នាវកោរាញឞ្រាសងើយតានាវងើយឞូន៝ង ហេឞ្រើ ៩

៩

នាវវៃអើម នទ្រែលមានាវវៃមហែ

១ នាវតឹមរាង្លាប់អីអើមអាល៝រនើស គែសនាវដាៈអេងៗមាយើកមឞាសកោរាញឞ្រាស នទ្រែលមាគែសនតុកជានឞ្រាសតានែសនតូអ្យាដ៝ង់។* ២ តឹងមានាវដាៈអីនៃ ឞូជានទូមល៝ម់ចូនឞ៝កជានឞ្រាសមាកោរាញឞ្រាស តាចូននៃគែសឞារអឹជ្រោ ជ្រោអីឞើសនាប់ឞូ ខាន់ពាង់ក្វាល់«នតុកក្ល៝សអ្វែស»‌ តានតុកនៃគែសតេៈងគ៝ង់ឆាគេង ញឆឺងនអ៝ប់មានុមពាង់តេៈញហើរ។* ៣ តាវាសវាងជ្រោឞើសនាប់ជ្រោឞើសកើយគែសឞ៝កញចីង* ជ្រោអីឞើសកើយទុតនៃខាន់ពាង់ក្វាល់«នតុកទុតក្ល៝សអ្វែស»។ ៤ តាជ្រោអីនៃគែសញឆឺងមាយ្សមាគុចនទើបោកាស នទ្រែលមាគែសហុបនាវតឹមរាង្លាប់ លាមហុបអីនៃងក្រេបមាមាយ្សទាទេ តាត្រោមហុបអីនៃគែសទូមល៝ម់ងានមាយ្សអីឞូតេៈនទើឆោងឆាមានា គែសម៝ង់ជ្រាអារោន លោសងក៝ត នទ្រែលមាគែសរាលាតលុញចីសនាវតឹមរាង្លាប់អើមដ៝ង់។* ៥ តាឞើសលើហុបអីនៃគែសរូបចេរូបីន †ជេងមឞេនកោរាញឞ្រាសគុទាច់តានៃ អីនារចេរូបីន ងក្រូមឞើសលើនទ្រុបហុបអីនៃជេងនតុកកោរាញជានឞ្រាសទុតក្វ៝ង់មាអ្យ្រាសមហាមមាទាន់យោៈនាវតីស។ យើនមានាវអីនៃហេនមោអោសទើយមឞើសងក៝ចអ៝ន់លែៈអាបៃអ្យា។*

៦ នទើតាចូនឞ៝កជានឞ្រាសមាកោរាញឞ្រាសលែៈជេសនទ្រាប់កើតនៃ មពោលឞូនុយ្សជានឞ្រាសលាប់ជានការអាប់នារតាជ្រោនតុកក្ល៝សអ្វែស។ ៧ យើនមាតាជ្រោនតុកទុតក្ល៝សអ្វែសនៃ គែសកោរាញជានឞ្រាសទុតក្វ៝ង់ទើមទើយលាប់ ទូនាម់លាប់ទូតឹទើម។ ពាង់លាប់អ្យាត់មាគែសញអោតនអ៝ប់មាមហាមមពោមពា(ឆ្យុម)អីពាង់លែៈញហើរមាកោរាញឞ្រាស គៃមាទើយទាន់កោរាញឞ្រាសយោៈនាវតីសឆាក់ពាង់នើម នទ្រែលមានាវតីសផូងប៝នលានអីឆាក់ខាន់ពាង់នើមមោអោសគឹតលាសគែសជានតីស។* ៨ នទ្រីទឹងឞ្រាសហ្វេងអ្វែសអីក្ល៝សអ្វែសអ៝ន់ឞ៝ន់គឹត នោកចូនឞ៝កជានឞ្រាសមាកោរាញឞ្រាសហោមអែគែស ផូងប៝នលានអេហ៝ៈគែសត្រ៝ងមាលាប់តាជ្រោនតុកទុតក្ល៝សអ្វែស។* ៩ នាវអីនៃជេងនតឹតមានោកអាបៃអ្យា យ៝រលាសតារានោកអាបៃអ្យានទើញហើរមាទាន់កោរាញឞ្រាសយោៈនាវតីស នទ្រែលមានទើញហើរអេងៗជឹត មោអោសទើយជានអ៝ន់ក្ល៝សងាន់នូយ្សនហ៝ម់នាវមឹនឞូនុយ្សអីញហើរនទើនៃ។* ១០ យ៝រលាសនទើជានតឹងនាវដាៈតានាវតឹមរាង្លាប់អើម ដាៈមានទើឆោងឆា នទើញេត នទ្រែលមានទើជូតរាវឆាក់អេងៗទើម នាវដាៈអីនៃមានមាគែសតាឆាក់ជាន់ ជេសរីគែសនាវខ្លៃនហ៝មាត៝ត់នាវដាៈតានាវតឹមរាង្លាប់អីអ្វែសរាលាវ។*

មហាមឞ្រាសក្រីស ខ្លៃរាលាវមាមហាមមពោមពា(ឆ្យុម)

១១ អាបៃអ្យាឞ្រាសក្រីស លែៈជេងកោរាញជានឞ្រាសទុតក្វ៝ង់ ពាង់លែៈត៝ត់ជេស ពាង់ម៝ត់អ្វាញ់ទឹងលែៈនទើអ្វែសតានាវតឹមរាង្លាប់មហែ។ ពាង់លែៈលាប់ជេសរ៝ៈចូនឞ៝កជានឞ្រាសមាកោរាញឞ្រាសតាកាលើត្រោកអីអ្វែសរាលាវ អីទុតអ្វែសងាន់ ចូនអីនៃមោអោសតីឞូនុយ្សជាន ក៝ៈមោដ៝ង់គែសតានែសនតូអ្យាអីកោរាញឞ្រាសរាហាក់ញជេង។ ១២ ពាង់តឹមឞានមាលាប់តានតុកអីទុតក្ល៝សអ្វែសជេសលែៈផ្យៅទូតឹ ពាង់មោអោសញអោតមហាមក៝នឞែងក្វ៝ង់ មោលាសមហាមក៝ននទ្រោក ពាង់ញអោតមហាមឆាក់ពាង់នើមច្វាយឞ៝ន់បាបើនហ៝រ៝។* ១៣ លាសមហាមឞែងក្វ៝ង់ នទ្រែលមាមហាមនទ្រោកងក្វ៝ង់ នអ៝ប់មាឞុសនទ្រោកទ្រោសអីឞូលាយមាទាកអីឞូអ្យ្រាសតាឞូនុយ្សអីមោអោសក្ល៝សតឹងមានាវវៃ លែៈជានអ៝ន់ខាន់ពាង់ជេងក្ល៝សតាឆាក់ជាន់‌* ១៤ លាសនទ្រីប៝ន់រាលាវមាអីនៃបាស មហាមឞ្រាសក្រីស ជានអ៝ន់នូយ្សនហ៝ម់នាវមឹនឞ៝ន់អ៝ន់ក្ល៝សឞើសនាវតីស គៃមាឞ៝ន់ទើយយើកមឞាសងាន់មាកោរាញឞ្រាសអីរេសងាន់ យ៝រលាសឞ្រាសក្រីស អីមោអោសគែសនាវមានទុយ្ស ញហើរឆាក់ពាង់នើមអ៝ន់មាកោរាញឞ្រាសតានាវទើយឞ្រាសហ្វេងអ្វែសអីហោមនហ៝រ៝។*

១៥ កើតនទ្រីទឹងឞ្រាសក្រីស ជេងនើមលែវមានាវតឹមរាង្លាប់មហែ គៃមាឞូម៝សអីលែៈកោរាញឞ្រាសទែក្វាល់ជេស ឆ៝ៈទើននទើអីកោរាញឞ្រាសលែៈត៝ននើសអីតឹមឞានមានទើនទ្រៃអីហោមនហ៝រ៝។ យ៝រលាសឞ្រាសក្រីស លែៈខឹតជេសគៃមារាក្លាយ្សឞូនុយ្សអ៝ន់ក្លាយ្សឞើសនាវកោរាញឞ្រាសតេៈទោយ្សយ៝រមានាវតីសខាន់ពាង់នើម នាវតីសអីខាន់ពាង់នើមជាននោកហោមគុតាន៝ម់នាវតឹមរាង្លាប់អើមនើស។* ១៦ លាសទូហ្វេឞូនុយ្សញចីសល៝រឆ៝ម់បុតនាវនតិញពាៈទ្រាប់នទើខ្លៃពាង់នើមត៝ត់ពាង់លែៈខឹត អ្យាត់មាគឹតនហេលនានេៈងាន់នើមអីតើមទ្រាប់នទើខ្លៃនៃលែៈខឹត‌ ១៧ យ៝រលាសទ្រាប់នទើខ្លៃអីនៃទឹងទើយតឹមពាៈ ត៝ត់ពាង់នើមអីតើមនៃលែៈខឹត នោកពាង់នើមអីតើមនៃហោមអែរេស ឆ៝ម់បុតអីនៃមោអោសគែសខ្លៃ។ ១៨ នាវតឹមរាង្លាប់អើមអាល៝រនើស ត៝ត់មាឞូងខឹតមពោមពា(ឆ្យុម)ញចាយមហាមដ៝ង់មើទឹងគែសខ្លៃ៖* ១៩ នោកមោឆេ លែៈជេសមឞើសអ៝ន់មាទឹងលែៈផូងប៝នលានគឹតទឹងលែៈនាវកោរាញឞ្រាសដាៈតានាវវៃអីនៃនើស ពាង់ឆ៝ៈមហាមក៝ននទ្រោក នទ្រែលមាមហាមក៝នឞែងក្វ៝ង់ លាយមាទាក ជេសរីឆ៝ៈរាឆៅឞែឞ្យាប់អីលែៈជេសញ៝មមាទាកចាង់ពូតតាងគីងឆីហីឆោប យុកតាមហាមអីនៃអ្យ្រាសតាឆ៝ម់បុតក្លោនអីមោឆេ ទែលែៈញចីសនាវវៃ នទ្រែលមាអ្យ្រាសតាទឹងលែៈផូងប៝នលានដ៝ង់។ ២០ ពាង់លាសមាខាន់ពាង់៖ «អ្យាជេងមហាមអីជាននាវតឹមរាង្លាប់កោរាញឞ្រាសដាសខាន់អៃមៃ អ៝ន់ខាន់អៃមៃញអោតលែៈនាវពាង់ដាៈ»†។ ២១ ជេសរីពាង់អ្យ្រាសមហាមអីនៃតាចូនឞ៝កជានឞ្រាសមាកោរាញឞ្រាស នទ្រែលមាតានទើទ៝ង់មាយើកមឞាសកោរាញឞ្រាសកើតនៃដ៝ង់។* ២២ តឹងមានាវវៃផូងអីឆ្រាអែល ឞ៝ន់ ឞើយមាទឹងលែៈនទើគៃមាជានអ៝ន់ក្ល៝សតានាប់មាត់កោរាញឞ្រាសអ្យាត់មាឆ៝ៈទ៝ង់មហាម។ លាសមោគែសអោសហ៝ចមហាម កោរាញឞ្រាសមោអោសយោៈនាវតីស នាវតីសឞូនុយ្សហោមក្រេបកើតអើម។*

ឞ្រាសក្រីស ជេងនទើជានឞ្រាស

២៣ កើតនទ្រីដ៝ង់ចូនឞ៝កជានឞ្រាសមាកោរាញឞ្រាស នអ៝ប់មាទឹងលែៈនទើតាត្រោម អ្យាត់មាឞូទែឆ៝ៈមហាមគៃមាជានអ៝ន់ក្ល៝សតានាប់មាត់កោរាញឞ្រាស ទឹងលែៈនទើអីនៃឞូជានតឹងនាវកោរាញឞ្រាសនើមដាៈកើតអីលែៈគែសតាកាលើត្រោកអីនតុកពាង់។ យើនមានទើអីគែសតាកាលើត្រោកនៃ អ្យាត់មាឆ៝ៈមហាមឞើសនទើជានឞ្រាសអីអ្វែសរាលាវមាមហាមមពោមពា(ឆ្យុម)គៃមាជានអ៝ន់ក្ល៝ស!* ២៤ ឞ្រាសក្រីស មោអោសលាប់តាចូនឞ៝កតាជ្រោនតុកក្ល៝សអ្វែសអីឞូនុយ្សជានគៃមាម៝ប់កោរាញឞ្រាស ជ្រោអីនៃមោទីអោសនទើអីងាន់ ឞូមានមាជានតឹងកើតនទើតាកាលើត្រោករីទើម។ យើនមាឞ្រាសក្រីស លែៈលាប់តានតុកតាកាលើត្រោករី គៃមាម៝ប់កោរាញឞ្រាសនើម ពាង់គុតានៃគៃមាឆើមទាន់អ៝ន់មាឞ៝ន់។* ២៥ អាប់នាម់អាប់នាម់កោរាញជានឞ្រាសទុតក្វ៝ង់ឆ៝ៈមហាមមពោមពា(ឆ្យុម)លាប់តាត្រោមជ្រោនតុកទុតក្ល៝សអ្វែស ពាង់មោអោសឆ៝ៈមហាមពាង់នើម។ ល៝ង់ឞ្រាសក្រីស ពាង់លែៈជេសលាប់តានតុកតាកាលើត្រោករី គៃមាញហើរឆាក់ពាង់នើមទូតឹទើម មោអោសអាប់នាម់អាប់នាម់កើតកោរាញជានឞ្រាសទុតក្វ៝ង់អីនៃវៃជាន។* ២៦ លាសឞ្រាសក្រីស ជានកើតនៃអាប់នាម់ ពាង់ទើននាវជេរជ៝ត់បាបើងាន់នតើមឞើសញជេងនែសនតូ នហ៝មាត៝ត់អាបៃអ្យា។ អាបៃអ្យាជេងរានោកឞើយត៝ត់នារងគ្លែៈទុតអីនារកោរាញឞ្រាសផាតទោយ្សមាទឹងលែៈឞូនុយ្ស។ តារានោកអ្យាពាង់លែៈជេសហាន់តានែសនតូអ្យាជាវឆាក់ពាង់នើមជេងនទើជានឞ្រាសមាកោរាញឞ្រាសគៃមាងគ្រ៝សលើយនាវតីសឞូនុយ្ស ពាង់ជាវឆាក់ពាង់នើមទូតឹទើម មោហោមអោសជានជឹត។

២៧ ទឹងលែៈឞូនុយ្សគែសខឹតទូតឹទើម ជេសរីកោរាញឞ្រាសនើមផាតទោយ្ស‌* ២៨ កើតនទ្រីដ៝ង់ឞ្រាសក្រីស គែសខឹតទូតឹទើមនោកពាង់ជេងនទើជានឞ្រាសជាវឆាក់ពាង់នើមគៃមាងគ្រ៝សលើយនាវតីសអ៝ក់ឞូនុយ្ស។ តានារជឹតនាប់តៃពាង់ព្លឹតៃទូតឹជឹត មោហោមអោសឆ៝ៈមអារ់លើយនាវតីសជឹត ពាង់វាច់គៃមារាក្លាយ្សឞូម៝សអីហោមគុរាប់ជាប់ក៝ប់ពាង់។*

*៩:១ ៩:១-៧៖ នង ២៦:៣១-៣៧

*៩:២ ៩:២៖ នង ២៥:២៣-៣១

*៩:៣ ៩:៣៖ «ឞ៝កញចីង» មោលាស «ឞ៝កញចីងត៝ល់ឞារ» យ៝រលាសហោមគែសឞ៝កង្វាយជឹតញចីងតាមពោងលាប់ចូនអីនៃ តាជ្រោនតុកក្ល៝សអ្វែស។

*៩:៤ ៩:៤៖ នង ៣០:១-៦; ២៥:១០-១៦; ១៦:៣២-៣៤

†៩:៥ ៩:៥៖ «ចេរូបីន» ជេងទូនតីលតោងពារ់។

*៩:៥ ៩:៥៖ នង ២៥:១៧-២២

*៩:៧ ៩:៧៖ នង ៣០:១០; កល ១៦:១១, ១៧

*៩:៨ ៩:៨៖ ហេឞ ១០:២០

*៩:៩ ៩:៩៖ ហេឞ ៧:១៩; ១០:១-៤

*៩:១០ ៩:១០៖ កោល ២:១៦-១៧

*៩:១២ ៩:១២៖ ហេឞ ១០:១៤; ២កោ ៥:១៨-២១

*៩:១៣ ៩:១៣៖ កល ១៧:១១; នក ១៩:១-២០

*៩:១៤ ៩:១៤៖ ២កោ ៥:១៨-២១; ១ពេ ៣:១៨; ១យហ ១:៧; ២:១-២

*៩:១៥ ៩:១៥៖ ហេឞ ៨:៦; ១២:២៤; អេផ ១:១៨; ១តម ២:៥-៦

*៩:១៨ ៩:១៨-២២៖ នង ២៤:៤-៨

†៩:២០ ៩:២០៖ នង ២៤:៨

*៩:២១ ៩:២១៖ នង ៨:១៥; កល ៧:១

*៩:២២ ៩:២២៖ កល ១៧:១១

*៩:២៣ ៩:២៣៖ ហេឞ ៨:៥

*៩:២៤ ៩:២៤៖ ហេឞ ៩:១១

*៩:២៥ ៩:២៥-២៦៖ ហេឞ ៧:២៧; ៩:១២; ១០:១៤

*៩:២៧ ៩:២៧៖ ២កោ ៥:១០

*៩:២៨ ៩:២៨៖ ហេឞ ១០:១២, ១៤; ១កោ ១៥:២៣; ១តេ ៤:១៥-១៧