នាវកោរាញឞ្រាសងើយតានាវងើយឞូន៝ង ឆ៝ម់បុតនាវនតើម ៣០

៣០

១ នោករាចែលឆៃឆាក់ពាង់នើមមោអោសឞាៈក៝នមាយាកោប ពាង់មោនាចអីយោសព្រែ។ ជេសរីពាង់លាសមាយាកោប៖ “អ៝ន់គ៝ប់គែសក៝នបាៈ លាសមោគែសក៝នខឹតហើយ្សគ៝ប់”។ ២ យាកោបហាវនូយ្សឞ្រូត ពាង់ជីនូយ្សមារាចែល ពាង់អើស៖ “គ៝ប់អ្យាគឹតមាកោរាញឞ្រាសអីមោអ៝ន់អៃគែសក៝នលាស?” ៣ រាចែលលាស៖ “នៃបិលហាតានៃ ពាង់អីឞូអូរឆើមកើលជានការគ៝ប់នើម មៃឆ៝ៈពាង់ទោ គៃមាពាង់ឞាៈក៝នមាគ៝ប់ គ៝ប់ឆ៝ៈក៝ននៃម៝ត់ជេងតឹមឞានមាក៝នគ៝ប់នើម”។* ៤ រាចែលឆ៝ៈបិលហាអីឞូអូរឆើមកើលជានការពាង់នើមនៃអ៝ន់ជេងអូរយាកោប នទ្រីយាកោបឞិចដាសបិលហានៃ។ ៥ ជេសរីបិលហានត្រែវ ពាង់ឞាៈទូហ្វេក៝នឞូក្លោមាយាកោប។ ៦ រាចែលលាស៖ “លែៈកោរាញឞ្រាសផាតទោយ្សឆ៝ង់មាគ៝ប់ លែៈពាង់តាង់នាវគ៝ប់ទាន់ យ៝រលាសពាង់លែៈអ៝ន់គ៝ប់គែសទូហ្វេក៝នឞូក្លោ” នទ្រីទឹងរាចែលតេៈរាញាក៝ននៃ «ដាន*»។ ៧ ជេសរីបិលហាអីឞូអូរឆើមកើលជានការមារាចែលនៃ ពាង់នត្រែវតៃឞាៈតៃទូហ្វេក៝នឞូក្លោជឹតមាយាកោប។ ៨ រាចែលលាស៖ “គ៝ប់តឹមរាទ៝ង់ដាសមាយោសគ៝ប់គៃមាកោរាញឞ្រាសកើល† ត៝ត់ទើយគ៝ប់ដ៝ង់”។ ជេសរីពាង់តេៈរាញាក៝ននៃ «នាប់តាលី‡»។

៩ ត៝ត់លេអាឆៃឆាក់ពាង់នើមមោហោមឞាៈក៝ន ពាង់ឆ៝ៈឆិលផាអីឞូអូរឆើមកើលជានការមាពាង់នើមនៃអ៝ន់ជេងអូរយាកោប។ ១០ ជេសរីឆិលផាឞាៈទូហ្វេក៝នឞូក្លោមាយាកោប។ ១១ លេអាលាស៖ “គែសនាវលាបងាន់” ជេសរីពាង់តេៈរាញាក៝ននៃ «កាត§»។ ១២ ឆិលផាអីអ៝សម៝នលេអានៃឞាៈតៃទូហ្វេក៝នឞូក្លោជឹតមាយាកោប។ ១៣ លេអាលាស៖ “គ៝ប់រាម់មអាកងាន់ យ៝រលាសទឹងលែៈផូងឞូអូរ ឞូលាសមាគ៝ប់រាម់មអាកងាន់”។ ជេសរីពាង់តេៈរាញាក៝ននៃ «អាឆើរ*»។

១៤ ត៝ត់ខៃរែកឞាព្រាង់ រូបេនហាន់អាមីរ ពាង់ឆៃព្លៃឆានែ†ពាង់ពែៈអ៝ន់លេអាអីមេៈពាង់។ ជេសរីរាចែលលាសមាលេអា៖ “ទាន់ពាៈព្លៃឆានែក៝នអៃនៃអ៝ន់គ៝ប់បាៈយោស”។ ១៥ លេអាលាសមាពាង់៖ “មោហ៝ៈឆ៝ប់អៃពីតឆាយគ៝ប់បាស? អាបៃអ្យាអៃអុចទាន់ព្លៃឆានែក៝នគ៝ប់ជឹត”។ រាចែលអើសមាពាង់៖ “លាសអៃអ៝ន់ព្លៃឆានែក៝នអៃនៃមាគ៝ប់ គ៝ប់អ៝ន់ឆាយគ៝ប់ឞិចដាសអៃមាង់អ្យា”។ ១៦ ត៝ត់កេងមាង់ នោកយាកោបឆឹតឞើសមីរ លេអាហាន់ច្វាៈពាង់អាត្រ៝ងរី ពាង់លាស៖ “អ្យាត់មាមៃឞិចដាសគ៝ប់មាង់អ្យា យ៝រលាសលែៈជេសគ៝ប់រាវាត់មៃមាព្លៃឆានែក៝នគ៝ប់”។ ជេសរីមាង់នៃយាកោបហាន់ឞិចដាសមាលេអា។ ១៧ កោរាញឞ្រាសអើសនាវលេអាទាន់ ជេសរីលេអានត្រែវឞាៈតៃទូហ្វេក៝នឞូក្លោជឹត នៃជេងក៝នត៝ល់ព្រាម់លេអាឞាៈមាយាកោប។ ១៨ លេអាលាស៖ “កោរាញឞ្រាសអ៝ន់នទើងខោមមាគ៝ប់ យ៝រលាសលែៈគ៝ប់អ៝ន់ឞូអូរឆើមកើលជានការមាគ៝ប់នើមមាឆាយគ៝ប់”។ ជេសរីពាង់តេៈរាញាក៝ននៃ «អីឆាខារ‡»។ ១៩ លេអានត្រែវតៃឞាៈតៃទូហ្វេក៝នឞូក្លោជឹតមាយាកោប ជេងក៝នត៝ល់ព្រាវ។ ២០ លេអាលាស៖ “កោរាញឞ្រាសអ៝ន់ទើមទាមនទើខ្លៃមាគ៝ប់ ទូតឹអ្យាឆាយគ៝ប់ពាង់យើកមាគ៝ប់រ៝ យ៝រលាសលែៈគ៝ប់ឞាៈព្រាវអឹក៝នឞូក្លោមាពាង់”។ ជេសរីពាង់តេៈរាញាក៝ននៃ «ឆាប់យូលោន§»។ ២១ ជេសឞើសនៃពាង់ឞាៈទូហ្វេក៝នឞូអូរ ពាង់តេៈរាញា «ដីនា»។

២២ កោរាញឞ្រាសហោមកើលមារាចែលអើសនាវពាង់ទាន់ ជេសរីជានអ៝ន់រាចែលគែសក៝ន។ ២៣ ជេសរីពាង់នត្រែវឞាៈទូហ្វេក៝នឞូក្លោ ពាង់លាស៖ “កោរាញឞ្រាសមោហោមអោសអ៝ន់គ៝ប់គែសនាវដីតព្រេងជឹត”។* ២៤ ជេសរីពាង់តេៈរាញាក៝ននៃ «យោឆែប*» ពាង់លាស៖ “ទាន់ឞ្រាសយេហោវានត៝បអ៝ន់មាគ៝ប់ហោមទូហ្វេក៝នឞូក្លោជឹត”។

យាកោប នទ្រែលមាលាបានតឹមទីឞាល់

២៥ ជេសរាចែលឞាៈយោឆែបយាកោបងើយមាលាបាន៖ “អើចែ គ៝ប់ទាន់អ៝ន់គ៝ប់ព្លឹឆឹតតាឞ្រីគ៝ប់នើមរី ២៦ គ៝ប់ទាន់លែវអូរលែវក៝នគ៝ប់អ្យាហាន់នទ្រែលគ៝ប់នើម គ៝ប់លែៈលោចជេសជានការមាបែយ៝រមាឞារហៃក៝នបែអ្យា។ បែលែៈគឹតដ៝ង់នាវគ៝ប់ជានការអ្វែសមាបែ”។* ២៧ លាបានអើសមាពាង់៖ “ទាន់បែអ្យាត់នាវគ៝ប់ប៝ត់ លែៈគ៝ប់គឹតនហេលងាន់ឞ្រាសយេហោវាទែអ៝ន់គែសជេងមាគ៝ប់អ្យា ជេងតាៈឞើសបែ។ ២៨ មឞើសមាគ៝ប់ហ៝ម់ ម៝សនទើបែអុចឆ៝ៈងខោមឞើសគ៝ប់ គ៝ប់អ៝ន់មាបែ”។ ២៩ យាកោបអើសមាពាង់៖ “អើចែ បែលែៈគឹតជេសនាវគ៝ប់គុជានការរាអាសរាគាញ់មាបែនើស គ៝ប់ម៝ត់អ្វាញ់មពោមពា(ឆ្យុម)ផូងបែនើស ជេសរីគែសលើមាអ៝ក់។ ៣០ នោកអេហ៝ៈគ៝ប់គុនទ្រែលមាបែ មពោមពា(ឆ្យុម)បែដេៈទើម ល៝ង់អាបៃអ្យាមពោមពា(ឆ្យុម)បែលែៈឞឹករឹអ៝ក់ងាន់ នតើមឞើសគ៝ប់គុនទ្រែលបែឞ្រាសយេហោវាអ៝ន់គែសជេងមាបែតាទឹងលែៈនទើគ៝ប់ជាន។ អាបៃអ្យាគ៝ប់អុចជានការអ៝ន់មារានាក់វ៝ល់គ៝ប់នើមហាញ”។ ៣១ លាបានលាសមាយាកោប៖ “លាសនទ្រីម៝សនទើបែអុចគ៝ប់អ៝ន់មាបែ?” យាកោបអើស៖ “អើចែ បែលើយអោសអ៝ន់នទើមាគ៝ប់។ លាសបែអុច អ៝ន់គ៝ប់ហោមគុច្យាប់ឞែឞ្យាប់ផូងបែជឹត។ ៣២ នារអ្យាគ៝ប់ហាន់អ្វាញ់តាឞែឞ្យាប់ផូងបែ ទឹងលែៈឞែឞ្យាប់អីគែសរាវាញរុកលុក នទ្រែលមាក៝នឞែឞ្យាប់អីក្រាក់ៗ គ៝ប់ងខាសអ៝ន់គុអេង។ ទឹងលែៈឞែអីគែសរាវាញរុកលុកគ៝ប់ងខាសអ៝ន់គុអេងឞើសផូងមពោមពា(ឆ្យុម)បែ។ ជេសរីទឹងលែៈមពោមពា(ឆ្យុម)នៃគ៝ប់ទាន់ឆ៝ៈជេងនទើងខោមអ៝ន់មាគ៝ប់។ ៣៣ នារជឹតនាប់តៃត៝ត់បែហាន់អ្វាញ់មពោមពា(ឆ្យុម)អីងខោមមាគ៝ប់ បែឆៃទីកើតនាវគ៝ប់លាសនៃរ៝ ទឹងលែៈមពោមពា(ឆ្យុម)មោគែសរាវាញរុកលុកអីបែឆៃ មោលាសទឹងលែៈឞែឞ្យាប់មោគែសក្រាក់គុតាមពោមពា(ឆ្យុម)ផូងគ៝ប់ ទឹងលែៈមពោមពា(ឆ្យុម)នៃជេងកើបគ៝ប់នតុង”។ ៣៤ លាបានអើស៖ “អើ កាដោយដ៝ង់ បែជានតឹងនាវបែលាសរីទោស!” ៣៥ ជេសរីនារនៃរ៝លាបានហាន់តឹមងខាសឞែងក្វ៝ង់អីគែសរាវាញមព៝រ នទ្រែលមាឞែមែអីគែសរាវាញមព៝រ ទឹងលែៈឞែអីគែសងលាងដេៈ នទ្រែលមាឞែឞ្យាប់អីក្រាក់ៗ ពាង់តឹមងខាសអ៝ន់គុអេង ផូងអីនៃពាង់អ៝ន់មាមពោលក៝នពាង់នើមម៝ត់ច្យាប់។† ៣៦ ជេសរីលាបានអ៝ន់ខាន់ពាង់គុបាសងាយដាសយាកោបពែនារឞ្រោៈត្រ៝ង។ យាកោបគុម៝ត់មពោមពា(ឆ្យុម)លាបានអីហោមតារី។

៣៧ យាកោបគិចងគីងពែនតីលតើមឆីអីគែសងលាងតាន៝ម់នតោអីហោមរេស ពាង់ព្លោកច៝រអីនតោរីអ៝ន់ឆៃងលាងរូនអូន។ ៣៨ ជេសរីពាង់ឆ៝ៈងគីងឆីអីនៃនទើមតាត្រ៝ងទាក នទ្រែលមាតាឞ៝ង នតុកមពោមពា(ឆ្យុម)ពាង់វៃញេតទាក គៃមាអ៝ន់មពោមពា(ឆ្យុម)នៃឆៃ យ៝រលាសពាង់តឹមជើងឞាល់ទោលពាង់ញេតទាក។ ៣៩ លាសពាង់តឹមជើងតាព្លាង់ងគីងឆីនៃ ត៝ត់មាទែសក៝នជេងរាវាញមព៝រ។ ៤០ ជេសរីយាកោបតឹមងខាសលើយទឹងលែៈក៝នអីគែសរាវាញមព៝រអ៝ន់គុអេងឞើសមពោមពា(ឆ្យុម)លាបាន។ នោកតឹមជើង ពាង់អ៝ន់មពោមពា(ឆ្យុម)លាបានអ្វាញ់ជឹតមពោមពា(ឆ្យុម)អីរាវាញមព៝រ មោលាសអីក្រាក់ៗ គៃមាគែសក៝នរាវាញមព៝រ។ កើតនទ្រីមពោមពា(ឆ្យុម)ផូងពាង់នើមគែសលើមាអ៝ក់។ ៤១ ត៝ត់មាមពោមពា(ឆ្យុម)អីទាង់ៗតឹមជើងឞាល់ យាកោបឆ៝ៈងគីងឆីរីនទើមតាត្រ៝ងទាកអ៝ន់មពោមពា(ឆ្យុម)នៃឆៃ គៃមាអ៝ន់ពាង់តឹមជើងឞាល់តាព្លាង់ឞើសនាប់ងគីងឆីនៃ។ ៤២ លាសមពោមពា(ឆ្យុម)អីមោទាង់មោទាង់តឹមជើងឞាល់ ពាង់មោអោសនទើមងគីងឆីនៃ។ កើតនទ្រីទឹងមពោមពា(ឆ្យុម)អីមោទាង់មោទាង់ជេងមពោមពា(ឆ្យុម)លាបាន ជេសរីមពោមពា(ឆ្យុម)អីទាង់ៗជេងមពោមពា(ឆ្យុម)យាកោប។

៤៣ ជេសរីយាកោបគែសទ្រាប់នទើលើមាអ៝ក់ងាន់ ពាង់គែសមពោមពា(ឆ្យុម)ទុតអ៝ក់ គែសនអ៝ប់មាឞូនុយ្សឆើមកើលជានការឞូអូរឞូក្លោ នអ៝ប់មាឆែសឆាមោ នទ្រែលមាឆែសលៀអ៝ក់ដ៝ង់។

*៣០:៣ ៣០:៣៖ ១៦:១-២

*៣០:៦ ៣០:៦៖ «ដាន»តានាវងើយហេឞ្រើរាញាអីនៃគែសនាវខ្លៃលាស«លែៈពាង់ផាតទោយ្ស»។

†៣០:៨ ៣០:៨៖ «គៃមាកោរាញឞ្រាសកើល» មោលាស៖ «ហោងាន់»។

‡៣០:៨ ៣០:៨៖ «នាប់តាលី»គែសនាវខ្លៃលាស«នាវគ៝ប់តឹមរាទ៝ង់»

§៣០:១១ ៣0:១១៖ «កាត»គែសនាវខ្លៃលាស«គែសនាវលាបងាន់»។

*៣០:១៣ ៣0:១៣៖ «អាឆេរ»គែសនាវខ្លៃលាស«រាម់មអាក»។

†៣០:១៤ ៣0:១៤៖ ព្លៃ«ឆានែ» មោលាស៖ «ព្លៃនាវរ៝ង់»។ តារានោកនៃឞូមឹនលាស ឞូអូរអីឆាព្លៃឆានែនៃ កើលអ៝ន់គែសក៝ន។

‡៣០:១៨ ៣0:១៨៖ «អីឆាខារ»តានាវងើយហេឞ្រើ រាញាអីនៃតឹមឞានមានតែសលាស៖ «នាវងខោម»។

§៣០:២០ ៣0:២0៖ «ឆាប់យូលោន»ឞូមឹនលាសគែសនាវខ្លៃ៖ «យើក»។

*៣០:២៣ ៣០:២៣៖ ១៦:៤; ១ឆា ១:៦; អេឆា ៤:១

*៣០:២៤ ៣0:២៤៖ «យោឆែប»គែសនាវខ្លៃលាស«អ៝ន់ពាង់នត៝ប»។

*៣០:២៦ ៣០:២៦៖ ២៩:២០, ៣០

†៣០:៣៥ ៣0:៣៥៖ តានតុកនៃគែសឞែ នអ៝ប់មាឞែឞ្យាប់ដេៈទើមអីគែសរាវាញ គែសអ៝ក់ឞែក្រាក់ទើម គែសអ៝ក់ឞែឞ្យាប់ងលាងទើម។