Chru PƠH-TƠBIĂ PƠNUAĬ TƠRĐƠŬ 21

Lơngì Bơrhơu Tơnah Bơrhơu – Plơi-Prŏng Jerusalem Bơrhơu

1 Tŭ nư̆n dơlhă 'buh lơngì bơrhơu tơnah bơrhơu; kơyoa lơngì c̆ơmrừp sơ̆ng tơnah c̆ơmrừp hũ lơhiă bơjơ, sơ̆ng ia-tơsì kŭng 'buh dò tra.

2 Dơlhă kŭng 'buh plơi-prŏng sơc̆ih-sri la Jerusalem bơrhơu, mư̆ng anih Yàng Pô Lơngì tơ ngŏ lơngì bloh trŭn, rơc̆ăng lờih yơu mơnih sơdiŭ bơrhơu pơrpa khiăng srơh pơmơkrư rùp tơ pơsàng drơi. 3 Dơlhă mơhư̆ sa săp prŏng mư̆ng anih sơbàn đờm lài: “Dih, sàng Yàng Pô Lơngì dò tơkrah jơi anà mơnih! Pô rơŭ dò sơ̆ng buơl guñu, sơ̆ng buơl guñu rơŭ ngă buơl làng Pô, rùp-phŭn Yàng Pô Lơngì rơŭ dò sơ̆ng buơl guñu. 4 Pô rơŭ uă goh abih ia-mơta klàh mư̆ng mơta buơl guñu. Rơŭ 'buh hũ pơnuaĭ mơtai, kŭng 'buh hũ pơnuaĭ hia-c̆ŏ, să-joa wờl lồk, halài pơđì-pơđoa tra; kơyoa tơgrơ̆ pơnuaĭ c̆ơmrừp hũ lơhiă abih bơjơ.”

5 Pô dò guh tơ ngŏ sơbàn đờm: “Ni, Kơu rơŭ ngă bơrhơu wơ̆ abih tơgrơ̆ mơta.” Pô đờm wơ̆: “Wă bĕ, kơyoa tơgrơ̆ pơnuaĭ ni la iơŭ păl păng-tui sơ̆ng tơpă-tơpe.” 6 Bloh nư̆n Pô đờm sơ̆ng dơlhă: “Tơl-wĭl abih bơjơ! Kơu la Alpha sơ̆ng Ômega, la Dơlhơu-C̆ơmrừp sơ̆ng Luĭ-Dŭt. Mơnih lơi mơhau, Kơu rơŭ brơi mơñŭm ia mư̆ng c̆roh ia pơnuaĭ hơdiŭ, bloh 'buh păl c̆iŭ priă. 7 Mơnih lơi pha-jai rơlau rơŭ đồ-mă hũ tơgrơ̆ pơnuaĭ lơngai-pơtuah nư̆n. Kơu rơŭ la Yàng Pô Lơngì mơnih nư̆n, sơ̆ng mơnih nư̆n rơŭ la anà Kơu. 8 Dò du mơnih huơĭ 'buh hĭl-dơmĭl, mơnih 'buh păng-tui, mơnih ngă du pơnuaĭ mơsak-jơhà, mơnih pơmơtai mơnih, mơnih ngă glài dri-sơnoh bŭng-pơkăl, mơnih gru-pơjơu, mơnih duh-dơlbăt rùp-ràk, sơ̆ng abih tơgrơ̆ mơnih đờm lơ̆r, nư̆n pơ-ơnah pioh tơ guñu la rơhồng-apui sơ̆ng sieu-apui 'bơ̆ng gùh. Nư̆n la pơnuaĭ mơtai amăng dua.”

9 Sa aràng lăm tơjuh aràng mơnih gơdrưh hũ apăn tơjuh boh pơtĭl daŭ baŭ tơjuh pơnuaĭ rŭng-rài luĭ-dŭt, truh đờm sơ̆ng dơlhă lài: “Truh bĕ, kơu rơŭ pơto tơ hã 'buh mơnih Mơrtơu-Kơmơi, la Sơdiŭ Abo Anà.”

10 Mơnih gơdrưh nư̆n ba dơlhă nau lăm Bơngă Sơc̆ih-Sri, truh tơ sa boh c̆ơ̆ prŏng biă sơ̆ng glòng biă, bloh nư̆n pơto tơ dơlhă 'buh plơi-prŏng sơc̆ih-sri, la Jerusalem, mư̆ng ngŏ lơngì, mư̆ng anih Yàng Pô Lơngì bloh trŭn, 11 sơrdah kơc̆rà pơnuaĭ màng-kơc̆rà Yàng Pô Lơngì. Pơnuaĭ sơrdah kơc̆rà plơi-prŏng nư̆n mơhiơ̆ yơu sa găr pơtơu c̆ơk-màng, yơu pơtơu c̆ơk-màng pơtih-sơrdah, sơrdah yơu krơh. 12 Plơi-prŏng hũ thĕng-bơga prŏng sơ̆ng glòng; plơi-prŏng hũ sa-pluh dua bơh 'băng prŏng, yàu bơh 'băng prŏng hũ sa aràng mơnih gơdrưh kraŭ-khiă, sơ̆ng tơ ngŏ du bơh 'băng prŏng hũ wă mơta sa-pluh dua jơi-pơtiàn anà-tơc̆o Israel. 13 Gah ia-hơrơi tơgồ hũ klơu bơh 'băng prŏng, gah ngŏ hũ klơu bơh 'băng prŏng, gah yù hũ klơu bơh 'băng prŏng, sơ̆ng gah ia-hơrơi tơma hũ klơu bơh 'băng prŏng. 14 Thĕng-bơga plơi-prŏng hũ bơ̆ tơ ngŏ sa-pluh dua boh rơnơ̆, sơ̆ng tơ ngŏ du rơnơ̆ nư̆n hũ wă mơta sa-pluh dua aràng mơnih tơdi-tơdài Abo Anà.

15 Mơnih gơdrưh dò đờm glai sơ̆ng dơlhă apăn sa 'bĕ gai dŭ, la sa 'bĕ gai pơrbo sơ̆ng mừh, tô dŭ plơi-prŏng, tơgrơ̆ bơh 'băng prŏng sơ̆ng thĕng-bơga plơi-prŏng. 16 Plơi-prŏng hũ pà gah rĭng sơ̆ng gơŭ, gah atàh sơ̆ng gah lơnàng rĭng kàr gơŭ. Mơnih gơdrưh dŭ plơi-prŏng sơ̆ng gai pơrbo, sơ̆ng plơi-prŏng dŭ hũ dua rơbơu pà rơtùh kơsồ; * gah atàh, gah lơnàng sơ̆ng gah glòng kŭng kàr gơŭ. 17 Mơnih gơdrưh kŭng dŭ thĕng-bơga plơi-prŏng. Thĕng-bơga kơpàl pơgăp năm pluh năm met, † tui gai dŭ jơi anà mơnih, kŭng la gai dŭ mơnih gơdrưh. 18 Thĕng-bơga bơ̆ sơ̆ng pơtơu-màng sơrdah angăn la pơtơu jasper, dò plơi-prŏng nư̆n bơ̆ sơ̆ng mừh biă, sơrdah yơu krơh. 19 Du rơnơ̆ thĕng-bơga plơi-prŏng hũ ngă mơkrư sơ̆ng tơ̆l abih tơgrơ̆ mơta pơtơu c̆ơk-màng. Rơnơ̆ sa sơ̆ng pơtơu-màng sơrdah angăn la pơtơu jasper, rơnơ̆ dua sơ̆ng pơtơu-màng mơtah lơngì angăn la pơtơu saphir, rơnơ̆ klơu sơ̆ng pơtơu-màng kĕ mơr-yah angăn la pơtơu agat, rơnơ̆ pà sơ̆ng pơtơu-màng mơtah sơla rơ̆ angăn la pơtơu emerôt, 20 rơnơ̆ lơma sơ̆ng pơtơu-màng kĕ-sơrdah angăn la pơtơu onis, rơnơ̆ năm sơ̆ng pơtơu-màng kò-sơrdah angăn la pơtơu karnelion, rơnơ̆ tơjuh sơ̆ng pơtơu-màng mơtah-sơrdah angăn la pơtơu krisôlit, rơnơ̆ tơlpăn sơ̆ng pơtơu-màng mơtah-ia angăn la pơtơu beril, rơnơ̆ sơlpăn sơ̆ng pơtơu-màng sơrdah mơr-yah angăn la pơtơu tôpas, rơnơ̆ sa-pluh sơ̆ng pơtơu-màng kơc̆rà-sơrdah angăn la pơtơu krisôpras, rơnơ̆ sa-pluh sa sơ̆ng pơtơu-màng mơr-yah kò angăn la pơtơu hiasin, rơnơ̆ sa-pluh dua sơ̆ng pơtơu-màng kơñì-sơrdah angăn la pơtơu ametis. 21 Sa-pluh dua bơh 'băng prŏng ngă sơ̆ng sa-pluh dua găr pơtơu c̆ŭng c̆ơk-màng, yàu bơh 'băng mĭn ngă sơ̆ng sa boh pơtơu-màng soh. Jơlàn lăm plơi-prŏng ngă sơ̆ng mừh biă, sơrdah yơu krơh. 22 Lăm plơi-prŏng, dơlhă 'bu 'buh hũ sàng duh-dơlbăt, kơyoa Yàng la Yàng Pô Lơngì Gơnăp-Gơnuăr Wĭl-Tơ̆l sơ̆ng Abo Anà la sàng duh-dơlbăt plơi-prŏng. 23 Plơi-prŏng 'buh c̆àng ia-hơrơi halài ia-blàn pơsàng sơrdah, kơyoa pơnuaĭ màng-kơc̆rà Yàng Pô Lơngì pơsàng sơrdah plơi-prŏng, sơ̆ng Abo Anà la apui đèng plơi-prŏng. 24 Tơgrơ̆ buơl làng lăm dun-ya rơŭ nau mơrai gơnừm tơ pơnuaĭ sơrdah plơi-prŏng; tơgrơ̆ pơtau lăm dun-ya rơŭ apăn pơnuaĭ màng-kơc̆rà drơi tơma lăm nư̆n. 25 Tơgrơ̆ bơh 'băng plơi-prŏng luĭ hơrơi 'buh tŭ lơi kơdrơ̆, kơyoa tơ anih nư̆n 'buh hũ glai mơlăm. 26 Aràng rơŭ apăn pơnuaĭ màng-kơc̆rà sơ̆ng pơnuaĭ mơda gơn-hư̆p tơgrơ̆ buơl làng tơma lăm nư̆n. 27 Abih tơgrơ̆ mơnih sơŭ-sơnoh, mơnih ngă pơnuaĭ sơŭ-ngkòr, mơnih đờm lơ̆r, 'buh hũ tơma lăm plơi-prŏng. Bloh mĭn du mơnih hũ mơta wă lăm 'bồn bơ-àr pơnuaĭ hơdiŭ Abo Anà nư̆n ka hũ tơma.

*21:16 21:16 12.000 Stadia.

†21:17 21:17 144 kubits.