Nau Ntơm
Nau bôk ăn bu gĭt lor
Nơm i nchih samƀŭt dja, bu mân lah jêng Môsê (NVa 31:9, 24; Mar 7:10). Bu mân lah păng nchih samƀŭt i dja, nôk phung Israel brô̆ rŏ bri rdah, klăp lah ta năm 1446-1406 ê lor ma Brah Krist deh. Nau ngơi ơm ta samƀŭt dja jêng nau ngơi Hêbrơ, kơt ma bơi dâng lĕ nau ta nau tâm rnglăp ơm.
Samƀŭt Nau Ntơm ta Nau Kôranh Brah Ngơi, mbơh nkoch ntơm njêng trôk njêng neh ntu, ntơm geh bunuyh ta neh ntu, ndrel ma ntơm geh phung ƀon lan Israel i ƀon lan Kôranh Brah nơm. Samƀŭt dja mbơh nkoch ma ntơm geh nau tih ta bunuyh, ndrel ma nau mbơh nkoch ma Kôranh Brah ntơm chuai bunuyh bơh nau tê̆ dôih yor ma nau tih khân păng jan.
Nau nti aƀă ta samƀŭt dja
Samƀŭt Nau Ntơm dja leo bunuyh ăn gĭt năl nau dăng nau dơi Kôranh Brah nơm. Bơh ntơm saơm saam, Păng lĕ njêng trôk, njêng neh ntu, ndrel ma ăn geh dâng lĕ ndơ ta neh ntu dja, jêh ri dâng lĕ ntil ndơ ta neh ntu dja gŭ ta nâm nau dơi Kôranh Brah nơm. Tih ma bunuyh tŏl nguai mâu iăt nau đă Kôranh Brah nơm (NNt 3:1-6), ndri dâng geh nau tih tưp dâng lĕ bunuyh ta neh ntu dja. Jêh ri Kôranh Brah đă bunuyh ăn jan brah nkhât mpômpa, gay ma chuai khân păng bơh nau tê̆ dôih nkhât khân păng yor ma nau tih i nây, jêh ri Kôranh Brah jan nau tâm rnglăp ndrel ma bunuyh aƀă. Kôranh Brah jan nau tâm rnglăp nây đah Ađăm (NNt 1:26-30; 2:15-17; 3:15), đah Nôê (NNt 9:11), nđâp ma đah Abrahăm (NNt 12:1-3). Nau tâm rnglăp đah Ađăm, ndrel ma nau tâm rnglăp đah Nôê, jêng nau tâm rnglăp đah ma dâng lĕ bunuyh jât năp tay. Ta nau tâm rnglăp đah Abrahăm i nây, Kôranh Brah ton ma păng, ăn nau geh jêng ma păng, ăn păng jêng du phung kuŏng, ndrel ma ăn geh nau geh jêng ma dâng lĕ phung bunuyh ta neh ntu dja tă bơh păng. Tă bơh nkô̆ 12 ta samƀŭt dja mbơh nkoch ma rnăk vâl Abrahăm, ndrel ma kon sau păng. Tât a kơi nau ton i nây geh ngăn ta Brah Yêsu Krist i rnoi deh Abrahăm, jêh ri dâng lĕ bunuyh i nsing ma Brah Yêsu Krist geh nau geh jêng tă bơh Kôranh Brah. Kêng lôch samƀŭt dja phung kon sau Abrahăm ê hŏ ôh jêng du phung kuŏng, yơn ma ta samƀŭt Nau Ngluh, nau ton dja lĕ geh ngăn.
Nau nti aƀă jât ta samƀŭt dja, nti ma nau Kôranh Brah dŭt geh nau dơi, nau rŏng Păng ma phung bunuyh, nau geh nau ŭch ntrŏng Păng ma phung bunuyh, nau răp jăp, nau sŏng Păng, ndrel ma nau Păng tê̆ dôih ma bunuyh jan tih, jêh ri rklaih bunuyh bơh nau tê̆ dôih yor ma nau yô̆ nđach Păng.
Mbơh nau khlay ta nkô̆ ta samƀŭt dja
1:1—11:32 nau ntơm trôk, ndrel ma neh ntu
1:1—2:3 nau njêng trôk, ndrel ma neh ntu
2:4—4:26 nau nkoch ma Ađăm, ndrel ma Êva, nau tih tŏl nguai, nau nkoch ma Kain, ndrel ma Êpĭl
5:1—10:32 nau nkoch ma Nôê, ndrel ma nau dak lêng dak dơng
11:1—11:32 nau nkoch ma ƀon Ƀaƀĭl
12:1—50:26 nau nkoch Kôranh Brah kuăl u che phung Israel ăn gĭt năl, ndrel ma yơk mbah ma Păng.
12:1—25:18 nau nkoch ma Abrahăm
21:1—35:29 nau nkoch ma Isăk i kon Abrahăm
25:19—37:1 nau nkoch ma Yakôp i sau Abrahăm, dâng geh tê̆ rnha «Israel». Yakôp geh 12 nuyh kon bu klô, i nây jêng geh 12 rnoi mpôl ta phung Israel.
37:2—50:26 nau nkoch ma Yôsep, jêng du huê ta 12 nuyh kon Yakôp nây.
1
Ntơm Kôranh Brah njêng neh ntu, ndrel ma dâng lĕ ntil ndơ
1 Bơh ntơm saơm saam Kôranh Brah njêng trôk, njêng neh ntu.*1:1-2: Yôp 26:7; 38; NMƠ 8; 33:6-9; 104; Yôh 1:1-4; KLê 1:15-17; Hêb 11:3; NTM 4:11; 21:1 2 Nôk nây nơh neh ntu ê hŏ geh ôh, hôm nsoyh bŏng lahưr, ngo chêk kôlăk ngăn ta bơh lơ dak jru, jêh ri Brah Huêng Ueh Kôranh Brah hăn rsong ta kalơ dak ri.
3 Jêh ri Kôranh Brah lah: “Ăn geh ang” jêh ri geh ang ngăn ro.*1:3: 2Kô 4:6 4 Kôranh Brah say ang i nây lĕ ueh jêh, jêh ri Păng tâm nkhah lơi ang nây bơh ngo. 5 Kôranh Brah kuăl ang i nây rnha «Nar», jêh ri Păng kuăl đŏng ngo rnha «Măng», ta nây geh măng geh ôi, i nây jêng nar tŏl nguai.
6 Jêh ri Kôranh Brah lah: “Ăn geh du mlŏm rlat ta nklang n'gul dak gay ma tâm nkhah lơi dak”.*1:6: 2Pê 3:5 7 Ndri Kôranh Brah jan rlat i nây, gay ma tâm nkhah lơi dak bơh dŏng bơh lơ, jêh ri geh kơt i nây ngăn ro. 8 Jêh ri Kôranh Brah kuăl rlat i nây rnha «Trôk», ta nây geh măng geh ôi, i nây jêng nar tŏl bar.
9 Jêh ri Kôranh Brah lah: “Dak i ta nâm trôk i nây ăn nsŭn gŭ du ntŭk, gay ăn mpơl kơh” jêh ri geh kơt i nây ngăn ro. 10 Kôranh Brah kuăl kơh i nây rnha «Neh», kuăl dak nsŭn i nây rnha «Dak văch dak văr», Kôranh Brah say lĕ ndơ Păng njêng i nây ueh dadê jêh. 11 Jêh ri Kôranh Brah lah: “Ăn neh geh hon tơm si tơm gle rêp ja i geh n'găr, tơm si tơm gle i geh play i geh n'găr hon tă bơh neh, geh lĕ ntil tâng ntil êng êng” jêh ri geh kơt i nây ngăn ro. 12 Ta kalơ neh păng geh hon pru tơm si tơm gle rêp ja dâng lĕ ntil êng êng, ndrel ma tơm si tơm gle i geh play i geh n'găr. Kôranh Brah say lĕ ndơ Păng njêng i nây ueh dadê jêh. 13 Ta nây geh măng geh ôi, i nây jêng nar tŏl pe.
14 Jêh ri Kôranh Brah lah: “Ăn geh ndơ ang êng êng ta kalơ trôk, gay ma tâm nkhah lơi nar đah măng, ăn ma blao kơp nar, khay, năm 15 ndrel ma ang ta neh ntu dja đŏng” jêh ri geh kơt nây ngăn ro. 16 Ndơ ang Kôranh Brah lĕ jêh njêng geh ndơ ang kuŏng kuŏng bar mlŏm ta kalơ trôk, ndơ ang i du mlŏm ri dăng rlao bu ma ang nôk nar, ndơ ang đê̆ đê̆ ri ma ang nôk măng, n'ho ma Păng njêng đŏng dâng lĕ mănh mbing. 17 Kôranh Brah tê̆ ndơ ang ta kalơ trôk nây, gay ma ang ta neh ntu dja 18 ma ang ta nôk nar, ta nôk măng, gay ma tâm nkhah ang bơh ngo đŏng, Kôranh Brah say lĕ ndơ ang i nây ueh dadê jêh. 19 Ta nây geh măng geh ôi, i nây jêng nar tŏl puăn.
20 Jêh ri Kôranh Brah lah: “Ta trôm dak ăn geh kât ka n'gla me re ăn ŏk rŏk, ta kalơ trôk ăn geh siŭm mpăr đŏng”. 21 Ndri Kôranh Brah njêng ka kuŏng kuŏng ngăn rŏ dak văch dak văr, ndrel ma dâng lĕ ndơ i geh rêh geh n'hâm blao mpŏt blao nslŏng pâl re lĭnh vĭnh ta dak, tâng ntil êng êng ngăn, dâng lĕ siŭm nar geh tâng ntil êng êng đŏng. Kôranh Brah say dâng lĕ ndơ i nây ueh dadê jêh. 22 Jêh ri Kôranh Brah ăn nau geh jêng dâng lĕ ntil ndơ i nây, Păng lah: “Ăn geh oh geh kon bâk rơ̆ lam dak văch dak văr nây, siŭm nar ăn geh oh geh kon bâk rơ̆ ta neh ntu dja đŏng”. 23 Ta nây geh măng geh ôi, i nây jêng nar tŏl prăm.
24 Jêh ri Kôranh Brah lah: “Ta neh ntu dja ăn geh mpômpa (siŭm) tâng ntil êng êng, mpômpa (siŭm) ta ƀon, mpômpa (siŭm) hung vơr, mpômpa (siŭm) ta bri” jêh ri geh kơt nây ngăn ro. 25 Kôranh Brah njêng mpômpa (siŭm) ta bri, geh tâng ntil êng êng, mpômpa (siŭm) ta ƀon tâng ntil êng êng, dâng lĕ mpômpa (siŭm) i hung i vơr ta neh ntu dja geh tâng ntil êng êng đŏng, Păng say dâng lĕ ntil ndơ i nây ueh dadê jêh.
26 Jêh ri Kôranh Brah lah: “Ăn Bân jan kon bunuyh blao mân jêng kôranh tâm ban ma Bân Nơm kơt Bân Nơm, ăn păng kôranh ma neh ntu dja, dơi đah ma kât ka ta dak văch dak văr, siŭm mpăr ta kalơ trôk, mpômpa (siŭm) ta bri ta ƀon lam neh ntu, ndrel ma ăn păng dơi dadê đah dâng lĕ ntil ndơ hung ndơ vơr ta neh ntu dja”.*1:26: NMƠ 8:6-9; 1Kô 11:7
27 Kôranh Brah njêng kon bunuyh nơh blao mân jêng kôranh tâm ban ma Păng Nơm ngăn
Kơt Păng Nơm ngăn ro
Kôranh Brah njêng khân păng ăn geh bu klô geh bu ur.*1:27: 9:6; NNt 5:1-2; Mat 19:4; Mar 10:6; KLê 3:10
28 Jêh ri Kôranh Brah ăn nau geh jêng ma khân păng, Păng lah: “Ăn bă oh rong kon bâk rơ̆ lam neh ntu dja, ăn jêng kôranh ma neh ntu dja, jêh ri dơi đah ma kât ka ta dak văch dak văr, siŭm mpăr ta kalơ trôk, dơi đah dâng lĕ rngôch mpômpa (siŭm) i geh ta neh ntu dja”.*1:28: 9:7 29 Kôranh Brah lah jât: “Hơi khân ay may, uănh dja! Gâp njêng ăn geh dâng lĕ ntil rêp ja i geh n'găr hon lam neh ntu dja, ndrel ma dâng lĕ ntil tơm si tơm gle i geh play geh n'găr dja, gay ma ăn khân ay may sông sa*1:29: 9:2-3 30 jêh ri lĕ rngôch siŭm mpăr kalơ trôk, lĕ rngôch mpômpa (siŭm), dâng lĕ ntil ndơ hung ndơ vơr, dâng lĕ ntil ndơ i geh rêh geh n'hâm ta neh ntu dja, gâp ăn đŏng rêp ja tơm si tơm gle dâng lĕ ntil dja pre ma kăp ma sa đŏng” jêh ri păng geh kơt nây ngăn ro. 31 Kôranh Brah uănh dâng lĕ rngôch ndơ Păng njêng i nây nơh, Păng say dâng lĕ ntil ndơ Păng jan nơh, lĕ ueh ngăn ro, ta nây geh măng geh ôi, i nây jêng nar tŏl prao.*1:31: 1Ti 4:4