នាវកោរាញឞ្រាសងើយតានាវងើយឞូន៝ង កោរាញអ៝សម៝ន ១០

១០

តោងពារ់តឹមម៝ប់ដាសកោនេលេស

១ តាប៝នឆេឆារា * គែសទូហ្វេឞូក្លោរាញាពាង់កោនេលេស ពាង់ជេងកោរាញតាហែន†រោម មពោលក៝នតាហែនពាង់ឞូក្វាល់លាស«មពោលឞ្រីអីតាលី »។* ២ ពាង់លែៈរានាក់វ៝ល់ពាង់ជេងឞូនុយ្សក្លាចអ្យាត់នាវកោរាញឞ្រាស។ ពាង់អ៝ន់អ៝ក់ព្រាក់យោៈមាផូងប៝នលានអ៝អាចតាផូងអីឆ្រាអែល នទ្រែលមាមឞើសឆើមក្វាល់កោរាញឞ្រាសមរ៝មរាង់។ ៣ គែសទូនារក្លាប់លាសម៝ងពែកេងមាង់ ពាង់តឹមឆៃនហេលដាសទូហ្វេតោងពារ់កោរាញឞ្រាសលាប់តាត្រោមជៃពាង់រី។ តោងពារ់នៃលាសមាពាង់៖ “ហើយកោនេលេស !” ៤ កោនេលេស អ្វាញ់ជឹតតោងពារ់រី អើសមាពាង់នអ៝ប់មាក្លាចញឆ៝រ់៖ “ហើយកោរាញ ម៝សគែសនាវហាៈ?” តោងពារ់លាស៖ “នាវមៃមឞើសឆើមលែៈកោរាញឞ្រាសអ្យាត់ជេស នទ្រែលមាព្រាក់អីមៃគែសនាវយោៈអ៝ន់មាឞូនៃគឹតត៝ត់មាកោរាញឞ្រាស ពាង់ហោមកាសគឹតដ៝ង់។ ៥ លាសនទ្រីមៃដាៈឞូហាន់តាប៝នយោបពេ រីអាបៃរ៝ ជាៈទូហ្វេឞូក្លោរាញាពាង់ឆីមោន ឞូក្វាល់ពាង់ពេត្រោស ដ៝ង់វាច់តាអ្យា។ ៦ ពាង់គុតាជៃទូហ្វេឞូនុយ្សអីរាញាឆីមោន ជេងឞូនុយ្សនទ្រាប់នតោមពោមពា(ឆ្យុម)គៃមាអ៝ន់ឞូនុយ្សអេងជាននទើអេងៗ។ ជៃអីនៃទាច់ទាកវាច់ទាកវារ់”។ ៧ ត៝ត់មាទូជេសតោងពារ់អីគុងើយដាសកោនេលេស នៃ ជេសរីពាង់ក្វាល់ឞារហៃឞូនុយ្សជានការមាពាង់ នទ្រែលមាទូហ្វេតាហែនអីគុទាច់នទ្រែលពាង់នើមបាបើអ្យាត់នាវកោរាញឞ្រាសដ៝ង់ វាច់តារី។ ៨ ជេសពាង់មឞើសលែៈផ្យៅនាវអីនៃមាខាន់ពាង់ ជេសរីដាៈខាន់ពាង់ហាន់តាប៝នយោបពេ រី។

ពេត្រោស មឞើសឆើមតាកាលើច៝រជៃ

៩ កាសអោយតៃ ខាន់ពាង់ពែនុយ្សនៃហាន់ឞើយត៝ត់តាប៝នយោបពេ រី ទីនារងក្លាងឞោក ពេត្រោស ហាវមឞើសឆើមតាកាលើច៝រជៃរី។ ច៝រជៃតានតុកនៃល៝ង់គៃមាជានការអេងៗ។ ១០ ទោលនៃពាង់ជីង៝ត ឞូញចោមានទ្រាប់ព្យាង់ត្រាវមាអ៝ន់ពាង់ឆោង ពាង់នហ៝មាតឹមឆៃរ៝។ ១១ ពាង់ឆៃត្រោកពើកឞ៝ង់លាហឺរ ជេសរីឆៃនទើតឹមឞានមាទូឞ្លាសឞ៝កលាយ្សក្វ៝ង់យូរតាៈឞើសកាលើត្រោកតីត៝ត់អាអ្យា គែសក៝ត់លែៈព្វាន់ញជោញដ៝ង់។* ១២ តាកាលើឞ៝កអីនៃគែសមពោមពា(ឆ្យុម)ជ៝ង់ព្វាន់អាប់នតីល មពោមពា(ឆ្យុម)ហូងវើរ នទ្រែលមាឆ្យុមមពារ់កាលើត្រោកដ៝ង់ គែសដ៝ង់មពោមពា(ឆ្យុម)អីមោក្ល៝សអីមោអោសទីមាឆាតឹងនាវវៃផូងអីឆ្រាអែល ។* ១៣ ជេសរីតាង់ងើយលាសមាពាង់៖ “ហើយពេត្រោស ! មៃងខឹតមពោមពា(ឆ្យុម)អ្យាមាគុចឆាទោ”។ ១៤ យើនមាពេត្រោស រាលាច់៖ “មោអោសកោរាញ យ៝រលាសមពោមពា(ឆ្យុម)អីមោក្ល៝សមោទីមាឆា គ៝ប់មោអោសវៃឆាតាទូញជារ់នាវរេសគ៝ប់”។ ១៥ ពេត្រោស តាង់តៃនាវងើយអីនៃទូតឹជឹត៖ “ម៝សនទើអីកោរាញឞ្រាសជានលែៈក្ល៝សជេស លើយហោមមៃកើបនទើអីនៃបឹបើចជឹត”។ ១៦ នាវអីនៃលាសត៝ត់មាពែតឹងាន់ ជេសរីឞ៝កអីនៃហាវតៃកាលើត្រោករីរ៝។

១៧ ទោលពេត្រោស ហោមគុមឹនមោវ៝ត់អោសមានាវអីនៃ ឞូនុយ្សពែនុយ្សកោនេលេស ទែដាៈហាន់រីនើស ជេសជ៝យជៃឆីមោន លែៈត៝ត់តាមពោងនៃ។ ១៨ ខាន់ពាង់អោបក្វាល់៖ “អាសឆីមោន អីឞូក្វាល់ពេត្រោស គុតាអ្យាដ៝ង់ឞើស?” ១៩ ពេត្រោស ហោមគុមឹនមានាវខ្លៃអីពាង់តឹមឆៃនៃនើស នហ៝មាគែសឞ្រាសហ្វេងអ្វែសលាសមាពាង់៖ “គែសឞូនុយ្សពែនុយ្សអោបជ៝យមៃ។ ២០ ជុរហ៝ម់ ហាន់នទ្រែលខាន់ពាង់ លើយអោសវិវែៈ យ៝រលាសគ៝ប់នើមដាៈខាន់ពាង់ហាន់នៃនើស”។ ២១ ជេសរីពេត្រោស ជុរអាទ៝ង់ឆូ លាសមាខាន់ពាង់រី៖ “គ៝ប់អ្យាអីខាន់មៃជ៝យនៃ ម៝សនាវហាៈ?” ២២ ខាន់ពាង់អើសមាពេត្រោស ៖ “កោរាញកោនេលេស អីកោរាញតាហែនរោម ដាៈហេនហាន់អាអ្យា។ ពាង់ជេងឞូនុយ្សឆ៝ង់ ក្លាចមាកោរាញឞ្រាស គែសអ៝ក់ផូងអីឆ្រាអែល រានេពាង់ជេងឞូនុយ្សអ្វែស។ ជេសរីគែសដ៝ង់ទូហ្វេតោងពារ់ក្ល៝សអ្វែសដាៈពាង់ជាៈមៃហាន់តាជៃពាង់ គៃមាអ្យាត់នាវមៃនតី”។ ២៣ ជេសរីពេត្រោស ជាៈខាន់ពាង់លាប់ត្រោមជៃ ឞិចតានៃទូមាង់។

កាសអោយតៃរីពាង់ទ៝ក់ហាន់នទ្រែលខាន់ពាង់ គែសដ៝ង់ផូងញឆីងអាបាៈតាប៝នយោបពេ នៃហាន់នទ្រែលពាង់ដ៝ង់។ ២៤ ត៝ត់អោយក្លាករីខាន់ពាង់ត៝ត់តាប៝នឆេឆារា ។ ល៝ង់កោនេលេស រី ពាង់លែៈក្វាល់ឞាល់មពោល នទ្រែលមាមឹតជាង់ពាង់ គុរាបុនតាជៃពាង់រីទាទេ ក៝ប់មពោលពេត្រោស រើបហើប។ ២៥ ទោលពេត្រោស ត៝ត់តារី កោនេលេស មអាកងាន់ ពាង់រានពាន់យើកមឞាសតាជ៝ង់ពេត្រោស រីរ៝។ ២៦ យើនមាពេត្រោស ញុបតីកោនេលេស តេកអ៝ន់ពាង់ទ៝ក់ នហ៝មាលាស៖ “ទ៝ក់ហ៝ម់! លើយអោសយើកមឞាសគ៝ប់ គ៝ប់ឞូនុយ្សទើមតឹមឞានកើតឞាល់ដ៝ង់”។*

២៧ ជេសរីខាន់ពាង់លាប់តាត្រោមជៃនហ៝មាតឹមងើយ។ ពេត្រោស ឆៃគែសឞូគុរាបុនអ៝ក់តារី។ ២៨ ពាង់លាសមាឞូ៖ “ខាន់អៃមៃលែៈគឹតជេសនាវវៃផូងអីឆ្រាអែល មោអ៝ន់អោសផូងអីឆ្រាអែល តឹមម៝ប់ដាសផូងអីមោទីផូងអីឆ្រាអែល មោលាសលាប់ជៃខាន់ពាង់។ យើនមាកោរាញឞ្រាសលែៈតឹមមពើលជេសមាគ៝ប់ អ៝ន់គ៝ប់រ៝មអាប់នតីលឞូនុយ្ស លើយទឹងអោសលាសទូហ្វេឞូនុយ្សបឹបើច មោលាស លាសមោអោសក្ល៝សតានាប់មាត់ពាង់។* ២៩ កើតនទ្រីទឹងគ៝ប់ហាន់រ៝ទោលខាន់អៃមៃដាៈឞូឞ្រោៈជាៈគ៝ប់។ លាសនទ្រីល៝ង់ខាន់អៃមៃមឞើសមាគ៝ប់ ម៝សនាវខាន់អៃមៃដាៈគ៝ប់ហាន់តាអ្យា?” ៣០ កោនេលេស អើសមាពាង់៖ “នោកពែនារឞើសកើយនើស ក្លាប់លាសម៝ងពែកេងមាង់កើតអាបៃអ្យាដ៝ង់ ទោលគ៝ប់មឞើសឆើមតាជៃ គែសទូហ្វេឞូក្លោញឆ៝សឞ៝កអាវងលាងច្រាត ទ៝ក់ឞើសនាប់គ៝ប់រី‌ ៣១ ជេសរីលាសមាគ៝ប់៖ «ហើយកោនេលេស កោរាញឞ្រាសលែៈអ្យាត់ជេសនាវមៃមឞើសឆើម នទ្រែលមានទើមៃអ៝ន់យោៈឞូនៃ ពាង់មោច្វេលអោស។ ៣២ អាបៃអ្យាអ៝ន់មៃដាៈឞូហាន់តាប៝នយោបពេ រី មឞើសមាទូហ្វេឞូក្លោរាញាពាង់ឆីមោន ឞូក្វាល់ពាង់ពេត្រោស ដ៝ង់ ដាៈពាង់ហាន់តាអ្យា។ ពាង់គុតាជៃឆីមោន ឞូនុយ្សនទ្រាប់នតោមពោមពា(ឆ្យុម) ជៃនៃទាច់ទាកវាច់ទាកវារ់»។ ៣៣ កើតនទ្រីទឹងគ៝ប់ដាៈឞូហាន់ជាៈមៃរ៝ អ្វែសងាន់មៃហាន់តាអ្យា។ អាបៃអ្យាទឹងលែៈហេនតាអ្យាលែៈគុឞើសនាប់កោរាញឞ្រាសជេស គៃមាអ្យាត់លែៈនាវពាង់ដាៈមៃងើយ”។

នាវពេត្រោស ងើយតាជៃកោនេលេស

៣៤ ជេសរីពេត្រោស នតើមងើយ៖ “អាបៃអ្យាលែៈគ៝ប់គឹតនហេលនានេៈងាន់ កោរាញឞ្រាសមោអោសកើយ្សឞូនុយ្សទូមពោលទើម‌* ៣៥ យើនមាទឹងលែៈតាមពោលឞូនុយ្ស ឞូម៝សអីញអោតនាវកោរាញឞ្រាស នទ្រែលមាជានការនាវឆ៝ង់ លែៈឞូនុយ្សអីនៃពាង់រ៝មរ៝។* ៣៦ ខាន់អៃមៃលែៈគឹតជេសនាវមហែមហានអ្វែសពាង់លែៈងើយមាផូងអីឆ្រាអែល ហេន៖ ឞូនុយ្សទើយគែសនាវដាប់មពាន់ដាសកោរាញឞ្រាសយ៝រមានាវខឹតកោរាញយេឆូក្រីស ។ កោរាញយេឆូក្រីស នៃជេងកោរាញមាទឹងលែៈឞូនុយ្សតានែសនតូ។* ៣៧ ខាន់អៃមៃលែៈគឹតជេសមានាវយោហាន-បាប់តែម ដាៈប៝នលានរាគ៝ល់លើយនូយ្សនហ៝ម់អ្យើស ជេសរីជានបាប់តែមខាន់ពាង់យុកមាទាកនៃនើស ខាន់អៃមៃលែៈគឹតដ៝ង់នទើកោរាញយេឆូ លែៈជាននតើមឞើសឞ្រីកាលីលេ ត៝ត់មាលាមឞ្រីយូដា នៃ។* ៣៨ ខាន់អៃមៃលែៈគឹតជេស កោរាញឞ្រាសអ៝ន់ឞ្រាសហ្វេងអ្វែសអីក្ល៝សអ្វែសគុតាកោរាញយេឆូ អីតាៈឞើសប៝ននាឆារែត នៃងាន់ នទ្រែលមាអ៝ន់នាវទើយតាពាង់។ ពាង់ឞ្រោៈញឆ៝ងអាប់នតុក ជាននទើអ្វែស នទ្រែលមាជានឞាសប៝នលានអីគែសឞ្រាសអ្យើសលើស។ ទឹងលែៈនទើអ្យាពាង់ឞ្លាវជានយ៝រលាសកោរាញឞ្រាសគុនទ្រែលពាង់។* ៣៩ ហេនអ្យាអីតើមឆៃលែៈនតីលនាវខ្លៃកោរាញយេឆូ ជានតាឞ្រីយូដា នទ្រែលមាតាប៝នយេរូឆាលឹម ។ ឞូងខឹតពាង់ ព៝ង់ពាង់តាឆីតឹមរាកាង់‌* ៤០ យើនមាត៝ត់ពែនារជេសខឹត កោរាញឞ្រាសជានអ៝ន់ពាង់ទ៝ក់រេស នទ្រែលមាអ៝ន់ពាង់តឹមមពើលឆាក់អ៝ន់ឞូឆៃ។* ៤១ កោរាញឞ្រាសមោអោសអ៝ន់ទឹងលែៈឞូនុយ្សឆៃពាង់ យើនមាកោរាញឞ្រាសកើយ្សហេនអ្យាអេល៝រមាពាង់ខឹតទ៝ក់រេស គៃមាជានតើមមឞើសមានទើអីនៃ។ ហេនអ្យាអីគុញេតឆោងនទ្រែលពាង់ ជេសពាង់ទ៝ក់រេសនៃនើស។ ៤២ កោរាញយេឆូ នតិញមាហេន ដាៈហេនមឞើសងក៝ចនាវមហែមហានអ្វែសអ៝ន់មាឞូ នទ្រែលមាមឞើសងក៝ចពាង់អ្យាអីកោរាញឞ្រាសទែអ៝ន់ផាតទោយ្សទឹងលែៈឞូនុយ្សតានែសនតូតានារជឹតនាប់តៃ ឞូនុយ្សហោមរេស នទ្រែលមាឞូនុយ្សលែៈខឹតដ៝ង់។* ៤៣ ទឹងលែៈមពោលឞូនុយ្សនតើយ្សនាវងើយកោរាញឞ្រាសកាល់អែនើស លែៈងក៝ចជេសនាវខ្លៃកោរាញយេឆូ ។ ខាន់ពាង់ងក៝ចកោរាញឞ្រាសយោៈនអាចមោហោមកើបនាវតីសមាទឹងលែៈឞូនុយ្សអីញឆីងមាឞ្រាសក្រីស យ៝រមានទើពាង់លែៈជេសជាន”។*

មពោលអីមោទីផូងអីឆ្រាអែល គែសឆ៝ៈទើនឞ្រាសហ្វេងអ្វែស

៤៤ ទោលពេត្រោស ហោមអែងើយ ឞ្រាសហ្វេងអ្វែសអីក្ល៝សអ្វែសជុរគុតាខាន់ពាង់អីគុអ្យាត់នាវពាង់ងើយនៃ។* ៤៥ ល៝ង់មពោលញឆីងមាឞ្រាសយេឆូ អីហាន់នទ្រែលពេត្រោស នៃនើស ខាន់ពាង់ផូងអីឆ្រាអែល អីគែសក៝សនតោទាទេ។ ខាន់ពាង់នទ្រ៝ត់ហីសរាហ៝ល់ងាន់មោវ៝ត់អោស ឆៃកោរាញឞ្រាសត្រ៝ចអ៝ន់ឞ្រាសហ្វេងអ្វែសអីក្ល៝សអ្វែសគុតាមពោលផូងអីមោទីផូងអីឆ្រាអែល ដ៝ង់‌* ៤៦ យ៝រលាសខាន់ពាង់តាង់មពោលអីនៃងើយតានាវងើយអេងៗអីមពោលអីនៃមោអោសឞ្លាវងើយអាល៝រនើស តាង់មពោលអីនៃរានេមាកោរាញឞ្រាស។ ជេសរីពេត្រោស លាស៖* ៤៧ “ខាន់ពាង់លែៈទើនឞ្រាសហ្វេងអ្វែសអីក្ល៝សអ្វែសគុតាខាន់ពាង់តឹមឞានមាឞ៝ន់ដ៝ង់ លាសនទ្រីឞូម៝សហោមទើយឞ្វៃមាមពោលអ្យាមោអ៝ន់ជានបាប់តែមយុកមាទាក?”* ៤៨ ជេសរីពេត្រោស ដាៈឞូជានបាប់តែមយុកមាទាកអ៝ន់មាមពោលអីនៃតារាញាឞ្រាសយេឆូក្រីស ។ ជេសជានបាប់តែមរី ឞូក៝ន់ពេត្រោស អ៝ន់គុនទ្រែលតារីជ៝ៈឞារពែនារជឹត។

*១០:១ ១០:១៖ ប៝នឆេឆារា គុតាមែងទាកវាច់ទាកវារ់ ក្លាប់លាស ៦០ កីលោមែតមពែសឞើសលើប៝នយោបពេ ។

†១០:១ ១០:១៖ ពាង់គែសក៝នតាហែនក្លាប់លាស ១០០ នុយ្ស។ ពាង់ នទ្រែលមាក៝នតាហែនពាង់តាមពោលតាហែន ៦០០ នុយ្ស ទឹងលែៈខាន់ពាង់អីនៃឞូក្វាល់លាស«មពោលឞ្រីអីតាលី »។

*១០:១ ១០:១៖ លក ៧:១-៥

*១០:១១ ១០:១១-១៦៖ ការ ១៥:៧-៩

*១០:១២ ១០:១២៖ កល ១១:២០, ២៥

*១០:២៦ ១០:២៦៖ នតម ១៩:១០

*១០:២៨ ១០:២៨៖ ការ ១០:១៥; ១១:៣-៤

*១០:៣៤ ១០:៣៤៖ នវ ១០:១៧

*១០:៣៥ ១០:៣៤-៣៥៖ យហ ១០:១៦; រម ២:១០-១១

*១០:៣៦ ១០:៣៦៖ ការ ៥:៣១; លក ២:១៤; អេផ ២:១៧

*១០:៣៧ ១០:៣៧៖ លក ៣:៣-១៧

*១០:៣៨ ១០:៣៨៖ លក ៣:២១-២២

*១០:៣៩ ១០:៣៩៖ ការ ១:៨; លក ២៤:៣២-៣៣

*១០:៤០ ១០:៤០-៤១៖ លក ២៤:១-៧, ៣៦-៤៣; ១កោ ១៥:៤-៨

*១០:៤២ ១០:៤២៖ ការ ១:៨; លក ២៤:៤៧

*១០:៤៣ ១០:៤៣៖ លក ២៤:៤៤-៤៦; អេឆា ៥៣:៥-១១; យេរ ៣១:៣៤

*១០:៤៤ ១០:៤៤៖ ការ ១១:១៥

*១០:៤៥ ១០:៤៥៖ ការ ២:៣៨-៣៩

*១០:៤៦ ១០:៤៦៖ ការ ២:៤

*១០:៤៧ ១០:៤៧-៤៨៖ ការ ៨:៣៦; ១១:១៦-១៧