Nau
Rut
I Bu Ur Bri Môăp Jêng I U Kađăch Đavid
Nau bôk ăn bu gĭt lor
Bân mâu gĭt ôh bu moh i năk nchih samƀŭt Rut dja, yơn ma bu mân lah, bu nchih samƀŭt dja bơh kơi kađăch Đavid lĕ jan kađăch, jêng ta năm 1010 ê lor ma Brah Yêsu deh.
Dâng lĕ nau nkoch ta samƀŭt dja geh ta rnôk phung Israel ê hŏ geh kađăch, ta nôk samƀŭt Nau Kôranh Brah Ngơi «Phung kôranh phat dôih» (Rut 1:1). Samƀŭt dja ngơi ma u che kađăch Đavid, jêng nau nkoch ma nau yô̆ nđach, nau rŏng răp jăp, nđâp ma nau chuai. Ta samƀŭt dja, bunuyh aƀă nhhơ nau rŏng răp jăp, nđâp ma nau yô̆ nđach i Kôranh Brah geh ma phung ƀon lan Păng nơm: Bu ur Rut i jêng phung Môăp nhhơ nau i nây ăn ma Naômi i po păng, Bôas nhhơ nau i nây ma Rut, jêh ri Kôranh Brah nhhơ nau rŏng răp jăp Păngnơm ăn ma khân păng dadê. Bol lah bơh ntơm nơh, Kôranh Brah mâu ôh ăn phung Môăp lăp jêng phung ƀon lan Israel i phung ƀon lan Păng nơm (Nau Vay 23:3), Kôranh Brah hôm rong bu ur Rut, yor ma păng geh nau rŏng răp jăp. Bu ur Rut jêng nau ntât ueh ma dâng lĕ bunuyh i nsing ma Kôranh Brah, yơn ma mâu ôh di phung Israel. Nau mbơh nkoch ta samƀŭt dja, ŭch nhhơ lah, Kôranh Brah kơp khlay ma bu moh i jan tâng nau ŭch Păng nơm, bol lah bunuyh i nây mâu di phung Israel kađôi đŏng, jêh ri Păng ăn nau geh jêng ma bu moh i rŏng ma Păng răp jăp.
Nau Kôranh Brah ndrăp nau rklaih ma dâng lĕ bunuyh
Rut gŭ oh kon bu klô, nau i nây geh du ntil nau khlay ngăn ta nau nkoch dja, yorlah jât năp tay, i kon păng nây jêng i che kađăch Đavid, jêh ri kađăch Đavid jêng i che Brah Yêsu, Brah Yêsu jêng nơm rklaih dâng lĕ bunuyh bơh nau tih. Yor ma nau rŏng răp jăp Rut, Kôranh Brah yơk ma păng i bu ur mâu di phung Israel, nđâp ma nchih rnha Rut ta nau nkoch yao phung u che Brah Yêsu nơm (Mathay 1:5).
Mbơh nau khlay ta nkô̆ ta samƀŭt dja
1:1-22 Rnăk vâl bu ur Naômi lôh bơh bri Israel, hăn ta bri Môăp, jêh ri Naômi plơ̆ sât ta bri păng nơm ndrel ma Rut i măn păng.
2:1—3:18 Naômi, nđâp ma Rut ta bri Yuđa
4:1-12 nau tâm nđăp Rut đah Bôas
4:13-22 Nau n'glĕ dŭt, ndrel ma nau nkoch yao kon sau Bôas, ndrel ma Rut
1
Geh nau tât jêr ta rnăk vâl Êlimalêk
1 Rnôk kăl e ta bri Israel ê lor ma geh kađăch, geh kôranh phat dôih dơm kơl mât uănh ƀon lan ta bri i nây. Nôk nây geh bar hê ur sai gŭ ta ƀon Ƀêtlêhem ta bri Yuđa. Ta bri nây geh nau tât ji sŏt ji ngot kuŏng bêng bri ngăn. Yor ma geh nau ji sŏt kuŏng i nây khân păng leo bar hê kon bu klô khân păng du bơh bri Yuđa hăn gŭ jât bri Môăp. 2 I sai nây rnha Êlimalêk, i ur păng rnha Naômi, i kon păng rnha Malôn, ndrel ma Kiliiôn*1:2: Ta nau ngơi Hêbrơ «Êlimalêk» geh nau khlay lah: «Kôranh Brah jêng kađăch gâp», «Naômi» geh nau khlay lah: «Nau maak», «Malôn» geh nau khlay lah: «Nau ji», «Kiliiôn» geh nau khlay lah: «Lơ ma rgây hô ngăn»., khân păng tă bơh băl mpôl Êprata ta ƀon Ƀêtlêhem ta bri Yuđa, jêh ri khân păng gŭ ta bri Môăp.*1:1-2: Phu 2:16; 1Sa 17:12; 22:3-4; Mik 5:1 3 Tât a kơi ri, Êlimalêk khât, ntlơi ur ndrel ma kon păng bar hê i nây. 4 Jêh ri kon păng bar hê i nây sŏ ur bơh phung Môăp, du huê rnha Ôrpa, du huê jât rnha Rut, khân păng gŭ ta bri i nây klăp lah geh jât năm. 5 Jêh ri Malôn ndrel ma Kiliiôn nây khât đŏng, ntlơi i mê̆ gŭ du huê êng, khât lĕ kon lĕ sai ro.
Naômi, ndrel măn păng plơ̆ sât tay ta ƀon Ƀêtlêhem
6 Geh du nar ri Naômi lư tăng bu nkoch lah Brah Yêhôvalĕ kơl ƀon lan phung Israel i ƀon lan Păng nơm ăn geh jêng geh ndơ sông sa tŏng ta bri Yuđa. Jêh ri păng ndrel bar hê i măn nây ndrăp ndoh ndơ plơ̆ sât jât ƀon păng nơm ri. 7 Pe nuyh khân păng du bơh ntŭk nây hăn rŏ trong ngai sât tay ta bri Yuđa.
8 Jêh ri Naômi lah ma i măn păng bar hê nây: “Khân ƀe hăn sât tâng mê̆ bơ̆ khân ƀe nơm a ri dôh! Khân ƀe nơh lĕ jan nau ueh ma kon gâp lĕ khât, ndrel ma gâp nơm đŏng. Gâp dăn Brah Yêhôva jan nau ueh ma khân ƀe kơt nây đŏng. 9 Gâp dăn Brah Yêhôva ăn khân ƀe bar hê dja geh sai tay, rêh jêng ueh đăp mpăn ta rnăk vâl”. Jêh ri i po chŭm ntĭnh i măn păng bar hê nây tâng ma nau vay khân păng. Khân păng bar hê nây nhŭm lŭng ngăn 10 ngơi ma i po păng lah: “Hên mâu ŭch ôh tâm nkhah! Hên ŭch tâng gŭ ndrel ƀe, ndrel ma ƀon lan ƀe đŏng”. 11 Tih ma Naômi mâu rom: “Hơi kon! Khân ƀe plơ̆ sât a ri hŏm, moh nau khân ƀe ŭch brô̆ ndrel gâp? Gâp lĕ ŏk năm hơi, mâu hôm ôh bă kon ma ntrŏ sai khân ƀe tâng nau vay bân†1:11: Tâng nau vay phung Israel, lah sai khât mâu ôh geh kon, yơn ma lah hôm geh oh nô i sai păng, oh nô i nây mra ntrŏ sŏ bu ur i lĕ khât sai i nây, gay ma geh kon ma oh nô i lĕ khât nây nơh..*1:11: NVa 25:5-10 12 Plơ̆ sât a ri hŏm! Yorlah gâp lĕ ranh hơyh lĭch hôm geh sai tay ôh. Bol lah gâp hôm rnơm geh kon, lah geh sai gŭ đah gâp ta măng dja, jêh ri geh bar hê kon bu klô, 13 lah ndri ơm khân ƀe ŭch kŏp khân păng truyh kuŏng lah? Ơm khân ƀe ŭch gŭ dơm lĭch ŭch sŏ sai lah? Mâu ôh! Jan kơt ri lĭch di ôh! Brah Yêhôva lĕ tâm rdâng đah gâp jan ăn nau rêh gâp ot nuih ot n'hâm rlao ma khân ƀe nây jât”.
14 Jêh ri bar hê i măn păng nây nhŭm lŭng du tơ̆ jât, i măn rnha Ôrpa nây chŭm ntĭnh po păng du tơ̆ jât, yor ma păng lĕ ŭch plơ̆ sât ta rnăk vâl păng nơm, yơn ma i măn rnha Rut nây kuăn rdâng po păng hô ngăn, mâu ŭch ôh nkhah đah păng. 15 Naômi ngơi ma Rut: “Hơi măn, măn ƀe lĕ plơ̆ sât joi ndŭl mpôl păng nơm, plơ̆ sât yơk mbah brah păng nơm đŏng. Ăn ƀe tâng măn ƀe a ri hŏm!” 16 Jêh ri Rut ơh:
“Dăn ƀe lơi ôh ntrŭt gâp du bơh ƀe
Lơi ôh buay gâp tâng ƀe!
Ah ntŭk ƀe hăn, gâp hăn ta ri đŏng
Ah ntŭk ƀe gŭ, gâp gŭ ta ri đŏng
Phung ƀon lan ƀe jêng phung ƀon lan gâp
Brah i ƀe yơk mbah jêng brah i gâp yơk mbah đŏng.*1:16: 2Sa 15:21
17 Ah ntŭk ƀe khât, gâp khât ta ri đŏng
Jêh ri bu tŏp gâp ta ntŭk nây đŏng.
Nau khât dơm dơi tâm nkhah gâp bơh ƀe
Lah mâu ngăn
Dăn Brah Yêhôva tê̆ dôih kuŏng ma gâp dôh!”
18 Tât tăng i măn păng ŭch gŭ ndrel dŭt hô kơt ndri, Naômi rom, jêh ri gŭ iăt săk rklăk.
19 Jêh ri khân păng brô̆ tât ta ƀon Ƀêtlêhem. Nôk khân păng bar hê tât ta ƀon nây lĕ rngôch ƀon lan ndrŏt dadê, jêh ri geh phung bu ur tâm ôp lah: “Yôh i nây, Naômi ngăn lah hiah?” 20 Yơn ma păng ơh lah:
“Lơi hôm kuăl gâp «Naômi» jât ôh
Kuăl gâp «Mara» hŏ
Yorlah Naômi geh nau khlay «Nau răm maak», tih ma Mara geh nau khlay «Ndơ tăng kher ngăn». Yorlah Kôranh Brah i geh nau dơi dŭt prêh dŭt kuŏng jan ăn nau rêh gâp ot nuih ot n'hâm.
21 Gâp du tă bơh dja nơh geh ndơ ăp ntil
Tih ma Brah Yêhôva ăn gâp plơ̆ sât ta dja jŏng lang mpang ti dơm
Moh nau hôm kuăl gâp «Naômi»?
Brah Yêhôva tâm rdâng đah gâp
Jêng Kôranh Brah i geh nau dơi dŭt prêh dŭt kuŏng ăn geh nau jêr jŏt ma gâp!”
22 Ndri nau Naômi plơ̆ sât ta ƀon păng nơm, leo nđâp ma i măn păng tă bơh bri Môăp sât n'hanh đŏng. Khân păng bar hê tât ta ƀon Ƀêtlêhem ta khay ntơm rek Ba Prăng‡1:22: Ntil Ba Prăng ta Nau Kôranh Brah Ngơi geh bar ntil. Ntil Ba Prăng geh ta samƀŭt Rut jêng ntil i thok mâu lăng kah ma jan nŭmpăng. .
*1:2 1:2: Ta nau ngơi Hêbrơ «Êlimalêk» geh nau khlay lah: «Kôranh Brah jêng kađăch gâp», «Naômi» geh nau khlay lah: «Nau maak», «Malôn» geh nau khlay lah: «Nau ji», «Kiliiôn» geh nau khlay lah: «Lơ ma rgây hô ngăn».
*1:2 1:1-2: Phu 2:16; 1Sa 17:12; 22:3-4; Mik 5:1
†1:11 1:11: Tâng nau vay phung Israel, lah sai khât mâu ôh geh kon, yơn ma lah hôm geh oh nô i sai păng, oh nô i nây mra ntrŏ sŏ bu ur i lĕ khât sai i nây, gay ma geh kon ma oh nô i lĕ khât nây nơh.
*1:11 1:11: NVa 25:5-10
*1:16 1:16: 2Sa 15:21
‡1:22 1:22: Ntil Ba Prăng ta Nau Kôranh Brah Ngơi geh bar ntil. Ntil Ba Prăng geh ta samƀŭt Rut jêng ntil i thok mâu lăng kah ma jan nŭmpăng.