នាវកោរាញឞ្រាសងើយតានាវងើយឞូន៝ង ហេឞ្រើ ៤

៤

នាវត៝នលាប់តានាវគុរាលូ

១ អាបៃអ្យានាវអីកោរាញឞ្រាសត៝នអ៝ន់ឞ៝ន់លាប់តានាវគុរាលូពាង់នើមហោមអែ លាសនទ្រីអ៝ន់ឞ៝ន់គឹតក្លាចញជ្រាង់ គៃមាលើយអោសគែសឞូនុយ្សតាផូងឞ៝ន់ត៝ត់នារងគ្លែៈទុត កោរាញឞ្រាសកើបពាង់មោអោសទីមាលាប់។* ២ នាវមហែមហានអ្វែសអីមឞើសងក៝ចមានាវឞ៝ន់លាប់តានាវគុរាលូកោរាញឞ្រាស នាវអីនៃឞ៝ន់លែៈតាង់ជេស នាវអីនៃជេងតឹមឞានមាផូងអីឆ្រាអែល នោកហោមគុតាឞ្រីអេឆីប លែៈតាង់នាវកោរាញឞ្រាសត៝នអ៝ន់ឞ្រីទាកមហែមាលាប់តានាវគុរាលូនៃដ៝ង់។ យើនមានាវកោរាញឞ្រាសអីខាន់ពាង់តាង់នៃមោអោសគែសនាវខ្លៃមាខាន់ពាង់ យ៝រលាសខាន់ពាង់មោអោសញអោតនាវខាន់ពាង់តាង់នៃនអ៝ប់មានាវញឆីង។* ៣ ល៝ង់ឞ៝ន់អីញឆីងមាពាង់ ឞ៝ន់លាប់តានាវគុរាលូពាង់។ យើនមាឞូនុយ្សអីមោញឆីង កោរាញឞ្រាសលាសកើតនអា៖

«គ៝ប់ជីនូយ្សមាខាន់ពាង់ នទ្រីទឹងគ៝ប់លាស៖ «គ៝ប់មោអោសអ៝ន់ខាន់ពាង់លាប់តានាវគុរាលូគ៝ប់»»†។

ទីងាន់ នតុកគុរាលូលែៈអើមនទ្រាប់ជេសលែៈផ្យៅ ឞើសនោកកោរាញឞ្រាសជេសញជេងនែសនតូនើស‌ ៤ យ៝រលាសគែសទូនតុកតានាវកោរាញឞ្រាសងើយលាសមានារពើសកើតនអា៖ «ជេសរីពាង់គុទើមមោហោមជានការតានារពើសអីនៃ»†។ ៥ យើនមាគែសញចីសកើតតាកាលើដ៝ង់៖ «គ៝ប់មោអោសអ៝ន់ខាន់ពាង់លាប់តានាវគុរាលូគ៝ប់»†។

៦ លាសនទ្រីឞូនុយ្សអាបាៈកោរាញឞ្រាសហោមអ៝ន់លាប់គុរាលូ យើនមាផូងអីលែៈតាង់ជេសនាវត៝នអាល៝រនើសមោគែសលាប់អោស យ៝រលាសខាន់ពាង់មោអោសអ្យាត់កោរាញឞ្រាស។* ៧ នទ្រីទឹងកោរាញឞ្រាសតេៈនារង្វាយជឹតលាស៖ «នារអ្យា»‌ ពាង់លាសតឹងមាកាដាច់ដាវីត លែៈជ៝ៈនាម់ឞើសកើយផូងអីឆ្រាអែល គុតាឞ្រីរាទាសនើស កើតនាវលាសឞើសលើអ្យា៖

«នារអ្យា នោកខាន់អៃមៃតាង់ឞ៝រ់មឞូងកោរាញឞ្រាសនើម លើយអោសគែសនូយ្សនហ៝ម់ទាង់ក៝»†។*

៨ លាសយោឆ្វេ លែៈលែវផូងអីឆ្រាអែល អ៝ន់គុរាលូងាន់ លាសនទ្រីនារជឹតនាប់កោរាញឞ្រាសមោហោមលាសមាទូនារអាអេងជឹតអោស។* ៩ លាសនទ្រីហោមអែគែសនាវគុរាលូង្វាយជឹតអីតឹមឞានមានាវរាលូនារឆាបាត់ អីកោរាញឞ្រាសអ៝ន់មាផូងប៝នលានពាង់នើមតានារជឹតនាប់តៃ។* ១០ ឞូម៝សអីលាប់តានាវគុរាលូកោរាញឞ្រាសនៃ ពាង់អីនៃលែៈរាលូឞើសនទើពាង់នើមជានការ តឹមឞានមាកោរាញឞ្រាសគុទើមមោហោមជានការដ៝ង់ ជេសពាង់ញជេងនែសនតូនើស។ ១១ លាសនទ្រីអ៝ន់ឞ៝ន់ញឆ្រោយ្សគៃមាហាន់លាប់តានាវគុរាលូអីនៃ គៃមាមោអ៝ន់អោសគែសឞូនុយ្សរ៝សហេង លើយអោសតឹងផូងអីមោអុចអ្យាត់នៃ។*

១២ នាវងើយកោរាញឞ្រាសនើមគែសនាវរេស គែសនាវទើយងាន់ ឆោតហើររាលាវមាដាវឞារមាត់ជឹត។ ជេសរីឆ្រែសនូយ្សនហ៝ម់ នទ្រែលមាហ្វេង ឆ្រែសនតីងនអាង់ នទ្រែលមាអីគ្ល៝ពាង់។ នាវងើយកោរាញឞ្រាសផាតទោយ្សនាវមឹន នទ្រែលមានាវអុចនាវនត្រ៝ង់តាត្រោមនូយ្សនហ៝ម់ឞូនុយ្ស។* ១៣ ទឹងលែៈនទើអីកោរាញឞ្រាសលែៈញជេង មោគែសអោសទូមល៝ម់នទើកោរាញឞ្រាសអ្វាញ់មោឆៃ ទឹងលែៈរាងោចនទើមោគែសអោសនាវងកីងតានាប់មាត់ពាង់ ជេងតឹមឞានមាគុឆាក់កុសរាងុចទើម។ អ្យាត់មាទឹងលែៈឞ៝ន់មឞើសងក៝ចមាពាង់ទាទេទឹងលែៈនាវតានាវរេសឞ៝ន់។*

ឞ្រាសយេឆូ ក្វ៝ង់រាលាវមាកោរាញជានឞ្រាសទុតក្វ៝ង់

១៤ ឞ៝ន់លែៈគែសជេសទូហ្វេកោរាញជានឞ្រាសទុតក្វ៝ង់ អីលែៈហាវជេសតាកាលើត្រោកអីនតុកកោរាញឞ្រាស ពាង់ឞ្រាសយេឆូ អីក៝នកោរាញឞ្រាសនើម លាសនទ្រីអ៝ន់ឞ៝ន់ញឆីងន៝ប់រ៝តានាវអីឞ៝ន់លែៈមឞើសងក៝ចមាឞូនៃ។* ១៥ ឞ្រាសយេឆូ អីនៃលែៈគែសនាវរាល៝ងគែសនាវនទើមអាប់នតីលកើតឞ៝ន់ដ៝ង់ យើនមាពាង់នើមមោអោសជានតីស។ លាសនទ្រីឞ៝ន់លែៈគែសជេសទូហ្វេកោរាញជានឞ្រាសទុតក្វ៝ង់អីលែៈគឹតលែៈម៝ប់នាវជេរតឹមឞានមាឞ៝ន់ដ៝ង់ កើតនទ្រីពាង់លែៈនាល់នាវរាអ្យាឞូនុយ្ស នអ៝ប់មាឞ្លាវយោៈដ៝ង់។* ១៦ លាសនទ្រីអ៝ន់ឞ៝ន់គែសនូយ្សនហ៝ម់ឞាញ់ ទាន់កោរាញឞ្រាសអីគុតារានើលកាដាច់ពាង់នើម យ៝រលាសពាង់គែសនូយ្សនហ៝ម់ទុតអ្វែស។ ឞ៝ន់ទាន់គៃមាពាង់យោៈនអាចកើលតានោកឞ៝ន់គែសនាវជេរ។*

*៤:១ ៤:១៖ ហេឞ ២:១

*៤:២ ៤:២៖ ហេឞ ៣:១៩

†៤:៣ ៤:៣៖ នម ៩៥:១១

†៤:៤ ៤:៤៖ នន ២:២

†៤:៥ ៤:៥៖ នម ៩៥:១១

*៤:៦ ៤:៦៖ រម ១១:២៨-៣០

†៤:៧ ៤:៧៖ នម ៩៥:៧-៨

*៤:៧ ៤:៧៖ ហេឞ ៣:៧-៩

*៤:៨ ៤:៨៖ នវ ៣១:៧; យោឆ ២១:៤៣-៤៤

*៤:៩ ៤:៩-១០៖ ផល ១:២៣; នតម ១៤:១៣

*៤:១១ ៤:១១៖ ហេឞ ២:១; ១កោ ១:៨

*៤:១២ ៤:១២៖ អេផ ៦:១៧; យេរ ២៣:២៩

*៤:១៣ ៤:១៣៖ នម ២៦:២; មក ៤:២២

*៤:១៤ ៤:១៤៖ ហេឞ ៦:១៩-២០

*៤:១៥ ៤:១៥៖ ហេឞ ២:១៧-១៨; ១កោ ១០:១៣; ២ពេ ២:៩

*៤:១៦ ៤:១៦៖ ហេឞ ១០:១៩; រម ៨:១៥; អេផ ២:១៨; ៣:១២