២៧
ឞូញជុនពោល តាប៝នរោម
១ ត៝ត់លែៈកោរាញក្វ៝ង់អ៝ន់ហេនជុរញច៝ទូកហាន់តាប៝នរោម ឞ្រីអីតាលី ឞូញជុនពោល នទ្រែលមាឞូនុយ្សទោយ្សអាបាៈអេងអ៝ន់មាទូហ្វេកោរាញតាហែនរាញាពាង់យូលេស ផូងតាហែនពាង់នៃជេងផូងតាហែនកោរាញកាដាច់។ ២ ហេនញច៝ទូមល៝ម់ទូកក្វ៝ង់អីតាៈឞើសប៝នអាដ្រាមីត អីលែៈនទ្រាប់ហាន់រ៝ៈមែងកើសតាប៝នអេងៗតាឞ្រីអាឆី ។ គែសអើរីសដារកុស ជេងឞូនុយ្សឞើសប៝នតេឆាលោនិក ឞ្រីមាឆេដោន ហាន់នទ្រែលហេនតារីដ៝ង់។*២៧:២៖ ការ ១៩:២៩; កោល ៤:១០ ៣ ត៝ត់នារអោយតៃហេនញឆ្រុងតាប៝នឆីដោន យូលេស គែសនូយ្សនហ៝ម់អ្វែសមាពោល ហោងាន់ អ៝ន់ពាង់ហាន់តាជៃមឹតជាង់ពាង់នើមរី គៃមាអ៝ន់ឞូកើលនទើមាពាង់។*២៧:៣៖ ការ ២៤:២៣; ២៨:១៦ ៤ ជេសរីហេនលោសឞើសប៝ននៃញច៝រ៝ៈគោលទាកកីព្រ៝ស ទែររ៝ៈមែងអីងាយឞើសឆ្យាល យ៝រលាសញច៝រាលឹឞើសចោងឆ្យាល។ ៥ ជេសហេនគ្លាត់ទាកវាច់ទាកវារ់ទាច់ឞ្រីកីលីកៀ នទ្រែលមាឞ្រីពាមផីលៀ ហេនត៝ត់តាប៝នមីរា ឞ្រីលូកេ ។ ៦ តាប៝ននៃកោរាញតាហែនជ៝យគែសទូមល៝ម់ទូកក្វ៝ង់តាៈឞើសប៝នអាលេកឆាន់ត្រី អីអុចហាន់តាឞ្រីអីតាលី ជេសរីពាង់លែវហេនញច៝ទូកអីនៃ។ ៧ ហេនញច៝មឞ្រើយៗហាន់ជឹតនាប់ជ៝ៈនារ ទឹងគែសមាត៝ត់តឹមឆ៝ង់មាប៝នកានីដោស មោទើសមោនើញងាន់ យ៝រលាសគែសឆ្យាលខោមតាៈឞើសនាប់ហេនរី។ ជេសរីតែងជឹតនតុកឆាលមោន តាគោលទាកក្រែត ញច៝រ៝ៈគោលទាកនៃរ៝ៈមែងអីងាយឞើសឆ្យាល។ ៨ ហេនញច៝រ៝ៈមែងនៃ ហេនញច៝នហ៝តនតុកឆាលមោន អីនៃមោទើសមោនើញទឹងត៝ត់តាទូនតុក ឞូរាញាលាស«នតុកអ្វែសញឆ្រុងទូក» ទាច់មាប៝នលាឆេ ។
៩ យ៝រមាមឞ្រើយអីរ ជេសរីនាវញេតបុនអ៝ត់ឆោងឆា*២៧:៩៖ បុនអ្យាជេងទូនតីលបុនតាផូងអីឆ្រាអែល អីគែសនាវខ្លៃទុតហោងាន់ នារនៃកោរាញជានឞ្រាសទុតក្វ៝ង់ងខឹតមពោមពា(ឆ្យុម)មាច្វាយនាវតីសផូងអីឆ្រាអែល ទឹងលែៈ។ (កល ១៦; ២៣:២៦-៣២; នក ២៩:៧-១១)។លែៈជេស នទ្រែលមាខៃឆ្យាលពោសលែៈឞើយមាត៝ត់ដ៝ង់ លាសហាន់ជឹតនាប់ជឹតក្លាចលាសគែសនាវជេរ នទ្រីពោល មឞើសមាខាន់ពាង់៖*២៧:៩-១០៖ ២កោ ១១:២៥-២៦ ១០ “អើខាន់មៃ គ៝ប់លែៈគឹតជេស លាសឞ៝ន់មោគុតាអ្យាប៝ត់ លាសហោមអែហាន់ជឹតនាប់ជឹតមរាគែសនាវត៝ត់ជេរងាន់ មោអោសទើនគែសជេរមាទ្រាប់នទើ នទ្រែលមាទូកទើម ពាង់គែសនាវជេរត៝ត់មាឆាក់ឞ៝ន់នើមជឹត”។ ១១ យើនមាកោរាញតាហែនមោអុចអោសអ្យាត់នាវពោល ងើយនៃ ពាង់អ្យាត់មាឞូនុយ្សអីតើមបើកទូក នទ្រែលមាឞូនុយ្សអីតើមទូកនៃទើម។ ១២ យ៝រមានតុកឞូញឆ្រុងទូកនៃមោលាង់អ្វែសអោសមាគុរាលូតាខៃឆ្យាលពោស†២៧:១២៖ ឞូក្វាល់លាស៖ «ខៃជីកាត់»ដ៝ង់។ នទ្រីទឹងគែសអ៝ក់ឞូនុយ្សអីអុចអ៝ន់ទូកហាន់នហ៝តជឹតនាប់អ៝យ។ ងខេបមាទើយហាន់ត៝ត់តាប៝នផេនិច ជេងនតុកឞូញឆ្រុងទូកទូនតុកតាគោលទាកក្រែត គៃមាគុរាលូតានតុកនៃតាខៃឆ្យាលពោស។ នតុកអីនៃគែសឞារត្រ៝ងមាលោសលាប់តាទាកវាច់ទាកវារ់ ជេងនតុកគែសនហុតមាឆ្យាលតាខៃឆ្យាលពោស។
គែសឆ្យាលផុត
១៣ ទោលនៃគែសឆ្យាលខោមលេតហេតតាៈមពែសឞើសទ៝ង់រី។ ខាន់ពាង់មឹនលាសជេងទីដាសនាវខាន់ពាង់អុច។ ជេសរីឞូអូយ្សរាឆែម៝ង់ល៝យ្សងគ៝ង់ទូកតេៈតាកាលើទូករី នតើមញច៝ហាន់រ៝ៈមែងគោលទាកក្រែត រី។ ១៤ យើនមាទូប្ល៝ត់ឞើសកើយនៃ គែសទូនតីលឆ្យាលផុតទុតទាង់ ឞូរាញាលាស«ឆ្យាលផុតអើរាក្លីដោន » ខោមតាៈឞើសគោលទាករីអ៝ន់បាសងាយ។ ១៥ ហេនរាប៝ង់ទូកជឹតឆ្យាលនៃមោហោមអោសទើយ ជេសរីហេនអ៝ន់ទូកតឹងឆ្យាលទែរាទូ។ ១៦ ត៝ត់តាទូមល៝ម់គោលទាកជេៈរីរាញាខ្លៅដា ‡២៧:១៦៖ មោលាស «ខៅដា »។ តាគោលទាកអីនៃហេនញច៝រ៝ៈនតុកនហុត ជេសរីហេននហាវទូកជេៈ§២៧:១៦៖ ខាន់ពាង់គែសទូមល៝ម់ទូកជេៈមាហាន់អាកើស លាសទូកក្វ៝ង់ហាន់មោទើយ។ឞើសទាក ក៝ត់តាកាលើមោទើសមោនើញងាន់។ ១៧ ជេសនហាវក៝ត់លែៈផ្យៅរី ហេនឆ៝ៈរាឆែឞ្រាត់មាពូតជុមទូកក្វ៝ង់រី ញជ្រាង់លើយអ៝ន់ឞ្លោសចាស។ ហេនក្លាចឆ្យាលរាទូទូកត៝ត់តានតុកថើលអីឞូក្វាល់លាស«ឆើរតីស » នទ្រីហេនងក្លាច់ទូមល៝ម់តើមឆីនហោងគៃមាអ៝ន់ទូកមឞ្រើយ ជេសរីហេនអ៝ន់ទូកក្វ៝ង់រីតឹងឆ្យាលទែរាទូ។ ១៨ ត៝ត់នារអោយតៃរី ខាន់ពាង់ងក្លាច់មអារ់លើយនទើរាទែងតាកាលើទូកនៃគៃមាងគើចទូក យ៝រមាឆ្យាលផុតទុតហោងាន់។ ១៩ ត៝ត់នារពែ ផូងហេនអីគុញច៝តាកាលើទូករី ងក្លាច់មអារ់លើយនទើអីទ៝ង់មាជានការតាទូកនៃដ៝ង់។ ២០ លែៈជ៝ៈនារហេនមោហោមអោសឆៃនារឆៃមាញ់*២៧:២០៖ នារ នទ្រែលមាមាញ់គែសនាវខ្លៃហោងាន់មាគឹតអាសមពែសទូកហាន់តាទាកវាច់ទាកវារ់។ លាសមោអោសឆៃមោគឹតត្រ៝ងមាហាន់។ យ៝រលាសគែសមីសនអ៝ប់មាឆ្យាលផុតនៃហោមអែទុតទាង់ងាន់ ជេសរីហេនមោហោមដ៝ង់អោសរានើមមារេស។
២១ លែៈជ៝ៈនារហេនអ៝ត់មោអោសគែសឆានទើ។ ពោល ទ៝ក់តាងគូលផូងខាន់ពាង់រី ជេសរីលាស៖ “អើអ៝សនោ លាសខាន់មៃអ្យាត់នាវគ៝ប់នើស លើយលោសអោសឞើសគោលទាកក្រែត នៃ ខាន់មៃមោគែសអោសនាវជេរ នាវរ៝សកើតនអា។ ២២ អាបៃអ្យាគ៝ប់ទាន់ខាន់មៃលើយអោសឞាសរានើម យ៝រលាសមោគែសអោសទូហ្វេឞូនុយ្សខឹតតាផូងខាន់មៃ មានមាអ្យើសអីទូកទើម។ ២៣ គ៝ប់លែៈគឹតជេស យ៝រលាសអាមាង់នើស កោរាញឞ្រាសអីគ៝ប់យើកមឞាស ពាង់ញជ្វាល់តោងពារ់ពាង់នើមទ៝ក់កេងមែងគ៝ប់រី លាសមាគ៝ប់៖*២៧:២៣-២៤៖ ការ ៨:២៦; ១៨:៩ ២៤ «អើពោល មៃលើយក្លាចអោស កោរាញឞ្រាសលែៈអ៝ន់មៃទ៝ក់តានាប់កោរាញកាដាច់ងាន់រ៝។ ពាង់លែៈអ្យាត់នាវមៃមឞើសឆើម រាក្លាយ្សទឹងលែៈឞូនុយ្សអីហាន់នទ្រែលមៃ»។ ២៥ លាសនទ្រី អើខាន់មៃ លើយក្លាចអោស យ៝រលាសគ៝ប់ញឆីងលែៈនាវងើយកោរាញឞ្រាសមាគ៝ប់ ពាង់មរាគែសកើតនៃងាន់។ ២៦ យើនមាទូកឞ៝ន់អ្យា មរាខានតាមែងតាទូនតុកគោលទាក”។
២៧ ត៝ត់លែៈ ១៤ នារទូកហេននហោងរ៝ៈទាកវាច់ទាកវារ់អាទ្រេ ។ ទោលនៃក្លាប់លាសលែៈងគូលមាង់ ផូងអីជានការតាទូករីនអោនលាសលែៈឞើយត៝ត់មែងកើស។ ២៨ ខាន់ពាង់ងក្លាច់រាឆែវែសជ្រូទាក ឆៃជ្រូទាក ៣៧ មែត។ ត៝ត់ទូប្ល៝ត់ ខាន់ពាង់វែសជឹតហោម ២៨ មែត។ ២៩ ជេសរីខាន់ពាង់ងក្លាច់រាឆែម៝ង់ល៝យ្សងគ៝ង់ទូកព្វាន់មល៝ម់ឞើសច្យាង់ទូករី ក្លាចលាសទូកគែសត៝មលុ នហ៝មាគុមឞើសឆើមទាន់គៃមាគើញអាង។ ៣០ ផូងអីតើមទូកអុចញច្វាត់នត្លើយទូកក្វ៝ង់រី ខាន់ពាង់ទ្រីសងក្លាច់ទូកជេៈៗអាទាកឆូជានលើសតឹមឞានមាអូយ្សរាឆែម៝ង់ល៝យ្សងគ៝ង់ទូកមាតេៈឞើសឞោកទូករី។ ៣១ ជេសរីពោល លាសមាកោរាញតាហែន នទ្រែលមាក៝នតាហែន៖ “លាសផូងនៃមោហោមតាកាលើទូកអ្យា ខាន់មៃមោរេសអោស”។ ៣២ ជេសរីផូងតាហែនឆ្រែសរាឆែទូកជេៈនៃតុបរាងាត់អាទាកឆូ។ ៣៣ ត៝ត់ឞ្រីឞើយអាង ពោល ក្វាល់ឞូទឹងលែៈ ពាង់លាស៖ “អើអ៝សនោ លែៈ ១៤ នារងាន់ ខាន់មៃគុរាង៝តទើមអ៝ត់មោគែសអោសឆានទើ។ ៣៤ អាបៃអ្យាខាន់មៃឆាទោ ពាង់មារេស យ៝រលាសមោគែសអោសទូហ្វេឞូនុយ្សតាផូងខាន់មៃរ៝សហេង”។ ៣៥ ជេសពាង់ងើយកើតនៃ ពាង់ឆ៝ៈនុមពាង់ លាសអ្វែសមាកោរាញឞ្រាសតានាប់ទឹងលែៈឞូរី ជេសរីពាង់គិចឆា។ ៣៦ ទឹងលែៈឞូតាកាលើទូករី នូយ្សនហ៝ម់ខាន់ពាង់នតើមគែសឆ្វានជឹត លែវឞាល់ឆាទាទេ។ ៣៧ ទឹងលែៈផូងហេនតាកាលើទូករី គែស ២៧៦ នុយ្ស។ ៣៨ ជេសឆាហើមលែៈផ្យៅរី ខាន់ពាង់ពឺងក្លាច់ឞាបៅអាទាកឆូ គៃមាងគើចអ៝យទូក។
ទូកង៝ម់តាទាក
៣៩ ត៝ត់ឞ្រីលែៈអាង ផូងតាកាលើទូករីឆៃទូនតុកគោលទាក មោអោសគឹតនាល់គោលទាកអីនៃ ខាន់ពាង់ឆៃក្វឹលទាកគែសនែសច៝យ្សរ៝ៈមែងគោលទាករី។ ខាន់ពាង់អុចញឆ្រុងទូកតានៃ លាសមាទើយ។ ៤០ ជេសរីខាន់ពាង់ឆ្រែសលើយរាឆែឞ្រាត់ងគ៝ង់ទូករីអាទាកឆូ ងក្រែមានត្លើយម៝ង់ល៝យ្សតាទាករី នទ្រែលមាទ្រីសរាឆែបឹតទូករីដ៝ង់។ ជេសរីខាន់ពាង់ដ៝ត់នហាវឞ៝កតាកាលើទូកមពែសឞើសនាប់ទូករី គៃមាអ៝ន់ឆ្យាលរាទូទូកហាន់ជឹតមែងកើសរី។ ៤១ យើនមាទូកត៝ល់នែសច៝យ្សតាព្លាង់ទាកហ៝ចតឹមច្រោស នហ៝មាខានអីឞោកទូកតារី អីច្យាង់ទូករីចាសលែៈផ្យៅយ៝រមាទាកទែរាឞុសទាង់ងាន់។ ៤២ ផូងតាហែនអុចងខឹតលើយផូងឞូនុយ្សទោយ្ស†២៧:៤២៖ ផូងតាហែននៃក្លាចលាសឞូតេៈទោយ្សខាន់ពាង់ក្វ៝ង់ លាសទូហ្វេឞូនុយ្សទោយ្សអីនៃក្លាយ្ស។តាកាលើទូករីអ៝ន់លែៈផ្យៅ ក្លាចលាសអាបាៈឞូរែញច្វាត់ឞើសនៃ។ ៤៣ យើនមាកោរាញតាហែននៃអុចកើលរាក្លាយ្សពោល កើតនទ្រីទឹងពាង់រើយ្សលើយនាវនៃ ពាង់ដាៈឞូម៝សអីឞ្លាវរែ ញឆាត់រែល៝រអាកើសតី។ ៤៤ ឞូម៝សអីមោឞ្លាវរែរី ពាង់ដាៈញុបមព្វាល់កាដារ មោលាសតាមពីរទូករី។ កើតនទ្រីទឹង ទឹងលែៈឞូនុយ្សត៝ត់អាយោកទាទេ មោអោសគែសនាវអានាវរី។
*២៧:២ ២៧:២៖ ការ ១៩:២៩; កោល ៤:១០
*២៧:៣ ២៧:៣៖ ការ ២៤:២៣; ២៨:១៦
*២៧:៩ ២៧:៩៖ បុនអ្យាជេងទូនតីលបុនតាផូងអីឆ្រាអែល អីគែសនាវខ្លៃទុតហោងាន់ នារនៃកោរាញជានឞ្រាសទុតក្វ៝ង់ងខឹតមពោមពា(ឆ្យុម)មាច្វាយនាវតីសផូងអីឆ្រាអែល ទឹងលែៈ។ (កល ១៦; ២៣:២៦-៣២; នក ២៩:៧-១១)។
*២៧:៩ ២៧:៩-១០៖ ២កោ ១១:២៥-២៦
†២៧:១២ ២៧:១២៖ ឞូក្វាល់លាស៖ «ខៃជីកាត់»ដ៝ង់។
‡២៧:១៦ ២៧:១៦៖ មោលាស «ខៅដា »។
§២៧:១៦ ២៧:១៦៖ ខាន់ពាង់គែសទូមល៝ម់ទូកជេៈមាហាន់អាកើស លាសទូកក្វ៝ង់ហាន់មោទើយ។
*២៧:២០ ២៧:២០៖ នារ នទ្រែលមាមាញ់គែសនាវខ្លៃហោងាន់មាគឹតអាសមពែសទូកហាន់តាទាកវាច់ទាកវារ់។ លាសមោអោសឆៃមោគឹតត្រ៝ងមាហាន់។
*២៧:២៣ ២៧:២៣-២៤៖ ការ ៨:២៦; ១៨:៩
†២៧:៤២ ២៧:៤២៖ ផូងតាហែននៃក្លាចលាសឞូតេៈទោយ្សខាន់ពាង់ក្វ៝ង់ លាសទូហ្វេឞូនុយ្សទោយ្សអីនៃក្លាយ្ស។