Yônais
Nau bôk ăn bu gĭt lor
Samƀŭt dja mbơh nkoch ma nau rêh Yônais i bunuyh ntơyh nau ngơi Kôranh Brah ta bri Israel mpeh bơh lơ, ta nôk phung Israel gŭ tâm nkhah bar ơ̆ bri dak. Bân mâu gĭt ôh păng nchih samƀŭt dja ma ti păng nơm, mâu lah bu êng nchih jŏ năm bơh kơi păng. Yônais gŭ rêh klăp lah ta năm 800-750 ê lor ma Brah Yêsu deh. Rnha păng geh nau khlay lah «Plŭk», ta samƀŭt Hôsê, Hôsê dŏng siŭm plŭk jêng rup ma bri Israel mpeh bơh lơ, yorlah bu kơp siŭm plŭk jêng dơh ngăn bu mƀrôh rlăm, jêng siŭm i mâu ôh geh nau mân, phung Israel kơt nđa đŏng (Hôsê 7:11).
Samƀŭt dja mbơh nkoch ma nau Yônais păng mâu ŭch jan tâng nau Kôranh Brah đă ma păng ôh. Kôranh Brah đă păng hăn ta ƀon Ninivê jêng ƀon i ngai bơh bri Israel, gay ma mbơh khân păng ăn rgâl lơi nuih n'hâm djơh, lah mâu rgâl Kôranh Brah lơh hêng lơi khân păng. Phung Israel kơp phung Ninivê jêng phung rlăng đah khân păng. Ƀon Ninivê i nây jêng mpeh bơh lôh nar, ndri dâng păng nchuăt du ŭch krap ăn ndŏp bơh Kôranh Brah, ncho duk hăn mpeh jât nhŏp nar.
Nau khlay ta samƀŭt dja nhhơ nau rŏng Kôranh Brah nơh, Păng mâu dơn rŏng ma phung ƀon lan Israel dơm ôh, Kôranh Brah rŏng ma dâng lĕ bunuyh lam neh ntu, bol lah mpômpa Păng yô̆, ndrel ma kơp khlay đŏng (Yônais 4:11). Kôranh Brah jêng sŏng, Păng phat dôih bunuyh tâng ndơ i khân păng jan, yơn ma dôl Kôranh Brah ŭch lơh ăn hêng lơi ma kon bunuyh yor ma nau tih khân păng nơh, lah bu rgâl mƀăr lơi nau tih djơh khân păng vay jan nây, lah ndri Kôranh Brah Păng mra rgâl lơi nau mân, Păng mâu hoch lơh hêng ma bu ôh. Kôranh Brah, Păng kôranh ma lĕ rngôch ndơ, jêh ri Păng jêng kôranh ma nau rêh, ndrel ma nau khât đŏng. Lah Kôranh Brah tê̆ dôih ŭch nkhât lơi, mâu lah rong rêh ma du huê bunuyh kađôi, lah ndri phung ƀon lan Păng nơm mâu di ji nuih ôh, lah say Kôranh Brah Păng yô̆ ma bunuyh tih i nây (Yônais 4:9-11). Bân nti đŏng, Kôranh Brah geh nau dơi ma sial, ma dak văch dak văr, nđâp ma mpômpa (Yônais 1:4; 2:1).
Ta samƀŭt dja bân say, geh nơm ntơyh nau ngơi Kôranh Brah, păng mâu ŭch ôh jan tâng nau Kôranh Brah đă, geh mâp ma nau jêr, nuih n'hâm mâu ueh, geh nau rlăch, tâm ban ma bunuyh aƀă êng i Kôranh Brah dŏng jan ndơ êng êng ma Păng đŏng. Kôranh Brah mâu ôh gơnh mƀăr phung ƀon lan Păng nơm. Kôranh Brah mâu ƀok gor đŏng ma phung ƀon lan Păng nơm du nchuăt ngai bơh Păng, Păng ŭch ntŭm hơi ntŭm jât.
Nau Kôranh Brah ndrăp nau rklaih ma dâng lĕ bunuyh
Samƀŭt Nau Kôranh Brah Ngơi ta nau tâm rnglăp mhe, Brah Yêsu sŏ nau nkoch ma Yônais ta samƀŭt dja, nau Yônais gŭ ta trôm ndŭl ka pe năng pe nar, jêng nau mbên ma nau Brah Yêsu nơm khât gŭ ta môch pe năng pe nar, jêh ri dâk rêh tay. Jêh ri Brah Yêsu nduih lah ma phung Israel ta rnôk Păng nây, yorlah khân păng i gĭt năl Kôranh Brah mâu ôh rgâl nuih n'hâm ta nau Păng ntŭm nti, ndrel ma ta ndơ dŭt nau ngăn i Păng jan, yơn ma phung Ninivê i mâu ôh gĭt năl Kôranh Brah, khân păng rgâl lơi nuih n'hâm yor ma nau Yônais nti (Mathay 12:38-42).
Mbơh nau khlay ta nkô̆ ta samƀŭt dja
1:1-16 Kôranh Brah đă Yônais hăn ta ƀon Ninivê, păng ncho duk kuŏng du nchuăt ta ntŭk êng, Kôranh Brah ăn geh sial phŭt, jêh ri bu nklăch Yônais ta dak văch dak văr.
2:1-11 Kôranh Brah ăn du mlŏm ka kuŏng rnguăn Yônais, Yônais rgâl nuih n'hâm, jêh ri mbơh sơm ma Kôranh Brah, jêh ri ka i nây hok nglôh păng a kơh.
3:1-10 Yônais hăn ta ƀon Ninivê, phung ƀon Ninivê rgâl nuih n'hâm.
4:1-11 Yônais tâm rlăch đah Kôranh Brah.
1
Yônais nchuăt du bơh Brah Yêhôva
1 Bơh kăl e nơh geh du huê bu klô rnha Yônais i kon Amithai. Tât du nar ri Brah Yêhôva đă ma Yônais :*1:1: 2KK 14:25 2 “Hơi Yônais, may dâk hăn hŏm ta ƀon Ninivê i ƀon dŭt kuŏng mpeh ma lôh nar nây, mbơh ma nau tê̆ dôih bunuyh ta ƀon i nây, yorlah nau tih djơh khân păng jan nây, lư n'găr tăng tât a Gâp dja ngăn”.*1:2: Hôr 1:1 3 Yônais mâu iăt ôh nau Brah Yêhôva păng du nchuăt bơh măt Brah Yêhôva, păng dâk bơh nây ro, hăn jât ƀon Yôppê ri, ntŭk ƀon geh duk kuŏng kuŏng, gay ma hăn jât ƀon Tasơs i ƀon mpeh ma nhŏp nar kăl ti dak văch dak văr chrao. Păng say geh du mlŏm duk kuŏng, ŭch ndrăp hăn jât ƀon Tasơs, păng ăn prăk ma ncho duk, jêh ri păng jŭr ncho duk i nây ro, hăn jât ƀon Tasơs ndrel bu aƀă êng, păng ŭch du krap ngai bơh măt Brah Yêhôva ngăn ro.*1:3: NMƠ 139:7-12
4 Duk i nây lôh bơh Yôppê, tât ta nklang dak nây, jêh ri Brah Yêhôva ăn geh sial phŭt dŭt hô ro, gay ma khôm mprat rŏ dak văch dak văr. Kơt ndri rŏ dak i nây geh sial dŭt hô ngăn, ăn khân păng klach lah duk khân păng nơh djơh lĕ phiao.*1:4: NMƠ 107:25 5 Mpôl jan kar ta kalơ duk nây khân păng klach nter dadê, khân păng nter kuăl du huê du huê đă brah khân păng nơm kơl. Jêh ri khân păng pư lĕ drăp ndơ ta kalơ duk i nây, mƀăr lơi ta dak văch dak văr ri gay ma ăn duk i nây n'gơch. I Yônais nơm ri lĕ ơm jŭr gŭ bêch hăk khŭr bơh dŏng su ta blat duk ri păng heh.*1:5: Kar 27:18-19 6 Jêh ri păng i tơm duk ri hăn joi Yônais gay ma lah, păng lah: “Mơm gŭ bêch may dja hiah? Dâk hŏm heh! Kuăl hŏm brah may nơm! Nkhêp lah brah i nây kah gĭt ma bân, lơi ăn bân khât”.*1:6: Mar 4:38
7 Mpôl bunuyh i gŭ ncho ta kalơ duk nây tâm nchră băl lah: “Lŏng bân nhŭp ndơ nchroh, gay ma gĭt bu moh bunuyh i jan nau djơh, dâng bân geh nau jêr kơt dja”. Jêh ri nchroh nau i nây di ta plăng Yônais ro.*1:7: Yôs 7:16-20; 1Sa 14:38-42 8 Jêh ri khân păng ôp Yônais: “Bu moh jan, dâng geh nau jêr kơt dja? Mbơh ma hên hŏm, may moh jan? Bơh tă may? Moh ƀon? May bu moh mpôl?” 9 Yônais mbơh ma khân păng: “Gâp mpôl Hêbrơ, gâp klach ma Brah Yêhôva Brah i gŭ ta kalơ trôk, Păng i njêng dak văch dak văr, ndrel ma neh ntu dja đŏng”.*1:9: NNt 1:9-10 10 Yônais nkoch lĕ nau păng i nây nơh ăn bu gĭt, tât ma gĭt nau Yônais păng nchuăt du bơh Brah Yêhôvakơt nây, khân păng klach dadê lơ hô ngăn, lĕ bunuyh i gŭ ncho ta duk i nây, khân păng lah ma Yônais: “Moh jan may kơt ndri ri?”
11 Dak rbuh lơ ma hô lơ ma hô ngăn, jêh ri khân păng ôp ma Yônais: “Lah ndri, mơm hên jan ma may, gay ma dak dja rngŏn mêh?” 12 Yônais ơh: “Khân may nklăch lơi gâp ta dak ri mơ bah, yorlah gâp gĭt sial phŭt dŭt hô dja, tă bơh nau tih gâp”. 13 Khân păng mâu iăt ôh, khân păng nsrôyh vah duk i nây ăn hăn jât meng, mâu dơi ro, yor ma dak rbuh lơ ma hô dăng ngăn. 14 Jêh ri khân păng nter kuăl Brah Yêhôva: “Ơi Brah Yêhôva dăn May yô̆ nđach ăn ma hên, lơi ăn hên khât yor ma hên nkhât nklăch lơi bunuyh dja ta dak. Ơi Brah Yêhôva lơi tê̆ dôih ma hên lah bunuyh dja mâu geh nau tih ôh, lĕ nau dja nơh tă bơhMay nơm ŭch”. 15 Jêh ri khân păng pư Yônais nklăch lơi ta dak văch dak văr i nây, jêh ri dak rngŏn ndal ro. 16 Lĕ rngôch mpôl i nây klach Brah Yêhôva hô ngăn, khân păng leo băl sŏ ndơ jan ma Brah Yêhôva ndrel ma mât ton đŏng.