នាវកោរាញឞ្រាសងើយនាវតឹមរាង្លាប់មហែ កាលាតី 6

តឹមកើលនោកគែសនាវជេរនទ្រាង់នើម

1 អើអ៝សនោតានាវញឆីង លាសគែសទូហ្វេឞូនុយ្សអីឞូឞានទោលជាននទើអ្យើស ឞូម៝សអីគែសឞ្រាសហ្វេងអ្វែសគុ អ៝ន់ទាប់ងក្រាឞូនុយ្សអីនៃមានូយ្សនហ៝ម់មលែស។ យើនមាញជ្រាង់ឆាក់ពាង់នើម ក្លាចលាសគែសនាវនទើមកើតឞូនុយ្សអីនៃដ៝ង់។* 2 អ៝ន់តឹមកើលម៝សគែសនាវជេរនទ្រាង់នើម ជានកើតនៃខាន់អៃមៃជានតឹងនាវវៃឞ្រាសក្រីស ងាន់។ 3 លាសឞូម៝សអីកើបអេងឆាក់ពាង់នើមជេងឞូនុយ្សគែសនាវខ្លៃ តីសមាមោអោសគែសនាវខ្លៃ ពាង់អីនៃជេងមរោសអេងឆាក់ពាង់នើមទើម។* 4 អ៝ន់ទូហ្វេទូហ្វេមេតអ្វាញ់អេងឆាក់ពាង់នើមជានហ៝ៈ អ៝ន់គុរាម់មអាកមានទើពាង់នើមជានហ៝ៈ លើយអោសរាដឹលមាឞូនុយ្សអេង‌* 5 យ៝រលាសតានារជឹតនាប់តៃ ទឹងលែៈឞូនុយ្សអ្យាត់មាមឞើសមាកោរាញឞ្រាសទឹងលែៈនទើខាន់ពាង់ជាន*។*

6 ឞូម៝សអីឞូនតុមនតីនាវកោរាញឞ្រាស អ៝ន់ខាន់ពាង់ឆ៝ៈទ្រាប់នទើអីខាន់ពាង់នើមគែសអាបាៈពាៈអ៝ន់មានាក់អីនតុមនតីមាខាន់ពាង់នៃ។* 7 ទាន់ខាន់អៃមៃលើយអោសវិ មោទើយអោសមរោសកោរាញឞ្រាស ពាង់មរាតេៈទោយ្សមាឞូម៝សអីមឺចពាង់។ ម៝សគារ់នតីលអីឞូតូចតានែស ឞូមរារែកឞើសគារ់នតីលអីនៃរ៝។ 8 ឞូម៝សអីជានតឹងនូយ្សនហ៝ម់អើមអីអុចជានអ្យើសឞើសនទុលមែ ពាង់អីនៃតឹមឞានមាតូចគារ់អ្យើស ជេសរីកោរាញឞ្រាសមរាតេៈទោយ្សមាពាង់អីនៃរ៝ តឹមឞានមាពាង់អីនៃរែកនាវតេៈទោយ្ស។ យើនមាឞូម៝សអីគុរេសគៃមាឞ្រាសហ្វេងអ្វែសរាម់មអាក ពាង់អីនៃតឹមឞានមាតូចគារ់អ្វែស ជេសរីពាង់មរាគែសនាវរេសនហ៝រ៝តាៈឞើសឞ្រាសហ្វេងអ្វែស។* 9 អ៝ន់ឞ៝ន់លើយអោសទឹលជាននាវអ្វែស ត៝ត់ទីនាររីតៃឞ៝ន់មរាគែសរែកព្លៃអ្វែសរ៝ លាសឞ៝ន់ជានអ្វែសនឹង។* 10 លាសនទ្រីលាសឞ៝ន់ទើយជាន† អ៝ន់ឞ៝ន់ជាននទើអ្វែសមាទឹងលែៈឞូនុយ្សទោ លើមាហោជាននទើអ្វែសមាអ៝សនោតានាវញឆីង។*

នាវនតុមនតីងគ្លែៈទុត

11 អ្វាញ់ហ៝ម់ រាព្លៃរាឆ៝អីក្វ៝ង់ៗអីខាន់អៃមៃអ្វាញ់នតើមឞើសនតុកអ្យាជឹតទ៝ង់ជេងតីគ៝ប់នើមញចីស។* 12 មពោលឞូនុយ្សផូងអីឆ្រាអែល អីញច៝ប់ខាន់អៃមៃក៝សនតោតឹងនាវវៃមោឆេ ខាន់ពាង់អុចឞូលឺមាខាន់ពាង់នើម ខាន់ពាង់មានមាជានកើតនៃគៃមាលើយអ៝ន់ផូងអីឆ្រាអែល ជានជេរទើម យ៝រមានតីលែៈរាក្លាយ្សជេសតាៈឞើសញឆីងមាឞ្រាសក្រីស អីខឹតតាឆីតឹមរាកាង់ មោអោសខាច់ជានទូនតីលនទើអាអេងជឹត។* 13 ឞ៝លលាសផូងអីលែៈក៝សនតោនៃ ឆាក់ខាន់ពាង់នើមមោអោសញអោតតឹងទឹងលែៈនាវវៃមោឆេ ខាន់ពាង់ដាៈខាន់មៃក៝សនតោនៃ គៃមាពាង់នហីអេងឆាក់ខាន់ពាង់នើម យ៝រមាខាន់មៃលែៈអ្យាត់តឹងនាវខាន់ពាង់ដាៈ។* 14 យើនមាគ៝ប់អ្យា លើយអ៝ន់គ៝ប់នហីអេងឆាក់មាទូនតីលនទើ មានមានហីអេងឆាក់មានាវខឹតឞ្រាសយេឆូក្រីស តាឆីតឹមរាកាង់អីកោរាញឞ៝ន់ហ៝ៈ។ យ៝រមានទើឞ្រាសយេឆូក្រីស ជានតាឆីតឹមរាកាង់អីនៃ ទឹងលែៈនទើតានែសនតូអ្យាមោហោមអោសគែសខ្លៃមាគ៝ប់ ជេងតឹមឞានមាងខឹតតាឆីតឹមរាកាង់អីនៃ ជេសរីគ៝ប់តឹមឞានមាលែៈខឹតតាឆីតឹមរាកាង់ដ៝ង់ នទ្រីឞូនុយ្សអីមោញឆីងមាឞ្រាសយេឆូក្រីស មោអោសកើបគ៝ប់ខ្លៃ។* 15 នាវគែសក៝សនតោ នាវមោគែសក៝សនតោ មោអោសគែសនាវខ្លៃ។ នទើអីគែសនាវខ្លៃជេងនាវកោរាញឞ្រាសអ៝ន់នាវរេសមហែ នាវអីនៃតឹមឞានមាពាង់ញជេងឞ៝ន់ទូតឹជឹត។* 16 ទាន់កោរាញឞ្រាសអ៝ន់នាវដាប់មពាន់ នទ្រែលមានាវយោៈនអាចមាឞូម៝សអីញអោតតឹងនាវរេសមហែអីនៃ នអ៝ប់មាទឹងលែៈផូងអីជេងប៝នលានកោរាញឞ្រាសនើមងាន់‡។

17 នតើមឞើសអ្យាជឹតនាប់ លើយអោសអ៝ន់ឞូនុយ្សជានអ៝ន់គ៝ប់គែសនាវជេរជឹតតាៈឞើសនាវឞូនតីងក្លាៈ យ៝រលាសខាបឞ្រាសយេឆូ នើមលែៈគែសតាឆាក់គ៝ប់ជេស ជេងនាវឞូរាពាត់មឞាងមាគ៝ប់។* 18 អើអ៝សនោតានាវញឆីង ទាន់នាវអ្វែសឞ្រាសយេឆូក្រីស អីកោរាញឞ៝ន់នើមគុនទ្រែលតានូយ្សនហ៝ម់ខាន់អៃមៃ។ អើអ៝ន់គែសកើតនៃងាន់រ៝§៕៚

*6:1 ៦:១-២៖ មថ ១៨:១៥; កោល ៤:៦; ១តេ ៥:១៤-១៥; ២តេ ៣:១១-១៥

*6:3 ៦:៣៖ ផល ២:៣

*6:4 ៦:៤៖ ១កោ ៤:៧

*6:5 ៦:៥៖ «យ៝រលាសតានារជឹតនាប់តៃ...មាកោរាញឞ្រាស» មោលាស «ម៝សនទើកោរាញឞ្រាសអ៝ន់មាឞ៝ន់ទូហ្វេទូហ្វេ អ្យាត់មាអាប់នើមទូហ្វេទូហ្វេជានតឹង»។

*6:5 ៦:៥៖ រម ១៤:១២

*6:6 ៦:៦៖ លក ១០:៧; ការ ២០:៣៣-៣៥; ១កោ ៩:៤-១៥

*6:8 ៦:៨៖ រម ៨:៦

*6:9 ៦:៩៖ ២តេ ៣:១៣; អេផ ២:១០

†6:10 ៦:១០៖ «លាសឞ៝ន់ទើយជាន» មោលាស «នោកឞ៝ន់ហោមគែសម៝ង»។

*6:10 ៦:១០៖ យហ ១៣:៣៤-៣៥; រម ១២:១៣; ២កោ ៨:១២-១៤

*6:11 ៦:១១៖ កោល ៤:១៨; ២តេ ៣:១៧

*6:12 ៦:១២៖ កាល ៥:១១

*6:13 ៦:១៣៖ កាល ៥:៣

*6:14 ៦:១៤៖ កាល ២:១៩; រម ៦:១១; ១កោ ១:២៩-៣១

*6:15 ៦:១៥-១៦៖ កាល ៣:២៦-២៨; ១កោ ១២:១២-១៣; ២កោ ៥:១៧

‡6:16 ៦:១៦៖ «ទឹងលែៈផូងអីជេងប៝នលានកោរាញឞ្រាសនើមងាន់» មោលាស «នអ៝ប់មាផូងអីឆ្រាអែល កោរាញឞ្រាស»។

*6:17 ៦:១៧៖ ២កោ ៤:១០

§6:18 ៦:១៨៖ «អើអ៝ន់គែសកើតនៃងាន់រ៝» មោលាស «អាមែន »។