នាវកោរាញឞ្រាសងើយនាវតឹមរាង្លាប់មហែ ១ តីមោថេ 1

ឆ៝ម់បុតពោលញជ្វាល់អ៝ន់មា

តីមោថេ រើស ១

នាវឞោកអ៝ន់ឞូគឹតល៝រ

នើមញចីសឆ៝ម់បុតអ្យារាញាពោល ពាង់ញចីសឆ៝ម់បុតអ្យាក្លាប់លាសតានាម់ ៦៣ ក្លាប់លាស ៣០ នាម់ជេសឞ្រាសយេឆូ ទ៝ក់រេស ពាង់ញចីសឆ៝ម់បុតអ្យាតាឞ្រីមាឆេដោន ។

មាឆ៝ម់បុតអាអេងអីពោល ញចីសទាន់អ្វាញ់តាឆ៝ម់បុតរោមតានាវឞោក «ឆ៝ម់បុតពោល »។

នោតីមោថេតាៈឞើសប៝នលីឆាត្រា ជេងប៝នពោល លែៈហាន់មឞើសងក៝ចនាវមហែមហានអ្វែសក្លាប់លាសតានាម់ ៤៧ នោកពាង់ហាន់មឞើសងក៝ចត៝ល់ង្វាយនើស។ នោកពោល ហាន់ខ៝ល់ផូងញឆីងតាប៝នអីនៃទូតឹជឹត នោកនៃពោល ជាៈតីមោថេហាន់នទ្រែលពាង់។ តីមោថេ នោកនៃហោមនទាម់ អីមេៈពាង់ផូងអីឆ្រាអែល អីឞឹពាង់ផូងគ្រែក (ការ ១៦:១-៣) តីមោថេ ហាន់នទ្រែលពោល នអ៝ប់មាជានការនទ្រែលពោល ជ៝ៈនាម់ ជេសរីពោល ដាៈពាង់ជានកោរាញម៝ត់អ្វាញ់មាផូងញឆីងតាប៝នអេផេឆោ ។ ពោល រ៝ង់មាតីមោថេ តឹមឞានមាក៝នពាង់នើមងាន់។ ឆ៝ម់បុតអ្យា ឞូអ៝ក់មឹនលាសពោល ញចីសឞើសកើយទឹងលែៈនាវអីលែៈគែសញចីសតាឆ៝ម់បុតការមពោលកោរាញអ៝សម៝ន យើនមាឞូនុយ្សអាបាៈមឹនលាសនាវញចីសតាឆ៝ម់បុតអ្យាជេងតឹមទីដាសនាវលែៈគែសញចីសតាការមពោលកោរាញអ៝សម៝នងកោៈ ២០។

នាវអុចនត្រ៝ង់តាឆ៝ម់បុតអ្យា

តាឆ៝ម់បុតអ្យាពោល នហាវនូយ្សនហ៝ម់តីមោថេ គៃមាគុន៝ប់តានាវតឹមរាលាច់មានើមនតីងក្លាៈ(១តម ១:៣-១១; ៤:១-៥; ៦:២-៥)។ ពោល ដាៈតីមោថេ កើយ្សផូងកោរាញមាផូងញឆីង ពាង់ដាៈតីមោថេ កើយ្សអាមើមឞូនុយ្សអីទីមាជានកោរាញ(១តម ៣:១-១៣) ពាង់ដាៈតីមោថេ អាមើមនាវលែវមពោលអេងៗតាផូងញឆីង កើតលាសលែវមាមពោលឞូរាញ មពោលឞូអូរ មពោលទ្រោសនទាម់ មពោលក៝នឆែ(១តម ៥:១-៦)។ ពាង់មឞើសមាតីមោថេ ដ៝ង់ អាមើមលែវតានាវរាបុន(១តម ២:១-១៥)។

មឞើសនាវខ្លៃតាងកោៈតាឆ៝ម់បុតអ្យា

- នាវអោបអ្វែសលាង់ (១:១-២)

- នាវតឹមរាលាច់មានើមនតីងក្លាៈ (១:៣-២០)

- នាវលែវតានាវរាបុន (២:១-១៥)

- អាមើមអីទីឞូនុយ្សអីជានកោរាញតាផូងញឆីង (៣:១-១៣)

- អាមើមនាវគុរេសផូងញឆីង ជេសរីមានើមនតីងក្លាៈ (៣:១៤-៤:១៦)

- អាមើមនាវលែវមពោលអេងៗតាផូងញឆីង (៥:១-៦:២)

- នាវនតុមនតីងក្លាៈ នទ្រែលមានាវកើញទ្រាប់នទើ (៦:៣-១០)

- នាវនតិញងគ្លែៈទុត (៦:១១-២១)

នាវអោបអ្វែសលាង់

1 ឆ៝ម់បុតគ៝ប់ពោល ញចីស គ៝ប់កោរាញអ៝សម៝នឞ្រាសក្រីសយេឆូ ។ គ៝ប់ជេងកោរាញអ៝សម៝នតាៈឞើសកោរាញឞ្រាសនើម នទ្រែលមាតាៈឞើសឞ្រាសក្រីសយេឆូ ដាៈ។ កោរាញឞ្រាសជេងនើមរាក្លាយ្សផូងឞ៝ន់ នាវរានើមផូងឞ៝ន់តាឞ្រាសក្រីសយេឆូ ទើម។ 2 គ៝ប់ញជ្វាល់ឆ៝ម់បុតអ្យាអ៝ន់មាមៃតីមោថេ អីតឹមឞានមាក៝នគ៝ប់នើមងាន់យ៝រមាគ៝ប់លែវមៃឆឹតញឆីងមាឞ្រាសយេឆូ ។ ទាន់កោរាញឞ្រាស នទ្រែលមាឞ្រាសក្រីសយេឆូ អ៝ន់នាវអ្វែស នាវយោៈ នាវដាប់មពាន់មាមៃ។ កោរាញឞ្រាសជេងឞឹឞ៝ន់ ឞ្រាសក្រីសយេឆូ ជេងកោរាញឞ៝ន់។*

ញជ្រាង់នាវនតុមនតីងក្លាៈ

3 នោកគ៝ប់លោសឞើសប៝នអេផេឆោ ហាន់តាឞ្រីមាឆេដោន គ៝ប់លែៈអ៝ន់មៃហោមគុតាប៝នអេផេឆោ គៃមាឞ្វៃឞូលើយអោសអ៝ន់នតុមនតីនាវងក្លាៈ។ អាបៃអ្យាគ៝ប់ហោមអ៝ន់មៃគុតានៃហ៝ៈគៃមាហោមជានកើតនៃដ៝ង់‌* 4 ឞ្វៃលើយអ៝ន់ឞូងក៝ចនអើនអ៝ក់ លើយអ៝ន់ងក៝ចយៅរុងអីជ៝ងរាហេងងាន់នៃ យ៝រលាសនាវអីនៃជេងតឹមអោបរាខេលទើម មោអោសកើលឞ៝ន់ជានតឹងនាវកោរាញឞ្រាសអុច។ យើនមានាវញឆីងមាឞ្រាសយេឆូ កើលអ៝ន់ឞ៝ន់ជានតឹងនាវកោរាញឞ្រាសអុច។ 5 នាវនតីតាផូងញឆីងមាឞ្រាសយេឆូក្រីស អុចអ៝ន់ផូងញឆីងគែសនាវរ៝ង់មាឞូ នាវរ៝ង់អីលោសឞើសនូយ្សនហ៝ម់ក្ល៝ស លោសឞើសនូយ្សនហ៝ម់ឆ៝ង់ នទ្រែលមាលោសឞើសនាវញឆីងរាប់ជាប់ងាន់។* 6 ឞូនុយ្សអាបាៈលែៈទូទែរជេសឞើសទឹងលែៈនាវអីនៃ អាបៃអ្យាខាន់ពាង់មឞើសងើយលាៈលេងទើម។ 7 ខាន់ពាង់អីនៃអុចជេងនើមនតីនាវវៃផូងអីឆ្រាអែល យើនមាខាន់ពាង់នើមមោគឹតវ៝ត់អោសនាវអីខាន់ពាង់ងើយ។ ជេសរីនទើអីខាន់ពាង់នតីឞាញ់ងាន់នៃមោគឹតវ៝ត់ដ៝ង់មានាវខ្លៃ។* 8 ឞ៝ន់លែៈគឹតនាវវៃផូងអីឆ្រាអែល ជេងអ្វែស លាសឞ៝ន់ឞ្លាវទ៝ង់អ៝ន់ទី។* 9 អ៝ន់ឞ៝ន់កាសគឹត នាវវៃផូងអីឆ្រាអែល កោរាញឞ្រាសមោអោសនទ្រាប់គៃមាតេៈទោយ្សមាឞូនុយ្សឆ៝ង់ យើនមាពាង់អ៝ន់នាវវៃអីនៃមាតេៈទោយ្សមាផូងអីមោជានតឹងនាវវៃ ផូងមោអ្យាត់នាវ ផូងមោយើកមាកោរាញឞ្រាស ផូងជានអ្យើសនឹង ផូងមោក្ល៝សអ្វែស ផូងរាកឆ្វាយកោរាញឞ្រាស ផូងងខឹតមេៈឞឹ ផូងងខឹតឞូ។ 10 ពាង់អ៝ន់នាវវៃអីនៃគៃមាតេៈទោយ្សមាផូងខើសក្លែរ ផូងឞូក្លោគុតឹមទ៝ង់នទ្រាង់ផូងឞូក្លោ* ផូងតាច់រាគ៝ល់ឞូនុយ្ស ផូងមរោស ផូងងើយញចើត នទ្រែលមាទឹងលែៈផូងអេងជឹតអីតឹមរាទ៝ង់ដាសនាវនតុមនតីទី។ 11 នាវនតុមនតីទីតាៈឞើសនាវមហែមហានអ្វែសអីកោរាញឞ្រាសអ៝ន់គ៝ប់មឞើសងក៝ចមាឞូ។ នាវមហែមហានអ្វែសអីនៃតាៈឞើសកោរាញឞ្រាសអីទុតអ្វែស នអ៝ប់មាគែសនាវច្រេកលើប។*

នាវលាសអ្វែសមានាវយោៈកោរាញឞ្រាស

12 គ៝ប់លាសអ្វែសមាឞ្រាសក្រីសយេឆូ អីកោរាញឞ៝ន់ ពាង់លែៈអ៝ន់នហ៝ម់ឆ្វានមាគ៝ប់ទើយជានការមាពាង់។ គ៝ប់លាសអ្វែសមាពាង់ យ៝រលាសលែៈពាង់កើបគ៝ប់ន៝ប់រាក៝ក់ងាន់ នអ៝ប់មាអ៝ន់គ៝ប់ជានការមាពាង់ដ៝ង់។ 13 ពាង់អ៝ន់គ៝ប់ជានការមាពាង់ ឞ៝លលាសគ៝ប់ឞើសនតើមនើសជេងឞូនុយ្សរាកថាម់ ឞូនុយ្សជានជេរ ឞូនុយ្សហាត់ជាញមាផូងអីញឆីងមាពាង់កាដោយ។ ពាង់ហោមយោៈនអាចគ៝ប់ដ៝ង់ ឞ៝លលាសនោកនៃគ៝ប់អេហ៝ៈអោសគែសនាវញឆីងមាពាង់ ជេសរីមោគឹតដ៝ង់ម៝សនទើអីគ៝ប់ជាននៃ។* 14 យើនមានាវយោៈកោរាញឞ្រាសអ៝ក់រាមែសលែរងាន់ ពាង់ជានអ៝ន់គ៝ប់គែសនាវញឆីង គែសនាវរ៝ង់មាឞូ។ លែៈនទើអីនៃជេងតាៈឞើសឞ្រាសក្រីសយេឆូ នើមអ៝ន់។ 15 ឞូលាស៖ «ឞ្រាសក្រីសយេឆូ វាច់តានែសនតូអ្យាគៃមារាក្លាយ្សឞូនុយ្សតីស»។ នាវអីនៃជេងទីងាន់ នទ្រែលមាទីមាឆ៝ៈទើនដ៝ង់។ ល៝ង់គ៝ប់អ្យាអីឞូនុយ្សតីសរាលាវឞូងាន់។* 16 យ៝រមាគ៝ប់អីឞូនុយ្សតីសរាលាវឞូងាន់ ឞ្រាសក្រីសយេឆូ យោៈមាគ៝ប់ គៃមាញហើនាវអ៝ត់នូយ្សពាង់ទុតហោងាន់ងេន កើតនទ្រីពាង់ជានគ៝ប់ជេងនាវនតឹតមាទឹងលែៈឞូនុយ្សអីឆឹតញឆីងមាពាង់ ទឹងគែសនាវរេសនហ៝រ៝។* 17 កើតនទ្រីអ៝ន់ឞ៝ន់យើកមាកោរាញឞ្រាសបាបើនហ៝រ៝ អ៝ន់ពាង់គែសនាវច្រេកលើបបាបើនហ៝រ៝។ ពាង់ជេងកាដាច់អីហោមគែសនហ៝រ៝ អីមោអោសឞ្លាវខឹត។ ឞូនុយ្សអ្វាញ់ពាង់មោឞ្លាវឆៃអោស ជេសរីមោហោមអោសគែសឞ្រាសអីងាន់អាអេងជឹត។ នាវអីនៃទីងាន់†!*

18 អើតីមោថេ ក៝នគ៝ប់ គ៝ប់នតិញមាមៃជេងតឹមទីមានាវអីឞូនុយ្សនតើយ្សនាវងើយកោរាញឞ្រាសលែៈមឞើសងក៝ចជេសមាមៃនើស អ៝ន់នាវមឞើសងក៝ចអីនៃនហាវនូយ្សនហ៝ម់មៃ អ៝ន់មៃតឹមរាទ៝ង់ដាសអាប់នតីលនាវអ្យើស តឹមឞានមាតាហែនតឹមលើសដាសឞូគៃមាទើយពាង់។* 19 នោកមៃគែសនាវតឹមរាទ៝ង់អ៝ន់មៃញអោតន៝ប់នាវញឆីង នទ្រែលមាជាននទើអីទីដាសកោរាញឞ្រាសអុចទើម។ យ៝រមាឞូនុយ្សអាបាៈរាលាច់មានទើអីទីដាសកោរាញឞ្រាសអុច នាវញឆីងខាន់ពាង់អីនៃលែៈរ៝សលែៈផ្យៅ។* 20 តាមពោលឞូនុយ្សអីនៃគែសហីមេនេស នទ្រែលមាអាលេកឆាន់ត្រុស ។ គ៝ប់លែៈញជុនជេសខាន់ពាង់អ៝ន់មាឆាតាង់ អីកោរាញមពោលឞ្រាសអ្យើសគៃមាលើសខាន់ពាង់‡ គៃមាខាន់ពាង់លើយហោមមឺចរាម៝តកោរាញឞ្រាស។*

*1:2 ១:២៖ ការ ១៦:១-៣

*1:3 ១:៣៖ ការ ២០:១

*1:5 ១:៥៖ យហ ១៣:៣៤-៣៥; រម ១២:១០

*1:7 ១:៥-៧៖ ១តម ៦:៣-៥

*1:8 ១:៨-១០៖ រម ៧:១២; កាល ៥:២២-២៣

*1:10 ១:១០៖ តានាវរាឞ្លាងអាបាៈគែសនត៝បញចីស «ផូងឞូអូរគុតឹមទ៝ង់នទ្រាង់ផូងឞូអូរ»។

*1:11 ១:១១៖ ២កោ ៣:១០-១២

*1:13 ១:១៣៖ ការ ៨:៣

*1:15 ១:១៥៖ លក ១៩:១០; រម ៥:៨

*1:16 ១:១៦៖ យហ ៦:៣៧; ការ ១៣:៣៨-៣៩; រម ១០:១៦

†1:17 ១:១៧៖ «នាវអីនៃទីងាន់» មោលាស «អាមែន »។

*1:17 ១:១៧៖ ១តម ៦:១៥-១៦; រម ១៦:២៧

*1:18 ១:១៨៖ ១តម ៤:១៤; ២តម ១:៦-៧

*1:19 ១:១៩៖ ១តម ១:៥; ៣:៩; អេផ ៤:១៩

‡1:20 ១:២០៖ នទើ«ញជុនមាឆាតាង់ » ឞូអ៝ក់គឹតគែសនាវខ្លៃលាស ពោល នទ្រែលមាកោរាញផូងញឆីងមាឞ្រាសយេឆូក្រីស មោហោមរ៝មឞូនុយ្សអីនៃតាផូងញឆីងអោស(១កោ ៥:១៣)។

*1:20 ១:២០៖ ២តម ២:១៧