នាវកោរាញឞ្រាសងើយនាវតឹមរាង្លាប់មហែ កោរាញអ៝សម៝ន 7

នាវឆាតេផាន ងើយ

1 ជេសរីអីកោរាញជានឞ្រាសទុតក្វ៝ង់អោបឆាតេផាន ៖ “ទីកើតនៃងាន់ដ៝ង់បាស?” 2 ឆាតេផាន អើសលាស៖ “ហើយផូងកោរាញ ហើយផូងអ៝សនោកោញវា ទាន់ខាន់មៃអ្យាត់គ៝ប់ហ៝ម់! កោរាញឞ្រាសតានាវច្រេកលើប ពាង់ នើម ពាង់លែៈតឹមមពើលមាចែអាឞ្រាហាម់ ឞ៝ន់កាល់អែនើស ទោលពាង់ហោមគុតាឞ្រីមេឆោពោតាមៀ អេល៝រមាពាង់គុតាប៝នចារាន ។* 3 កោរាញឞ្រាសលាសកើតនអា៖ «មៃទ៝ក់ហ៝ម់លោសឞើសឞ្រីទាកមៃនើម ឞើសនទុលមពោលមៃ ជេសរីហាន់តានតុកឞ្រីទាកអីគ៝ប់ញច៝ង់មាមៃ»†។ 4 ជេសរីអាឞ្រាហាម់ ទូឞើសឞ្រីខាលដេ ហាន់គុតាប៝នចារាន ។ ជេសខឹតឞឹពាង់តានៃ កោរាញឞ្រាសលែវពាង់ទូឞើសឞ្រីនៃ ហាន់តាឞ្រីអីខាន់មៃគុអាបៃអ្យា។ 5 តាឞ្រីអ្យា កោរាញឞ្រាសមោអោសអ៝ន់នែសមីរមាពាង់ នែសទឹងមពាងជ៝ង់កោរាញឞ្រាសមោអ៝ន់ដ៝ង់។ យើនមាកោរាញឞ្រាសត៝នឞ្រីអ្យាជេងឞ្រីពាង់ នហ៝មាត៝ត់ក៝នត៝ត់ឆៅពាង់នើមអាកើយតៃ ឞ៝លលាសនោកនៃអាឞ្រាហាម់ មោហ៝ៈអោសគែសក៝ន។* 6 កោរាញឞ្រាសលាសមាពាង់កើតនអា៖ «ក៝នឆៅមៃមរាគុជេងឞូនាច់តាឞ្រីទាកឞូអេង។ ឞូនុយ្សតាឞ្រីអីនៃឆ៝ៈខាន់ពាង់ជានទឹក នទ្រែលមាតុនជ៝តខាន់ពាង់ជ៝ៈ ៤០០ នាម់»។ 7 កោរាញឞ្រាសលាសដ៝ង់៖ «យើនលាសគ៝ប់តេៈទោយ្សមាឞ្រីទាកអីឆ៝ៈក៝នឆៅមៃនៃជានទឹក។ ជេសរីក៝នឆៅមៃទូលោសឞើសនតុកនៃ គុយើកមឞាសគ៝ប់តាឞ្រីអ្យា»†។ 8 ជេសរីកោរាញឞ្រាសតឹមរាង្លាប់មាអាឞ្រាហាម់ ដាៈពាង់ក៝សនតោទឹងលែៈផូងឞូក្លោអីគុតាញីសពាង់។ នទើអីនៃជេងនាវមឞេននាវតឹមរាង្លាប់អីនៃ។ នទ្រីទឹងទោលអីឆាក់ អីក៝នពាង់នើមទែសគែសផាមនារ អាឞ្រាហាម់ អីឞឹរីក៝សនតោមាពាង់។ ជេសរីអីឆាក់ ក៝សនតោអ៝ន់មាយាកោប អីក៝នពាង់ យាកោប ក៝សនតោអ៝ន់មា ១២ នុយ្សអីក៝នឞូក្លោពាង់ដ៝ង់ នទ្រីទឹងលែៈផូងឞ៝ន់ជេងអីក៝នឆៅ ១២ នុយ្សខាន់ពាង់នៃ។* 9 ខាន់ពាង់អីនៃគែសនូយ្សនហ៝ម់មោនាចមាយោឆែប អីអ៝សខាន់ពាង់ នទ្រីទឹងតាច់លើយអោឞាល់អ៝ន់គុជានទឹកតាឞ្រីអេឆីប ។ យើនមាកោរាញឞ្រាសគុនទ្រែលពាង់‌* 10 រាក្លាយ្សលែៈនាវជេរជ៝ត់តាពាង់ អ៝ន់ពាង់គែសនាវមឹនគឹតឞ្លាវងាន់ នទ្រែលមាអ៝ន់ផារ៝ន អីកាដាច់ឞ្រីអេឆីប *នៃទីនូយ្សនហ៝ម់មាពាង់ដ៝ង់។ ផារ៝ន អ៝ន់ពាង់ជេងកោរាញម៝ត់អ្វាញ់តាឞ្រីអេឆីប នទ្រែលមាអ៝ន់ម៝ត់អ្វាញ់ទឹងលែៈទ្រាប់នទើពាង់នើមដ៝ង់។* 11 ឞើសកើយនៃគែសនាវជីឆ៝ត់ជីង៝តក្វ៝ង់តាឞ្រីអេឆីប នទ្រែលមាតាឞ្រីកានាអាន គែសរេសរាញាល់លាមនតុក។ ផូងអូចែឞ៝ន់កាល់អែនើសជ៝យនទើឆោងឆាមោគែសអោស។* 12 ទោលយាកោប តាង់លឺលាសហោមគែសឞាតាឞ្រីអេឆីប រី ពាង់ដាៈអីក៝នៗពាង់ហាន់តាឞ្រីនៃឞោកទាក។* 13 ត៝ត់មាហាន់ឞារតឹ រីមើយោឆែប អ៝ន់អ៝សនោពាង់គឹតនាល់ពាង់ នហ៝មាផារ៝ន គឹតនទុលមពោលយោឆែប រីដ៝ង់។* 14 ជេសរីយោឆែប ដាៈឞូហាន់ឆ៝ៈយាកោប អីឞឹពាង់ឞើសរី នទ្រែលមាឞាល់មពោលពាង់ ទឹងលែៈនៃគែស ៧៥ នុយ្ស។ 15 នទ្រីយាកោប ហាន់តាឞ្រីអេឆីប គុនហ៝មាខឹតតាឞ្រីនៃ នអ៝ប់មាក៝នឞូក្លោពាង់†ខឹតតាឞ្រីនៃដ៝ង់។ 16 ជេសរីឞូរាទែងឆាក់ជាន់យាកោប នទ្រែលមាយោឆែប លែវត៝ប់តាប៝នឆីកែម តាឞ្រីឞ៝ន់នើមអ្យា នតុកមោចអាឞ្រាហាម់ ទែរាវាត់ឞើសក៝នឆៅហេម៝រ តានតុកប៝នឆីកែម នៃនើស”។*

17 “ផូងឞ៝ន់លើមាឞឹកលើមាអ៝ក់តាឞ្រីអេឆីប រី ត៝ត់ឞើយទីនាម់កោរាញឞ្រាសទែត៝នមាអាឞ្រាហាម់ នៃនើស។* 18 ជេសរីគែសកាដាច់មហែនត្រ៝ៈជានកាដាច់តាឞ្រីអេឆីប រី កាដាច់អីនៃមោអោសគឹតនទើយោឆែប វៃជានមាផូងអេឆីប នើស។ 19 កាដាច់អីនៃគែសនាវមឹនអ្យើសមហឹកងាន់មាផូងឞ៝ន់ ពាង់តុនជ៝តផូងអូចែឞ៝ន់ នហ៝មាត៝ត់ដាៈខាន់ពាង់មអារ់លើយក៝នមហែទែស មោអ៝ន់អោសរ៝ងរេស។ 20 មោឆេ ទែសនោកនៃដ៝ង់ ពាង់ជេងអ៝សឞេអ្វែសរែស‡ងាន់។ មេៈឞឹម៝ត់ពាង់តាជៃគែសពែខៃ។* 21 ទោលរីអ្យាត់មាអីមេៈឞឹមអារ់ពាង់ គែសក៝នឞូអូរផារ៝ន អីកាដាច់ឞ្រីអេឆីប ឆ៝ៈម៝ត់ ជេងតឹមឞានមាក៝នពាង់នើមងាន់។ 22 នទ្រីទឹងមោឆេ លាប់នតីទឹងលែៈនាវគឹតឞ្លាវផូងអេឆីប ជេសរីពាង់មឞើសងើយឞ្លាវងាន់ នទ្រែលមាឞ្លាវជានការអ៝ក់នតីលដ៝ង់។ 23 ត៝ត់ពាង់គែស ៤០ នាម់ ពាង់អុចហាន់ខ៝ល់ផូងអីឆ្រាអែល អីអ៝សនោឞាល់មពោលពាង់នើម។* 24 ត៝ត់តានៃពាង់ឆៃទូហ្វេមពោលអេឆីប ជានអ្យើសលើសឞាល់ពាង់ទូហ្វេ ពាង់កើលងកីងឞាល់ពាង់រី ជេសរីព្លើងមឞាងមពោលអេឆីប អីនៃត៝ត់ខឹតរ៝។ 25 មោឆេ មឹនអេងឆាក់ពាង់នើម ផូងអ៝សនោមឹនមាពាង់រ៝កោរាញឞ្រាសទែអ៝ន់គៃមារាក្លាយ្សខាន់ពាង់ តីសមាឞូមោគែសអោសមឹនកើតនៃ។ 26 ត៝ត់នារអោយតៃ មោឆេ ឆៃមពោលអីឆ្រាអែល អាបាៈតឹមលើសនទ្រាង់ខាន់ពាង់នើម ពាង់ឞ្វៃ អ៝ន់ខាន់ពាង់តឹមរាង្លាប់ឞាល់ ពាង់លាស៖ «ហើយអ៝សនោ ម៝សជានតឹមលើសអ្យើសនទ្រាង់នើម អើមឞូអេងលាសខាន់មៃនៃហែស?» 27 ពាង់អីជានអ្យើសមាអ៝សនោច្យៅមែងរី ងក្លឹមោឆេ នហ៝មាលាសពាង់៖ «ឞូម៝សអ៝ន់មៃជានកោរាញ នទ្រែលមាជានកោរាញផាតទោយ្សមាហេន? មោគែសអោស។ 28 មៃអុចងខឹតគ៝ប់ កើតមៃលែៈងខឹតទូហ្វេមពោលអេឆីប នត្រីនើសឞើស?†» 29 ជេសមោឆេ តាង់នាវកើតនៃពាង់ក្លាចផូងអេឆីប ព្លើងងខឹតពាង់ដ៝ង់ ជេសរីពាង់ញច្វាត់ទូគុជេងឞូនាច់តាឞ្រីមាដេន ជ៝ៈនាម់ងាន់។ តានតុកឞ្រីនៃពាង់គែសក៝នឞូក្លោឞារហៃ”។

30 “ត៝ត់គែស ៤០ នាម់ គែសទូហ្វេតោងពារ់កោរាញឞ្រាសតឹមមពើលឆាក់អ៝ន់មាមោឆេ ឆៃតាឞ្រីរាទាសយោកឆីនាយ រី។ តាឞ្រីរាទាសនៃគែសទូពុមល៝ក ជេសរីតោងពារ់អីនៃតឹមមពើលមាពាង់ជេងមព្យាត់អុញតាពុមល៝កអីនៃ។* 31 ទោលមោឆេ ឆៃកើតនៃ ពាង់គែសនាវនទ្រ៝ត់ហីសរាហ៝ល់ងាន់មោវ៝ត់អោសមានទើតឹមមពើលអីនៃ យ៝រមាពុមល៝កអីនៃមោគែសអោសអុញឆាងាន់។ ជេសរីពាង់ហាន់ទាច់គៃមាអ្វាញ់នហេលនទើនៃ ពាង់តាង់កោរាញឞ្រាសលាសមាពាង់៖ 32 «គ៝ប់ជេងឞ្រាសអាឞ្រាហាម់ យើកមឞាស ជេងឞ្រាសអីឆាក់ យើកមឞាស ជេងឞ្រាសយាកោប យើកមឞាស»†។ មោឆេ ញឆ៝រ់ងាន់ ពាង់ក្លាចមោហោមអោសឞាញ់អ្វាញ់។ 33 កោរាញឞ្រាសលាសមាពាង់៖ «ទ្រ៝សលើយនតោជ៝តមៃនៃ យ៝រលាសនតុកមៃទ៝ក់នៃជេងនតុកក្ល៝សអ្វែស។ 34 លែៈគ៝ប់ឆៃងាន់នាវឞូតុនជ៝តមាប៝នលានគ៝ប់តាឞ្រីអេឆីប លែៈគ៝ប់តាង់ងាន់នាវខាន់ពាង់រាដេងដ៝ង់ ជុរគ៝ប់អ្យាគៃមារាក្លាយ្សខាន់ពាង់អីនៃ។ ទ៝ក់ហ៝ម់! គ៝ប់ដាៈមៃហាន់តាឞ្រីអេឆីប អាបៃអ្យារ៝»†។ 35 អាល៝រនើសមោឆេ អ្យាប៝នលានអីឆ្រាអែល លែៈរាលាច់មោអោសគឹតនាល់ពាង់ ឞូទែលាសពាង់៖ «ឞូម៝សអ៝ន់មៃជានកោរាញ នទ្រែលមាជានកោរាញផាតទោយ្សហេន?» យើនមាកោរាញឞ្រាសទែដាៈពាង់ហាន់ជានកោរាញ នទ្រែលមារាក្លាយ្សខាន់ពាង់។ តោងពារ់កោរាញឞ្រាសអីលែៈតឹមមពើលជេសមាពាង់តាពុមល៝កនៃនើសកើលពាង់ជានការអីនៃ។* 36 មោឆេ អ្យាលែវផូងប៝នលានអីឆ្រាអែល ទូលោសឞើសឞ្រីអេឆីប ពាង់ជាននាវខ្លៃ នទ្រែលមានាវមឞេនលែៈនាវងាន់តាឞ្រីអេឆីប តាទាកវាច់ទាកវារ់ចាង់ តាឞ្រីរាទាសទោល ៤០ នាម់ខាន់ពាង់គុតានៃ។* 37 មោឆេ អីអ្យាលាសមាផូងអីឆ្រាអែល ៖ «ជឹតនាប់តៃកោរាញឞ្រាសអ៝ន់គែសទូហ្វេឞូនុយ្សនតើយ្សនាវងើយកោរាញឞ្រាសតាៈឞើសអ៝សនោខាន់អៃមៃ តឹមឞានមាគ៝ប់ [អ៝ន់ខាន់អៃមៃអ្យាត់នាវពាង់ទោ]»†។ 38 មោឆេ អីអ្យាគុនទ្រែលផូងប៝នលានអីរាគូមតាឞ្រីរាទាសនើស តោងពារ់អីនៃមឞើសងក៝ចមាពាង់តាយោកឆីនាយ ជេសរីពាង់នតើយ្សនាវអីនៃអ៝ន់មាផូងអូចែឞ៝ន់។ ពាង់ឆ៝ៈទើននាវងើយកោរាញឞ្រាសអីអ៝ន់នាវរេស អ៝ន់ត៝ត់មាផូងឞ៝ន់។* 39 តីសមាផូងអូចែឞ៝ន់មោអ្យាត់អោសនាវពាង់ ខាន់ពាង់មោហោមអុចពាង់ជានកោរាញ គែសនូយ្សនហ៝ម់អុចព្លឹតៃតាឞ្រីអេឆីប ជឹតច្រាវ។* 40 ខាន់ពាង់លាសមាអារោន អីនោមោឆេ កើតនអា៖ «ដាៈមៃជានម៝នរូបឞ្រាសអេងៗមាលែវផូងហេន យ៝រលាសមោឆេ អីលែវហេនលោសតាៈឞើសឞ្រីអេឆីប នើស ហេនមោគឹតអោសម៝សនាវគែសមាពាង់»†។ 41 ជេសរីខាន់ពាង់ជានម៝នទូមល៝ម់ក៝ននទ្រោក ខាន់ពាង់ជានឞ្រាសយើកមឞាសមារូបអីនៃ ខាន់ពាង់រាម់មអាកមានទើតីខាន់ពាង់នើមជាន។* 42 កើតនទ្រីកោរាញឞ្រាសមោហោមអោសម៝ត់អ្វាញ់ខាន់ពាង់ ប៝កគ៝រខាន់ពាង់អ៝ន់យើកមឞាសមាលែៈនទើតាកាលើត្រោក ជេងតឹមទីដាសនាវគែសញចីសតាឆ៝ម់បុតឞូនុយ្សនតើយ្សនាវងើយកោរាញឞ្រាសកើតនអា៖

«ហើយផូងអីឆ្រាអែល ទោលខាន់អៃមៃគុតាឞ្រីរាទាស ៤០ នាម់នើស‌

ទឹងលែៈមពោមពា(ឆ្យុម)អីខាន់អៃមៃងខឹត នទ្រែលមានទើជានឞ្រាសអីខាន់អៃមៃវៃជាន ខាន់អៃមៃមោគែសអោសជានមាគ៝ប់។

43 ខាន់អៃមៃតូងចូនឞ៝កជានឞ្រាសមាឞ្រាសមោលុក ‌

នទ្រែលមារូបមាញ់ឞ្រាសរេមផាន់ អីឞ្រាសផូងអេងយើកមឞាសដ៝ង់‌

ទឹងលែៈរូបឞ្រាសខាន់អៃមៃជានម៝ននៃ គៃមាយើកមឞាសមាពាង់!

យ៝រមាខាន់អៃមៃជានកើតនៃទឹងគ៝ប់វែងខាន់អៃមៃអ៝ន់ទូលោសឞើសឞ្រីទាកខាន់អៃមៃនើមហាន់ងាយរាលាវមាឞ្រីបាបីលោន ជឹតនាប់តៃ»†”។

44 “តាឞ្រីរាទាស ផូងអូចែឞ៝ន់នោកនៃនើសគែសជេសចូនឞ៝កជានឞ្រាសមាកោរាញឞ្រាស ខាន់ពាង់ជានចូនអីនៃកើតនាវកោរាញឞ្រាសដាៈមាមោឆេ កើតព្រែអីឆៃរីនើស។* 45 ផូងអូចែឞ៝ន់ញអោតដើនចូនអីនៃ នហ៝មាត៝ត់យោឆ្វេ លែវលាប់តានតុកឞ្រីទាកអីខាន់ពាង់ទើយពីតឞើសឞូ ឞ្រីទាកអីកោរាញឞ្រាសទែនត្រុតឞូទូលោសតានាប់មាត់ខាន់ពាង់នៃនើស។ ចូនអីនៃហោមត៝ត់មាកាដាច់ដាវីត ដ៝ង់”។*

46 “កោរាញឞ្រាសរ៝ង់ងាន់មាកាដាច់ដាវីត ដាវីត អុចជានទូមល៝ម់ញីសមាយើកមឞាសកោរាញឞ្រាស ឞ្រាសអីចែយាកោប ឞ៝ន់កាល់អែនើសយើកមឞាស។* 47 យើនមាកោរាញឞ្រាសមោអោសអ៝ន់ពាង់ជានញីសអីនៃ កាដាច់ឆាលោមោន អីក៝នពាង់ទឹងហ៝ចជានញីសជានឞ្រាសអីនៃ។ 48 យើនមាកោរាញឞ្រាសទុតព្រេស មោគុអោសតាញីសតីឞូនុយ្សជាន។ ឞូនុយ្សនតើយ្សនាវងើយកោរាញឞ្រាសកាល់អែនើសលែៈគែសញចីសដ៝ង់៖

49 «កោរាញឞ្រាសលាស៖ «ត្រោកហោមជេៈតឹមឞានមារានើលកាដាច់នតុកគ៝ប់គុ‌

ជេសរីនែសនតូហោមជេៈតឹមឞានមារានើលនតុករាកើលជ៝ង់គ៝ប់។

លាសនទ្រីមើមញីសខាន់មៃទើយជានអ៝ន់មាគ៝ប់ហាៈ?

មោលាសអាសនតុកអ៝ន់គ៝ប់ឞែមាគុ?

50 យ៝រលាសត្រោក នទ្រែលមានែសនតូ ទឹងលែៈនទើអីនៃនើស តីគ៝ប់នើមទាទេញជេង»»†”។

51 “ហើយឞូនុយ្សទាង់ក៝! ខាន់មៃតឹមឞានមាឞូនុយ្សអីមោទីផូងអីឆ្រាអែល គែសតោរមោអុចអ្យាត់កោរាញឞ្រាស។ ខាន់មៃតឹមរាទ៝ង់ដាសឞ្រាសហ្វេងអ្វែសអីក្ល៝សអ្វែសនឹងនែងទើម តឹមឞានមាផូងអូចែខាន់មៃកាល់អែរីនើសដ៝ង់!* 52 យ៝រលាសលែៈមពោលឞូនុយ្សនតើយ្សនាវងើយកោរាញឞ្រាសកាល់អែនើស ផូងអូចែខាន់មៃជានជេរមាខាន់ពាង់ទាទេ។ ខាន់ពាង់ងខឹតលើយលែៈផ្យៅមពោលឞូនុយ្សនតើយ្សនាវងើយកោរាញឞ្រាសអីងក៝ចល៝រមានាវវាច់ឞ្រាសក្រីស អីទូហ្វេឞូនុយ្សឆ៝ង់។ អាបៃអ្យាខាន់មៃលែៈញុបឞ្រាសក្រីស អីនៃញជុនមាឞូ ជេសរីងខឹតលើយអោឞាល់ដ៝ង់។* 53 ខាន់មៃលែៈឆ៝ៈទើនជេសនាវវៃកោរាញឞ្រាសអីតោងពារ់លែៈអ៝ន់មាមោឆេ នទ្រែលមាផូងអូចែឞ៝ន់ តីសមាខាន់មៃមោអោសជានតឹងនាវពាង់ដាៈនៃ!”

ឞូងខឹតឆាតេផាន

54 ជេសឞូតាង់នាវឆាតេផាន ងើយនៃ ឞូជីនូយ្សទុតហោ កាប់រាច្យាត់ឆេកនែងមាពាង់ងាន់។* 55 ល៝ង់ឆាតេផាន រី ឞ្រាសហ្វេងអ្វែសអីក្ល៝សអ្វែសគុតាពាង់ងាន់ អ៝ន់ពាង់ងគើរអ្វាញ់ជឹតត្រោកតី ឆៃនាវច្រេកលើបកោរាញឞ្រាស នទ្រែលមាឆៃឞ្រាសយេឆូ ទ៝ក់ឞើសមាកោរាញឞ្រាសរីដ៝ង់។* 56 ពាង់លាស៖ “អ្វាញ់រី! គ៝ប់ឆៃត្រោកពើកលាហឺរ នទ្រែលមាឆៃកោរាញយេឆូ អីក៝នឞូនុយ្សតាៈឞើសកោរាញឞ្រាសទ៝ក់ឞើសមាកោរាញឞ្រាសរីដ៝ង់”។ 57 ទោលនៃឞូនតែរទុតហោ នហ៝មាឆ៝ៈលាវតីញឆេតតោរខាន់ពាង់នើមគៃមាមោហោមតាង់នាវពាង់ដ៝ង់ ទឹងលែៈឞូរាទោសតាពាង់រីទាទេ។ 58 ឞូមផ៝ក់តេកពាង់ទូលោសឞើសទីសប៝នយេរូឆាលឹម នៃ គៃមាក្លុបពាង់មាលុត៝ត់ខឹត។ មពោលអីគុអ្វាញ់នៃ ទ្រីសអាវក្វ៝ង់ខាន់ពាង់នើមអ៝ន់តាជ៝ង់ទូហ្វេឞូក្លោនទាម់ រាញាឆោល ។* 59 ទោលឞូនតុបឆាតេផាន មាលុរី ពាង់មឞើសឆើម៖ “ហើយកោរាញយេឆូ ទាន់មៃឆ៝ៈទើនហ្វេងគ៝ប់”។* 60 ជេសរីពាង់ច៝នកោម៝ក់ នតែរទុតនតែសងាន់៖ “ហើយកោរាញ! លើយអោសកើបនាវតីសអ្យាត៝ត់មាខាន់ពាង់”។ ជេសពាង់លាសកើតនៃ នហ៝មារ៝សនហ៝ម់ក្ល៝ក់។*

*7:2 ៧:២-៤៖ នន ១១:៣១

†7:3 ៧:៣៖ នន ១២:១

*7:5 ៧:៥៖ នន ១១:២៩-៣០; ១២:៧

†7:7 ៧:៧៖ នន ១៥:១៣-១៤

*7:8 ៧:៨៖ នន ១៧:៩-១៤

*7:9 ៧:៩៖ នន ៣៧:៤, ១១-២៨; ៣៩:២

*7:10 ៧:១០៖ ទឹងលែៈកាដាច់តាឞ្រីអេឆីប ឞូក្វាល់លាស៖ «ផារ៝ន »។

*7:10 ៧:១០៖ នន ៣៩:២១-២៣; ៤១:១៤-៤៦

*7:11 ៧:១១៖ នន ៤១:៥៣-៥៧

*7:12 ៧:១២៖ នន ៤២:១-៥

*7:13 ៧:១៣-១៤៖ នន ៤៥:១-១៦; ៤៦:២៦-២៧

†7:15 ៧:១៥៖ តានាវងើយគ្រែក លាស៖ «ផូងចែឞ៝ន់»។

*7:16 ៧:១៦៖ នន ៣៣:១៩; ៥០:៥, ២៤-២៥; យោឆ ២៤:៣២

*7:17 ៧:១៧-១៩៖ នង ១:៧-១៦, ២២

‡7:20 ៧:២០៖ មោលាស «អ្វែសរែសតាឞើសនាប់កោរាញឞ្រាស»។

*7:20 ៧:២០-២១៖ នង ២:១-១០; ហេឞ ១១:២៣

*7:23 ៧:២៣-២៩៖ នង ២:១១-២២; ១៨:៣-៤; ហេឞ ១១:២៤-២៧

†7:28 ៧:២៨៖ នង ២:១៤

*7:30 ៧:៣០-៣៤៖ នង ២:២៣-២៥; ៣:១-១០

†7:32 ៧:៣២៖ នង ៣:៦

†7:34 ៧:៣៤៖ នង ៣:៥-១០

*7:35 ៧:៣៥៖ នង ២:១៤

*7:36 ៧:៣៦៖ នង ៧:៩-១២:៣០; ១៤:២១-២២; នក ១៤:៣៣-៣៤; នវ ៤:៣៤

†7:37 ៧:៣៧៖ នវ ១៨:១៥

*7:38 ៧:៣៨៖ នង ២០:១៨-២១; ៣១:១៨

*7:39 ៧:៣៩៖ នង ១៦:២-៣

†7:40 ៧:៤០៖ នង ៣២:១-២

*7:41 ៧:៤១៖ នង ៣២:៤-៦

†7:43 ៧:៤៣៖ អាម ៥:២៥-២៧

*7:44 ៧:៤៤៖ នង ២៥:៩

*7:45 ៧:៤៥៖ យោឆ ១៨:១; ១នរ ២១:២៩

*7:46 ៧:៤៦-៤៧៖ ២ឆា ៧:២-១៣; ១កក ៦:១-៣៨

†7:50 ៧:៥០៖ អេឆា ៦៦:១-២

*7:51 ៧:៥១៖ នង ៣២:៩; អេឆា ៦៣:១០

*7:52 ៧:៥២៖ លក ១១:៤៧-៥១; ១៣:៣៤

*7:54 ៧:៥៤៖ ការ ៥:៣៣

*7:55 ៧:៥៥-៥៦៖ លក ២២:៦៩; រម ៨:៣៤

*7:58 ៧:៥៨៖ ការ ២២:២០; នវ ១៧:៧

*7:59 ៧:៥៩៖ លក ២៣:៤៦

*7:60 ៧:៦០៖ មថ ៥:៤៤; លក ២៣:៣៤