Nau Kôranh Brah Ngơi Nau Tâm Rnglăp Mhe Nau Tâm Mpơl 15

Pơh nuyh tông păr geh pơh ơ̆ ngan i geh nau jêr

1 Jêh ri gâp say nau gĭt mbên nguai jât ta kalơ trôk, nau gĭt mbên i nây dŭt kuŏng ndrŏt hih rhŏl ngăn, geh pơh nuyh tông păr ndjôt pơh ơ̆ nau jêr n'glĕ dŭt, jêng nau jêr n'glĕ dŭt, yorlah ta nau jêr i nây nau Kôranh Brah ji nuih tê̆ dôih ma dâng lĕ bunuyh ta neh ntu dja lĕ lôch jêh.* 2 Jêh ri gâp say dak văch dak văr rsang tâm ban ma lŭ nglang tâm lai đah ŭnh, jêh ri bu moh i lĕ dơi đah mpômpa (siŭm) i dŭt janh i nây, đah rup păng, yorlah khân păng mâu ôh yơk mbah ma mpômpa (siŭm) i nây, ndrel ma mâu ôh ăn bu tê̆ mbên mrô rnha păng ta săk khân păng nơm, khân păng dâk ta meng dak văch dak văr i nây, nđâp ma ndjôt gong rêng i Kôranh Brah lĕ ăn ma khân păng nơh.* 3 Jêh ri khân păng mprơ nau mprơ Môsê i nơm sơm kơl jan kar ma* Kôranh Brah, ndrel ma nau mprơ Kon Be Biăp nơm kơt nđa:

“Ơ Kôranh Brah, May dŭt geh nau dơi ma dâng lĕ ntil ndơ,

Ndơ May nơm jan dŭt kuŏng,

Jêh ri dŭt nau ngăn!

May i Kađăch dâng lĕ bri dak ơi,

Dâng lĕ ndơ May jan lĕ sŏng, lĕ di dadê ngăn!*

4 Ơ Kôranh Brah! Dâng lĕ bunuyh klach yơk ma May dadê!

Dâng lĕ bunuyh rnê May dadê,

Yorlah geh du huê May dơm i kloh ueh.

Dâng lĕ bunuyh dâng lĕ bri dak mra hăn yơk mbah ma May dadê,

Yorlah khân păng say n'hêl nau May jan sŏng ngăn.”*

5 Bơh kơi nây jât, gâp uănh say mpông nhih jan brah ma Kôranh Brah ta kalơ trôk jêng chun bok jan brah pơk bŏng rpưk.* 6 Jêh ri pơh nuyh tông păr lôh bơh nhih jan brah i nây, ndjôt pơh ơ̆ nau jêr, geh nsoh n'gut ma bok laih nglang kloh ang ngăn, jêh ri geh rse mayh kât ta ntang ntơh đŏng. 7 Geh du huê ndơ ta puăn nuyh ndơ i geh nau rêh i nây, ăn ngan mayh pơh ơ̆ ma pơh nuyh tông păr nây. Ta trôm ngan mayh nây geh bêng ma nau Kôranh Brah tê̆ dôih, Kôranh Brah i gŭ rêh ƀaƀơ n'ho ro.* 8 Ta trôm nhih jan brah ri geh bêng ma nau nhhuk thŭl nau chrêk lơp Kôranh Brah nơm, ndrel ma nau dơi Kôranh Brah nơm, mâu ôh geh du huê dơi lăp ta trôm nây, n'ho ma lĕ lôch pơh ơ̆ nau jêr i tă bơh pơh nuyh tông păr mơ dơi lăp.*

*15:1 15:1: NTM 16:1

*15:2 15:2: NTM 4:6; 13:14-18

*15:3 15:3: ‘Nơm sơm kơl jan kar ma’, mâu lah ‘Dâk’.

*15:3 15:3: NNg 15:1-18; NMƠ 111:2; 145:17

*15:4 15:4: Êsa 45:22-24

*15:5 15:5: NTM 11:19

*15:7 15:7: NTM 4:6

*15:8 15:8: NNg 40:34-35; 1KK 8:10-11; Êsê 44:4