នាវកោរាញឞ្រាសងើយតានាវងើយឞូន៝ង ឆ៝ម់បុតនាវនតើម ១៧

១៧

នទើមឞេននាវតឹមរាង្លាប់

១ ត៝ត់អាប់រាមលែៈគែស ៩៩ នាម់ ឞ្រាសយេហោវាតឹមមពើលអ៝ន់ពាង់ឆៃ ពាង់លាសមាអាប់រាម៖ “គ៝ប់ជេងឞ្រាសអីទុតគែសនាវទើយ អ៝ន់មៃអ្យាត់នាវគ៝ប់ គុអ្វែសឆ៝ង់ឆ្រាង់ងាន់។ ២ គ៝ប់អុចតឹមរាង្លាប់ដាសមៃ អុចជានរាន៝យទែសមៃអ៝ន់ឞឹករឹទុតអ៝ក់”។* ៣ អាប់រាមពាន់ក្រាបអានែសឆូ ជេសរីកោរាញឞ្រាសលាសមាពាង់ជឹត៖ ៤ “អ្យានាវគ៝ប់តឹមរាង្លាប់នទ្រែលមៃកើតនអា មៃតៃជេងចែមាផូងឞូនុយ្សទុតអ៝ក់។* ៥ ឞូមោហោមអោសក្វាល់មៃ «អាប់រាម»ជឹត គែសនាវខ្លៃ «ឞឹក្វ៝ង់» ឞូក្វាល់មៃ «អាឞ្រាហាម់ » គែសនាវខ្លៃ «ឞឹផូងឞូនុយ្សទុតអ៝ក់» យ៝រលាសគ៝ប់អ៝ន់មៃជេងឞឹមាផូងឞូនុយ្សទុតអ៝ក់។* ៦ គ៝ប់ជានអ៝ន់មៃគែសក៝នគែសឆៅទុតអ៝ក់ គ៝ប់អ៝ន់រាន៝យទែសមៃជេងគែសផូងអ៝ក់ងាន់ នទ្រែលមាអ៝ន់គែសកាដាច់អាបាៈតាៈឞើសរាន៝យទែសមៃដ៝ង់។ ៧ គ៝ប់តឹមរាង្លាប់មាមៃត៝ត់ក៝នត៝ត់ឆៅមៃឞើសកើយឞើសកើយតឹមអាប់រានោក។ នាវតឹមរាង្លាប់អ្យាហោមនហ៝រ៝។ គ៝ប់ជេងឞ្រាសមៃ នហ៝មាត៝ត់ក៝នត៝ត់ឆៅមៃឞើសកើយឞើសកើយរីតៃ* ៨ គ៝ប់អ៝ន់ទឹងលែៈឞ្រីទាកកានានអីមៃវែសគុអ្យាជេងឞ្រីទាកមៃនហ៝រ៝ នទ្រែលមាត៝ត់ក៝នត៝ត់ឆៅមៃឞើសកើយឞើសកើយតៃដ៝ង់ ជេសរីគ៝ប់ជេងឞ្រាសមាក៝នឆៅមៃនៃ”។*

៩ កោរាញឞ្រាសលាសមាអាឞ្រាហាម់ ៖ “ល៝ង់អីមៃនៃ អ៝ន់មៃញអោតនាវតឹមរាង្លាប់គ៝ប់ នអ៝ប់មាមៃនើមនហ៝រ៝ នអ៝ប់មាក៝នមាឆៅមៃឞើសកើយឞើសកើយតៃ។* ១០ អ្យានាវតឹមរាង្លាប់អីគ៝ប់អ៝ន់មាខាន់អៃមៃញអោត នទ្រែលមាក៝នមាឆៅខាន់អៃមៃនៃ អ៝ន់លែៈក៝នឞូក្លោតាផូងខាន់អៃមៃអ៝ន់ក៝សនតោទាទេ។* ១១ អ៝ន់ខាន់អៃមៃក៝សតាចោងនតោនទើឞូក្លោរី អីនៃជេងនទើមឞេននាវតឹមរាង្លាប់គ៝ប់អ៝ន់មាខាន់អៃមៃ។ ១២ ទឹងលែៈក៝នឞូក្លោអ្យាត់មាត៝ត់ផាមនារជេសទែស ជានក៝សនតោទាទេ ឞ៝លលាសទឹកទែសតាជៃខាន់អៃមៃនើមកាដោយលែៈ ឞ៝លលាសទឹករាវាត់ឞើសឞូនាច់ផូងឞ្រីអេងកាដោយលែៈ ជាននាវអ្យានហ៝រ៝តឹមអាប់រានោកខាន់អៃមៃ។ ១៣ ទឹងលែៈទឹកឞូក្លោទែសតាជៃខាន់អៃមៃនើម មោលាសទឹករាវាត់មាព្រាក់កាដោយ ជានក៝សនតោទាទេ អីនៃជេងនទើមឞេននាវតឹមរាង្លាប់គ៝ប់អ៝ន់មពែសមាឆាក់ជាន់ខាន់អៃមៃហោមនហ៝រ៝។ ១៤ លាសឞូម៝សឞូក្លោអីមោអោសក៝សនតោតាឆាក់ពាង់រី មោហោមអោសកើបពាង់ជេងផូងប៝នលានខាន់អៃមៃជឹត យ៝រលាសពាង់លែៈមអារ់លើយនាវតឹមរាង្លាប់គ៝ប់”។

១៥ កោរាញឞ្រាសលាសមាអាឞ្រាហាម់ ជឹត៖ “ឆារាយ អូរមៃនៃ មៃមោហោមអោសក្វាល់ពាង់ឆារាយ ជឹត ក្វាល់ពាង់ «ឆារា*»ហ៝ៈ។ ១៦ គ៝ប់អ៝ន់នាវគែសជេងមាពាង់ គ៝ប់អ៝ន់មៃគែសទូមល៝ម់ក៝នឞូក្លោតាៈឞើសពាង់។ គ៝ប់អ៝ន់នាវគែសជេងមាពាង់ ជេសរីរាន៝យទែសពាង់ជេងផូងឞ្រីអេងៗ នទ្រែលមាគែសកាដាច់អាបាៈតារាន៝យទែសពាង់ដ៝ង់”។

១៧ ជេសរីអាឞ្រាហាម់ ក្រាបពាន់អានែសឆូ គើមអេងតានូយ្សនហ៝ម់រីលាស៖ “ឞូក្លោលែៈ ១០០ នាម់ អើមហោមឞ្លាវគែសក៝នលាស? ល៝ង់ឆារាលែៈ ៩០ នាម់ គឹតមាហោមឞាៈក៝នលាស?”* ១៨ អាឞ្រាហាម់ លាសមាកោរាញឞ្រាស៖ “លាសមៃអ៝ន់អីសមាអែលទើននាវត៝នមៃអ្យា លែៈគាប់ងាន់”។ ១៩ កោរាញឞ្រាសលាសមាអាឞ្រាហាម់ ៖ “មោអោស យ៝រលាសអូរមៃឆារាឞាៈទូហ្វេក៝នឞូក្លោមាមៃ! អ៝ន់មៃតេៈរាញាពាង់ «អីឆាក់» គែសនាវខ្លៃ«គើម»។ គ៝ប់តឹមរាង្លាប់មាពាង់ ជេងនាវតឹមរាង្លាប់ហោមនហ៝រ៝ត៝ត់ក៝នត៝ត់ឆៅពាង់។ ២០ ល៝ង់អីសមាអែលអីនៃ លែៈគ៝ប់តាង់នាវមៃលាស តៃគ៝ប់អ៝ន់នាវគែសជេងមាពាង់ គ៝ប់ជានអ៝ន់ពាង់គែសក៝នគែសឆៅឞឹករឹទុតអ៝ក់។ គ៝ប់អ៝ន់គែសកាដាច់ ១២ នុយ្សតាៈឞើសរាន៝យទែសពាង់ នទ្រែលមាអ៝ន់រាន៝យទែសពាង់ជេងទូផូងឞ្រីទាកទុតក្វ៝ង់ដ៝ង់។* ២១ យើនមាគ៝ប់តឹមរាង្លាប់ដាសមាអីឆាក់ក៝នឆារា ពាង់ទែសនាម់តៃ ខៃអ្យាដ៝ង់”។* ២២ ជេសលែៈផ្យៅកោរាញឞ្រាសងើយនទ្រែលមាអាឞ្រាហាម់ ជេសរីពាង់ទូឞើសនតុកនៃយ៝តក្ល៝ក់។

២៣ ជេសរីអាឞ្រាហាម់ លែវអីសមាអែល លែវលែៈរាងោចផូងទឹកទែសតាជៃពាង់រី នអ៝ប់មាផូងទឹកអីពាង់រាវាត់មាព្រាក់ ទឹងលែៈឞូក្លោអីគុតាជៃពាង់រី ពាង់ក៝សនតោតានារនៃទាទេ ពាង់ជានកើតនាវកោរាញឞ្រាសទែដាៈមាពាង់រីនើស។ ២៤ នោកអាឞ្រាហាម់ ក៝សនតោ ពាង់លែៈគែស ៩៩ នាម់ ២៥ យើនមាអីសមាអែលអីក៝នពាង់រី លែៈគែស ១៣ នាម់។ ២៦ អាឞ្រាហាម់ នទ្រែលមាអីសមាអែលក៝សនតោទូនារទើម។ ២៧ នអ៝ប់មាលែៈរាងោចផូងឞូក្លោអីគុតាជៃពាង់រី ផូងទឹកទែសតាជៃពាង់ ផូងទឹកពាង់រាវាត់មាព្រាក់ឞើសផូងឞូនាច់ឞ្រីអេងកាដោយ ខាន់ពាង់ក៝សនតោនទ្រែលមាអាឞ្រាហាម់ ទាទេដ៝ង់។

*១៧:២ ១៧:២៖ ១២:២

*១៧:៤ ១៧:៤-៦៖ ១២:២

*១៧:៥ ១៧:៥៖ រម ៤:១៧

*១៧:៧ ១៧:៧៖ លក ១:៥៥

*១៧:៨ ១៧:៨៖ ១២:៧; ការ ៧:៥

*១៧:៩ ១៧:៩-១៤៖ ២១:៤; កល ១២:៣; យោឆ ៥:២-៣; លក ២:២១; រម ៤:១០-១២

*១៧:១០ ១៧:១០៖ ការ ៧:៨; រម ៤:១១

*១៧:១៥ ១៧:១៥៖ លែៈឞាររាញា «ឆារាយ » នទ្រែលមា«ឆារា» គែសនាវខ្លៃលាស«ក៝នឞូអូរកាដាច់»។

*១៧:១៧ ១៧:១៧៖ ១៨:១០-១៥; ២១:៣, ៦-៧

*១៧:២០ ១៧:២០៖ ២១:១៣, ១៨; ២៥:១២-១៨

*១៧:២១ ១៧:២១៖ ២១:១២