នាវកោរាញឞ្រាសងើយតានាវងើយឞូន៝ង អេផេឆោ ៦

៦

នាវតឹមរាង្លាប់មេៈឞឹ នទ្រែលមាក៝ន

១ អើផូងក៝នឆែ អ្យាត់ហ៝ម់នាវមេៈឞឹខាន់អៃមៃនើមយ៝រមាខាន់អៃមៃគុនទ្រែលកោរាញយេឆូ ជានកើតនអៃមើទឹងទី។* ២ តានាវកោរាញឞ្រាសងើយគែសញចីស៖ «អ៝ន់យើកមាមេៈឞឹខាន់អៃមៃនើម»។ អីនៃជេងនាវវៃត៝ល់ង្វាយអីគែសនអ៝ប់មានាវកោរាញឞ្រាសទែត៝នដ៝ង់៖* ៣ «លាសខាន់អៃមៃយើកមាមេៈឞឹ ខាន់អៃមៃគែសនាវរេសអ្វែសដាប់មពាន់ នទ្រែលមាគុរេសជ៝ៈនាម់តានែសនតូអ្យា»†។ ៤ អើផូងជេងអីមេៈឞឹ លើយអោសជានអ៝ន់នូយ្សនហ៝ម់អ៝សក៝នខាន់អៃមៃជីនូយ្ស យើនមានតុមនតីខាន់ពាង់អ៝ន់គុងាវអ្វែស អ៝ន់គឹតនាវនតុមនតីតាៈឞើសកោរាញយេឆូ ។*

នាវតឹមរាង្លាប់ឞូនុយ្សទឹកឞូ នទ្រែលមាកោរាញ

៥ អើផូងទឹកឞូ អ៝ន់ខាន់អៃមៃអ្យាត់នាវកោរាញខាន់អៃមៃនើមតានែសនតូអ្យាមានាវក្លាចមានាវយើករាប់ជាប់ងាន់កើតអ្យាត់នាវឞ្រាសក្រីស ដ៝ង់។* ៦ លើយអោសជាននោកកោរាញឆៃ គៃមាអ៝ន់ពាង់រានេទើម។ អ៝ន់ជានមាលែៈនូយ្សនហ៝ម់តឹមឞានមាជេងទឹកឞ្រាសក្រីស អ៝ន់ជាននាវកោរាញឞ្រាសអុច។ ៧ អ្យាត់មាឆើមកើលជានការមាកោរាញខាន់អៃមៃមាលែៈនូយ្សនហ៝ម់។ លើយអោសកើបនាវជានការអីនៃឆើមកើលជានការអ៝ន់មាឞូនុយ្ស យើនមាកើបនាវជានការអីនៃឆើមកើលជានការអ៝ន់មាកោរាញយេឆូ ហ៝ៈ។ ៨ យ៝រលាសឞ៝ន់លែៈគឹតជេសទឹងលែៈឞ៝ន់ ឞ៝លលាសឞូនុយ្សទឹកឞូ មោលាសឞូនុយ្សក៝នមែកាដោយ មរាគែសឆ៝ៈទើននាវងខោមតាៈឞើសកោរាញយេឆូ ទាទេមាទឹងលែៈនទើអ្វែសអីឞ៝ន់ជាន។

៩ អើផូងអីកោរាញឞូ អ៝ន់ខាន់អៃមៃជានមាទឹកខាន់អៃមៃនើមតឹមឞានកើតនៃដ៝ង់ លើយអោសរាអ៝ត់គ្រាបខាន់ពាង់។ ខាន់អៃមៃលែៈគឹតជេស នអ៝ប់មាខាន់អៃមៃនើម នអ៝ប់មាខាន់ពាង់លែៈគែសជេសទូហ្វេកោរាញទើមតាកាលើត្រោក ពាង់មោអោសកើយ្សឞូនុយ្ស។*

នទើអីផូងញឆីងឆ៝ៈមាតឹមលើស

១០ ជេសរីអ៝ន់ខាន់អៃមៃលើមាគុន៝ប់ងាន់តានាវញឆីងតាកោរាញយេឆូ នទ្រែលមានាវញឆីងមានាវទើយទុតក្វ៝ង់ពាង់នើម។* ១១ អ៝ន់ខាន់អៃមៃញឆ៝សទឹងលែៈនទើតឹមលើសអីតាៈឞើសកោរាញឞ្រាសនើម គៃមាទើយនោកតឹមលើសដាសនាវមរោសនាវនទើមឆាតាង់ អីកោរាញមពោលឞ្រាសអ្យើស។* ១២ យ៝រលាសលាសឞូនុយ្សជានជេរមាឞ៝ន់ មោទីអោសតឹមលើសដាសឞូនុយ្ស ឞ៝ន់តឹមលើសដាសឞ្រាសអ្យើសអីជានកោរាញម៝ត់អ្វាញ់ ដាសឞ្រាសអ្យើសអីគែសនាវទើយ ដាសនាវទើយអ្យើសង៝នែសនតូអ្យា ជេសរីតឹមលើសដាសមាឞ្រាសអ្យើសអាប់នតីលតាកាលើត្រោកអីគែសនាវទើយ។ ១៣ លាសនទ្រីអ៝ន់ខាន់អៃមៃឆ៝ៈហ៝ម់នទើតឹមលើសតាៈឞើសកោរាញឞ្រាសនើម គៃមាទើយនោកនាវតឹមលើសដាសមានាវអ្យើសអីនៃ ជេសរីត៝ត់មាជេសលែៈផ្យៅនាវតឹមលើសអីនៃ ហោមគុន៝ប់រាក៝ក់កើតអើម។ ១៤ កើតនទ្រីទ៝ក់ន៝ប់រាក៝ក់ហ៝ម់ ឆ៝ៈនាវងាន់តឹមឞានមាតាហែនវាន់រាឆែឞុត ឆ៝ៈនាវឆ៝ង់តឹមឞានមាញឆ៝សអាវល៝យ្ស។* ១៥ អ៝ន់ខាន់អៃមៃលែៈជេសនទ្រាប់នឹងមាមឞើសងក៝ចនាវមហែមហានអ្វែស មាមឞើសងក៝ចនាវដាប់មពាន់អីតាៈឞើសកោរាញឞ្រាស តឹមឞានមាតាហែនញឆ៝សនតោជ៝តមានទ្រាប់តឹមលើស។ ១៦ ជេសរីឆ៝ៈនាវញឆីងតឹមឞានមាឆ៝ៈខេល គៃមាខាន់អៃមៃទើយដាសនាវនទើមឆាតាង់ តឹមឞានមាខេលទ្រើហារ់អុញ។ ១៧ ឆ៝ៈនាវរាក្លាយ្សតឹមឞានមានទោមោកល៝យ្ស នទ្រែលមាឆ៝ៈនាវងើយកោរាញឞ្រាសនើមអីតឹមឞានមាដាវអីឞ្រាសហ្វេងអ្វែសអ៝ន់មាខាន់អៃមៃ។* ១៨ អ៝ន់មឞើសឆើមអាប់នតីលបាបើតឹងឞ្រាសហ្វេងអ្វែសនើមអ៝ន់ ទាន់កោរាញឞ្រាសកើលតាអាប់នតីលនទើ។ លាសនទ្រីគុរាងែសញជ្រាង់នអ៝ប់មាមឞើសឆើមទាន់កោរាញឞ្រាសនឹងមាកើលទឹងលែៈផូងប៝នលានកោរាញឞ្រាស។* ១៩ ទាន់កើលមឞើសឆើមអ៝ន់មាគ៝ប់បាៈដ៝ង់ គៃមាកោរាញឞ្រាសអ៝ន់គ៝ប់ឞ្លាវមឞើសងក៝ចនាវមហែមហានអ្វែសមាឞូ នអ៝ប់មានូយ្សនហ៝ម់ឞាញ់ ជេងនាវមហែមហានអ្វែសអីឞូនុយ្សមោគឹតនាល់អោសអាល៝រនើស។* ២០ កោរាញឞ្រាសដាៈគ៝ប់មឞើសងក៝ចនាវអីនៃ គ៝ប់ហោមគុតាត្រោមនទ្រូងយ៝រមានាវអីនៃ។ អ្យាត់មាគ៝ប់ហោមមឞើសងក៝ចនាវអីនៃ លាសនទ្រីដាៈខាន់អៃមៃទាន់កោរាញឞ្រាសអ៝ន់គ៝ប់គែសនូយ្សនហ៝ម់ឞាញ់។

នាវងគ្លែៈទុត

២១ គៃមាអ៝ន់ខាន់អៃមៃគឹតនាវគុរេសគ៝ប់ នទ្រែលមាទឹងលែៈការអីគ៝ប់ជានតាអ្យា គ៝ប់ដាៈនោតីខីកុស អីឞូនុយ្សញអោតឆ៝ម់បុតអ្យាអ៝ន់មាខាន់អៃមៃ នហ៝មាមឞើសងក៝ចទឹងលែៈនទើអីនៃអ៝ន់មាខាន់អៃមៃ។ ពាង់ជេងអ៝សនោតានាវញឆីងអីគ៝ប់រ៝ង់ងាន់ ពាង់ឞូនុយ្សជានការរាប់ជាប់ងាន់មាកោរាញយេឆូ នើម។* ២២ គ៝ប់ដាៈពាង់ហាន់អាខាន់អៃមៃ គៃមាមឞើសងក៝ចនាវហេនអីនៃ នទ្រែលមានហាវនូយ្សនហ៝ម់ខាន់អៃមៃដ៝ង់។ ២៣ ទាន់កោរាញឞ្រាសឞឹ នទ្រែលមាទាន់ឞ្រាសយេឆូក្រីស អីកោរាញឞ៝ន់អ៝ន់នាវដាប់មពាន់ អ៝ន់នាវរ៝ង់ពាង់ នអ៝ប់មាអ៝ន់នាវញឆីងមាខាន់អៃមៃ។ ២៤ ទាន់នាវអ្វែសកោរាញឞ្រាសគុនហ៝រ៝តាទឹងលែៈឞូនុយ្សអីរ៝ង់មាឞ្រាសយេឆូក្រីស អីកោរាញឞ៝ន់នៃ*៕៚

*៦:១ ៦:១-៣៖ កោល ៣:២០; លក ២:៥១

*៦:២ ៦:២៖ នវ ៥:១៦

†៦:៣ ៦:៣៖ នវ ៥:១៦

*៦:៤ ៦:៤៖ កោល ៣:២១

*៦:៥ ៦:៥-៨៖ កោល ៣:២២-២៥; ១តម ៦:១-២; តត ២:៩-១០; ១ពេ ២:១៨

*៦:៩ ៦:៩៖ កោល ៤:១; រម ៣:២៣

*៦:១០ ៦:១០៖ អេផ ១:១៩-២០; ១យហ ២:១៤

*៦:១១ ៦:១១-១៣៖ រម ១៣:១១-១២; ៨:៣៨-៣៩; កោល ២:១៤-១៥

*៦:១៤ ៦:១៤-១៧៖ អេឆា ៥៩:១៧; ១តេ ៥:៨

*៦:១៧ ៦:១៧៖ ហេឞ ៤:១២; លក ៤:១-១៣

*៦:១៨ ៦:១៨៖ មក ១៤:៣៨; រម ៨:២៦-២៧

*៦:១៩ ៦:១៩-២០៖ កោល ៤:៣-៤

*៦:២១ ៦:២១-២២៖ កោល ៤:៧

*៦:២៤ ៦:២៤៖ ឆ៝ម់បុតអើមអីញចីសមាតីអាបាៈនត៝បលាស៖ «អើអ៝ន់គែសកើតនៃងាន់រ៝» មោលាស «អាមែន »។