Nau Kôranh Brah Ngơi Nau Tâm Rnglăp Mhe Nau Tâm Mpơl 19

Mprơ nau dơi Kôranh Brah, ndrel ma nau tâm nđăp Kon Be Biăp

1 Jêh bơh nây gâp tăng nteh khôh dŭt hô ngăn ta kalơ trôk tâm ban ma bunuyh dŭt ŏk, lah kơt nđa:

“Ăn rnê ma Kôranh Brah*!

Kôranh Brah dơm i năk rklaih bân, Păng geh nau chrêk lơp dŭt kuŏng, Păng geh nau dơi dŭt kuŏng, 2 yorlah nau Păng phat dôih jêng sŏng, jêng di ngăn.

Păng lĕ tê̆ dôih ƀon i nây i tâm ban ma bu ur văng târ i bu lư, i jan ăn dâng lĕ bunuyh ta neh ntu ƀơ̆ ƀơch yor ma nau khơh kler bu ur i nây.

Kôranh Brah plơng tê̆ dôih bu ur i nây yorlah păng lĕ nkhât jêh mpôl bunuyh sơm kơl jan kar ma† Kôranh Brah.”*

3 Jêh ri khân păng lah tay:

“Ăn rnê ma Kôranh Brah!

Nhhuk ŭnh ta ƀon i nây, jêng nhhuk thŭl ƀaƀơ n'ho ro.”*

4 Mpôl kôranh 24 nuyh, ndrel ma puăn nuyh ndơ geh nau rêh i nây, khân păng păn a neh bơh năp Kôranh Brah i gŭ ta rnơl kađăch ri, yơk mbah ma Păng dadê lah:

“Nau i nây di ngăn‡! Ăn rnê ma Kôranh Brah!”*

5 Jêh ri tăng nteh bŏr bơh rnơl kađăch i nây, lah kơt nđa:

“Dâng lĕ bunuyh i sơm kơl jan kar ma Kôranh Brah, i klach yơk ma Păng, nđâp ma bu kuŏng, bu jê̆,

Ăn rnê hŏm ma Păng.”

6 Nôk nây gâp tăng nteh khôh ngăn tâm ban ma bunuyh dŭt ŏk, tâm ban ma n'gôr dak kuŏng, tâm ban ma ntŏr mih, lah kơt nđa:

“Ăn rnê ma Kôranh Brah,

Yorlah Kôranh Brah i dŭt geh nau dơi ma dâng lĕ ntil ndơ, Păng lĕ jêng Kađăch jêh!

7 Ăn bân leo băl răm maak hŏm, răm rhơn ăn dŭt hô,

Jêh ri rnê nau chrêk lơp Kôranh Brah,

Yorlah lĕ tât jêh nau tâm rnglăp ngăn Kon Be Biăp đah phung i nsing ma Păng, nau tâm rnglăp i nây tâm ban ma nau tâm nđăp.

Phung i nsing ma Păng tâm ban ma bu ur i ma nđăp đah Kon Be Biăp i nây lĕ jêh ndrăp săk phiao đŏng.*

8 Kôranh Brah lĕ ăn ma bu ur i nây nsoh n'gut bok ao nglang dŭt ueh,

Lơp chrat ngăn, ndrel ma dŭt kloh.”

Bok ao nglang dŭt ueh nây geh nau khlay lah, phung ƀon lan Kôranh Brah jan ndơ ueh nơh.*

9 Tông păr i nây lah ma gâp: “Ăn may nchih hŏm: Ueh maak ngăn ma bu moh i lĕ Kôranh Brah kuăl lăp sông sa tâm nđăp Kon Be Biăp nây!” Jêh ri păng lah tay ma gâp: “Nau ngơi dja, jêng nau ngơi ngăn tă bơh Kôranh Brah nơm.”* 10 Jêh ri gâp păn ŭch yơk mbah ta jŏng tông păr i nây, yơn ma păng lah ma gâp: “Lơi jan kơt nây ôh, yorlah gâp jêng nơm sơm kơl jan kar ndrel may, nđâp ma nơm sơm kơl jan kar ndrel phung oh nô may ta nau nsing i mbơh nkoch ma bu nau Brah Yêsu jêng kôranh khân păng nơm đŏng. Yơk mbah ma Kôranh Brah hŏ! Yorlah nau mbơh nkoch ma bu nau Brah Yêsu jêng kôranh khân păng nơm, jêng nau ntơyh nau ngơi Kôranh Brah.”*

Brah Yêsu lĕ dơi tâm lơh

11 Jêh ri gâp say trôk pơk bŏng lahưr, say du mlŏm seh nglang, ta kalơ seh nây geh Nơm ncho păng, bu kuăl nơm i nây ‘Răp Jăp’, nđâp ma ‘I Ngăn’. Păng phat dôih sŏng, Păng tâm lơh đah bu ma nau sŏng đŏng.* 12 I trôm măt Păng tâm ban ma mpiăt ŭnh, jêh ri ta bôk Păng geh ŏk môk kađăch. Ta săk Păng ri geh nchih rnha nguai jât, geh du huê Păng nơm dơm gĭt nau khlay rnha i nây.* 13 Bok ao Păng nsoh mbĕ mham dadê. Rnha Păng ‘Nau Ngơi Kôranh Brah’.* 14 Dâng lĕ phung tahen ta kalơ trôk i ntŭk Kôranh Brah, ncho seh nglang dadê hăn tâng Păng, nđâp ma nsoh n'gut bok ao nglang i dŭt ueh, i dŭt kloh.* 15 Geh du mlŏm đao dŭt sôt lôh bơh mbung Păng ri, sreh dâng lĕ bri dak dơi, nau Păng mât uănh geh nau dơi ngăn tâm ban ma mŏng loyh. Păng mra jot play yŭng yar ƀon ta ntŭk njot play i nây, geh nau khlay lah Păng tê̆ dôih ma dâng lĕ bunuyh dâng lĕ bri dak i nây, tâng ma nau ŭch Kôranh Brah nơm i dŭt geh nau dơi ma dâng lĕ ntil ndơ.* 16 Ta bok ao kuŏng Păng nsoh n'gut ri, ndrel ma ta tâm blu Păng ri, geh nchih rnha Păng ‘Kađăch kuŏng rlau ma dâng lĕ kađăch, Kôranh kuŏng rlau ma dâng lĕ kôranh’.*

17 Nôk nây gâp say du huê tông păr dâk ta kalơ nar, păng nter dŭt nteh ngăn lah ma dâng lĕ siŭm i mpăr ta kalơ trôk: “Văch rgum băl hŏm, ma nhêt kuŏng sa kuŏng i Kôranh Brah lĕ jêh ndrăp,* 18 gay ma sa mlay mpôl kađăch, sa mlay mpôl kôranh tahen, sa mlay mpôl i dŭt dăng, sa mlay seh, sa mlay phung i ncho seh i nây, nđâp ma sa mlay dâng lĕ bunuyh, nđâp ma dâk bu, nđâp ma kon me, nđâp ma bu jê̆, nđâp ma bu kuŏng.”

19 Gâp say mpômpa (siŭm) i dŭt janh i nây, ndrel ma say mpôl kađăch lam neh ntu, nđâp ma phung tahen khân păng nơm lĕ rgum băl, gay ma tâm lơh đah Nơm i gŭ ncho seh nglang i nây, đah phung tahen Păng nơm đŏng.* 20 Mpômpa (siŭm) i dŭt janh nây bu nhŭp, ndrel ma nhŭp đŏng du huê bunuyh ntơyh nklă nau ngơi Kôranh Brah i jan nau khlay dŭt nau nơh ta năp mpômpa (siŭm) i nây. Bunuyh ntơyh i nây leo mƀrôh bunuyh ăn hiơt ma nau khlay dŭt nau i nây nơh, păng leo hiơt dâng lĕ bunuyh i geh nau mbên mpômpa (siŭm) i dŭt janh, ndrel ma dâng lĕ bunuyh i yơk mbah ma rup mpômpa (siŭm) dŭt janh i nây. Dâng lĕ bar hê khân păng i nây bu nklăch rêh ta nglao ŭnh geh nsiu hit.* 21 Lŏng dâng lĕ mpôl aƀă ri, khât lĕ phiao yor ma đao i lôh bơh mbung Nơm i ncho ta seh ri, jêh ri dâng lĕ siŭm chok sa mlay khân păng dŭt hơm dadê.*

*19:1 19:1: ‘Ăn rnê ma Kôranh Brah’, mâu lah ‘Halêluia’. ‘Halêluia’, nau ngơi Hêbrơ. Kơt nây đŏng geh ta trong 3, 4, 6.

†19:2 19:2: ‘Bunuyh sơm kơl jan kar ma’, mâu lah ‘Dâk’. Kơt nây đŏng geh ta trong 5.

*19:2 19:2: NTM 6:10; 17:6

*19:3 19:3: NTM 14:11

‡19:4 19:4: ‘Nau i nây di ngăn’, mâu lah ‘Amen’.

*19:4 19:4: NTM 4:4, 6; 5:14

*19:7 19:7: NTM 21:2, 9; Mat 22:2; 2Kô 11:2; Êph 5:25-32

*19:8 19:8: NTM 3:4-5, 18; 4:4; 6:11; 7:9, 13-14; 15:6; 16:15; 19:14

*19:9 19:9: Luk 14:15; Êsa 25:6

*19:10 19:10: NTM 22:8-9; Kar 10:25-26; 14:15

*19:11 19:11: NTM 3:14; 6:2

*19:12 19:12: NTM 1:14; 3:12

*19:13 19:13: Êsa 63:1-3; Yôh 1:1

*19:14 19:14: NTM 19:8

*19:15 19:15: NTM 1:16; NMƠ 2:9; Yôe 3:13

*19:16 19:16: NTM 17:14

*19:17 19:17-18: Êsê 39:17-20

*19:19 19:19: NTM 16:14; 17:12-14; NMƠ 2:2

*19:20 19:20: NTM 13:1-2, 11-15; 2Tê 2:8

*19:21 19:21: NTM 1:16