នាវកោរាញឞ្រាសងើយនាវតឹមរាង្លាប់មហែ កោរាញអ៝សម៝ន 24

មពោលកោរាញឞ្រីយូដា លាសនតោនពោល

1 ជេសពោល ហាន់ត្រុយ្សតាប៝នឆេឆារា ត៝ត់ព្រាម់នារឞើសកើយនៃ ត៝ត់កោរាញជានឞ្រាសទុតក្វ៝ង់រាញាអានានេស នទ្រែលមាកោរាញឞ្រីយូដា អាបាៈ។ ខាន់ពាង់លែវទូហ្វេឞូនុយ្សឞ្លាវតឹមមឞើសទោយ្សរាញាតើតូលុស នតោនពោល តានាប់កោរាញក្វ៝ង់នៃ។* 2 ឞូក្វាល់ពោល វាច់តារី ជេសរីតើតូលុស នតើមនតោនពាង់កើតនអា៖ “គ៝ប់ទាន់កោសមឞាសលាសអ្វែសមាកោរាញក្វ៝ង់ផេលិច ។ យ៝រមានាវមឹនអ្វែសមៃទឹងផូងហេនគែសនាវដាប់មពាន់ ទឹងឞ្រីទាកហេនគែសនាវរាគ៝ល់ជេងអ្វែសលែៈជ៝ៈហើយ។ 3 កើតនទ្រីហេនកាសគឹតលាសអ្វែសមាកោរាញទុតហោងាន់តឹមអាប់តឹ លែៈនាវមៃអ៝ន់មាហេនតឹមអាប់នតុក។ 4 គ៝ប់មោអុចអោសរាខ្វាកកោរាញជ៝ៈជ៝ងអីរដ៝ង់ គ៝ប់ទាន់កោរាញគែសនាវយោៈអុចអ្យាត់នាវហេនឞារពែត៝ងទើម‌ 5 យ៝រលាសហេនឆៃឞូនុយ្សអ្យាជានអ្យើស ពាង់ជានអ៝ន់នាវអុសអាសមាផូងអីឆ្រាអែល លាមនែសនតូអ្យា ពាង់អីនៃជេងកោរាញអីឞូក្វាល់ផូងនាឆារែត *។* 6 ជេសរីនអ៝ប់មាពាង់ជានបឹមាញីសជានឞ្រាសមាកោរាញឞ្រាសជឹត កើតនទ្រីទឹងហេនញុបពាង់[ហេនអុចផាតទោយ្សពាង់តឹងមានាវវៃហេន‌* 7 យើនមាគែសលូឆៀ †ជេងកោរាញតាហែនក្វ៝ង់ ពាង់រាយ្សមឞាងឞូ នទ្រែលមាមផ៝ក់ឞូនុយ្សអ្យាឞើសតីហេន‌ 8 ជេសរីដាៈផូងនតោនពាង់ហាន់ម៝ប់មៃតាអ្យា។] ត៝ត់មៃនើមអោបនាវឞើសពាង់ មៃគឹតរ៝ទឹងលែៈនាវអីហេននតោនពាង់”។ 9 មពោលកោរាញឞ្រីយូដា អ្យាត់នាវនតោននៃ ជេសរីមឞើសមាកោរាញក្វ៝ង់ទឹងលែៈនាវអីនៃជេងទីងាន់។

ពោល អើសនាវឞូនតោនពាង់

10 ជេសរីកោរាញក្វ៝ង់នៃញច៝ង់តីដាៈពោល ងើយ។ ពោល ងើយ៖ “អើកោរាញក្វ៝ង់ លែៈគ៝ប់គឹតជេសមៃកោរាញផាតទោយ្សតាអ្យាលែៈជ៝ៈនាម់ កើតនទ្រីនាវគ៝ប់អើសអ្យា គ៝ប់មោគែសអោសនាវរាវៃ។ 11 យើនមាលាសមៃអោបឞូ មៃគឹតរ៝ ញចោមា ១២ នារឞើសកើយនើសទើមគ៝ប់ហាន់យើកមឞាសកោរាញឞ្រាសតាជ៝ង់គូងញីសជានឞ្រាសតាយេរូឆាលឹម ។* 12 ឞូមោព្រ៝តអោសឆៃគ៝ប់គុតឹមរាលាច់ដាសឞូ មោលាសជាៈឞូជាននាវអុសអាស ឞ៝លលាសតាញីសជានឞ្រាស តាញីសរាបុន មោលាសលាមនតុកតាប៝ននៃ។ 13 អាបៃអ្យាមពោលអីនៃនតោនគ៝ប់ជានអ្យើស យើនមាជ៝យនទើញហើនទើគ៝ប់ជានអ្យើសមោអោសឆៃ។ 14 យើនមាគ៝ប់អុចងក៝ចឆ៝ង់អ៝ន់មាកោរាញ គ៝ប់យើកមឞាសមាកោរាញឞ្រាសអីផូងអូចែហេនយើកមឞាសដ៝ង់។ គ៝ប់យើកមឞាសពាង់តឹងនាវកោរាញយេឆូ នតីជេងទីងាន់ តីសមាកោរាញឞ្រីយូដា លាសនាវនតីអីនៃងក្លាៈ យើនមាគ៝ប់អ្យាត់លែៈនាវមោឆេ ញចីស នទ្រែលមាគែសញចីសតាឆ៝ម់បុតមពោលឞូនុយ្សនតើយ្សនាវងើយកោរាញឞ្រាស។* 15 គ៝ប់គែសនាវរានើមន៝ប់រាក៝ក់អ្យាតាកោរាញឞ្រាស តឹមឞានមាមពោលអីនៃដ៝ង់៖ ឞូនុយ្សឆ៝ង់ ឞូនុយ្សក្វែទ៝ក់រេសទាទេ។* 16 កើតនទ្រីទឹងគ៝ប់ញឆ្រោយ្សបាបើ គៃមាជានឆ៝ង់មោគែសអោសនាវដីតព្រេងតានាប់មាត់កោរាញឞ្រាស នទ្រែលមាតានាប់មាត់ទឹងលែៈឞូនុយ្ស។* 17 គ៝ប់ទូឞើសប៝នយេរូឆាលឹម លែៈជ៝ៈនាម់ ជេសរីគ៝ប់ព្លឹឆឹតញអោតព្រាក់គៃមាកើលផូងអ៝អាចតាផូងប៝នលានគ៝ប់នើម នទ្រែលមាជានឞ្រាសមាកោរាញឞ្រាសដ៝ង់។* 18 ទោលគ៝ប់ជានឞ្រាសនៃ ឞូឆៃគ៝ប់គុតាជ៝ង់គូងញីសជានឞ្រាសលែៈជេសជាននាវរាវឆាក់គៃមាក្ល៝សតឹងនាវវៃ។ មោគែសអោសតឹមរាបុនឞូនុយ្សអ៝ក់ មោលាសគែសនាវអុសអាស។* 19 យើនមាផូងអីឆៃគ៝ប់តាជ៝ង់គូងញីសជានឞ្រាសនៃ គែសផូងអីឆ្រាអែល អាបាៈតាៈឞើសឞ្រីអាឆី ទីលាសផូងអីនៃហាន់នតោនគ៝ប់មឞើសមាមៃកោរាញ លាសខាន់ពាង់គែសនាវដាសគ៝ប់។ 20 មោលាសអ៝ន់ផូងអ្យាងក៝ច លាសខាន់ពាង់ឆៃនាវគ៝ប់ជានតីសមោលាសមោ នោកគ៝ប់លែៈគុតានាប់មពោលកោរាញជានការផូងឞ្រីយូដា នើស‌ 21 លាសមាគែសនាវខាន់ពាង់លាសគ៝ប់។ នោកនៃគ៝ប់គែសងើយទាង់មាខាន់ពាង់កើតនអា៖ «ខាន់មៃឆ៝ៈគ៝ប់ផាតទោយ្សនារអ្យា យ៝រមានាវគ៝ប់អ្យាត់ឞូនុយ្សខឹតហោមទ៝ក់រេសដ៝ង់»”។*

22 ផេលិច លែៈគឹតនហេលជេសមានាវញឆីងមាឞ្រាសយេឆូ ។ ជេសរីពាង់អ៝ន់ឞូឆឹត លាសមាខាន់ពាង់៖ “ក៝ប់ត៝ត់កោរាញតាហែនក្វ៝ង់លូឆៀ តាអ្យា ទឹងគ៝ប់ផាតទោយ្សនាវខាន់មៃអ្យា”។ 23 ជេសរីពាង់ដាៈទូហ្វេកោរាញតាហែនក្រុងពោល ជឹត យើនមាពាង់អ៝ន់នាវទើសមាពោល នទ្រែលមាមោអោសឞ្វៃឞូនុយ្សអីហាន់កើលពាង់។

ពោល ម៝ប់ផេលិច នទ្រែលមាអូរពាង់

24 គែសឆឹន ជឹតនារឞើសកើយនៃនើស កោរាញក្វ៝ង់ផេលិច ហាន់នទ្រែលអូរពាង់រាញាត្រូឆីល ឞូអូរនៃជេងផូងអីឆ្រាអែល ។ ពាង់ដាៈឞូក្វាល់ពោល ជេសរីអ្យាត់នាវពោល ងើយនាវញឆីងមាឞ្រាសយេឆូក្រីស ។ 25 ទោលពោល ងើយមានាវគុឆ៝ង់ មានាវឞ្លាវម៝ត់ញជ្រាង់ឆាក់អ៝ន់គុទីកែស នទ្រែលមានាវផាតទោយ្សកោរាញឞ្រាសតានារងគ្លែៈទុតតៃ ផេលិច គែសនាវក្លាច ជេសរីពាង់លាសមាពោល ៖ “អាបៃអ្យាមៃឆឹតប៝ត់ទោស ក៝ប់ម៝សនារគ៝ប់រូ គ៝ប់ក្វាល់តៃមៃ”។* 26 ផេលិច រានើមលាសពោល ឞ្ល៝ល់ព្រាក់អ៝ន់ពាង់ កើតនទ្រីទឹងពាង់ដាៈឞូក្វាល់ពោល ហាន់តឹមម៝ប់ងក៝ចឞ្រីមាពាង់អ៝ក់តឹ។ 27 ត៝ត់ឞារនាម់ឞើសកើយនៃ គែសទូហ្វេឞូក្លោរាញាព៝រកេស-ផេសតុស ‡ជានកោរាញក្វ៝ង់នត្រ៝ៈផេលិច ។ យ៝រលាសផេលិច អុចអ៝ន់មពោលកោរាញឞ្រីយូដា រាម់មអាកមាពាង់ កើតនទ្រីទឹងពាង់មោមអើកពោល ។

*24:1 ២៤:១៖ ការ ២៣:២

*24:5 ២៤:៥៖ នោកនៃឞូក្វាល់ផូងអីញឆីងមាឞ្រាសយេឆូ «ផូងនាឆារែត »ដ៝ង់។

*24:5 ២៤:៥៖ ការ ១៧:៦

*24:6 ២៤:៦៖ ការ ២១:២៨-២៩

†24:7 ២៤:៧៖ រាញាឆាក់ងាន់ពាង់ «ក្លោដេស-លូឆៀ »។

*24:11 ២៤:១១៖ ការ ២១:១៥

*24:14 ២៤:១៤៖ ការ ២៦:២២-២៣; រម ៣:៣១; ៧:១-៦

*24:15 ២៤:១៥៖ ការ ៤:២; ២៣:៦; ២៤:២១; ១កោ ១៥:២៣-២៥; ១តេ ៤:១៤; ដាន ១២:២

*24:16 ២៤:១៦៖ ការ ២៣:១; ២កោ ១:១២

*24:17 ២៤:១៧៖ កាល ២:១០; ១កោ ៩:២០

*24:18 ២៤:១៨-១៩៖ ការ ២១:២៦-២៧

*24:21 ២៤:២១៖ ការ ២៣:៦

*24:25 ២៤:២៥៖ ការ ២៣:២៦

‡24:27 ២៤:២៧៖ រាញាគ្លែសពាង់គែស«ផេសតុស »។