នាវកោរាញឞ្រាសងើយនាវតឹមរាង្លាប់មហែ យាកើ 1

ឆ៝ម់បុត

យាកើ

ញចីស

នាវឞោកអ៝ន់ឞូគឹតល៝រ

នើមញចីសឆ៝ម់បុតអ្យារាញាយាកើ ពាង់ញចីសឆ៝ម់បុតអ្យាក្លាប់លាសតានាម់ ៤៥ ក្លាប់លាស ១២ នាម់ជេសឞ្រាសយេឆូ ទ៝ក់រេស។ ឞូមឹនលាសពាង់ញចីសឆ៝ម់បុតអ្យាតាប៝នយេរូឆាលឹម ពាង់ញចីសឆ៝ម់បុតអ៝ន់មាផូងញឆីងមាឞ្រាសក្រីស តាផូងអីឆ្រាអែល លាមនែសនតូ(យាក ១:១)។ យាកើ អ្យាអីអ៝សឞ្រាសយេឆូ (មថ ១៣:៥៥; កាល ១:១៩) ពាង់កោរាញមាផូងញឆីងតាប៝នយេរូឆាលឹម ឞូងខឹតពាង់ក្លាប់លាសតានាម់ ៦២ យ៝រមាពាង់មឞើសងក៝ចនាវមហែមហានអ្វែស។

នាវអុចនត្រ៝ង់តាឆ៝ម់បុតអ្យា

ឞ៝លលាសឆ៝ម់បុតអ្យាញចីសអ៝ន់មាផូងអីឆ្រាអែល អីញឆីងមាឞ្រាសក្រីស គែសនាវខ្លៃអ៝ន់មាទឹងលែៈផូងអីញឆីងមាឞ្រាសក្រីស ។ យាកើ នហាវនូយ្សនហ៝ម់ផូងអីញឆីងមាឞ្រាសក្រីស អ៝ន់គុងាវតឹមទីដាសនាវកោរាញឞ្រាសអុច ពាង់ញចីសដ៝ង់ ឞូម៝សអីញឆីងមាឞ្រាសក្រីស អ្យាត់មាឞូគឹតឆៃនាវញឆីងពាង់តាៈឞើសនាវគុងាវអ្វែសពាង់ មោអោសទើនឞើសឞ៝រ់មឞូងមឞើសងក៝ចទើម(យាក ២:១៧)។ ពាង់ញចីសលាសផូងញឆីងមាឞ្រាសក្រីស លើយអោសកើយ្សផូងនទ្រ៝ង់ដាសមាផូងអ៝អាច(យាក ២:១-៤) ជេសរីពាង់ដាៈផូងញឆីងឞ្លាវញជ្រាង់ម៝សនាវលោសឞើសឞ៝រ់មឞូងងើយ(យាក ៣:១-១២)។

មឞើសនាវខ្លៃតាងកោៈតាឆ៝ម់បុតអ្យា

- នាវអោបអ្វែសលាង់ (១:១)

- នាវរាល៝ង នទ្រែលមានាវនទើម (១:២-១៨)

- នាវអ្យាត់មាតោរទើម នទ្រែលមានាវជានតឹងនាវវៃកោរាញឞ្រាស (១:១៩-២៧)

- ផូងញឆីងមាឞ្រាសយេឆូ មោអោសកើយ្សឞូនុយ្ស (២:១-១៣)

- នាវញឆីង នទ្រែលមានាវជានអ្វែស (២:១៤-២៦)

- នាវញជ្រាង់ឞ៝រ់មឞូង នទ្រែលមានាវមឹនគឹតឞ្លាវអីតាៈឞើសកោរាញឞ្រាស (៣:១-១៨)

- នាវរ៝ង់នទើតានែសនតូ នទ្រែលមាញជ្រាង់នាវងើយ (៤:១-៥:៦)

- នាវអ៝ត់នូយ្សតានាវជេរជ៝ត់ នទ្រែលមានាវមឞើសឆើម (៥:៧-២០)

នាវអោបអ្វែសលាង់

1 គ៝ប់យាកើ អីឞូនុយ្សឆើមកើលជានការមា*កោរាញឞ្រាស នទ្រែលមាឆើមកើលជានការមាកោរាញយេឆូក្រីស ។ គ៝ប់ទាន់អោបនាវអ្វែសលាង់ទឹងលែៈផូងប៝នលានកោរាញឞ្រាស†អីគុចាសច្រាយលាមនែសនតូអ្យា។*

នាវរាល៝ង នទ្រែលមានាវនទើម

2 អើអ៝សនោតានាវញឆីង លាសខាន់អៃមៃគែសនាវជេរជ៝ត់អាប់នតីល អ៝ន់ខាន់អៃមៃកើបនាវអីនៃជេងនទើរាម់មអាកហោងាន់ហ៝ៈ។* 3 ខាន់អៃមៃលែៈគឹតជេស នាវជេរជ៝ត់អាប់នតីលជេងនាវរាល៝ងអ្វាញ់តានាវញឆីងខាន់អៃមៃ យ៝រលាសតាៈឞើសនាវរាល៝ងអ្វាញ់អីនៃ ទឹងខាន់អៃមៃលើមាឞ្លាវអ៝ត់នូយ្ស។ 4 អ៝ន់ខាន់អៃមៃឞ្លាវអ៝ត់នាវជេរជ៝ត់កើតនៃ គៃមាខាន់អៃមៃគុន៝ប់តានាវញឆីងលែៈតឹមទីកែសងាន់ មោហោមអោសគែសនាវមានទុយ្ស។ 5 តាផូងខាន់អៃមៃ ឞូម៝សអីមោលាង់គែសនាវមឹនគឹតឞ្លាវ អ៝ន់ទាន់ហ៝ម់មាកោរាញឞ្រាស ពាង់មរាអ៝ន់រ៝ យ៝រលាសពាង់អីអ៝ន់មាទឹងលែៈឞូនុយ្សមានូយ្សនហ៝ម់ល៝ង់ ពាង់មោអោសនទុយ្សយ៝រមាទាន់‌* 6 យើនមាអ្យាត់មាឞូនុយ្សអីនៃទាន់មានាវញឆីងន៝ប់ លើយអោសមឹនលាសយ៝ង់មាគែស យ៝រលាសឞូម៝សអីហោមគែសនូយ្សនហ៝ម់មឹនកើតនៃជេងតឹមឞានមាញច៝ច់ទាកវាច់ទាកវារ់តឹងឆ្យាលខោម។* 7 ឞូនុយ្សអីកើតនៃលើយអោសមឹនគែសឆ៝ៈទើននទើឞើសកោរាញឞ្រាស‌ 8 យ៝រលាសគែសនូយ្សនហ៝ម់ឞារ មោគែសន៝ប់អោសតាទឹងលែៈនទើអីពាង់ជានពាង់មឹន។

9 អ៝សនោតានាវញឆីងអីអ៝អាច អ៝ន់ខាន់អៃមៃរាម់មអាកហ៝ម់ យ៝រលាសកោរាញឞ្រាសលែៈកើបខាន់អៃមៃខ្លៃ។* 10 អ៝សនោតានាវញឆីងអីនទ្រ៝ង់អ៝ន់ខាន់អៃមៃរាម់មអាកតឹមឞានដ៝ង់ លាសខាន់អៃមៃគឹតវ៝ត់ទ្រាប់នទើអីខាន់អៃមៃលែៈគែស មោអោសគែសនាវខ្លៃតាកោរាញឞ្រាស យ៝រលាសខាន់អៃមៃមរារ៝សតឹមឞានមាកាវឆីឞ្រីដ៝ង់។* 11 ត៝ត់ទោសនារ អីតើមកាវឆីឞ្រីអីនៃនទ្រ៝ អីកាវពាង់រុង ជេសរីនាវអ្វែសតាពាង់ក៝ៈមោហោមគែសអោស។ កើតនៃដ៝ង់ឞូនុយ្សនទ្រ៝ង់មរាខឹតរ៝សនទ្រែលមានទើអីពាង់ជាននៃ។

12 អ្វែសមអាកងាន់មាឞូម៝សអីគុន៝ប់ ឞ៝លលាសគែសនាវជេរជ៝ត់អាប់នតីលកាដោយ យ៝រលាសលោចជេសនាវអីនៃ កោរាញឞ្រាសមរាអ៝ន់នទើងខោម‡មាឞូនុយ្សអីនៃ ជេងនាវរេសនហ៝រ៝ អីកោរាញឞ្រាសលែៈត៝នជេសមាឞូម៝សអីរ៝ង់មាពាង់នើម។*

13 នោកខាន់អៃមៃម៝ប់មានាវនទើម លើយអោសលាស៖ “កោរាញឞ្រាសនទើមគ៝ប់ជានអ្យើស” យ៝រលាសមោគែសអោសទូនតីលនទើទើយនទើមកោរាញឞ្រាសជានអ្យើស ជេសរីកោរាញឞ្រាសក៝ៈមោដ៝ង់នទើមឞូនុយ្សជានអ្យើស។* 14 ទឹងលែៈឞូនុយ្សគែសម៝ប់នាវនទើម យ៝រមាឞ៝ន់គែសនូយ្សនហ៝ម់កើញហោអីរលែវឞ៝ន់ជានតីស។* 15 ទឹងលែៈនាវជានតីសជេងតឹមឞានមានាវគុរេសឞូនុយ្ស ឞើសនតើមនើសគែសនាវកើញមាជានតីសទើម នាវអីនៃតឹមឞានមានតើមគែសក៝នតាឞូអូរមហែរ៝សខៃ ត៝ត់មាជានតីសងាន់តឹងនាវកើញអីនៃ តឹមឞានមាត៝ត់ក៝នអីនៃទែសដ៝ង់។ ជេសរីងគ្លែៈទុតតាៈឞើសនាវតីសអីនៃកោរាញឞ្រាសតេៈទោយ្សគុតានទ្រូងអុញនហ៝រ៝ ជេងតឹមឞានមាខឹតឆាក់§។

16 អើអ៝សនោតានាវញឆីងអីគ៝ប់រ៝ង់ លើយអោសមរោសអេងខាន់អៃមៃនើម។ 17 ទឹងលែៈនទើអ្វែស ទឹងលែៈនទើអីអ្វែសមោហោមអោសឞ្លាវនតឹតអីឞ៝ន់ឆ៝ៈទើន ទឹងលែៈនទើអីនៃជេងតាៈឞើសកោរាញឞ្រាសអីឞឹឞ៝ន់អីនាក់ញជេងទឹងលែៈនទើអាងតាកាលើត្រោកនើស។ នាវអាងអីនៃឞ្លាវរាគ៝ល់ គូយនាវអាងអីនៃហោមឞ្លាវរាគ៝ល់ដ៝ង់ យើនមានូយ្សនហ៝ម់កោរាញឞ្រាសមោអោសឞ្លាវរាគ៝ល់ ដេៈមោអើម។* 18 តាៈឞើសនាវពាង់នើមអុច នអ៝ប់មាឞ៝ន់ញឆីងមានាវនតីអីងាន់ ពាង់ជានអ៝ន់ឞ៝ន់ជេងក៝នពាង់នើម ពាង់អុចឞ៝ន់ជេងនទើទុតខ្លៃរាលាវមាទឹងលែៈនទើពាង់ញជេង ឞ៝ន់តឹមឞានមាព្លៃឞោកទាកអីគែសញហើរល៝រ អេល៝រមាពែៈទឹងលែៈព្លៃអាបាៈអេង។*

នាវអ្យាត់មាតោរទើម នទ្រែលមានាវជានតឹងនាវវៃកោរាញឞ្រាស

19 អើអ៝សនោតានាវញឆីងអីគ៝ប់រ៝ង់ អ៝ន់ខាន់អៃមៃជេងឞូនុយ្សគឹតឞ្លាវទាទេ អ៝ន់ខាន់អៃមៃញឆ្រោយ្សអ្យាត់ហ៝ម់ លើយគើញងើយ លើយអោសគើញនូយ្ស‌* 20 យ៝រលាសនាវជីនូយ្សឞូនុយ្សមោអោសលែវតានាវគុងាវឆ៝ង់អីកោរាញឞ្រាសអុច។ 21 លាសនទ្រីអ៝ន់ខាន់អៃមៃមអារ់លើយហ៝ម់ទឹងលែៈនាវបឹបើចអាប់នតីល ទឹងលែៈនទើអ្យើសអាប់នតីលតានាវគុងាវខាន់អៃមៃ ជេសរីឆ៝ៈទើនអ្យាត់នាវនតីមាលែៈនូយ្សនហ៝ម់ហ៝ៈអីកោរាញឞ្រាសលែៈតេៈតានូយ្សនហ៝ម់ឞ៝ន់អីគែសនាវទើយលែវខាន់អៃមៃគែសនាវរាក្លាយ្សឞើសនាវកោរាញឞ្រាសតេៈទោយ្ស។*

22 អ៝ន់ខាន់អៃមៃជានតឹងនាវនតីអីនៃហ៝ម់ លើយអោសអ្យាត់មាតោរទើម យ៝រលាសឞូម៝សអីអ្យាត់មាតោរទើមជេងមរោសអេងឆាក់ពាង់នើម លាសពាង់លាសឆាក់ពាង់នើមលែៈគែសរាក្លាយ្ស។* 23 លាសឞូម៝សអីអ្យាត់មាតោរទើមនាវកោរាញឞ្រាស ជេសរីមោអោសជានតឹងកើត ពាង់អីនៃជេងតឹមឞានមាឞូនុយ្សអីអ្វាញ់មុសមាត់ពាង់នើមតានទើអ្វាញ់មុសមាត់‌ 24 ជេសអ្វាញ់ ពាង់ហាន់ទូឞើសនតុកនៃ ជេសរីច្វេលរ៝មុសមាត់ពាង់នើម។ 25 នាវវៃកោរាញឞ្រាសទុតអ្វែសងាន់ ជេងនាវវៃអីអ៝ន់ឞូនុយ្សជេងក៝នមែតឹមឞានមាបើកឞើសនាវជានទឹកឞូ។ ឞូម៝សអីទើនអ្យាត់មាតោរទើម ជេសរីច្វេល មោអោសគែសនាវអ្វែសមអាក យើនមាឞូម៝សអីមឹនមានាវវៃអីនៃ ជេសរីញឆ្រោយ្សជានតឹងកើត ពាង់អីនៃគែសនាវអ្វែសមអាកងាន់មាទឹងលែៈនទើពាង់ជាន។* 26 យើនមាឞូម៝សអីកើបអេងឆាក់ពាង់នើមជានតឹងនាវវៃកោរាញឞ្រាសងាន់ តីសមាមោអោសញជ្រាង់មព្យាត់ទាសមាងើយ ពាង់អីនៃជេងឞូនុយ្សមរោសអេងឆាក់ពាង់នើមទើម ជេសរីនាវពាង់ជានតឹងនាវវៃអីនៃមោដ៝ង់គែសនាវខ្លៃ។* 27 នទើជានអីក្ល៝សអីអ្វែសតានាប់មាត់កោរាញឞ្រាសអីឞឹឞ៝ន់ជេងកើតនអា៖ ហាន់កើលឞូនុយ្សក៝នដើយ នទ្រែលមាឞូអូរនទ្រោអីគែសនាវជេរជ៝ត់ នអ៝ប់មាឞ្លាវញជ្រាង់ឆាក់មោអោសជាននទើអ្យើសតឹងឞូនុយ្សអីមោញឆីងមាកោរាញឞ្រាសតានែសនតូអ្យា។*

*1:1 ១:១៖ «ឞូនុយ្សឆើមកើលជានការមា» មោលាស «ទឹក»។

†1:1 ១:១៖ «ផូងប៝នលានកោរាញឞ្រាស» មោលាស «ផូងអីញឆីងមាឞ្រាសក្រីស តារាន៝យទែស ១២ មពោលតាផូងអីឆ្រាអែល »។

*1:1 ១:១៖ ការ ១៥:១៣

*1:2 ១:២-៤៖ ការ ៥:៤១; ២តម ៣:១២; ១ពេ ១:៦-៧; ៤:១២-១៣

*1:5 ១:៥៖ នហ ១:៧; ២:២-៦

*1:6 ១:៦-៨៖ មថ ៧:១១; មក ១១:២៤; យហ ១៥:៧

*1:9 ១:៩៖ យាក ២:៥

*1:10 ១:១០-១១៖ មថ ៦:១៩-២១; លក ១២:១៥-២១; ១តម ៦:១៧-១៩; ១ពេ ១:២៤; នម ៣៩:៥-៧

‡1:12 ១:១២៖ «នទើងខោម» មោលាស «មោកកាដាច់នាវរេស»។

*1:12 ១:១២៖ ១កោ ៩:២៤-២៧; ផល ៣:១២-១៤; កោល ២:១៨; ១ពេ ៥:៤

*1:13 ១:១៣៖ ១កោ ១០:១៣

*1:14 ១:១៤-១៥៖ មក ៧:២០-២៣; ១យហ ២:១៦-១៧

§1:15 ១:១៥៖ ត្រ៝ងអ្យាមោអោសទីងើយមាឞូអូរនត្រែវអេងមោគែសឆាយ។

*1:17 ១:១៧៖ ១តម ៦:១៦; ១យហ ១:៥; នតម ២២:៥

*1:18 ១:១៨៖ ២កោ ៥:១៧

*1:19 ១:១៩-២០៖ នហ ២៩:២០; មថ ៥:២១-២៦; ១២:៣៦; អេផ ៤:២៦

*1:21 ១:២១៖ អេផ ៤:២៩-៣២; កោល ៣:៨; ១ពេ ២:១

*1:22 ១:២២-២៤៖ មថ ៧:២១-២៣; រម ២:១៣; អេផ ២:១០

*1:25 ១:២៥៖ យាក ២:១២

*1:26 ១:២៦៖ ១ពេ ៣:១០

*1:27 ១:២៧៖ ១តម ៥:៣; នង ២២:២១-២២