1 Nôk nây Yuđa du lôh bơh oh nô păng, hăn gŭ ndrel du huê bu klô ta ƀon Ađulam, rnha Hira. 2 Ta ntŭk nây păng say du huê bu ur drôh, kon Sua phung Kanan, păng sŏ bu ur nây jêng ur păng, gŭ ndrel păng.*38:2: 24:3-4 3 Jêh ri bu ur nây ntreo gŭ oh du huê kon bu klô, păng tê̆ rnha Êr. 4 Bu ur nây ntreo gŭ oh tay du huê kon bu klô jât, n'ho ma tê̆ rnha Ônan. 5 Jêh ri păng ntreo gŭ oh tay du huê kon bu klô jât, n'ho ma tê̆ rnha Sêla. Nôk păng gŭ oh i nây, Yuđa gŭ ta ƀon Kêsip ri.

6 Jêh ri tât Êr i kon bôk dak ri lĕ ndăm, Yuđa ôp ur ma păng, bu ur nây rnha Tamar. 7 Yơn ma Êr i kon bôk dak Yuđa jêng bunuyh djơh janh ta năp măt Brah Yêhôva, kơt ndri dâng Brah Yêhôva nkhât lơi păng. 8 Jêh ri Yuđa lah ma Ônan i oh Êr nây: “May sŏ mi may nây dô, jêng di ma nau vay bân, gŭ ndrel păng, gay ma hôm geh rnoi deh ma nô may”.*38:8: NVa 25:5-6 9 Yơn ma Ônan lĕ gĭt, lah geh kon nây mâu ôh kơp jêng kon păng nơm, kơt ndri nôk păng hăn gŭ đah mi păng nây, păng nglôh lơi dak păng a neh, gay ma lơi ăn geh kon ma nô păng. 10 Ndơ Ônan jan nây jêng djơh ta năp măt Brah Yêhôva, Brah Yêhôva nkhât lơi păng đŏng. 11 Jêh ri Yuđa lah ma Tamar i măn păng nây: “Ƀe sât gŭ ndrô ta jay bơ̆ ƀe ri ƀŏt, mpơ ma kuŏng Sêla kon gâp” yorlah păng klach i kon dŭt păng nây khât đŏng. Jêh ri Tamar sât gŭ a jay bơ̆ păng nơm.

12 Jŏ bơh kơi nây, i ur Yuđa kon Sua ri nơh khât. Tât Yuđa lĕ bah rngot nklŏn khât i ur nây, jêh ri păng hăn ta ƀon Thĭmna, hăn ndrel ma mât jăng păng rnha Hira bơh ƀon Ađulam, gay ma uănh bu koh rsau be biăp păng nơm. 13 Geh bu hăn mbơh ma Tamar: “Bơ̆ po ay hăn koh rsau be biăp păng nơm ta ƀon Thĭmna”. 14 Tăng lah kơt nây, păng drih lơi bok ao bu ur ndrô păng nơm ri, jêh ri păng sŏ bok put lơi muh măt păng nơm, mâu ôh ăn bu gĭt năl. Păng hăn gŭ a trong dăch kêng ƀon Ênaiim, jêng trong hăn ta Thĭmna ri. Păng jan kơt nây, yorlah păng say Sêla lĕ kuŏng, tih ma mâu ôh say Yuđa sŏ păng ăn ma jêng ur Sêla. 15 Dôl Yuđa say păng, Yuđa nđôn lah bu ur văng târ gay ma geh prăk, yorlah muh măt păng lĕ nkŭm lơi. 16 Jêh ri Yuđa hăn dăch ta bu ur nây, păng lah: “Hô̆! Hăn bêch ndrel gâp”. Păng mâu gĭt ôh lah bu ur nây măn păng nơm chrao. Bu ur nây ơh ma păng: “Lah gâp bêch đah may, moh ndơ may ăn ma gâp?”*38:16: KLê 18:15 17 Păng ơh: “Tay gâp ăn du mlŏm kon be ma ay”. Bu ur nây ơh: “Ơ gâp ŭch, lah ndri moh ndơ may nchăm ma gâp lor, gĭt jŏ may ăn kon be nây ma gâp?” 18 Păng lah: “Lah ndri moh ndơ ay ŭch gâp nchăm ăn ay?” Bu ur nây ơh: “Nây, may ăn tra may, nđâp ma i rse yông nây, ndrel ma ăn mŏng ta ti may nây ma gâp”. Yuđa ăn ndơ nây ma păng, jêh ri hăn bêch đah păng. Bu ur nây n'ho ma ntreo ma păng ro. 19 Jêh ri bu ur nây dâk sât, păng drih lơi bok nkŭm muh măt păng ri nơh, păng nsoh n'gut tay bok ao bu ur ndrô.

20 Nôk Yuđa ăn du mlŏm kon be ta mât jăng păng i tă bơh ƀon Ađulam, gay ma ăn mât jăng nây hăn chuai ndơ păng nchăm ta bu ur nây nơh, yơn ma mât jăng nây joi bu ur nây mâu say ôh. 21 Păng ôp bu ta nây: “Ah ntŭk gŭ bu ur văng târ gŭ ta meng trong lăp jât Ênaiim dja nơh?” Bu ơh: “Ta ntŭk dja mâu geh ôh bu ur văng târ”. 22 Jêh ri păng sât mbơh ăn ma Yuđa: “Gâp joi bu ur nây mâu say ôh, bu ta bri nây lah: «Ta ntŭk dja mâu geh ôh bu ur văng târ»”. 23 Yuđa lah ma păng: “Lah ndri ăn păng ndjôt kađôi ndơ gâp nchăm nây, lơi hôm joi, đit bu. Yorlah gâp lĕ ŭch ăn kon be ma păng kơt nau gâp lĕ ton, yơn ma may joi păng mâu say ôh”.

24 Tât pe khay bơh kơi nây, geh bu hăn mbơh ma Yuđa: “Tamar măn may bu ur văng târ, lĕ ntreo êng đah bu”. Yuđa lah: “Nglôh păng a dih dja, pur n'grêh păng ta ŭnh dôh!” 25 Tât bu leo păng lôh a dih dja, bu ur nây ngơi ma Yuđa bơ̆ po păng ri: “Gâp ntreo đah păng i tơm ndơ dja, lŏng may uănh, bre moh mŏng, tra, ndrel ma rse dja?” 26 Yuđa năl lĕ ndơ nây, jêh ri lah: “Ƀe sŏng rlao gâp ngăn, yorlah gâp mâu geh ăn ƀe ma Sêla ma jêng ur kon gâp”. Ntơm bơh nây Yuđa mâu hôm ôh bêch ndrel păng đŏng.

27 Tât bơi ăp khay gŭ oh, say ta trôm ndŭl păng ri geh kon bar. 28 Tât păng gŭ oh, geh i du huê lôh lor ti, jêh ri bunuyh ndjôt ndŭl nây sŏ rse brai gŭr kât ta ti oh bê ri, păng lah: “Kon dja ro lôh lor”. 29 Yơn ma oh bê nây păng rhuăt ti lăp jât trôm ri, i nô păng lôh lor. Bunuyh ndjôt ndŭl nây lah: “Mơm may dja chrao lôh lor” jêh ri bu tê̆ rnha kon nây, Pêrês, geh nau khlay lah «Mplŭng». 30 Jêh bơh nây lôh i oh ri jât, nđâp ma geh rse brai gŭr kât ta ti păng ri đŏng. Jêh ri bu tê̆ rnha kon nây «Seras», geh nau khlay lah «Trôk gŭr a ôi».