នាវកោរាញឞ្រាសងើយតានាវងើយឞូន៝ង ២ តេឆាលោនិក ២

២

នទើត៝ត់អេល៝រមាឞ្រាសយេឆូ វាច់

១ អើអ៝សនោ គ៝ប់អុចញចីសមាខាន់អៃមៃមានាវវាច់ឞ្រាសយេឆូក្រីស អីកោរាញឞ៝ន់នើម នអ៝ប់មានាវពាង់រាគូមឞ៝ន់គៃមាគុនទ្រែលពាង់។ ហេនទាន់ខាន់អៃមៃហោងាន់* ២ លើយអោសគើញគែសនូយ្សនហ៝ម់វិ មោលាសគែសនាវនទ្រ៝ត់រាវៃយ៝រមាតាង់ឞូមឞើសងក៝ចលាសនារឞ្រាសយេឆូ វាច់លែៈត៝ត់ជេស។ ឞ៝លលាសគែសឞូនុយ្សអាបាៈលាសឞ្រាសហ្វេងអ្វែសលែៈមឞើសងក៝ចមាខាន់ពាង់ មោលាសគែសឞូនុយ្សមឞើសងក៝ចអេង មោលាសគែសឞូនុយ្សលាសហេនលែៈគែសញចីសតាឆ៝ម់បុតកាដោយ។* ៣ លើយអោសអ៝ន់ឞូមរោសខាន់អៃមៃ ដេៈមោអើម យ៝រលាសអេល៝រមានារឞ្រាសយេឆូ វាច់នៃ គែសអ៝ក់ឞូនុយ្សតឹមរាទ៝ង់មអារ់លើយកោរាញឞ្រាស នទ្រែលមាឞូឆៃគែសទូហ្វេឞូនុយ្សតីស*ញឆោសឆាក់ យើនមាកោរាញឞ្រាសលែៈនទ្រាប់នាវរ៝សហេងមាពាង់ងាន់រ៝†។* ៤ ពាង់អីនៃតឹមរាទ៝ង់ដាសទឹងលែៈនទើអីឞូកើបលាសឞ្រាស មាទឹងលែៈនទើអីឞូយើកមឞាស នហាវអេងឆាក់ពាង់នើមខ្លៃរាលាវមាទឹងលែៈនទើអីនៃ នហ៝មាពាង់គុតានតុកញីសជានឞ្រាសមាកោរាញឞ្រាស ជេសរីមឞើសអេងឆាក់ពាង់នើមលាសកោរាញឞ្រាសដ៝ង់។* ៥ អាសខាន់អៃមៃហោមកាសគឹតដ៝ង់ នោកគ៝ប់គុនទ្រែលខាន់អៃមៃនើស? នាវអីនៃគ៝ប់លែៈមឞើសងក៝ចមាខាន់អៃមៃលែៈផ្យៅ។ ៦ យើនមាអាបៃអ្យា នទើ ‡អីងកីងពាង់ ខាន់អៃមៃលែៈនាល់ជេស§ ពាង់ញឆោសឆាក់ត៝ត់ទីនារពាង់ញឆោសមើ។ ៧ អាបៃអ្យាឆាតាង់ អីកោរាញមពោលឞ្រាសអ្យើស*លែៈអ៝ន់ឞូនុយ្សតឹមរាទ៝ង់មានាវវៃកោរាញឞ្រាស យើនមាហោមជានមពោន នហ៝មាត៝ត់ទីនារទូហ្វេឞូនុយ្សអីងកីងពាង់រីលែៈរ៝សក្ល៝ក់ជេស។ ៨ រីមើឞូនុយ្សទុតតីសអីនៃញឆោសឆាក់ ជេសរីឞ្រាសយេឆូ លើសហេងពាង់មានហ៝ម់អីលោសតាៈឞើសមឞូងឞ្រាសយេឆូ នើម មានាវច្រេកលើបតានាវវាច់ឞ្រាសយេឆូ នើមងគ្រ៝សលើយពាង់។* ៩ អេល៝រមានារអីនៃ ឞូនុយ្សទុតតីសអីនៃ ពាង់វាច់មានាវទើយឆាតាង់ ពាង់ជានអាប់នតីលនទើក្វ៝ង់ ជាននទើទុតនាវងាន់ ជាននាវមឞេនអេងៗ។ យើនមាទឹងលែៈនទើអីនៃជេងនាវងក្លាៈទាទេ។ ១០ ពាង់ជាននាវក្វែនាវមរោសអាប់នតីលងាន់ អ៝ន់មាទឹងលែៈមពោលអីមរាឆ៝ៈទើននាវរ៝សហេង។ មពោលអីនៃឆ៝ៈទើននាវរ៝សហេងយ៝រមាមោអុចអោសឆ៝ៈទើននាវងាន់ មោអុចអោសរ៝ង់នាវងាន់ ឞ៝លលាសនាវងាន់អីនៃទើយរាក្លាយ្សខាន់ពាង់។* ១១ កើតនទ្រីទឹងកោរាញឞ្រាសញជុននាវងក្លាៈមាជានអ៝ន់ខាន់ពាង់ហ្យើត អ៝ន់ខាន់ពាង់អ្យាត់នាវមរោសច្រាវ‌ ១២ គៃមាតេៈទោយ្សមាមពោលអីមោអ្យាត់អោសនាវងាន់ ជេសរីរាម់មាជាននទើក្វែច្រាវ។*

នាវគុន៝ប់តានាវញឆីង

១៣ អើអ៝សនោ កោរាញឞ្រាសរ៝ង់មាខាន់អៃមៃ។ ហេនលាសអ្វែសកោរាញឞ្រាសបាបើងាន់មាខាន់អៃមៃ យ៝រលាសលែៈកោរាញឞ្រាសកើយ្សខាន់អៃមៃមានាវរាក្លាយ្សឞើសនតើមញជេងនែសនតូងាន់†។ ខាន់អៃមៃគែសនាវរាក្លាយ្សយ៝រមាឞ្រាសហ្វេងអ្វែសជានអ៝ន់ខាន់អៃមៃក្ល៝សអ្វែស គែសនាវរាក្លាយ្សយ៝រមាខាន់អៃមៃញឆីងមានាវងាន់ដ៝ង់។* ១៤ កោរាញឞ្រាសលែៈក្វាល់ខាន់អៃមៃនៃមានាវមហែមហានអ្វែសអីហេនលែៈមឞើសងក៝ច ពាង់ក្វាល់ខាន់អៃមៃគៃមាអ៝ន់ខាន់អៃមៃឆ៝ៈទើននាវរាក្លាយ្សអីនៃ ពាង់អុចខាន់អៃមៃគែសនាវច្រេកលើបឞ្រាសយេឆូក្រីស នើមអីកោរាញឞ៝ន់។ ១៥ លាសនទ្រីអើអ៝សនោ អ៝ន់ខាន់អៃមៃគុន៝ប់រាក៝ក់ហ៝ៈ ជេសរីញអោតទឹងលែៈនាវអីហេនលែៈនតុមនតីអ៝ន់មាខាន់អៃមៃនើស។ ហេននតុមនតីខាន់អៃមៃមាឞ៝រ់មឞូងហេននើមងើយនើស នទ្រែលមាតាឆ៝ម់បុតអីហេនលែៈញចីស។ ១៦ កោរាញឞ្រាសអីឞឹឞ៝ន់ ពាង់គែសនាវរ៝ង់មាឞ៝ន់។ យ៝រមានាវអ្វែសពាង់នើម ពាង់ឞ៝ញលែងឞ៝ន់នឹងនហ៝រ៝ នអ៝ប់មាលែៈអ៝ន់ឞ៝ន់នាវរានើមន៝ប់រាក៝ក់។ ទាន់ឞ្រាសយេឆូក្រីស អីកោរាញឞ៝ន់ នទ្រែលមាកោរាញឞ្រាសអីឞឹឞ៝ន់‌* ១៧ នហាវនូយ្សនហ៝ម់ខាន់អៃមៃ អ៝ន់ខាន់អៃមៃគែសនហ៝ម់ឆ្វានមាជានអាប់នតីលនទើអ្វែស នទ្រែលមាមឞើសងក៝ចនាវអ្វែសដ៝ង់។

*២:១ ២:១៖ ១តេ ៤:១៥-១៨

*២:២ ២:២៖ មថ ២៤:៤-៦

*២:៣ ២:៣៖ «ឞូនុយ្សតីស» មោលាស «ឞូនុយ្សអីមោអ្យាត់កោរាញឞ្រាស»។

†២:៣ ២:៣៖ «ញឆោស...ងាន់រ៝» មោលាស «ញឆោសឆាក់អីជាននាវរ៝សហេង»។

*២:៣ ២:៣៖ ១តម ៤:១

*២:៤ ២:៤៖ ១កោ ៣:១៦-១៧; ២កោ ៦:១៦

‡២:៦ ២:៦៖ តានាវងើយគ្រែក មោគឹតនហេលជេងនទើ មោលាសឞូនុយ្សងកីងពាង់។

§២:៦ ២:៦៖ ឞ៝ន់អាបៃរីមោហោមគឹតអោសម៝សនទើអីនៃ។

*២:៧ ២:៧៖ «ឆាតាង់ អីកោរាញមពោលឞ្រាសអ្យើស» មោលាស «នាវជានការនាវតីសអីហោមនទ៝ប់មពោន»។

*២:៨ ២:៨-១០៖ នតម ១៩:១៥-២១; មថ ២៤:២៤

*២:១០ ២:១០-១១៖ ២កោ ៤:៣-៤; ២តម ៤:៣-៤

*២:១២ ២:១២៖ យហ ១២:៤៨

†២:១៣ ២:១៣៖ មោលាស «កើយ្សខាន់អៃមៃជេងឞូនុយ្សឞោកទាកតានាវរាក្លាយ្ស»។

*២:១៣ ២:១៣-១៤៖ អេផ ១:៤; ៣:១១; ១តេ ១:៤; ២ពេ ១:១០-១១

*២:១៦ ២:១៦៖ ១ពេ ៥:១០