Chru PƠH-TƠBIĂ PƠNUAĬ TƠRĐƠŬ 8

Abo Anà Pơh 'Băng-Kì Tơjuh

1 Tŭ Abo Anà pơh 'băng-kì tơjuh, tơ ngŏ lơngì dò kơđơ̆ng-rik pơgăp mơtưh jơ. 2 Dơlhă 'buh tơjuh aràng mơnih gơdrưh dò dơ̆ng tơ anaŭ Yàng Pô Lơngì, sơ̆ng buơl guñu hũ brơi tơjuh 'bĕ kơlwờk. 3 Sa aràng mơnih gơdrưh pơkơ̆n truh dò dơ̆ng tơ anaŭ sơbàn duh-dơlbăt, tơngàn apăn sa boh blŏ mừh daŭ gơlhơu. Mơnih gơdrưh ni hũ brơi lô gơlhơu, tô pơyă gơlhơu găm sơ̆ng tơgrơ̆ pơnuaĭ iơu-lài du mơnih sơc̆ih-sri tơ ngŏ sơbàn duh-dơlbăt sơ̆ng mừh, dò tơ anaŭ sơbàn. 4 Asă gơlhơu mư̆ng tơngàn mơnih gơdrưh, găm sơ̆ng tơgrơ̆ pơnuaĭ iơu-lài du mơnih sơc̆ih-sri, pơ̆r đì tơ anaŭ Yàng Pô Lơngì. 5 Hơdơi mư̆ng nư̆n, mơnih gơdrưh apăn blŏ gơlhơu, mă apui anih sơbàn duh-dơlbăt daŭ baŭ lăm blŏ sơ̆ng prah trŭn tơ ala lơ̆n, nư̆n hũ du săp grơ̆m-kơtàl, săp dơnài-dơlờng, c̆ă-kơrla sơ̆ng tơtuơ̆n-jơrlơh lơ̆n-tơnah.

Tơjuh Săp Kơlwờk

6 Tơjuh aràng mơnih gơdrưh apăn tơjuh 'bĕ kơlwờk rơc̆ăng lờih tô blùh.

7 Mơnih gơdrưh c̆ơmrừp blùh kơlwờk, nư̆n hũ hơjàn pơlia sơ̆ng apui, pơc̆ă găm sơ̆ng drah tuh trŭn tơ ala lơ̆n. Sa pơ-ơnah klơu boh tơnah kơđòng apui 'bơ̆ng abih; sa pơ-ơnah klơu jơi phŭn kơyơu kơđòng apui 'bơ̆ng; sơ̆ng abih tơgrơ̆ jơi rơ̆ mơtah kơđòng apui 'bơ̆ng abih.

8 Mơnih gơdrưh dua blùh kơlwờk, nư̆n hũ phơ̆n hơgĕ mơhiơ̆ yơu sa boh c̆ơ̆ prŏng apui dò 'bơ̆ng gùh kơđòng prah trŭn lăm ia-tơsì. Sa pơ-ơnah klơu ia-tơsì tơbiă jiơ̆ng drah, 9 sa pơ-ơnah klơu du jơi-phơ̆n hơdiŭ lăm ia-tơsì mơtai abih, sơ̆ng sa pơ-ơnah klơu du ahò kŭng kơđòng pơluĭ-pơlơhiă abih.

10 Mơnih gơdrưh klơu blùh kơlwờk, nư̆n sa boh ia-pơtŭ prŏng 'bơ̆ng gùh yơu apui sơnuh mư̆ng ngŏ lơngì lĕ trŭn. Ia-pơtŭ nư̆n lĕ iơŭ lăm sa pơ-ơnah klơu du ia sơdờng sơ̆ng du c̆roh ia. 11 Angăn ia-pơtŭ nư̆n la Kơyơu-Phì. Sa pơ-ơnah klơu ia tơbiă jiơ̆ng phì, sơ̆ng lô mơnih mơtai kơyoa ia nư̆n, kơyoa ia hũ tơbiă jiơ̆ng phì.

12 Mơnih gơdrưh pà blùh kơlwờk, nư̆n sa pơ-ơnah klơu ia-hơrơi, sa pơ-ơnah klơu ia-blàn sơ̆ng sa pơ-ơnah klơu du ia-pơtŭ kơđòng pờng iơŭ, ngă tơ sa pơ-ơnah klơu guñu tơbiă jiơ̆ng kơnăm. Sa pơ-ơnah klơu glai hơrơi 'buh hũ pơnuaĭ sơrdah, sơ̆ng glai mơlăm kŭng yơu nư̆n rơi.

13 Bloh nư̆n dơlhă c̆ơ 'buh, sơ̆ng mơhư̆ sa drơi c̆ĭm klàng-kră,* pơ̆r tơkrah lơngì, driau prŏng săp lài: “Gleh-glăr dồn-să biă! Gleh-glăr dồn-să biă! Gleh-glăr dồn-să biă tơ du buơl làng hơdiŭ lăm lơ̆n-tơnah, kơyoa săp kơlwờk bloh klơu aràng mơnih gơdrưh tra rơŭ blùh.”

*8:13 8:13 C̆ĭm klàng prŏng. (Kơho: klàng-bŭng).