នាវកោរាញឞ្រាសងើយតានាវងើយឞូន៝ង ឆ៝ម់បុតនាវនតើម ២៥

២៥

អាឞ្រាហាម់ ខឹត

១ អាឞ្រាហាម់ ឆ៝ៈតៃអូរអេងជឹតរាញាកិតូរា។ ២ ឞូអូរនៃគុអ៝សក៝នឞូក្លោមាពាង់ តានៃគែស៖ ឆឹមរាន គែសយុកឆាន គែសមេដាន គែសមីដៀន គែសអីសបាក់ នទ្រែលមាគែសឆូអា។ ៣ យុកឆានអីនៃឞាៈឆេបា នទ្រែលមាដេដាន អីក៝នឆៅដេដាននៃទឹងជេងគែសផូងអាសឆើរ ផូងលេតូឆីម នទ្រែលមាផូងលេអូមីម។ ៤ អីក៝នឆៅមីដៀនរី តានៃគែស៖ អេផា គែសអេផើរ គែសហានុក គែសអាបីដា នទ្រែលមាគែសអែលដា។ ទឹងលែៈផូងអីនៃជេងក៝នឆៅកិតូរាទាទេ។

៥ ទឹងលែៈនទើអាឞ្រាហាម់ គែស ពាង់អ៝ន់មាអីឆាក់ទាទេ។ ៦ យើនមានោកអាឞ្រាហាម់ ហោមរេស ពាង់អ៝ន់ដ៝ង់នទើអាបាៈមាក៝នអូរៗចោងពាង់រី ពាង់អ៝ន់ផូងនៃទូងាយឞើសអីឆាក់ អ៝ន់ខាន់ពាង់គុអាឞ្រីមពែសឞើសលោសនាររី។ ៧ អាឞ្រាហាម់ រេស គែស ១៧៥ នាម់។ ៨ ពាង់រេសមពៃលែៈជ៝ៈងាន់ នអ៝ប់មាលែៈរាញងាន់ដ៝ង់ ជេសរីពាង់រ៝សនហ៝ម់ខឹតហាន់គុនទ្រែលមាផូងចែពាង់។ ៩ ជេសរីក៝នពាង់អីឆាក់ នទ្រែលមាអីសមាអែលត៝ប់ពាង់តាត្រោមយោកមាក់ពេលាមពែសឞើសលោសនារមាប៝នមាម់រេ តាមីរអេប្រុនអីក៝នឆោហារផូងហេត។* ១០ អីនៃជេងមីរអាឞ្រាហាម់ ទែរាវាត់តាៈឞើសផូងហេតនើស តានៃឞូត៝ប់អាឞ្រាហាម់ ត៝ប់នទ្រែលតានតុកពាង់ត៝ប់ឆារានើស។* ១១ ជេសខឹតអាឞ្រាហាម់ រី កោរាញឞ្រាសអ៝ន់គែសជេងមាអីឆាក់ក៝នពាង់រី អីឆាក់ហាន់គុទាច់កេងតូទាកលាហាយរ៝យ។*

ងក៝ចរាន៝យទែសអីសមាអែល

១២ អ្យាជេងងក៝ចយៅទែសក៝នឆៅអីសមាអែល អីក៝នអាឞ្រាហាម់ ជេងក៝នហាការឞូអូរផូងអេឆីប អីទឹកឆារាឞាៈអ៝ន់មាអាឞ្រាហាម់។* ១៣ អ្យាជេងរាញាក៝នឞូក្លោអីសមាអែល រាញាតឹងឞូម៝សទែសល៝រ ឞូម៝សទែសឞើសកើយ ក៝នឞោកទាកអីសមាអែលរាញានេបាយោត ជេសរីអីអ៝សៗរាញាកេដារ រាញាអាត់បែល រាញាមីបឆាម‌ ១៤ រាញាមីសមា រាញាដូមា រាញាមាឆា‌ ១៥ រាញាហាដាត់ រាញាថេមា រាញាយេថូរ រាញានាផីស នទ្រែលមារាញាកេតមា។ ១៦ ទឹងលែៈក៝នអីសមាអែលអីនៃ អីនៃរាញាខាន់ពាង់តឹងប៝នតឹងនតុកខាន់ពាង់គុ ទឹងលែៈ ១២ នុយ្សនៃជេងកោរាញតានទុលមពោលខាន់ពាង់នើម។ ១៧ អីសមាអែលរេសគែស ១៣៧ នាម់ ជេសរីពាង់រ៝សនហ៝ម់ខឹតគុនទ្រែលមាផូងចែពាង់។ ១៨ ឞ្រីផូងក៝នឆៅអីសមាអែលគុ នតើមឞើសឞ្រីហាវីលា ត៝ត់អាឞ្រីឆូរទាច់មាឞ្រីអេឆីប មពែសមាឞ្រីអាឆើរ។ ផូងក៝នឆៅអីសមាអែលខាន់ពាង់គុតឹមលើសនទ្រាង់អ៝សនោខាន់ពាង់នើមនឹង*។

នាវងក៝ចឞ្រីយាកោប នទ្រែលមាអេឆាវ

១៩ អ្យានាវងក៝ចយៅអីឆាក់ក៝នអាឞ្រាហាម់ ៖ អាឞ្រាហាម់ ឞាៈអីឆាក់។ ២០ ត៝ត់អីឆាក់លែៈគែស ៤០ នាម់ ពាង់ឆ៝ៈរេបេកាជេងអូរ។ រេបេកានៃអីក៝នបេថូអែលអីអ៝សលាបានបេថូអែលនៃផូងអារាមគុតាឞ្រីពាដាន-អារាម។* ២១ អីឆាក់មឞើសឆើមមាឞ្រាសយេហោវា យ៝រលាសអូរពាង់នៃជេងឞូអូរមោអោសឞាៈក៝ន ឞ្រាសយេហោវាអ្យាត់នាវពាង់មឞើសឆើម ជេសរីអូរពាង់នត្រែវ។ ២២ ក៝នតាត្រោមនទុលរេបេកាគែសឞារអឹតឹមថាក់ឞាល់ ពាង់លាស៖ “មើមទឹងជេងកើតនទ្រីច្រាវ?” ជេសរីពាង់អោបឞ្រាសយេហោវា។ ២៣ ឞ្រាសយេហោវាលាសមាពាង់៖

“អៃគែសឞារអឹឞ្រីទាកគុតាត្រោមនទុលអៃនៃ

អៃទែសគែសឞារអឹផូងតាៈឞើសនទុលអៃអីតឹមរាទ៝ង់ឞាល់

ទូផូងជេងទាង់រាលាវដាសមាទូផូង

ក៝នឞោកទាកជេងព្លាច់ឆើមកើលជានការអ៝ន់មាអីអ៝ស”។*

២៤ ត៝ត់អាប់ខៃរី ពាង់គុអ៝សគែសក៝នឞារងាន់ ក៝នឞូក្លោទាទេ។ ២៥ ក៝នអីឞោកទាករីឆាក់ពាង់ទុមងាន់ គែសរាឆៅតឹមឞានមារាឆៅមពោមពា(ឆ្យុម) ឞូតេៈរាញា «អេឆាវ†»។ ២៦ ជេសរីអីអ៝សលោសដ៝ង់ តីពាង់ក្វាន់ការ់ញើនតាជ៝ង់អេឆាវរី កើតនទ្រីទឹងឞូតេៈរាញា «យាកោប» គែសនាវខ្លៃលាស«ក្វាន់ការ់ញើនតាជ៝ង់»‡។ នោកគុអ៝សនៃអីឆាក់លែៈគែស ៦០ នាម់។ ២៧ ជេសរីអីក៝នពាង់ឞារអឹរីត៝ត់ក្វ៝ង់ត៝ត់នទាម់ អេឆាវជេងឞូនុយ្សឞ្រែនពាញ់ព្វាច់ ពាង់ហោងាន់ឞ្រោៈឞ្រី។ ល៝ង់យាកោបរី ជេងឞូនុយ្សគុរាមឺយ្សទើម ពាង់គុទាច់តាចូនឞ៝ករីច្យាប់ឞែឞ្យាប់។ ២៨ អីឆាក់រ៝ង់មាអេឆាវហោងាន់ យ៝រលាសពាង់រ៝ង់ឆាព្វាច់អេឆាវទែពាញ់ យើនមារេបេការ៝ង់មាយាកោប។

២៩ គែសទូនារយាកោបគុគ៝ម់ត្រាវ អេឆាវឆឹតឞើសនទ្រិចរីពាង់ហ្វារ់ងាន់។ ៣០ ពាង់លាសមាយាកោប៖ “ទាន់ពាៈគ៝ប់ដេៈត្រាវទុមអីជានមាតោសមៃនៃគ៝ប់ឞែមាឆា លែៈហោងាន់ហ្វារ់គ៝ប់តារី!” (កើតនទ្រីទឹងឞូក្វាល់ពាង់ «អេដ៝ម់» យ៝រលាសគែសនាវខ្លៃ«ទុម»។) ៣១ យាកោបលាសមាពាង់៖ “ព្លាច់អ៝ន់មាគ៝ប់នាវខ្លៃមៃជេងក៝នឞោកទាកនៃមើ”។ ៣២ អេឆាវអើសមាពាង់៖ “គ៝ប់តារីលែៈឞើយមាខឹតងាន់ ម៝សហោមខ្លៃជេងក៝នឞោកទាក?” ៣៣ យាកោបលាសតៃមាពាង់៖ “លាសនទ្រីមៃត៝នអ៝ន់មាគ៝ប់ល៝រប៝ត់”។ ជេសរីអេឆាវត៝នព្លាច់អ៝ន់មាយាកោបនាវខ្លៃជេងក៝នឞោកទាកនៃ។* ៣៤ យាកោបឆ៝ៈនុមពាង់ នទ្រែលមាត្រាវតោសទុមពាង់គ៝ម់នៃអ៝ន់មាអេឆាវឆោង។ អេឆាវញេតឆោងនទើយាកោបអ៝ន់នៃ ជេសរីទ៝ក់ទូឞើសនតុកនៃ។ កើតនទ្រីពាង់លែៈមឺចជេសនាវខ្លៃតាឆាក់ពាង់នើមជេងក៝នឞោកទាករី។

*២៥:៩ ២៥:៩-១០៖ ២៣:១៧-២០

*២៥:១០ ២៥:១០៖ នន ២៣:៣-១៦

*២៥:១១ ២៥:១១៖ ១២:២, ៧; ១៧:១៩; ១៦:១៤

*២៥:១២ ២៥:១២-១៨៖ ១៦:១០-១២; ២១:១៣, ១៨

*២៥:១៨ ២៥:១៨៖ «ផូងក៝នឆៅអីសមាអែលខាន់ពាង់គុតឹមលើសនទ្រាង់អ៝សនោខាន់ពាង់នើមនឹង» មោលាស៖ «ផូងក៝នឆៅអីសមាអែលខាន់ពាង់គុតឹមទាច់អ៝សនោខាន់ពាង់នើម»។

*២៥:២០ ២៥:២០៖ ២៤:២-៦៧

*២៥:២៣ ២៥:២៣៖ មាល ១:២-៣; រម ៩:១០-១៣

†២៥:២៥ ២៥:២៥៖ តានាវងើយហេឞ្រើ «អេឆាវ» តឹមនទ្រឹងមា«រាឆៅ»។

‡២៥:២៦ ២៥:២៦៖ តានាវងើយហេឞ្រើ ឞូក្វាល់ឞូនុយ្សមរោសរាលាម់ឞូ «ឞូនុយ្សក្វាន់ការ់ញើនតាជ៝ង់»ដ៝ង់។

*២៥:៣៣ ២៥:៣៣៖ ហេឞ ១២:១៦