នាវកោរាញឞ្រាសងើយតានាវងើយឞូន៝ង ២ យោហាន ១

ឆ៝ម់បុត

យោហាន

ញចីស

រើស ២

នាវឞោកអ៝ន់ឞូគឹតល៝រ

នើមញចីសឆ៝ម់បុតអ្យារាញាយោហាន ពាង់ញចីសឆ៝ម់បុតអ្យាក្លាប់លាសតានាម់ ៦០-៩០។ តានាវងើយគ្រែក មោអោសគែសញចីសរាញាយោហាន តាឆ៝ម់បុតអ្យា នើមញចីសក្វាល់ឆាក់ពាង់នើម«កោរាញ» យើនមាផូងកោរាញផូងញឆីងមាឞ្រាសក្រីស អ៝ក់នាម់ឞើសកើយជេសឞូញចីសនាវតឹមរាង្លាប់មហែ ញចីសលាសនើមញចីសយោហាន អីកោរាញអ៝សម៝នឞ្រាសក្រីស ។ ឞូមឹនលាសពាង់ញចីសឆ៝ម់បុតអ្យាតាប៝នអេផេឆោ ពាង់ញជ្វាល់ឆ៝ម់បុតអ្យាអ៝ន់មា«យោសឞូអូរ នទ្រែលមាផូងអ៝សក៝នឞូអូរអីនៃ» គែសឞូនុយ្សអាបាៈមឹនលាសខាន់ពាង់អីនៃជេងទូហ្វេឞូអូរនអ៝ប់មាអីក៝នពាង់អីយោហាន គឹតនាល់ គែសឞូនុយ្សអ៝ក់មឹនលាសងើយហោរមាផូងញឆីងទូនតុក។ យោហាន ញចីសឆ៝ម់បុតយោហាននាវមហែមហានអ្វែសដ៝ង់ ឆ៝ម់បុតយោហានរើស ១‌ រើស ៣ នទ្រែលមាឆ៝ម់បុតនាវតឹមមពើលដ៝ង់។

នាវអុចនត្រ៝ង់តាឆ៝ម់បុតអ្យា

តាឆ៝ម់បុតអ្យាយោហាន នហាវនូយ្សនហ៝ម់នទ្រាង់ផូងញឆីងអ៝ន់តឹមរ៝ង់នទ្រាង់ខាន់ពាង់នើម ពាង់នតីលាសឞូម៝សអីរ៝ង់មាឞូជេងអ្យាត់នាវកោរាញឞ្រាសដាៈ ជេសរីពាង់ដាៈញជ្រាង់នាវនតីងក្លាៈ។

មឞើសនាវខ្លៃតាងកោៈតាឆ៝ម់បុតអ្យា

- នាវអោបអ្វែសលាង់ (១:១-៣)

- នាវតឹមរ៝ង់នទ្រាង់ឞូនុយ្សញឆីង (១:៤-៦)

- នើមនតីងក្លាៈ (១:៧-១១)

- នាវនតិញងគ្លែៈទុត (១:១២-១៣)

១

នាវអោបអ្វែសលាង់

១ ឆ៝ម់បុតអ្យាតាៈឞើសគ៝ប់យោហាន អីកោរាញតាផូងអីញឆីងមាឞ្រាសយេឆូក្រីស ។ ទាន់អោបនាវអ្វែសលាង់មាយោសឞូអូរ នទ្រែលមាផូងអ៝សក៝នឞូអូរអីនៃ*។ លែៈកោរាញឞ្រាសទែកើយ្សខាន់អៃមៃជេស។ គ៝ប់រ៝ង់ខាន់អៃមៃងាន់ងេន។ មោអោសទើនទូហ្វេគ៝ប់ទើមអីគែសនាវរ៝ង់អីនៃ ទឹងលែៈមពោលអីលែៈគឹតនាល់នាវងាន់ ខាន់ពាង់គែសនាវរ៝ង់អីនៃដ៝ង់។* ២ នាវរ៝ង់អីនៃគែសយ៝រលាសនាវងាន់លែៈគុជេសនទ្រែលឞ៝ន់អាបៃអ្យា ជេសរីហោមគុនទ្រែលឞ៝ន់បាបើនហ៝រ៝។ ៣ ទាន់កោរាញឞ្រាសឞឹ នទ្រែលមាឞ្រាសយេឆូក្រីស អីក៝នកោរាញឞ្រាសឞឹនើម អ៝ន់នាវអ្វែស នាវយោៈ នាវដាប់មពាន់មាផូងឞ៝ន់អីគុតានាវនតីអីងាន់ នទ្រែលមាគុតានាវរ៝ង់។*

នាវតឹមរ៝ង់នទ្រាង់អ៝សនោតានាវញឆីង

៤ គ៝ប់គែសនាវរាម់មអាកហោងាន់ យ៝រមាឆៃអ៝សក៝នអៃអាបាៈអីលែៈគុរេសជានតឹងនាវនតីអីងាន់ ជេងតឹមទីដាសនាវកោរាញឞ្រាសឞឹដាៈឞ៝ន់នើស។* ៥ អើយោសតានាវញឆីង តាឆ៝ម់បុតអីគ៝ប់ញចីសញជ្វាល់អ្យា គ៝ប់អុចងកាសតោរអៃ អ៝ន់ផូងឞ៝ន់តឹមរ៝ង់នទ្រាង់ឞ៝ន់នើម។ នាវដាៈមានាវរ៝ង់អីនៃមោទីអោសនាវដាៈមហែ ជេងនាវដាៈអើមអីផូងឞ៝ន់លែៈអើមគែសនតើមឞើសឆាអើមនើស។* ៦ នាវតឹមរ៝ង់នទ្រាង់ឞ៝ន់នើមគែសនាវខ្លៃលាសជានតឹងនាវកោរាញឞ្រាសលែៈដាៈមាផូងឞ៝ន់។ ពាង់ដាៈផូងឞ៝ន់តឹមរ៝ង់នទ្រាង់ឞ៝ន់នើម នទ្រីអៃលែៈតាង់នតើមឞើសឆាអើមនើស។*

នើមនតីងក្លាៈ

៧ តានែសនតូអ្យាលែៈគែសអ៝ក់មពោលអីមរោសឞូអ៝ន់ជានតីស មពោលអីនៃនតីកើតនអា៖ ឞ្រាសយេឆូក្រីស វាច់តាអ្យាមោអោសជេងរាង្លៃឆាក់ឞូនុយ្សងាន់។ ឞូម៝សអីនតីកើតនៃ ពាង់ជេងឞូនុយ្សមរោសឞូ ជេងឞូនុយ្សអីតឹមរាទ៝ង់ដាសឞ្រាសក្រីស ។* ៨ អ៝ន់ខាន់អៃមៃញជ្រាង់ងាន់ហ៝ម់ ក្លាចលាសរ៝សនាវងខោមមានទើអីទឹងលែៈឞ៝ន់លែៈញឆ្រោយ្សជានការ។ យើនមាអ៝ន់ខាន់អៃមៃញឆ្រោយ្សជានការគៃមាឆ៝ៈទើននាវងខោមអីនៃអ៝ន់រឹង។ ៩ ឞូម៝សអីមោញអោតន៝ប់នាវនតីឞ្រាសក្រីស ជានរាលាវតានាវនតីអីនៃ ពាង់អីនៃមោគែសអោសកោរាញឞ្រាសគុនទ្រែល។ យើនមាឞូម៝សអីញអោតន៝ប់នាវនតីអីនៃ ពាង់អីនៃគែសកោរាញឞ្រាសឞឹ នទ្រែលមាក៝នកោរាញឞ្រាសនើមគុនទ្រែលតាពាង់។* ១០ លាសឞូម៝សអីហាន់តាខាន់អៃមៃ មោនតីនាវអីនៃមាខាន់អៃមៃ លើយអោសរ៝មពាង់គុតាត្រោមជៃខាន់អៃមៃ ជេសរីលើយអោសអោបនាវអ្វែសលាង់ពាង់ដ៝ង់។* ១១ ឞូម៝សអីអោបនាវអ្វែសលាង់ឞូនុយ្សអីកើតនៃ ជេងលែៈតឹមទីនាវនទ្រែលនាវអ្យើសឞូនុយ្សអីនៃជានដ៝ង់។

១២ គែសអ៝ក់នាវជឹតអីគ៝ប់អុចញចីសអ៝ន់មាខាន់អៃមៃ យើនមាគ៝ប់មោអុចអោសញចីសមាទាកក្រាក់តានហារាដាយ្ស យ៝រលាសគ៝ប់រានើមហាន់ខ៝ល់ខាន់អៃមៃ តឹមងើយនទ្រែលខាន់អៃមៃ គៃមាទឹងលែៈឞ៝ន់គែសនាវរាម់មអាកលើមាហោងាន់។* ១៣ ល៝ង់អ៝សក៝នយោសខាន់អៃមៃ†អីលែៈកោរាញឞ្រាសទែកើយ្សនើស ខាន់ពាង់អោបនាវអ្វែសលាង់ខាន់អៃមៃដ៝ង់៕៚

*១:១ ១:១៖ «យោសឞូអូរ»អីនៃឞូមឹនលាស ងើយមាផូងញឆីងអីរាបុនតានតុកង្វាយ ជេសរី«អ៝សក៝នឞូអូរ»អីនៃ ងើយមាទឹងលែៈឞូនុយ្សអីញឆីងមាឞ្រាសក្រីស តានតុករាបុនអីនៃ។

*១:១ ១:១៖ ៣យហ ១:១; យហ ១៤:៦

*១:៣ ១:៣៖ ១តម ១:២; ២តម ១:២

*១:៤ ១:៤៖ ៣យហ ១:៣-៤

*១:៥ ១:៥៖ យហ ១៣:៣៤

*១:៦ ១:៦៖ យហ ១៤:១៥; ១យហ ៥:៣

*១:៧ ១:៧៖ ១យហ ៤:១-៣

*១:៩ ១:៩៖ យហ ៧:១៦; ១២:៤៩; ១យហ ២:២៣

*១:១០ ១:១០៖ រម ១៦:១៧

*១:១២ ១:១២៖ ៣យហ ១:១៣-១៤

†១:១៣ ១:១៣៖ មោលាស «ល៝ង់ទឹងលែៈឞូនុយ្សអីញឆីងមាឞ្រាសយេឆូក្រីស តានតុកអ្យា»។