នាវកោរាញឞ្រាសងើយតានាវងើយឞូន៝ង កោរាញអ៝សម៝ន ១៧

១៧

ពោល នទ្រែលមាឆីលាស ហាន់តាប៝នតេឆាលោនិក

១ ជេសរីពោល នទ្រែលមាឆីលាស ហាន់គ្លាត់រ៝ៈប៝នអាម់ផីពោលី នទ្រែលមាគ្លាត់រ៝ៈប៝នអាពុលោនី ខាន់ពាង់ហាន់ត៝ត់តាប៝នតេឆាលោនិក ។ តាប៝ននៃគែសទូមល៝ម់ញីសរាបុនផូងអីឆ្រាអែល ។* ២ តឹងមានាវវៃពោល នើស ពាង់លាប់តាញីសរាបុនរី នទ្រែលមាតឹមរាលាច់តឹមញច្រាៈអ្វាញ់នាវកោរាញឞ្រាសងើយដាសឞូពែពើស អាប់នារឆាបាត់ អីនាររាលូផូងអីឆ្រាអែល ។ ៣ ពាង់ទ៝ង់នាវកោរាញឞ្រាសងើយអីនៃមឞើសងក៝ចអ៝ន់ឞូនហេលនានេៈ ឞ្រាសក្រីស អីនើមរាក្លាយ្សអីកោរាញឞ្រាសលែៈត៝នមាផូងអីឆ្រាអែល អ្យាត់មាគែសនាវរេសរាញាល់ នហ៝មាត៝ត់ខឹត ជេសរីទ៝ក់រេសតៃ។ ពាង់លាស៖ “ឞ្រាសក្រីស អីនៃ ពាង់កោរាញយេឆូ អីគ៝ប់មឞើសមាខាន់អៃមៃនើស”។* ៤ គែសផូងអីឆ្រាអែល អាបាៈអ្យាត់តឹងពោល នទ្រែលមាឆីលាស ។ គែសផូងគ្រែក អីយើកមឞាសកោរាញឞ្រាសអ៝ក់ដ៝ង់ នអ៝ប់មាផូងឞូអូរជានក្វ៝ង់អ៝ក់ដ៝ង់អ្យាត់តឹងខាន់ពាង់។ ៥ ល៝ង់ផូងអីឆ្រាអែល អីមោអ្យាត់តឹងខាន់ពាង់ ផូងអីនៃមោនាចយ៝រមាឆៃអ៝ក់ឞូនុយ្សតឹងឞារហៃខាន់ពាង់នៃ។ ជេសរីផូងអីនៃរាគូមផូងឞូនុយ្សអ្យើសអីប្លាវជានការ ផូងទាសមាគុរ៝ៈត្រ៝ង លែវឞាល់ជានអុសអាសតាប៝ននៃ។ ផូងអីនៃហាន់ញជ្វែងជៃទូហ្វេឞូក្លោរាញាយាឆុន ជ៝យញុបពោល នទ្រែលមាឆីលាស គៃមាញជុនខាន់ពាង់អ៝ន់ផូងប៝នលានផាតទោយ្ស។* ៦ យ៝រមាជ៝យខាន់ពាង់តានៃមោឆៃ ជេសរីញុបនទាៈយាឆុន អីឞូនុយ្សតើមជៃ នទ្រែលមាញុបឞូនុយ្សអាបាៈអីញឆីងមាឞ្រាសយេឆូ តេកញជុនអ៝ន់មាកោរាញប៝ននៃ នហ៝មានតែរទុតទាង់ៗលាស៖ “ពោល នទ្រែលមាឞាល់ពាង់ជេងផូងអីជានអ៝ន់លាមនែសនតូគែសនាវអុសអាស លែៈត៝ត់តាអ្យាជេស!* ៧ យាឆុន អ្យារ៝មផូងអីនៃគុតាជៃពាង់។ ផូងអីនៃជានតីសមានាវកោរាញកាដាច់តាប៝នរោម លែៈដាៈប៝នលាន យ៝រលាសខាន់ពាង់មឞើសងក៝ចអ៝ន់ឞូអ្យាត់ទូហ្វេកាដាច់អេងជឹតរាញាយេឆូ ”។* ៨ ត៝ត់តាង់នាវងើយផូងអីនៃ ផូងប៝នលាន នទ្រែលមាកោរាញប៝នគែសនាវរាវៃហោងាន់។ ៩ ជេសរីកោរាញប៝ននៃដាៈអ៝ន់ព្រាក់មាច្វាយយាឆុន នទ្រែលមាឞូនុយ្សអាបាៈអេងនៃ រីមើឞូមអើកខាន់ពាង់អ៝ន់លោសឞើសនតុកនៃ។

ពោល នទ្រែលមាឆីលាស ហាន់គុតាប៝នបេរា

១០ ជេសរីផូងញឆីងញជ្វាល់ពោល នទ្រែលមាឆីលាស លោសនតុងឞើសប៝ននៃទឹងមាង់រ៝ ហាន់តាប៝នបេរា ។ ត៝ត់តាប៝ននៃខាន់ពាង់ហាន់តាញីសរាបុនផូងអីឆ្រាអែល ។* ១១ ផូងអីឆ្រាអែល តាប៝ននៃគែសនូយ្សនហ៝ម់អ្វែសរាលាវមាផូងអីឆ្រាអែល តាប៝នតេឆាលោនិក យ៝រលាសខាន់ពាង់អ្យាត់នាវឞារហៃខាន់ពាង់នៃមឞើសងក៝ចមាលែៈនូយ្សនហ៝ម់ មេតអ្វាញ់នាវកោរាញឞ្រាសងើយអាប់នារ គៃមាអុចគឹតនហេលនាវពោល នទ្រែលមាឆីលាស នតីនៃ ងាន់មោលាសមោ។* ១២ គែសអ៝ក់តាផូងខាន់ពាង់នៃឆឹតញឆីង នអ៝ប់មាផូងឞូអូរគ្រែក ជានក្វ៝ង់ នទ្រែលមាផូងឞូក្លោគ្រែក អ៝ក់ដ៝ង់។ ១៣ យើនមាត៝ត់ផូងអីឆ្រាអែល តាប៝នតេឆាលោនិក តាង់លាសពោល មឞើសងក៝ចនាវកោរាញឞ្រាសតាប៝នបេរា ដ៝ង់ ខាន់ពាង់ហាន់ញឆោចផូងប៝នលានតានៃជាននាវអុសអាស។* ១៤ ត៝ត់មាឆៃកើតនៃ ផូងញឆីងមាឞ្រាសយេឆូ លែវពោល ហាន់តាមែងទាកវាច់ទាកវារ់រ៝ ហោមគុតារីឆីលាស នទ្រែលមាតីមោថេ ។ ១៥ ផូងអីញជុនពោល រីនើស ខាន់ពាង់ញច៝ទូកក្វ៝ង់ញជុនត៝ត់តាប៝នក្វ៝ង់អាថែន រីមើខាន់ពាង់ព្លឹឆឹតនហ៝មាមឞើសនាវពោល ទែនតិញឆីលាស នទ្រែលមាតីមោថេ ដាៈហាន់តឹងពាង់អ៝ន់គើញ។*

នាវពោល មឞើសងើយតាប៝នអាថែន

១៦ ទោលពោល គុក៝ប់ឆីលាស នទ្រែលមាតីមោថេ តាប៝នអាថែន នូយ្សនហ៝ម់ពាង់គែសនាវរាវៃរាង៝តហោងាន់ យ៝រមាពាង់ឆៃតាប៝ននៃគែសរូបឞ្រាសអេងៗទាទេងាន់។ ១៧ កើតនទ្រីពាង់តឹមញច្រាៈមាផូងអីឆ្រាអែល នទ្រែលមាផូងអីមោទីផូងអីឆ្រាអែល អីយើកមឞាសមាកោរាញឞ្រាសតាញីសរាបុនផូងអីឆ្រាអែល រី ជេសរីអាប់នារពាង់តឹមញច្រាៈដ៝ង់មាឞូនុយ្សអីពាង់ម៝ប់រ៝ៈត្រ៝ងតាប៝ននៃ។* ១៨ ជេសរីគែសផូងនើមនតីមពែសនាវនតីអេពីកូរ * នទ្រែលមាផូងនើមនតីមពែសនាវនតីឆាតោអិក ផូងនៃឞ្លាវតឹមញច្រាៈ។ ខាន់ពាង់តឹមញច្រាៈដាសពោល ជេសរីតឹមលាសនទ្រាង់ខាន់ពាង់នើម៖ “ម៝សនាវនតីឞូនុយ្សប៝ច់ប៝រ់អ្យាហ្យាស?” ឞូអាបាៈជឹតលាសកើតនអា៖ “តឹមឞានមាពាង់អុចមឞើសងក៝ចមាឞ្រាសឞូនាច់”។ ខាន់ពាង់ងើយនទ្រីយ៝រលាសខាន់ពាង់តាង់ពោល មឞើសងក៝ចនាវមហែមហានអ្វែសឞ្រាសយេឆូ នទ្រែលមាងក៝ចនាវទ៝ក់រេសតៃ។ ១៩ ជេសរីឞូញជុនលែវពាង់ឞើសនាប់កោរាញប៝នតានតុករាបុនកាលើយោកអើរីយុស ឞូលាសមាពាង់៖ “ល៝ង់មៃមឞើសអ៝ន់ហេនគឹតនាវនតីមហែមៃនៃ‌ ២០ យ៝រលាសនាវនតីមៃអ៝ន់ហេននទ្រ៝ត់ងាន់។ ហេនអុចគឹតនាវខ្លៃអីនៃដ៝ង់”។ ២១ ល៝ង់ទឹងលែៈឞូនុយ្សតាប៝នអាថែន នទ្រែលមាផូងឞូនាច់គុតាប៝ននៃ ខាន់ពាង់រូមាងើយ រូមាគុអ្យាត់នាវមហែអេងៗទើម មោហោមអោសជាននទើអេងជឹត។

២២ ជេសរីពោល ទ៝ក់ឞើសនាប់ផូងកោរាញប៝នអីនៃ ពាង់លាស៖ “ហើយផូងអ៝សនោកោញវាអីគុតាប៝នអាថែន គ៝ប់លែៈឆៃខាន់អៃមៃញឆ្រោយ្សយើកមឞាសមាឞ្រាសអេងៗងាន់‌ ២៣ យ៝រលាសទោលគ៝ប់ហាន់រាឆ៝ងតានតុកអ្យា គ៝ប់អ្វាញ់នតុកមាយើកមឞាសឞ្រាសអេងៗ។ ជេសរីគ៝ប់ឆៃទូញឆឺងជានឞ្រាសគែសញចីសលាសកើតនអា៖ «យើកមឞាសមាឞ្រាសអីឞូនុយ្សមោគឹតនាល់»។ កើតនទ្រីគ៝ប់អុចមឞើសងក៝ចអ៝ន់មាខាន់អៃមៃ មាឞ្រាសអីខាន់អៃមៃយើកមឞាសយើនមាមោគឹតនាល់នៃ។ ២៤ ពាង់កោរាញឞ្រាសរាហាក់ញជេងនែសនតូអ្យា នទ្រែលមាទឹងលែៈនតីលនទើគែសតានែសនតូអ្យា។ ពាង់អីកោរាញមាត្រោកមានែសនតូ ពាង់មោគុអោសតាញីសឞូនុយ្សជាន។* ២៥ ពាង់មោខាច់អោសដាៈឞូនុយ្សឆើមកើលជានការមាពាង់ យ៝រលាសពាង់នើមអីអ៝ន់ទឹងលែៈឞូនុយ្សគែសនាវរេស គែសនហ៝ម់ នទ្រែលមាអ៝ន់លែៈនតីលនទើ។ ២៦ កោរាញឞ្រាសញជេងឞូនុយ្សនើសលោសតាៈឞើសទូហ្វេឞូនុយ្សទើម ទឹងគែសមាឞូនុយ្សគុលាមឞ្រីទាកលាមនែសនតូអ្យា។ ទឹងលែៈលាមឞ្រីទាកអីនៃកោរាញឞ្រាសអ៝ន់ទាសអ៝ក់នារខៃនាម់ទូញជារ់នាវរេស នទ្រែលមាអ៝ន់នហារ់ឞ្រីមាខាន់ពាង់គុ ទាសពាង់នើមអុច។ ២៧ ពាង់ជានកើតនអាគៃមាទឹងលែៈឞូនុយ្សជ៝យពាង់ ជេសរីលាសញឆ្រោយ្សជ៝យពាង់ក្លាប់លាសគឹតនាល់ពាង់ដ៝ង់។ យើនមាពាង់មោអោសគុងាយដាសមាឞូនុយ្សឞ៝ន់។* ២៨ យ៝រតាៈឞើសកោរាញឞ្រាសអ៝ន់ ទឹងឞ៝ន់គែសនាវរេស ទឹងឞ៝ន់ឞ្លាវមព៝ត់ នទ្រែលមាទឹងឞ៝ន់ជេងឞូនុយ្ស។ គែសដ៝ង់ឞូនុយ្សឞ្លាវមព្រឹងតាផូងខាន់អៃមៃនើមលាសកើតនអា៖

«ឞូនុយ្សឞ៝ន់ជេងរាន៝យទែសតាៈឞើសកោរាញឞ្រាស»។

២៩ លាសនទ្រី លាសឞូនុយ្សឞ៝ន់ជេងរាន៝យទែសតាៈឞើសកោរាញឞ្រាស ឞ៝ន់លើយអោសមឹនកោរាញឞ្រាសជេងតឹមឞានមារូបមាយ្ស មារូបព្រាក់ មោលាសជេងតឹមឞានមាលុតឹងមានាវគឹតឞ្លាវឞូនុយ្សឞ្លាវជាន។* ៣០ ឞើសនតើមកោរាញឞ្រាសមោអោសក្លាប់នទាង់មាឞូនុយ្សគុរេសអេហ៝ៈគឹតនាល់ពាង់ យើនមាអាបៃអ្យាកោរាញឞ្រាសដាៈទឹងលែៈឞូនុយ្សតានែសនតូអ្យា ដាៈខាន់ពាង់រាគ៝ល់លើយនូយ្សនហ៝ម់អ្យើសឆឹតញឆីងមាពាង់‌ ៣១ យ៝រលាសកោរាញឞ្រាសលែៈនទ្រាប់ជេសនារផាតទោយ្សទឹងលែៈឞូនុយ្សតានែសនតូមានាវឆ៝ង់។ ពាង់លែៈជេសកើយ្សទូហ្វេឞូនុយ្សជេងកោរាញផាតទោយ្ស ពាង់លែៈជានអ៝ន់ឞូនុយ្សអីនៃទ៝ក់រេសគៃមាអ៝ន់ទឹងលែៈឞូនុយ្សគឹតនហេលនានេៈឞូនុយ្សអីនៃជេងកោរាញផាតទោយ្សអីនៃងាន់”។*

៣២ ត៝ត់មាឞូតាង់ពោល ងក៝ចនាវឞូនុយ្សខឹតទ៝ក់រេសតៃកើតនៃ គែសឞូអាបាៈមឺចមាអោឞាល់ យើនមាឞូអាបាៈជឹតលាសកើតនអា៖ “នារជឹតនាប់តៃ ហេនហាន់អ្យាត់នាវមៃជឹត”។* ៣៣ ជេសរីពោល ទូលោសឞើសខាន់ពាង់នៃ។ ៣៤ គែសឞូនុយ្សអាបាៈតឹងពាង់ នហ៝មាឆឹតញឆីង។ តានៃគែសទូហ្វេរាញាដេវនីស ជេងកោរាញផាតទោយ្សតាប៝ននៃ នទ្រែលមាគែសទូហ្វេឞូអូររាញាដាមារីស នអ៝ប់មាគែសឞូនុយ្សអេងៗដ៝ង់។

*១៧:១ ១៧:១-២៖ ការ ១៣:១៤

*១៧:៣ ១៧:៣-៤៖ ការ ៩:២២; ១៨:២៨; លក ២៤:៤៤-៤៦; រម ១:២

*១៧:៥ ១៧:៥៖ ការ ៥:១៧; ១៣:៤៥; ១៩:២៣

*១៧:៦ ១៧:៦៖ ការ ១៦:២០

*១៧:៧ ១៧:៧៖ លក ២៣:២

*១៧:១០ ១៧:១០៖ ការ ១៣:១៤

*១៧:១១ ១៧:១១៖ លក ២៤:៤៤-៤៦; យហ ៥:៣៩

*១៧:១៣ ១៧:១៣៖ ការ ១៧:៥

*១៧:១៥ ១៧:១៥៖ ការ ១៦:១-៣

*១៧:១៧ ១៧:១៧៖ ការ ១៣:១៤

*១៧:១៨ ១៧:១៨៖ នាវនតីអេពីកូរ នទ្រែលមានាវនតីឆាតោអិក ជេងនាវនតីឞារអឹអេងឞាល់ តានៃគែសនាវនតីមានាវរេស មើមរេសតានែសនតូអ្យា នទ្រែលមានាវរេសម៝សគែសនាវខ្លៃ។ នាវនតីអីនៃលាសមោអោសគែសឞ្រាស។

*១៧:២៤ ១៧:២៤៖ ការ ៧:៤៧-៥០

*១៧:២៧ ១៧:២៧៖ អេឆា ៥៥:៦

*១៧:២៩ ១៧:២៩៖ ការ ១៩:២៦; អេឆា ៤០:១៨-២២

*១៧:៣១ ១៧:៣១៖ ២កោ ៥:១០

*១៧:៣២ ១៧:៣២-៣៤៖ ១កោ ១:២២-២៥