នាវកោរាញឞ្រាសងើយតានាវងើយឞូន៝ង ឆ៝ម់បុតនាវនតើម ៣

៣

នតើមគែសនាវតីសឞូនុយ្ស

១ នតើមនើសគែសទូមល៝ម់ឞេសជេងមពោមពា(ឆ្យុម)ឞ្រី ពាង់ឞ្លាវរាលាម់នាវរាលាវឞូ ដាសមាមពោមពា(ឆ្យុម)អាបាៈអេងតាឞ្រីអីឞ្រាសយេហោវា លែៈជេសញជេង។ គែសទូនារឞេសនៃអោបមាឞូអូរអីនៃ៖ “ហើយយោស ងាន់លាសកោរាញឞ្រាសលាសនើស៖ «មោអ៝ន់ខាន់អៃមៃឆាព្លៃទឹងលែៈតាមីរអ្យា?»”* ២ ឞូអូរអីនៃអើសមាពាង់៖ “លិចនទ្រីអោស ព្លៃតាមីរអ្យាកោរាញឞ្រាសអ៝ន់ហេនឆាទាទេ‌ ៣ តើមព្លៃអីងក្លាងមីរអីនៃទូតើមទើម កោរាញឞ្រាសលាស៖ «ព្លៃតើមឆីអីងក្លាងមីរអីនៃមោអោសអ៝ន់ខាន់អៃមៃឆា មោអោសអ៝ន់ខាន់អៃមៃពាស លាសឆាលាសពាសខាន់អៃមៃមរាខឹតរ៝» នទ្រីលាសព្រែនើស”។ ៤ ឞេសលាសមាឞូអូរអីនៃជឹត៖ “មោខឹតអោសយោស ខាន់អៃមៃមោខឹតវាៈ។ ៥ កោរាញឞ្រាសពាង់គឹត លាសខាន់អៃមៃឆា មាត់មរាអាង រីមើទឹងខាន់អៃមៃជេងតឹមឞានមាកោរាញឞ្រាសនើម គឹតនាល់នទើអ្វែសនទើអ្យើសដ៝ង់អេៈ”។ ៦ ជេសរីឞូអូរអីនៃឆៃព្លៃឆីអីនៃទុមអ្វែសងាន់ អុចមាឆារ៝ ពាង់កើញគែសនាវគឹតឞ្លាវអីរី នហ៝មាត៝ត់ពាង់ពែៈឆា។ អីឆាយពាង់គុដាសពាង់នើមតានៃដ៝ង់ ជេសរីពាៈអ៝ន់អីឆាយពាង់ឆា អីឆាយពាង់ឆាដ៝ង់។ ៧ ជេសឆាព្លៃអីនៃ មាត់ខាន់ពាង់ឆៃអាងងាន់រ៝ នហ៝មាគឹតលាសឆាក់ខាន់ពាង់នើមគុលាហោកដ៝ង់ ជេសរីខាន់ពាង់ពែៈនហារាវី ជឹងតឹមងក្រេបជានឞ៝កគៃមាមឞាន់ឆាក់ជាន់ខាន់ពាង់នើម។

៨ ត៝ត់នារវែតញឆ្រិញរិញនអីករាងេតនៃ ខាន់ពាង់តាង់នតែសឞ្រាសយេហោវា ហាន់ឞ្រោៈរ៝ៈមីរនៃ ខាន់ពាង់ទូញច្វាត់ក្រាបតាន៝ម់តើមឆីតាមីរនៃរ៝ គៃមាលើយអ៝ន់ឞ្រាសយេហោវា ឆៃ។* ៩ ជេសរីឞ្រាសយេហោវា ក្វាល់អីឆាយរី៖ “ហើយអាដាម់ * អាសមៃហ្យើ?”* ១០ ពាង់អើស៖ “គ៝ប់តាង់មៃហាន់រ៝ៈមីរនៃ គ៝ប់ក្លាចញឆ៝រ់ងាន់ យ៝រលាសគ៝ប់នើសគុឆាក់លាហោកទើម កើតនទ្រីទឹងគ៝ប់ក្រាបកោរាញឞ្រាសមេ”។ ១១ ឞ្រាសយេហោវា អោបជឹត៖ “ឞូម៝សមឞើសមាមៃ ទឹងមៃគឹតលាសគុលាហោក? គឹតមៃគែសឆាព្លៃឆីអីគ៝ប់ឞ្វៃមោអ៝ន់មៃឆានើសមោ?” ១២ អាដាម់ †អើស៖ “ឞូអូរអីមៃអ៝ន់គុនទ្រែលគ៝ប់នើស ពាង់អ៝ន់ព្លៃអីនៃមាគ៝ប់ ជេសរីគ៝ប់ឆាដ៝ង់”។ ១៣ ជេសរីឞ្រាសយេហោវា លាសឞូអូរអីនៃ៖ “ម៝សជានអៃកើតនទ្រីរី?” ឞូអូរអីនៃអើស៖ “ឞេសទែមរោសដាៈគ៝ប់ឆា ទឹងគ៝ប់ឆាព្លៃឆីអីនៃនើស កោរាញឞ្រាសមេ”។*

១៤ ឞ្រាសយេហោវា លាសឞេស៖

“យ៝រមាមៃជាននអៃ

ទឹងលែៈមពោមពា(ឆ្យុម)អាបាៈអេង

អីតាឞ្រីតាប៝ន

ទូមល៝ម់មៃអ្យាគ៝ប់រាតាប់អ៝ន់មៃឞ្រោៈហូងមានទុល

នទ្រែលមាឆាលែរនែស

ទូញជារ់នាវរេសមៃ។

១៥ ជេសរីគ៝ប់អ៝ន់គែសនាវតឹមលើសមៃ ដាសឞូអូរអីនៃ

នទ្រែលមារាន៝យទែសឞូអូរអីនៃ ដាសមាអីក៝នឆៅមៃតៃដ៝ង់

រាន៝យទែសពាង់តៃមរាជ៝តឞោកមៃ

ជេសរីមៃតៃមរាចោករាមាង់អ្យារ់រាន៝យទែសពាង់ដ៝ង់”។*

១៦ ជេសរីឞ្រាសយេហោវា លាសមាឞូអូរអីនៃដ៝ង់៖

“ទោលអៃគុអ៝សគ៝ប់អ៝ន់អៃគែសនាវជេរហោរាលាវជឹត

អៃគែសនាវជីនទុលហោងាន់រ៝

នូយ្សនហ៝ម់អៃមរាអុចងាន់ម៝ត់ឞោកឆាយអៃ‡

តីសមាឆាយអៃម៝ត់ឞោកអៃ”។*

១៧ ជេសរីឞ្រាសយេហោវា លាសអាដាម់ ដ៝ង់៖

“គ៝ប់រាតាប់នែសអ្យា មោអោសអ៝ន់គែសជេង

យ៝រមាមៃអ្យាត់នាវអូរមៃឆាព្លៃឞើសតើមឆីអីគ៝ប់មោអ៝ន់ឆានៃនើស

នទ្រីទឹងមៃជ៝យនទើឆោងឆាព៝ក់នែសរាអាសរាគាញ់អាប់នារទូញជារ់នាវរេសមៃ។*

១៨ ជេសរីមៃឆោងឆានទើអីហ៝នលោសតាៈឞើសឞ្រីឞើសមីរ

យើនមានែសហ៝នរេបហ៝នល៝កដ៝ង់

១៩ មៃជានការលោសរាហាលពាលមលៃងាន់

រីមើគែសនទើឆោងឆាមាឆ្យាម់ឆាក់ត៝ត់ខឹតងក្រែមាលេកតៃតានែស

យ៝រលាសគ៝ប់ឆ៝ៈម៝នមៃនើសតាៈឞើសនែសមោយ

កើតនទ្រីមៃមរាជេងតៃនែសមោយកើតអើមដ៝ង់”។*

២០ ជេសរីអាដាម់ តេៈរាញាអូរពាង់អីនៃក្វាល់លាស«អេវា »§ យ៝រលាសពាង់នើសអីមេៈទឹងលែៈរាងោចឞូនុយ្ស។ ២១ ជេសរីឞ្រាសយេហោវា ឆ៝ៈនតោមពោមពា(ឆ្យុម)ឆើមជានឞ៝កអាវឆើមញឆ៝សអ៝ន់មាខាន់ពាង់។

២២ ឞ្រាសយេហោវា លាសអេងពាង់នើម៖ “អាបៃរីឞូនុយ្សជេងតឹមឞានមាឞ៝ន់ លែៈគឹតនាល់នទើអ្វែសនទើអ្យើស លាសនទ្រីគៃមាលើយអ៝ន់ខាន់ពាង់គែសនាវរេសនហ៝រ៝ លើយអោសអ៝ន់ខាន់ពាង់ពែៈឆាតៃព្លៃតើមឆីអ៝ន់នាវរេស”។* ២៣ នទ្រីទឹងឞ្រាសយេហោវា នត្រុតមព្រើសខាន់ពាង់ទូលោសឞើសមីរអេដែន នៃ អ៝ន់ខាន់ពាង់គុនតុកអេង ជានមីរព៝ក់នែសអីឞ្រាសយេហោវា ឆ៝ៈម៝នញជេងខាន់ពាង់នើស។ ២៤ ជេសនត្រុតមព្រើសខាន់ពាង់ទូលោសឞើសមីរអេដែន អីនៃ ឞ្រាសយេហោវា អ៝ន់តោងពារ់ចេរូបីន* នទ្រែលមាដាវអុញរាវាវញជ្រាង់ត្រ៝ង ក៝ប់ឞើសមពែសលោសនារមីរអេដែន នៃ គៃមាលើយអោសអ៝ន់ឞូនុយ្សព្លឹតៃតាតើមឆីអីអ៝ន់នាវរេសនហ៝រ៝។

*៣:១ ៣:១៖ នតម ១២:៩; ២០:២

*៣:៨ ៣:៨៖ នម ១៣៩:៧-១០; យេរ ២៣:២៤

*៣:៩ ៣:៩៖ «ហើយអាដាម់ » មោលាស៖ «ហើយឞូនុយ្ស» តានាវងើយហេឞ្រើ«អាដាម់ »រាញា «ឞូនុយ្ស»ដ៝ង់។

*៣:៩ ៣:៩៖ ២:៧

†៣:១២ ៣:១២៖ «អាដាម់ » មោលាស៖ «ឞូនុយ្ស»។

*៣:១៣ ៣:១៣៖ ២កោ ១១:៣; ១តម ២:១៤

*៣:១៥ ៣:១៥៖ នតម ១២:១៧

‡៣:១៦ ៣:១៦៖ «នូយ្សនហ៝ម់អៃមរាអុចងាន់ម៝ត់ឞោកឆាយអៃ» មោលាស៖ «នូយ្សនហ៝ម់អៃអុចឆាយអៃហោដ៝ង់»។

*៣:១៦ ៣:១៦៖ អេផ ៥:២២-២៣

*៣:១៧ ៣:១៧៖ ហេឞ ៦:៨

*៣:១៩ ៣:១៩៖ នម ១០៣:១៤; ករ ៣:២០; ១២:៧

§៣:២០ ៣:២០៖ តានាវងើយហេឞ្រើនតែសរាញា«អេវា »តឹមឞានមានតែស«នាវរេស»។

*៣:២២ ៣:២២៖ នតម ២២:១៤

*៣:២៤ ៣:២៤៖ «តោងពារ់ចេរូបីន» ពាង់អីឞូនុយ្សទូមពោលគុតាកាលើត្រោក គុជានការមាកោរាញឞ្រាសនើម។