នាវកោរាញឞ្រាសងើយនាវតឹមរាង្លាប់មហែ ២ កោរិនតោ 1

ឆ៝ម់បុតពោលញជ្វាល់អ៝ន់មាផូងញឆីងតាប៝ន

កោរិនតោ រើស ២

នាវឞោកអ៝ន់ឞូគឹតល៝រ

នើមញចីសឆ៝ម់បុតអ្យារាញាពោល ពាង់ញចីសឆ៝ម់បុតអ្យាក្លាប់លាសតានាម់ ៥៧ កើតឆ៝ម់បុតកោរិនតោរើស ១ ដ៝ង់។ ពាង់គុតាឞ្រីមាឆេដោន នោកពាង់ញចីសឆ៝ម់បុតអ្យា។

មាឆ៝ម់បុតអាអេងអីពោល ញចីសទាន់អ្វាញ់តាឆ៝ម់បុតរោមតានាវឞោក «ឆ៝ម់បុតពោល »។

ឆ៝ម់បុតអ្យាក្លាប់លាសឆ៝ម់បុតត៝ល់ព្វាន់អីពោល ញចីសញជ្វាល់អ៝ន់មាផូងញឆីងតាប៝នកោរិនតោ យើនមាអាបៃអ្យាគែសឞារអឹឆ៝ម់បុតកោរិនតោរើស ១ នទ្រែលមាឆ៝ម់បុតកោរិនតោរើស ២ ទើម។ អេល៝រមាពោល ញចីសឆ៝ម់បុតកោរិនតោរើស ១ ពាង់លែៈគែសញចីសឆ៝ម់បុតអាអេងញជ្វាល់អ៝ន់មាផូងញឆីងតាប៝នកោរិនតោ នៃ(១កោ ៥:៩) ឆ៝ម់បុតអីនៃមោហោមគែស លែៈរ៝ស។ លែៈលោចពោល ញចីសឆ៝ម់បុតកោរិនតោរើស ១ ឞើសប៝នអេផេឆោ ពាង់មោអោសគែសនាវដាប់មពាន់តានូយ្សនហ៝ម់ ជេសរីពាង់ដាៈនោតីតុស ហាន់ខ៝ល់ខាន់ពាង់ញអោតឆ៝ម់បុតង្វាយជឹត(២កោ ២:៣-៤; ៧:៨-១៦) ពោល ហោមក៝ប់តីតុស ព្លឹឆឹតតាប៝នអេផេឆោ មោអោសឆៃពាង់ នទ្រីពោល ហាន់តាប៝នត្រោអាស អ្វាញ់ពាង់តានៃមោដ៝ង់ឆៃ ជេសរីពាង់ហាន់ជឹតនាប់ជឹតត៝ត់តាឞ្រីមាឆេដោន ម៝ប់នោតីតុស តារី។ តីតុស មឞើសងក៝ចឞូនុយ្សញឆីងតាប៝នកោរិនតោ ជានតឹងនាវពោល ញចីសតាឆ៝ម់បុតរើស ១ នៃ យើនមាហោមគែសឞូនុយ្សអាបាៈមឺចមាពោល ។

នាវអុចនត្រ៝ង់តាឆ៝ម់បុតអ្យា

ពោល ញចីសឆ៝ម់បុតអ្យាគៃមាញហើពាង់នើមជេងកោរាញអ៝សម៝នងាន់ គៃមាដាៈផូងញឆីងតាប៝នកោរិនតោ នៃជានជេសនាវរាគូមព្រាក់មាកើលឞូនុយ្សអ៝អាចតាប៝នយេរូឆាលឹម ។ ពាង់ញចីសដ៝ង់គៃមាអ៝ន់ផូងអីមឺចពាង់ហោមគែសម៝ងមារាគ៝ល់នូយ្សនហ៝ម់ អេល៝រមាពាង់នើមហាន់ខ៝ល់តាប៝នកោរិនតោ នៃ។

ទាន់អ្វាញ់ដ៝ង់តានាវឞោកអ៝ន់ឞូគឹតតាឆ៝ម់បុតកោរិនតោរើស ១។

មឞើសនាវខ្លៃតាឆ៝ម់បុតអ្យា

- នាវអោបអ្វែសលាង់ (១:១-១១)

- នាវជានការពោល (១:១២-៦:១៣)

- នាវដាៈ នអ៝ប់មានាវនហាវនូយ្សនហ៝ម់អ៝ន់មាផូងញឆីងតាប៝នកោរិនតោ (៦:១៤-៩:១៥)

- នាវអើសពោល អ៝ន់មាផូងអីតឹមរាលាច់ដាសពាង់ នអ៝ប់មានាវពាង់ជេងកោរាញអ៝សម៝ន (១០:១-១៣:១០)

- នាវនតិញងគ្លែៈទុត (១៣:១១-១៤)

នាវអោបអ្វែសលាង់

1 ឆ៝ម់បុតគ៝ប់ពោល គ៝ប់អីកោរាញអ៝សម៝នឞ្រាសក្រីសយេឆូ តាៈឞើសនាវអុចកោរាញឞ្រាសនើម។ គ៝ប់ នទ្រែលមាតីមោថេ អីអ៝សនោឞ៝ន់តានាវញឆីងទាន់អោបនាវអ្វែសលាង់ផូងអីញឆីងមាកោរាញឞ្រាសតាប៝នកោរិនតោ នទ្រែលមាទាន់អោបនាវអ្វែសលាង់ទឹងលែៈផូងប៝នលានកោរាញឞ្រាសអីគុលាមឞ្រីអាខៃ ។* 2 ទាន់កោរាញឞ្រាសឞឹឞ៝ន់ នទ្រែលមាកោរាញយេឆូក្រីស អ៝ន់នាវអ្វែស អ៝ន់នាវដាប់មពាន់មាខាន់អៃមៃ។

នាវនហាវនូយ្សតាប៝នកោរិនតោ

3 អ៝ន់រានេមាកោរាញឞ្រាសអីឞឹឞ្រាសយេឆូក្រីស កោរាញឞ៝ន់។ ពាង់ជេងឞឹឞ៝ន់អីគែសនាវយោៈនអាចទុតក្វ៝ង់ ពាង់ជេងតើមទឹងលែៈនាវកើលរាថីនូយ្សនហ៝ម់អាប់នតីល។* 4 ពាង់កើលរាថីនូយ្សនហ៝ម់ឞ៝ន់នោកឞ៝ន់រេសរាញាល់អាប់នតីល គៃមាឞ៝ន់ឞ្លាវកើលរាថីនូយ្សនហ៝ម់ឞូនុយ្សអីគែសនាវរេសរាញាល់ កើតកោរាញឞ្រាសលែៈកើលរាថីមាឞ៝ន់។* 5 ទាសអ៝ក់ឞ៝ន់លែៈគែសជេសនាវជេរជ៝ត់អេងៗយ៝រមាឞ៝ន់គុនទ្រែលឞ្រាសក្រីស លើមាហោជឹតឞ៝ន់ឆ៝ៈទើននាវរាថីតានូយ្សនហ៝ម់យ៝រមាឞ្រាសក្រីស ដ៝ង់។* 6 លាសហេនគែសរេសរាញាល់ នទើអីនៃគៃមាអ៝ន់ខាន់អៃមៃគែសរាថីនូយ្សនហ៝ម់ នទ្រែលមាគែសនាវរាក្លាយ្ស។ លាសកោរាញឞ្រាសរាថីនូយ្សនហ៝ម់ហេន ហេនឞ្លាវរាថីនូយ្សនហ៝ម់ខាន់អៃមៃ ជេសរីខាន់អៃមៃទើយញឆ្រោយ្សមានាវជេរជ៝ត់អេងៗអីតឹមឞានមានាវជេរជ៝ត់ហេនដ៝ង់។* 7 ជេសរីនោកហេនគុមឹនខាន់អៃមៃ ហេនគែសនាវរានើមទុតន៝ប់ងាន់ យ៝រមាហេនលែៈគឹតនហេលត៝ត់ខាន់អៃមៃគែសនាវជេរជ៝ត់កើតហេន ខាន់អៃមៃមរាគែសនាវរាថីនូយ្សនហ៝ម់កើតហេនដ៝ង់។

8 អើអ៝សនោតានាវញឆីង ហេនអុចខាន់អៃមៃគឹតនាវជេរជ៝ត់អីហេនលែៈគែសជេសតាឞ្រីអាឆី នើស។ តានៃហេនគែសនាវជេរជ៝ត់ទុតហោងាន់ ឞើយមាខឹត ហេនមោហោមអោសរានើមមារេសជឹត។* 9 ហេនមឹនលាសហេនមរាខឹតងាន់រ៝*។ យើនមានទើអីនៃគៃមាលើយអោសអ៝ន់ហេនញឆីងមាឆាក់ហេននើម អ៝ន់ហេនញឆីងមាកោរាញឞ្រាសអីជានឞូនុយ្សខឹតអ៝ន់ទ៝ក់រេសហ៝ៈ។ 10 ជេសរីពាង់រាក្លាយ្សហេនឞើសនាវខឹតឞើសនាវរ៝សហេង ជេសរីជឹតនាប់តៃពាង់ហោមរាក្លាយ្សដ៝ង់។ ងាន់រ៝ ហេនរានើមពាង់ហោមរាក្លាយ្សតៃហេនដ៝ង់។* 11 ទាន់ខាន់អៃមៃហោមកើលហេនតានាវមឞើសឆើមមាហេនដ៝ង់។ អ៝ក់ឞូនុយ្សមរាលាសអ្វែសកោរាញឞ្រាស យ៝រលាសពាង់អើសនាវមឞើសឆើមអ៝ក់មាហេនកើតនៃ។

នទើពោល នទ្រាប់

12 តានូយ្សនហ៝ម់ហេននើមលែៈគឹតនហេល នាវគុងាវហេនតានែសនតូអ្យាហេនគុរាប់ជាប់មាលែៈនូយ្សនហ៝ម់ ងើយនាវងាន់ទើម ហេនជានកើតនៃតានាប់ទឹងលែៈឞូនុយ្ស លើមាហោជានតានាប់ខាន់អៃមៃ។ តានាវអីនៃ ហេនមោអោសទ៝ង់នាវមឹនគឹតឞ្លាវឞូនុយ្ស យើនមាគុងាវតឹងមានាវកោរាញឞ្រាសនើមអុច តាៈឞើសនាវពាង់កើលមានាវអ្វែសពាង់នើម។ គ៝ប់រាម់មអាកងាន់មានាវអីនៃ។* 13 តាឆ៝ម់បុតហេនលែៈញជ្វាល់អ៝ន់ខាន់អៃមៃនើស ហេនមោអោសញចីសនាវងើយហោរ ហេនញចីសនាវងើយងាន់ នាវងើយនហេល នាវងើយអីខាន់អៃមៃទើយគឹតវ៝ត់នៃទើម។ ជេសរីគ៝ប់រានើមលាសខាន់អៃមៃមរាគឹតវ៝ត់ទាទេទឹងលែៈនាវខ្លៃហេនលែៈញចីសនើស‌ 14 ឞ៝លលាសអាបៃអ្យាខាន់អៃមៃគឹតវ៝ត់អាបាៈទើម។ លាសខាន់អៃមៃគឹតវ៝ត់ទាទេ ខាន់អៃមៃមរារាម់មអាកមាហេនតានារកោរាញយេឆូ ព្លឹវាច់តាអ្យាតៃ កើតហេនមរារាម់មអាកមាខាន់អៃមៃដ៝ង់។*

15-16 យ៝រមានាវគ៝ប់រានើមន៝ប់កើតនៃ ទឹងអាល៝រនើសគ៝ប់អុចវែសខ៝ល់ខាន់អៃមៃប៝ត់ អេល៝រមាហាន់ជឹតឞ្រីមាឆេដោន ជេសរីព្លឹវែសតៃតាខាន់អៃមៃទូតឹជឹតនោកព្លឹឆឹតឞើសឞ្រីមាឆេដោន គៃមាគែសនាវខ្លៃមាខាន់អៃមៃឞារតឹ។ ជេសរីគៃមាខាន់អៃមៃកើលគ៝ប់ហាន់តាឞ្រីយូដា ដ៝ង់។* 17 លាសនទ្រីនាវអីគ៝ប់លែៈនទ្រាប់ជានកើតនៃ អើមគ៝ប់គែសនាវមឹនព្លាច់នាប់ព្លាច់កើយឞើស? មោលាសនាវអីគ៝ប់លែៈនទ្រាប់នទើ អើមគ៝ប់នទ្រាប់តឹមឞានមាឞូនុយ្សអីមោញឆីងមាឞ្រាសក្រីស អីទូតឹងើយនអា ទូតឹងើយនត៝កើតនៃឞើស?* 18 ឞ៝ន់លែៈគឹតនហេលកោរាញឞ្រាសរាប់ជាប់ងាន់ កើតនទ្រីដ៝ង់នាវអីហេនមឞើសងក៝ចមាខាន់អៃមៃមោគែសអោសទូតឹងើយនអា ទូតឹងើយនត៝‌ 19 យ៝រលាសឞ្រាសយេឆូក្រីស អីក៝នកោរាញឞ្រាសអីពែនុយ្សហេនមឞើសងក៝ចអ៝ន់មាខាន់អៃមៃនៃនើស គែសគ៝ប់ គែសឆីលាស † នអ៝ប់មាតីមោថេ ហេនមឞើសងក៝ចពាង់រាប់ជាប់នឹង ពាង់មោគែសអោសងើយទាសមារាព្លាច់នាប់រាព្លាច់កើយ ពាង់ងើយទូត៝ងគឹតលាសទូត៝ងរ៝។ 20 ទឹងលែៈនាវកោរាញឞ្រាសត៝នលែៈគែសងាន់តាឞ្រាសក្រីស ទាទេ។ កើតនទ្រីទឹងឞ៝ន់លាស «នាវអីនៃទីងាន់‡» នទ្រែលមារានេនាវច្រេកលើបកោរាញឞ្រាស យ៝រមានទើឞ្រាសក្រីស លែៈជានមាឞ៝ន់។*

21 កោរាញឞ្រាសនើមអ៝ន់ហេន នទ្រែលមាអ៝ន់ខាន់អៃមៃគែសនាវញឆីងន៝ប់តាឞ្រាសក្រីស នអ៝ប់មាកើយ្សឞ៝ន់អ៝ន់ជេងប៝នលានពាង់នើម។ 22 លែៈពាង់អ៝ន់ជេសឞ្រាសហ្វេងអ្វែសគុតានូយ្សនហ៝ម់ឞ៝ន់ ជេងតឹមឞានមាតេៈនទើព្លាក្រេបតាឞ៝ន់ គៃមាឞ៝ន់គឹតនហេលពាង់មរាអ៝ន់ទឹងលែៈនទើពាង់លែៈត៝នមាឞ៝ន់ជឹតនាប់តៃ។* 23 គែសកោរាញឞ្រាសនើមនាក់តើមឆៃ គ៝ប់មោហ៝ចហាន់អោសអាប៝នកោរិនតោ យ៝រលាសគ៝ប់យោៈខាន់អៃមៃ មោអុចលាសទាង់ខាន់អៃមៃ។* 24 ហេនមោអុចជេងកោរាញខាន់អៃមៃ អ៝ន់ខាន់អៃមៃអ្យាត់នាវហេនដាៈទើម យ៝រលាសខាន់អៃមៃគែសនាវញឆីងន៝ប់ងាន់ ហេនអុចជានការនទ្រែលឞាល់ គៃមាអ៝ន់ខាន់អៃមៃគែសនូយ្សនហ៝ម់រាម់មអាក។*

*1:1 ១:១៖ ការ ៩:១៥; ១៦:១-៣

*1:3 ១:៣៖ អេផ ១:៣

*1:4 ១:៤៖ ២កោ ៧:៦

*1:5 ១:៥៖ ២កោ ៤:៩-១១, ១៧; ២តម ៣:១២

*1:6 ១:៦៖ ២កោ ៤:១៥

*1:8 ១:៨៖ ១កោ ១៥:៣២

*1:9 ១:៩៖ «ហេនមរាខឹតងាន់រ៝» មោលាស «ឞូតេៈទោយ្សហេនត៝ត់ខឹតឆាក់»។

*1:10 ១:១០-១១៖ កោល ៤:៣-៤

*1:12 ១:១២៖ ២កោ ២:១៧; ១កោ ៤:៤

*1:14 ១:១៤៖ ២កោ ៥:១២; ១កោ ១៥:៣១

*1:15-16 ១:១៥-១៦៖ ១កោ ១៦:៥-៧

*1:17 ១:១៧៖ យាក ៤:១៣-១៥; ៥:១២

†1:19 ១:១៩៖ តានាវងើយគ្រែក គែសរាញាពាង់លាស៖ «ឆីលវានុស » ជេងរាញាឞារអឹ ពាង់ឞូនុយ្សហាន់នទ្រែលពោល អ៝ក់ងាន់(ការ ១៥:៤០)។

‡1:20 ១:២0៖ «នាវអីនៃទីងាន់» មោលាស «អាមែន »។

*1:20 ១:២០៖ លក ២៤:៤៤-៤៦; ការ ១៧:៣; ១៨:៥; នតម ៣:១៤

*1:22 ១:២២៖ ២កោ ៥:៥; រម ៨:១១, ២៣; អេផ ១:១៣-១៤

*1:23 ១:២៣៖ ២កោ ១៣:២; ១កោ ១៦:៥-៧

*1:24 ១:២៤៖ ២កោ ៤:៥; ១ពេ ៥:៣