នាវកោរាញឞ្រាសងើយនាវតឹមរាង្លាប់មហែ ១ កោរិនតោ 7

នាវនអាប់អូរឆាយ

1 ល៝ង់នាវអោបតាឆ៝ម់បុតអីខាន់អៃមៃលែៈញចីសញជ្វាល់អ៝ន់គ៝ប់នើស។ អើ អ្វែសមាឞូក្លោគុទូហ្វេអេងមោអោសឆ៝ៈអូរ។* 2 យើនមាគែសនាវខើសក្លែរ លាសនទ្រីអ្វែសដេៈអ៝ន់ឞូក្លោទូហ្វេទូហ្វេឆ៝ៈអូរ ជេសរីអ្វែសដេៈអ៝ន់ឞូអូរទូហ្វេទូហ្វេឆ៝ៈឆាយ។* 3 តានាវឞិចនទ្រែលអូរឆាយ អ្យាត់មាអីឆាយជានតឹងនាវអុចអីអូរ ជេសរីអីអូរអ្យាត់មាជានតឹងនាវអុចអីឆាយកើតនៃដ៝ង់។ 4 អីអូរមោអោសទើយជេងកោរាញមាឆាក់ជាន់ពាង់នើម យ៝រលាសឆាក់ជាន់អីនៃជេងនទើអីឆាយ។ អីឆាយកើតនៃដ៝ង់ ពាង់មោអោសទើយជេងកោរាញមាឆាក់ជាន់ពាង់នើម យ៝រលាសជេងនទើអីអូរ។ 5 លាសអុចតឹមងអាត់នទ្រាង់នើមគៃមាគែសម៝ងមាមឞើសឆើម អ៝ន់តឹមទីទូនតោរនាវល៝រ លើយជ៝ៈអីរនារ។ ជេសរីទឹងឞិចនទ្រែលកើតអើមជឹត ក្លាចលាសឆាតាង់ នទើមយ៝រមាខាន់អៃមៃអ៝ត់មោទើយនៃ។ 6 គ៝ប់ងើយកើតនៃមោអោសទីគ៝ប់ដាៈខាន់អៃមៃតឹមងអាត់នទ្រាង់នើម យើនមាលាសអុចជាន ជានកើតនៃទោ។ 7 គ៝ប់អុចទឹងលែៈខាន់អៃមៃមោឆ៝ៈអូរឆ៝ៈឆាយកើតគ៝ប់ដ៝ង់ យើនមាទូហ្វេទូហ្វេឆាក់គែសនទើអ្វែសកោរាញឞ្រាសអ៝ន់អេងៗឞាល់ ទូហ្វេគែសកើតនអា ទូហ្វេគែសកើតនត៝។*

8 គ៝ប់ទាន់មឞើសមាផូងទ្រោសនទាម់ នទ្រែលមាឞូអូរនទ្រោខឹតឆាយ៖ លាសខាន់ពាង់គុរេសមោអោសឆ៝ៈអូរឆ៝ៈឆាយកើតគ៝ប់មោអោសឆ៝ៈអូរ លែៈអ្វែសងាន់។ 9 យើនមាលាសខាន់ពាង់មោអោសទើយអ៝ត់ទើយរាទ៝ង់ អ៝ន់ឆ៝ៈអូរឆ៝ៈឆាយទោ។ នាវឆ៝ៈអូរឆ៝ៈឆាយអីនៃជេងអ្វែសរាលាវមានូយ្សនហ៝ម់កើញហោអីរ។*

10 ល៝ង់ឞូនុយ្សអីលែៈគែសអូរគែសឆាយជេស នាវអីអ្យាមោទីគ៝ប់អោសដាៈ កោរាញយេឆូ នើមដាៈ៖ អូរលើយអោសនត្លើយឆាយ។* 11 លាសពាង់នត្លើយឆាយ លើយហោមអ៝ន់អោសឆ៝ៈតៃឆាយមហែ មោលាសអ្យាត់មាពាង់ព្លឹឆ៝ៈតៃឆាយអើមហ៝ៈ។ ជេសរីអីឆាយលើយនត្លើយអូរពាង់នើមដ៝ង់។

12 ល៝ង់ឞូនុយ្សអាបាៈអេងជឹត នាវអីអ្យាមោអោសតាៈឞើសកោរាញយេឆូ តាៈឞើសមឞូងគ៝ប់នើម៖ លាសឞូម៝សគែសអូរឞូនុយ្សមោអោសញឆីងមាកោរាញយេឆូ យើនមាលាសអីអូរនៃហោមអុចគុរេសនទ្រែល លាសនទ្រីលើយអោសនត្លើយពាង់។ 13 លាសឞូម៝សគែសឆាយឞូនុយ្សមោអោសញឆីង យើនមាលាសអីឆាយនៃហោមអុចគុរេសនទ្រែល លាសនទ្រីលើយនត្លើយពាង់ដ៝ង់‌ 14 យ៝រលាសកោរាញឞ្រាសលែៈកើបក្ល៝សអីឆាយឞូនុយ្សមោញឆីងនៃយ៝រមាអីអូរនៃ ជេសរីពាង់លែៈកើបក្ល៝សដ៝ង់អីអូរឞូនុយ្សមោញឆីងនៃយ៝រមាអីឆាយនៃ*។ លាសនទើអីនៃមោងាន់ អ៝សក៝នខាន់ពាង់អីហោមក៝នឆែជេងតឹមឞានមាអ៝សក៝នផូងអីមោញឆីង។ យើនមានហេលនានេៈអ៝សក៝នអីនៃលែៈជេងប៝នលានកោរាញឞ្រាស។ 15 លាសអូរ មោលាសឆាយអីមោញឆីងនត្លើយខាន់អៃមៃ អ៝ន់ពាង់នត្លើយទោ ខាន់អៃមៃមោអោសគែសតីស។ កោរាញឞ្រាសលែៈក្វាល់ជេសឞ៝ន់គុងាវនាវដាប់មពាន់។* 16 អើឞូអូរអីលែៈគែសឆាយ ក្លាប់លាសខាន់អៃទើយលែវពាង់ឆឹតញឆីង អើឞូក្លោអីលែៈគែសអូរ ក្លាប់លាសខាន់មៃទើយលែវពាង់ឆឹតញឆីង។*

នាវរាគ៝ល់នាវគុងាវ

17 តានាវអាអេងជឹត នោកកោរាញឞ្រាសក្វាល់ខាន់អៃមៃឆឹតញឆីង អ្យាត់មារាគ៝ល់លើយនូយ្សនហ៝ម់អ្យើស យើនមានាវគុងាវក្រាវឆាចហោមកើតអីខាន់អៃមៃអេហ៝ៈឆឹតញឆីងមាកោរាញយេឆូ យ៝រលាសតានាវគុងាវអីនៃតាៈឞើសកោរាញយេឆូ អ៝ន់។ គ៝ប់វៃនតុមនតីទឹងលែៈផូងញឆីងអាប់នតុកអ៝ន់ជានកើតនអា។ 18 នតឹតលាស លាសកោរាញឞ្រាសក្វាល់ទូហ្វេឞូនុយ្សតានាវគុងាវក្រាវឆាចជេងផូងអីឆ្រាអែល លែៈជេសក៝សនតោតឹងនាវវៃមោឆេ អ៝ន់ពាង់ហោមកើតនៃទោ។ លាសកោរាញឞ្រាសក្វាល់ទូហ្វេឞូនុយ្សមោអោសទីផូងអីឆ្រាអែល មោគែសក៝សនតោ លើយអោសអ៝ន់ពាង់ក៝សនតោលាប់ជេងផូងអីឆ្រាអែល ។* 19 នាវក៝សនតោមោក៝សនតោ មោអោសគែសនាវខ្លៃ។ នទើអីគែសនាវខ្លៃជានតឹងនាវកោរាញឞ្រាសនើមដាៈ។ 20 អាមើមបាៈនាវគុងាវខាន់អៃមៃនោកកោរាញឞ្រាសក្វាល់ខាន់អៃមៃនើស អ៝ន់គុងាវកើតអីនៃជឹតទោ។ 21 លាសកោរាញឞ្រាសក្វាល់ទូហ្វេឞូនុយ្សតានាវគុងាវក្រាវឆាចជានទឹកឞូ លើយអោសរាង៝ត យើនមាលាសទើយជេងក៝នមែ†ជានទោ ទើយដ៝ង់‌* 22 យ៝រលាសឞូម៝សអីជានទឹកឞូនោកកោរាញឞ្រាសក្វាល់ ពាង់អីនៃជេងក៝នមែតាកោរាញឞ្រាសនើម ជេសរីឞូម៝សអីលែៈអើមក៝នមែនោកកោរាញឞ្រាសទែក្វាល់ ពាង់អីនៃជានទឹកឞ្រាសក្រីស នើម។* 23 កោរាញឞ្រាសលែៈត៝ម់រាន៝សខ្លៃអ៝ក់ងាន់មាច្វាយខាន់អៃមៃ។ លាសនទ្រីអ៝ន់ខាន់អៃមៃគុតាន៝ម់កោរាញឞ្រាស អ្យាត់នាវពាង់ លើយហោមជានតឹងនាវតីសដាសនាវកោរាញឞ្រាសអុចកើតឞូនុយ្សអីមោញឆីង។* 24 អើអ៝សនោតានាវញឆីង អាមើមបាៈនាវគុងាវខាន់អៃមៃនោកកោរាញឞ្រាសក្វាល់ខាន់អៃមៃនើស អ៝ន់គុងាវកើតអីនៃជឹតតានាប់មាត់កោរាញឞ្រាស។

នាវឆ៝ៈអូរឆាយមោលាសមោ

25 ល៝ង់ផូងឞូអូរទ្រោសអីអេហ៝ៈគែសឆាយ គ៝ប់មោអោសគែសនាវដាៈឞើសកោរាញឞ្រាសតានាវឆ៝ៈឆាយ យើនមាកោរាញឞ្រាសយោៈនអាចមាគ៝ប់ អ៝ន់គ៝ប់គែសនាវមឹនគឹតឞ្លាវអីទីមាអ្យាត់ ជេសរីគ៝ប់មឞើសងក៝ចមាខាន់អៃ។ 26 តឹងមានាវគ៝ប់មឹន យ៝រមាអាបៃអ្យាគែសអ៝ក់នាវជេរ លាសឞូម៝សអីអេហ៝ៈគែសអូរអេហ៝ៈគែសឆាយ អ៝ន់ពាង់ហោមគុអេងកើតអើមជេងអ្វែសរាលាវ។*

27 លាសឞូម៝សអីលែៈគែសអូរ លើយអោសនត្លើយពាង់ លាសឞូម៝សអីអេហ៝ៈគែសអូរ លើយអោសឆ៝ៈអូរ។ 28 យើនមាឞូម៝សអីឆ៝ៈអូរមោអោសតីស ជេសរីឞូម៝សអីឆ៝ៈឆាយក៝ៈមោដ៝ង់តីស។ យើនមាខាន់ពាង់អីនៃមរាគែសនាវជេរតានាវរេស‡។ ជេសរីគ៝ប់យោៈខាន់អៃមៃ កើតនទ្រីទឹងគ៝ប់មឞើសកើតនៃ។*

29 អើអ៝សនោតានាវញឆីង គ៝ប់ទាន់មឞើសមាខាន់អៃមៃ ម៝ងនារកោរាញយេឆូ ព្លឹវាច់ឞើយមាត៝ត់។ ជឹតអ្យាជឹតនាប់តៃ ទឹងលែៈឞូនុយ្សអីលែៈគែសអូរអ៝ន់ពាង់ឆើមកើលជានការមាកោរាញឞ្រាសតឹមឞានមាឞូនុយ្សមោគែសអូរដ៝ង់។* 30 ឞូម៝សអីញុមរាង៝ត ជានតឹមឞានមាមោញុមរាង៝តហ៝ៈ ឞូម៝សអីអ្វែសមអាក ជានតឹមឞានមាមោអ្វែសមអាកហ៝ៈ ឞូម៝សអីរាវាត់ទ្រាប់នទើ ជានតឹមឞានមាមោជេងមាទ្រាប់នទើពាង់នើមហ៝ៈ‌* 31 ជេសរីឞូម៝សអីទ៝ង់ទ្រាប់នទើតានែសនតូអ្យា លើយតាពើសមារាវៃទ្រាប់នទើអីនៃដ៝ង់ យ៝រលាសនែសនតូអ្យាមរារ៝ស។

32 គ៝ប់មោអុចខាន់អៃមៃគែសនាវរាវៃមានទើតានែសនតូអ្យា។ ឞូម៝សអីមោគែសអូរ ពាង់រាវៃមានាវកោរាញឞ្រាសទើម មឹនអេងលាស មើមជានគៃមាអ៝ន់កោរាញឞ្រាសទែរាម់។ 33 ល៝ង់ឞូនុយ្សអីលែៈគែសអូរ ពាង់រាវៃមានទើតានែសនតូអ្យា មឹនអេងលាស មើមជានគៃមាអ៝ន់អូរទែរាម់‌ 34 ជេសរីតានាវមឹនពាង់គែសនាវរាវៃឞារនតីល រាវៃមាកោរាញឞ្រាស រាវៃមាអូរដ៝ង់។ ឞូអូរអីមោគែសឆាយ នទ្រែលមាឞូអូរហោមទ្រោសពាង់រាវៃមានាវកោរាញឞ្រាសទើម មឹនអេងលាស មើមឆើមកើលជានការមាកោរាញឞ្រាសមាលែៈនូយ្សនហ៝ម់ មាលែៈឆាក់ជាន់។ ល៝ង់ឞូអូរអីលែៈគែសឆាយ ពាង់រាវៃមានទើតានែសនតូអ្យា មឹនអេងលាស មើមជានគៃមាអ៝ន់ឆាយទែរាម់។ 35 គ៝ប់ងើយនាវអីនៃគៃមាអ្វែសមាខាន់អៃមៃ គ៝ប់មោអោសអុចញច៝ប់ខាន់អៃមៃ គ៝ប់អុចខាន់អៃមៃគុងាវអ្វែស ជានការអ៝ន់មាកោរាញឞ្រាសមោគែសនាវរាខ្វាក។ 36 យើនមាលាសគែសឞារហៃលែៈជេងងក្វាត់នទ្រោយ លាសអីឞូក្លោមឹនមោទីអោសលាសមោនអាប់ដាសនទ្រោយពាង់នើមនៃ ជេសរីលាសនូយ្សនហ៝ម់ពាង់ដោកដោលហោងាន់អុចនអាប់ អ៝ន់ជានតឹងនាវពាង់អុចទោ នអាប់ពាង់ដាសឞូអូរអីនៃ មោអោសតីស។§* 37 យើនមាលាសឞូម៝សអីលែៈមោអុចអោសតឹមនអាប់ ទើយម៝ត់ញជ្រាង់ឆាក់ជាន់ពាង់នើម ជេសរីទើយអ៝ត់នូយ្សនហ៝ម់មោអោសដោកដោល ឞូនុយ្សអីនៃជានអ្វែស។ 38 លាសនទ្រីឞូម៝សអីនអាប់ដាសនទ្រោយពាង់នើមឞូនុយ្សអីនៃជានអ្វែស យើនមាឞូម៝សអីមោអោសនអាប់គុទើមហ៝ៈ ឞូនុយ្សអីនៃលើមាហោជានអ្វែស។

39 ល៝ង់ឞូអូរលែៈគែសឆាយ នោកឆាយហោមរេសអ្យាត់មាអូរគុដាសឆាយនឹង យើនមាលាសឆាយលែៈខឹត រីមើពាង់ទើយឆ៝ៈតៃឆាយអេងទាសអុចពាង់នើម ទើនឆ៝ៈឆាយតាផូងអីញឆីងមាកោរាញឞ្រាសហ៝ៈ។* 40 យើនមាតឹងមានាវគ៝ប់មឹន លាសឞូអូរអីនៃមោហោមអោសឆ៝ៈឆាយជឹត ពាង់លើមារាម់មអាក។ គ៝ប់មោអោសដាៈនាវអីនៃ គ៝ប់ងើយកើតនៃតាៈឞើសឞ្រាសហ្វេងអ្វែសកោរាញឞ្រាសគុតាគ៝ប់។

*7:1 ៧:១៖ មថ ១៩:១០

*7:2 ៧:២៖ ១កោ ៦:១៣; ១តេ ៤:៣-៥; ហេឞ ១៣:៤

*7:7 ៧:៧៖ មថ ១៩:១១-១២

*7:9 ៧:៩៖ ១តម ៥:១៤

*7:10 ៧:១០-១១៖ ១កោ ៧:៣៩-៤០; មថ ១៩:១-៩

*7:14 ៧:១៤៖ នាវអ្យាមោអោសគែសខ្លៃលាស ឞូនុយ្សគែសនាវរាក្លាយ្ស យ៝រមាអូរឆាយ យ៝រមាមេៈឞឹគែសនាវរាក្លាយ្ស។

*7:15 ៧:១៥៖ រម ១២:១៨

*7:16 ៧:១៦៖ ១ពេ ៣:១-២

*7:18 ៧:១៨-១៩៖ រម ២:២៨-២៩; កាល ៥:២-៦; ៦:១៥; កោល ២:១១

†7:21 ៧:២១៖ តារានោកពោល ឞូនុយ្សទឹកឞូ លាសទឹកអីនៃគែសព្រាក់មាច្វាយឆាក់ពាង់នើម ពាង់ទើយច្វាយជេងក៝នមែ។

*7:21 ៧:២១៖ កាល ៣:២៨; ផលម ១:១៦

*7:22 ៧:២២៖ អេផ ៦:៥-៩

*7:23 ៧:២៣៖ ១កោ ៦:២០; មថ ២០:២៨

*7:26 ៧:២៦៖ មថ ២៤:១៩

‡7:28 ៧:២៨៖ ឞូអាបាៈមឹនលាស ពោល ងើយមានាវជេរមាឞូនុយ្សអីញឆីងមាឞ្រាសយេឆូ យ៝រលាសតានោកនៃឞូលែៈជានជេរមាផូងញឆីង(ហេឞ ១០:៤) ឞូអាបាៈមឹនលាសពោល ងើយមានាវជេរជ៝ត់តានារងគ្លែៈទុត(មក ១៣:៧-១៣)។

*7:28 ៧:២៨៖ ១កោ ៧:២; មថ ២៤:១៩

*7:29 ៧:២៩៖ រម ១៣:១១; លក ១៤:២៦-២៧

*7:30 ៧:៣០-៣១៖ ១យហ ២:១៥-១៧

§7:36 ៧:៣៦៖ ទឹងលែៈត្រ៝ង ៣៦៖ មោលាស «លាសគែសអីឞឹមឹនមោទីអោសលាសមោអ៝ន់ក៝នឞូអូរពាង់ឆ៝ៈឆាយ ក្លាចលាសអីក៝ននៃលើមារាញ ទីអ៝ន់ពាង់ឆ៝ៈឆាយ ជានតឹងនាវអីឞឹអុចទោ។ ឞឹអីនៃមោអោសតីស ទីពាង់អ៝ន់អីក៝នពាង់ឆ៝ៈឆាយ»។

*7:36 ៧:៣៦-៣៨៖ ១កោ ៧:២; មថ ១៩:១១-១២

*7:39 ៧:៣៩-៤០៖ ១កោ ៧:១០-១១; រម ៧:២-៣; ១តម ៥:១១-១៤