នាវកោរាញឞ្រាសងើយតានាវងើយឞូន៝ង ១ កោរិនតោ ៥

៥

នាវអ្យើសតាប៝នកោរិនតោ

១ គែសតាង់លឺគែសនាវតឹមទ៝ង់ នាវខើសក្លែរតាផូងខាន់អៃមៃ គែសទូហ្វេឞូនុយ្សតឹមទ៝ង់ដាសអូរមហែអីឞឹពាង់នើម ជេងទូនតីលនាវខើសក្លែរ ឞ៝លលាសតាផូងអីមោគឹតនាល់កោរាញឞ្រាសក៝ៈមោគែសកើតនៃដ៝ង់។* ២ តីសមាខាន់អៃមៃហោមនហីអេងឆាក់កើបអេងឆាក់ខាន់អៃមៃនើមឞ្លាវញអោតមានាវញឆីង។ មើមទឹងខាន់អៃមៃមោអោសរាង៝តរាវៃមានាវអីនៃ? ជេសរីនត្រុតលើយឞូនុយ្សអីជានអ្យើសអីនៃលោសឞើសខាន់អៃមៃនើម។ ៣ ឞ៝លលាសឆាក់គ៝ប់មោគុនទ្រែលខាន់អៃមៃកាដោយ លាសងើយមាឞ្រាសហ្វេងអ្វែសគ៝ប់តឹមឞានមាហោមគុនទ្រែលខាន់អៃមៃ ជេសរីឞូនុយ្សអីជានអ្យើសអីនៃគ៝ប់លែៈជេសផាតទោយ្សពាង់ តឹមឞានមាគ៝ប់លែៈគុនទ្រែលខាន់អៃមៃងាន់។* ៤ អ៝ន់ខាន់អៃមៃគុរាគូមឞាល់តារាញាឞ្រាសយេឆូ អីកោរាញឞ៝ន់ នាវមឹនគ៝ប់គុនទ្រែលខាន់អៃមៃ ជេសរីនាវទើយឞ្រាសយេឆូ អីកោរាញឞ៝ន់គុនទ្រែលតានៃដ៝ង់។ ៥ ជាវពាង់អីនៃអ៝ន់មាអាឆាតាង់ អីកោរាញមពោលឞ្រាសអ្យើស គៃមាលើសហេងលើយអីរាង្លៃឆាក់ពាង់ យើនមាអីហ្វេងពាង់នៃហោមគែសនាវរាក្លាយ្សតានារកោរាញយេឆូ វាច់ត៝ត់។ ៦ ខាន់អៃមៃរានេអេងឆាក់ខាន់អៃមៃនើមមានាវអីនៃមោអ្វែសអោស។ ខាន់អៃមៃមោគឹតបាស៖ «នទ្រូយដេៈទើមទើយជានរានីសទឹងលែៈលើមាក្វ៝ង់!» នាវជានអ្យើសតឹមឞានមាកើតនៃដ៝ង់ លាសទូហ្វេជានអ្យើស គែសដ៝ង់អ៝ន់នាវជេរមាឞូអេង នអ៝ប់មាឞូអេងជានតឹងកើតនៃ។* ៧ អ៝ន់ខាន់អៃមៃនត្រុតលើយឞូនុយ្សជានតីសអីនៃតឹមឞានមាមអារ់លើយនទ្រូយអើម គៃមាផូងខាន់អៃមៃជេងក្ល៝សតឹមឞានមារានីសមហែមាជាននុមពាង់អីមោអោសគែសនទ្រូយ* យ៝រលាសផូងខាន់អៃមៃលែៈជេងក្ល៝សតាៈឞើសឞ្រាសក្រីស ខឹតនត្រ៝ៈឞ៝ន់តឹមឞានមាក៝នឞែឞ្យាប់អីឞូងខឹតតានារញេតបុននហ៝ត។ ៨ លាសនទ្រីអ៝ន់ឞ៝ន់កាសគឹតនាវរាក្លាយ្សឞ៝ន់មានាវមអារ់លើយនាវអ្យើសនាវមហឹកអាប់នតីល តឹមឞានមាផូងអីឆ្រាអែល កាសគឹតនាវរាក្លាយ្សខាន់ពាង់ឞើសឞ្រីអេឆីប តានាវញេតបុននហ៝តមានាវមអារ់លើយនុមពាង់គែសនទ្រូយ ជេសរីអ៝ន់ឞ៝ន់គុឆ៝ង់ គែសនូយ្សនហ៝ម់ងើយនាវងាន់ទើមហ៝ៈ ជេងតឹមឞានផូងអីឆ្រាអែល ឆានុមពាង់មោគែសនទ្រូយទើម។

៩ តាឆ៝ម់បុតអីគ៝ប់លែៈជេសញជ្វាល់អ៝ន់អាខាន់អៃមៃអាល៝រនើស គ៝ប់លែៈឞ្វៃជេសខាន់អៃមៃលើយអ៝ន់អោសគុនទ្រែលមាឞូនុយ្សអីតឹមទ៝ង់អីខើសក្លែរ។* ១០ នាវគ៝ប់ងើយអីនៃមោទីអោសអុចលាសមាទឹងលែៈឞូនុយ្សអីតឹមទ៝ង់តានែសនតូអ្យា ផូងអីកើញទ្រាប់នទើហោអីរ ផូងនតុងឞូ មោលាសផូងអីយើកមឞាសមារូបឞ្រាសអេងៗ។ លាសឆ៝ៈនាវគ៝ប់ឞ្វៃកើតនៃឞុតតាលោសឞើសនែសនតូអ្យាទើម! ១១ យើនមានាវគ៝ប់អុចងើយអីនៃគ៝ប់ងើយមាឞូនុយ្សអីលាសអេងឆាក់ពាង់នើមញឆីងមាឞ្រាសក្រីស ជេសរីងខើងមាតឹមទ៝ង់ខើសក្លែរ កើញនទើហោអីរ យើកមឞាសមារូបឞ្រាសអេងៗ រាកឆ្វាយឞូ ញេតញុលឞ្លឹកឞ្លែក នតុងឞូ។ លាសនទ្រីឞូនុយ្សអីកើតនៃឞ៝លលាសឆោងឆាលើយគុនទ្រែលដ៝ង់។ ១២ មោអោសទីគ៝ប់ផាតទោយ្សឞូនុយ្សអីមោញឆីង យ៝រលាសអីនៃមោទីនាវជានការគ៝ប់។ យើនមាអ្យាត់មាខាន់អៃមៃផាតទោយ្សឞូនុយ្សអីញឆីង! ១៣ ផូងអីមោញឆីងនៃ កោរាញឞ្រាសមរាផាតទោយ្សខាន់ពាង់។ យើនមាខាន់អៃមៃ «អ្យាត់មាងលោសលើយឞូនុយ្សអ្យើសឞើសខាន់អៃមៃទោ» កើតលែៈគែសញចីសតានាវកោរាញឞ្រាសងើយ។*

*៥:១ ៥:១៖ កល ១៨:៧-៨

*៥:៣ ៥:៣-៥៖ ១កោ ៣:១៥; ១១:៣១-៣២; ១តម ១:២០

*៥:៦ ៥:៦-៧៖ រម ១៦:១៧; តត ៣:១០-១១; នង ១២:១៥; យហ ១:២៩

*៥:៧ ៥:៧៖ តានារនទ្រាប់មាញេតបុននហ៝ត ផូងអីឆ្រាអែល ជ៝យនទ្រូយ នទ្រែលមានទើអីគែសនទ្រូយតាជៃខាន់ពាង់នើមមអារ់លើយ ជេសរីតានារញេតបុននហ៝ត ខាន់ពាង់ងខឹតក៝នឞែឞ្យាប់នអ៝ប់មាឆានុមពាង់មោគែសនទ្រូយអាប់ផាមនារ។

*៥:៩ ៥:៩-១១៖ អេផ ៥:៥-៧; ១តេ ៥:២២; ២តេ ៣:៦

*៥:១៣ ៥:១៣៖ នវ ១៧:៧; ១៩:១៩; ២១:២១; ២២:២១; ២៤:៧