Chru JĂNG 12

Yàng Jêsu Hũ Lŭ Mơñà Tơ 'Bethani

(Mathiơ 26:6-13; Mak 14:3-9)

1 Năm hơrơi dơlhơu tơ pơnuaĭ pơjŭm 'bơ̆ng Nau-Găn, Yàng Jêsu truh tơ 'Bethani, plơi Lasarơ dò, la mơnih Pô hũ ngă hơdiŭ wơ̆ mư̆ng pơnuaĭ mơtai. 2 Buơl guñu pồ pơnuaĭ huă 'bơ̆ng tơ Yàng Jêsu tơ anih nư̆n. Mathe duh bruă, dò Lasarơ la sa aràng lăm du mơnih dò guh huă 'bơ̆ng găm sơ̆ng Pô. 3 Mari mă sa khàr mơñà 'bơu bơlhơu sơ̆ng c̆ơk-màng biă, lŭ tơkai Yàng Jêsu, sơ̆ng mă 'bù drơi bloh uă. Abih sa boh sàng 'bơu bơlhơu mơñà nư̆n. 4 Bloh Juđa Iskariôt, la sa aràng lăm du mơnih tui-mơgru Yàng Jêsu, mơnih hơdơi ni pơblơ̆-dră Pô, đờm lài: 5 “Kơđa hơgĕ 'buh pơblơi mơñà 'bơu bơlhơu nư̆n mă klơu rơtùh đơnie tô dŏng brơi-soh tơ mơnih rơ'bah?” 6 Ñu đờm yơu nư̆n, 'buh iơŭ kơyoa ñu sơnư̆ng-anĭt hơgĕ truh tơ mơnih rơ'bah, bloh kơyoa ñu la sa aràng mơnih klĕ blơ̆, sơ̆ng kŭng la mơnih pioh kơdŭng priă, nư̆n ñu jiăng klĕ mă priă aràng daŭ lăm nư̆n tô angui krơi tơ rùp-phŭn drơi. 7 Yàng Jêsu đờm: “Luơi bĕ ñu kơđơ̆ng, kơyoa ñu hũ pioh mơñà 'bơu bơlhơu ni tơ hơrơi dơ̆r rùp Kơu! 8 Kơyoa buơl guhã jiăng hũ mơnih rơ'bah dò sơ̆ng drơi mĭt, bloh buơl guhã 'buh hũ Kơu mĭt ơu!”

9 Sa tơrpuơl lô mơnih Juđa thơu Yàng Jêsu dò tơ anih nư̆n, buơl guñu ba gơŭ truh, 'buh iơŭ mĭn kơyoa buơl guñu khiăng 'buh Yàng Jêsu soh, bloh kŭng tô c̆ơ Lasarơ, la mơnih bloh Pô hũ ngă hơdiŭ wơ̆ mư̆ng pơnuaĭ mơtai. 10 Du mơnih gơnuăr apăn-akŏ pơyă phơ̆n duh-dơlbăt 'buh yơu nư̆n, buơl guñu ngă-nìn rơŭ pơmơtai găm Lasarơ rơi. 11 Kơyoa mư̆ng bruă Lasarơ hơdiŭ wơ̆ bloh lô mơnih Juđa luơi buơl guñu sơ̆ng păng-tui Yàng Jêsu.

Yàng Jêsu Tơma Lăm Plơi-Prŏng Jerusalem

(Mathiơ 21:1-11; Mak 11:1-11; Luka 19:28-40)

12 Hơrơi hơdơi, hũ sa tơrpuơl lô buơl làng truh tô pơjŭm 'bơ̆ng. Tŭ mơhư̆ thơu Yàng Jêsu truh tơ plơi-prŏng Jerusalem, 13 nư̆n buơl guñu mă sơla guăl, tơbiă nau rò Pô, sơ̆ng driau prŏng lài: “Hôsana! Lơngai-pơtuah tơ Pô mă angăn Yàng bloh truh, la Pơtau buơl làng Israel.”* 14 Yàng Jêsu duah hũ sa drơi alàng anà, Pô đì tơ ngŏ, iơŭ yơu pơnuaĭ hũ wă:

15 “Ơ anà kơmơi Siôn, juơi huơĭ!

Dih, pơtau hã truh, đì tơ ngŏ alàng anà!” †

16 Tŭ c̆ơmrừp, du mơnih tui-mơgru Pô 'buh wờng tơgrơ̆ pơnuaĭ nư̆n, bloh hơdơi tŭ Yàng Jêsu hũ màng-kơc̆rà bơjơ, buơl guñu sơdơ̆r wơ̆ du pơnuaĭ nư̆n hũ wă mư̆ng Pô, sơ̆ng buơl làng hũ ngă tơ Pô iơŭ yơu nư̆n. 17 Tơrpuơl mơnih hũ dò sơ̆ng Yàng Jêsu tŭ Pô iơu Lasarơ tơbiă mư̆ng kŭt atơu, sơ̆ng ngă tơ ñu mư̆ng pơnuaĭ mơtai hơdiŭ wơ̆, nau ngă grơh lăm abih tơgrơ̆ anih. 18 Kơyoa hơgĕ buơl làng ba gơŭ tơbiă nau rò Pô, la kơyoa buơl guñu mơhư̆ thơu Pô hũ ngă nàl-c̆rih nư̆n. 19 Kơyoa nư̆n, du mơnih Pharisi đờm sơ̆ng gơŭ: “Buơl guhã 'buh jơ, buơl gudrơi 'buh ngă hơgĕ jiơ̆ng ơu! C̆ơ dih, abih buơl làng plơi-lơgăr đuaĭ tui ñu!”

Mơnih Grek Duah Yàng Jêsu

20 Tŭ nư̆n, lăm du mơnih đì tơ Jerusalem duh-dơlbăt Yàng lăm pơnuaĭ pơjŭm 'bơ̆ng Nau Găn, hũ du mơnih Grek. 21 Du mơnih ni truh tòm Philip, la mơnih plơi-prŏng 'Betsaiđa, c̆àr Galile, sơ̆ng đờm lài: “Ơ kơi, buơl dơlhă khiăng tòm Yàng Jêsu.” 22 Philip nau đờm sơ̆ng Andre; bloh nư̆n Andre sơ̆ng Philip truh đờm sơ̆ng Yàng Jêsu. 23 Yàng Jêsu đờm: “Jơ Anà Mơnih hũ màng-kơc̆rà hũ truh bơjơ! 24 Iơŭ biă, iơŭ biă, Kơu đờm sơ̆ng buơl guhã: Yah găr bơdai dih, 'buh mơtai hơdơi tŭ drà trŭn lăm lơ̆n, nư̆n ñu sơđaŭ mĭn la sa găr soh; bloh yah ñu mơtai, nư̆n tơbiă phŭn-hơjŭng hũ lô. 25 Aràng sơi rơnăm pơnuaĭ hơdiŭ drơi nư̆n rơŭ lơhiă, aràng sơi mơbai pơnuaĭ hơdiŭ drơi lăm rài ni, nư̆n rơŭ păng-rơmiă wơ̆ tơ pơnuaĭ hơdiŭ rài pơdò rài. 26 Yah aràng sơi duh-bruă Kơu, nư̆n păl tui Kơu; sơ̆ng Kơu dò anih lơi, mơnih duh-bruă Kơu kŭng rơŭ dò anih nư̆n. Yah aràng sơi duh-bruă Kơu, nư̆n rơŭ hũ Ama Kơu c̆ơ prŏng-màng.”

27 “Tŭ ni bơngă-joa Kơu dơnuh-dơnà biă. Kơu rơŭ đờm hơgĕ ni? ‘Ơ Ama, yòng dŏng anà klàh mư̆ng jơ ni! Bloh kŭng kơyoa mư̆ng jơ ni bloh Anà hũ truh. 28 Ơ Ama, yòng ngă màng-kơc̆rà angăn Ama!’ ”

Tŭ nư̆n hũ săp mư̆ng ngŏ lơngì đờm lài: “Kơu hũ ngă màng-kơc̆rà bơjơ, sơ̆ng Kơu rơŭ ngă màng-kơc̆rà wơ̆!”

29 Mơhư̆ săp nư̆n, buơl làng dò dơ̆ng tơ anih nư̆n đờm lài: “Nư̆n la săp grơ̆m.” Du mơnih pơkơ̆n wơ̆ đờm: “Nư̆n la sa aràng mơnih gơdrưh đờm glai sơ̆ng Pô.” 30 Yàng Jêsu đờm: “'Buh iơŭ kơyoa Kơu bloh săp nư̆n hũ dơlờng trŭn ơu, bloh la kơyoa buơl guhã. 31 Tŭ ni la tŭ dun-ya kơđòng c̆ahrơña, sơ̆ng Satăn, la mơnih apăn-akŏ dun-ya ni rơŭ kŏng prơh tơbiă tơ agàh. 32 Pơ-ơnah Kơu, tŭ Kơu hũ yuăl tơ ngŏ kơyơu pơkăl, Kơu rơŭ kơtŭng tơgrơ̆ mơnih truh sơ̆ng Kơu.” 33 Pô đờm yơu nư̆n tô pơto brơi thơu Pô rơŭ păl mơtai hơyơu lơi. 34 Tơrpuơl buơl làng đờm lài: “Buơl dơlhă hũ mơhư̆ pơnuaĭ adăt-adia đờm Pô Krist rơŭ dò rài pơdò rài. Nư̆n kơđa hơgĕ Pô-Pơto đờm Anà Mơnih păl kơđòng yuăl tơ ngŏ? Anà Mơnih nư̆n la aràng sơi?” 35 Yàng Jêsu đờm: “Pơnuaĭ sơrdah mĭn dò sơ̆ng buơl guhã sa-sĭt suơi tra soh. Nau bĕ lăm tŭ buơl guhã dò hũ pơnuaĭ sơrdah, huơĭ lài pơnuaĭ kơnăm-mơsrư̆ mơre-mơro gơrwàng-jơ̆m buơl guhã. Mơnih lơi nau lăm pơnuaĭ kơnăm-mơsrư̆, nư̆n 'buh thơu drơi nau anih lơi. 36 Lăm tŭ buơl guhã dò hũ pơnuaĭ sơrdah, păng-tui bĕ lăm pơnuaĭ sơrdah, tô buơl guhã tơbiă jiơ̆ng du anà pơnuaĭ sơrdah.”

Hơdơi tŭ đờm yơu nư̆n, Yàng Jêsu nau, sơ̆ng pleh mơta 'buh brơi buơl guñu 'buh.

Mơnih Juđa Kră-Khăng Hơtai-Hơtiàn 'Buh Khiăng Păng-Tui

37 Yah lài Yàng Jêsu hũ ngă lô nàl-c̆rih tơ anaŭ buơl guñu, bloh buơl guñu sơđaŭ 'buh păng-tui Pô. 38 Yơu nư̆n la tơbiă iơŭ yơu pơnuaĭ mơnih gơnuăr-hwơ̆r Êsai hũ đờm dơlhơu lài:

“Khoai Yàng, aràng sơi hũ păng-tui pơnuaĭ buơl dơlhă pơto-akhàn,

Sơ̆ng tơngàn Yàng hũ ràng-tơbiă tơ aràng sơi?” ‡

39 Kơyoa nư̆n buơl guñu 'buh rơgơi păng-tui, kơyoa Êsai kŭng hũ đờm:

40 “Yàng hũ ngă tơ mơta buơl guñu bồm,

Hơtai-hơtiàn buơl guñu kră-khăng,

Huơĭ mơta buơl guñu 'buh,

Hơtai-hơtiàn buơl guñu wờng jiơ̆ng, bloh gài pơsơlih wơ̆,

Sơ̆ng Kơu rơŭ pơsồ-pơsaih tơ buơl guñu.”§

41 Êsai đờm pơnuaĭ ni, kơyoa hũ 'buh pơnuaĭ màng-kơc̆rà Pô sơ̆ng đờm mư̆ng Pô. 42 Yah lài yơu nư̆n, sơđaŭ hũ lô mơnih lăm tơrpuơl gơnuăr apăn-akŏ buơl làng Juđa păng-tui Pô, bloh buơl guñu 'buh khĭn akhàn tơbiă angăn Pô, kơyoa buơl guñu huơĭ du mơnih Pharisi rơŭ prơh buơl guñu tơbiă mư̆ng sàng pơtòm. 43 Kơyoa buơl guñu ư̆ng-tơkrư pơnuaĭ màng-kơc̆rà truh mư̆ng jơi anà mơnih rơlau la pơnuaĭ màng-kơc̆rà truh mư̆ng Yàng Pô Lơngì.

44 Yàng Jêsu prŏng săp đờm lài: “Aràng sơi păng-tui Kơu, 'buh iơŭ mĭn păng-tui Kơu, bloh păng-tui Pô hũ pơđăr Kơu. 45 Aràng sơi 'buh Kơu nư̆n la 'buh Pô hũ pơđăr Kơu. 46 Kơu la pơnuaĭ sơrdah hũ truh lăm dun-ya, tô aràng sơi păng-tui Kơu rơŭ 'buh dò lăm pơnuaĭ kơnăm-mơsrư̆. 47 Yah aràng sơi păng pơnuaĭ Kơu, bloh 'buh păng-rơmiă ngă tui, nư̆n 'buh iơŭ Kơu c̆ahrơña mơnih nư̆n. Kơyoa Kơu truh 'buh iơŭ tô c̆ahrơña dun-ya, bloh tô dŏng-pơklàh dun-ya. 48 Mơnih lơi kơmlah-luơi Kơu, 'buh đồ-mă pơnuaĭ Kơu, nư̆n hũ mơnih gơnuăr c̆ahrơña bơjơ; rùp-phŭn tơgrơ̆ pơnuaĭ Kơu đờm rơŭ c̆ahrơña mơnih nư̆n lăm hơrơi luĭ-dŭt. 49 Kơyoa Kơu 'buh iơŭ mư̆ng rùp-phŭn drơi đờm tơbiă, bloh la rùp-phŭn Ama, Pô hũ pơđăr Kơu truh, hũ brơi pơnuaĭ gơnuăr-pơđăr tơ Kơu păl đờm pơnuaĭ hơgĕ sơ̆ng pơto-akhàn pơnuaĭ hơgĕ. 50 Sơ̆ng Kơu thơu: pơnuaĭ gơnuăr-pơđăr Pô la pơnuaĭ hơdiŭ rài pơdò rài. Kơyoa nư̆n, tơgrơ̆ pơnuaĭ Kơu đờm, la đờm iơŭ yơu pơnuaĭ Ama hũ kơkơi pơđăr.”

*12:13 12:13 Pơđik Adoh Mơyòm 118:25,26.

†12:15 12:15 Sac̆ari 9:9.

‡12:38 12:38 Êsai 53:1.

§12:40 12:40 Êsai 6:10.