នាវកោរាញឞ្រាសងើយតានាវងើយឞូន៝ង ២ កោរិនតោ ៤

៤

ឞូនុយ្សនាក់មឞើសងក៝ចនាវមហែមហានអ្វែស

១ លាសនទ្រីហេនមោអោសទឹលនូយ្សនហ៝ម់តានាវជានការមឞើសងក៝ចនាវមហែមហានអ្វែស យ៝រលាសកោរាញឞ្រាសដាៈហេនជានតាៈឞើសនាវយោៈពាង់នើម។ ២ ហេនរាលាច់មោអុចអោសជាននទើនទ៝ប់មពោនអីគែសនាវដីតព្រេង។ ហេនមោអោសមរោសឞូ មោអោសនតីងក្លាៈនាវកោរាញឞ្រាស ហេនមឞើសងក៝ចនាវងាន់តានាប់មាត់កោរាញឞ្រាស ជេសរីឞូម៝សអីគឹតនាល់កោរាញឞ្រាសលែៈគឹតជេសនាវអីនៃជេងទី។* ៣ លាសនាវខ្លៃតានាវមហែមហានអ្វែសអីហេនមឞើសងក៝ចនៃ ឞូអេហ៝ៈវ៝ត់តឹមឞានមានទ៝ប់មពោនងកុមមាឞ៝ក គែសនទ៝ប់មពោនមាផូងអីរ៝សហេងទើម។* ៤ ផូងអីនៃមោអោសញឆីង យ៝រលាសលែៈឆាតាង់ អីកោរាញមពោលឞ្រាសអ្យើសជានអ៝ន់នូយ្សនហ៝ម់ខាន់ពាង់ជេងង៝ មោអោសអ៝ន់ខាន់ពាង់ឆៃនាវអាងតានាវមហែមហានអ្វែស នាវមហែមហានអ្វែសអីនៃញហើនាវច្រេកលើបឞ្រាសក្រីស នទ្រែលមាពាង់តឹមឞានមាកោរាញឞ្រាសនើមងាន់។* ៥ ហេនមោអោសមឞើសងក៝ចមាឆាក់ហេននើម ហេនមឞើសងក៝ចឞ្រាសយេឆូក្រីស ជេងកោរាញ ជេសរីកើបឆាក់ហេននើមជេងឞូនុយ្សឆើមកើលជានការអ៝ន់មាខាន់អៃមៃ*យ៝រមាឞ្រាសយេឆូ ។* ៦ កោរាញឞ្រាសលែៈលាសជេស៖ «អ៝ន់លោសអាងហ៝ម់ឞើសនាវង៝»† ជេសរីពាង់លែៈងអាងជេសតានូយ្សនហ៝ម់ឞ៝ន់ អ៝ន់ឞ៝ន់នាល់នាវច្រេកលើបកោរាញឞ្រាសនើម អីអាងច្រាតឞើសមុសមាត់ឞ្រាសក្រីស ។*

៧ ហេនគែសនាវអាងអ្វែសអីនៃតានូយ្សនហ៝ម់ យើនមាហេនជេងតឹមឞានមាគ្លាសអូកអីហោមឞ្លាវចាស យើនមាគែសទ្រាប់នទើខ្លៃតាត្រោម គៃមាអ៝ន់ឞូឆៃនាវទើយអីទុតក្វ៝ង់តាហេនតាៈឞើសកោរាញឞ្រាសនើម មោអោសតាៈឞើសឆាក់ហេននើម។* ៨ ហេនគែសនាវជេរអាប់នតីលងាន់ យើនមានាវជេរអីនៃមោអោសទើយឞ្វៃហេន គែសដ៝ង់ហេនមោគឹតអោសមើមជាន យើនមាហេនមោអោសមអារ់នាវរានើម។ ៩ អាបៃអ្យាឞូជានជេរមាហេន យើនមាកោរាញឞ្រាសមោអោសនត្លើយហេន គែសឞូមឞាងហេនងាន់ យើនមាហេនមោខឹតអោស។* ១០ តាទឹងលែៈនាវជេរហេនតឹមឞានមាហេនគុនទ្រែលនឹងតានាវជេរនអ៝ប់មានាវខឹតឞ្រាសយេឆូ យើនមាតាៈឞើសទឹងលែៈនាវអីនៃឞូទើយឆៃតាឆាក់ហេននាវទើយឞ្រាសយេឆូ អីលែៈទ៝ក់រេសងាន់ យ៝រលាសពាង់កើលហេននឹង។ ១១ នាវរេសហេនឞើយមាខឹតនឹងយ៝រមាហេនឆើមកើលជានការមាឞ្រាសយេឆូ យើនមាតាៈឞើសទឹងលែៈនាវអីនៃឞូទើយឆៃតាឆាក់ហេននាវទើយឞ្រាសយេឆូ អីលែៈទ៝ក់រេសងាន់ ឞ៝លលាសឆាក់ហេនឞ្លាវខឹត។ ១២ កើតនទ្រីហេនគុរេសទាច់ដាសនាវខឹតនឹង យើនមាតាៈឞើសនាវអីនៃទឹងខាន់អៃមៃគែសនាវរេសនហ៝រ៝។*

១៣ លែៈគែសញចីសតានាវកោរាញឞ្រាសងើយ៖ «គ៝ប់ញឆីងមាកោរាញឞ្រាសទឹងគ៝ប់ងើយ»†។ តានូយ្សនហ៝ម់ហេនគែសនាវញឆីងកើតនៃដ៝ង់ នទ្រីទឹងហេនហោមមឞើសងក៝ចនាវកោរាញឞ្រាស។* ១៤ យ៝រមាឞ៝ន់គឹតជេសកោរាញឞ្រាសលែៈជានអ៝ន់កោរាញយេឆូ ទ៝ក់រេសនើស នទ្រីពាង់មរាជានអ៝ន់ឞ៝ន់ទ៝ក់រេសកើតកោរាញយេឆូ ដ៝ង់ ជេសរីលែវឞ៝ន់គុតានាប់កោរាញឞ្រាសនើមនទ្រែលខាន់អៃមៃដ៝ង់។* ១៥ ទឹងលែៈនាវជេរហេន គៃមាគែសនាវខ្លៃមាខាន់អៃមៃ។ យ៝រលាសគែសអ៝ក់ឞូនុយ្សមហែគឹតនាល់នាវអ្វែសកោរាញឞ្រាស គែសដ៝ង់លើមាអ៝ក់ឞូនុយ្សលាសអ្វែសកោរាញឞ្រាស នទ្រែលមារានេនាវច្រេកលើបពាង់លើមាហោដ៝ង់។*

នាវរេសនហ៝រ៝

១៦ លាសនទ្រីហេនមោគែសនាវទឹលអោសតានាវជានការហេន។ ឞ៝លលាសឆាក់ជាន់ហេននហ៝ម់ឆ្វានលើមាលែៈកាដោយ យើនមាតានូយ្សនហ៝ម់នាវមឹនហេនរីលើមាគែសនហ៝ម់ឆ្វានមហែអាប់នារ។* ១៧ នាវជេរជ៝ត់អីហេនគែសអាបៃអ្យាតឹមឞានមាដេៈដាៈ នអ៝ប់មាទូប្ល៝ត់ទើម យើនមានាវអីនៃជានអ៝ន់ហេនគែសនាវច្រេកលើបទុតហោងាន់អីហោមនហ៝រ៝។* ១៨ លាសនទ្រីហេនមោអោសកើបខ្លៃមានទើអីអ្វាញ់ឆៃ យើនមាហេនកើបខ្លៃមានទើអីអ្វាញ់មោឆៃ យ៝រលាសនទើអីអ្វាញ់ឆៃតឹមឞានមាគែសទូប្ល៝ត់ទើម យើនមានទើអីអ្វាញ់មោឆៃ ជេងនទើអីហោមគែសនហ៝រ៝។

*៤:២ ៤:២៖ ២កោ ២:១៧; ១តេ ២:៣-៦

*៤:៣ ៤:៣៖ ១កោ ១:១៨

*៤:៤ ៤:៤៖ យហ ១៤:៧-១០; កោល ១:១៥; ហេឞ ១:៣

*៤:៥ ៤:៥៖ «ឞូនុយ្សឆើមកើលជានការអ៝ន់មាខាន់អៃមៃ» មោលាស «ទឹកខាន់អៃមៃ»។

*៤:៥ ៤:៥៖ ២កោ ១:២៤; ១កោ ២:១-២

†៤:៦ ៤:៦៖ នន ១:៣

*៤:៦ ៤:៦៖ ១ពេ ២:៩

*៤:៧ ៤:៧៖ ២កោ ៥:១; ១២:៩

*៤:៩ ៤:៩-១១៖ ២កោ ១១:២៣-២៩; ១កោ ៤:៩; ១៥:៣១; ២តម ៣:១២

*៤:១២ ៤:១២៖ ១កោ ៤:១០

†៤:១៣ ៤:១៣៖ នម ១១៦:១០

*៤:១៣ ៤:១៣៖ ការ ៤:២០; ១កោ ៩:១៦

*៤:១៤ ៤:១៤៖ រម ៦:៨; ៨:១១; ១កោ ៦:១៤; ១៥:២០

*៤:១៥ ៤:១៥៖ ២កោ ១:៦

*៤:១៦ ៤:១៦៖ ១កោ ៩:២៧; អេផ ៣:១៦

*៤:១៧ ៤:១៧-១៨៖ រម ៨:១៧-២២; ២តម ៣:១២