នាវកោរាញឞ្រាសងើយតានាវងើយឞូន៝ង យោហាន ៦

៦

ឞ្រាសយេឆូ ពាៈនុមពាង់អ៝ន់មា ៥០០០ នុយ្ស

(មថ ១៤:១៣-២១; មក ៦:៣០-៤៤; លក ៩:១០-១៧)

១ ជេសរីឞ្រាសយេឆូ ហាន់គ្លាត់កាល់តីងលៅក្វ៝ង់កាលីលេ អីឞូក្វាល់ដ៝ង់ទាកងលៅតីបេរៀស ។ ២ គែសឞូនុយ្សផូងអ៝ក់ងាន់ហាន់តឹងពាង់នឹង យ៝រមាឆៃនាវខ្លៃពាង់ជានឞាសឞូនុយ្សជីក្វែតនើស។ ៣ ឞ្រាសយេឆូ ហាវតាយោកនទ្រែលមពោលអ៝សម៝នពាង់គុរើបគើបតានៃ។ ៤ នោកនៃនាវញេតបុននហ៝តផូងអីឆ្រាអែល លែៈឞើយត៝ត់។* ៥ ឞ្រាសយេឆូ ងើកមាត់ឆៃផូងប៝នលានអ៝ក់ងាន់ហាន់តាពាង់ ជេសរីពាង់លាសមាផីលីប ៖ “អាសនតុកឞ៝ន់រាវាត់នទើឆោងឆាមាអ៝ន់ផូងប៝នលានអីនៃឆា?”* ៦ ទឹងឞ្រាសយេឆូ អោបផីលីប កើតនៃ គៃមារាល៝ងផីលីប យ៝រលាសពាង់លែៈអើមគឹតជេសម៝សនទើពាង់អុចជាន។ ៧ ផីលីប អើសមាឞ្រាសយេឆូ ៖ “ឞ៝លលាសឆ៝ៈព្រាក់ ២០០ ព្រាក់កាក់*រាវាត់នុមពាង់អ៝ន់ខាន់ពាង់ឆាមោត៝ង់អោស ឞ៝លលាសតឹមពាៈដេៈៗកាដោយមោអាប់ឞូនុយ្សដ៝ង់”។ ៨ គែសទូហ្វេអ៝សម៝នរាញាអ៝ន់ទ្រេ អីអ៝សពេត្រោស † មឞើសមាឞ្រាសយេឆូ ៖* ៩ “តាអ្យាគែសទូហ្វេក៝នឆែឞូក្លោ ពាង់គែសព្រាម់មល៝ម់នុមពាង់‡ នទ្រែលមាឞារមល៝ម់កាជេៈ។ យើនមាលាសគែសទូនៃទើម គឹតមាត៝ង់លាសឞូនុយ្សទុតអ៝ក់អ្យា?”* ១០ ឞ្រាសយេឆូ លាស៖ “មឞើសអ៝ន់ខាន់ពាង់គុ”។ តានតុកនៃគែសអ៝ក់រេបញឆែ ជេសរីខាន់ពាង់លែវឞាល់គុរើបគើបតារេបអីនៃ។ អ៝ក់ឞូនុយ្សក្លាប់លាស ៥០០០ នុយ្ស កើបផូងឞូក្លោទើម។ ១១ ឞ្រាសយេឆូ ឆ៝ៈនុមពាង់អីនៃ លាសអ្វែសមាកោរាញឞ្រាស ជេសរីពាៈអ៝ន់មាទឹងលែៈឞូនុយ្សគុតានៃ ពាង់ពាៈកាជេៈកើតនៃដ៝ង់ ទាសខាន់ពាង់នើមអុច។ ១២ ត៝ត់លែៈហើមខាន់ពាង់ឆា ឞ្រាសយេឆូ លាសមាមពោលអ៝សម៝នពាង់៖ “ខាន់មៃហាន់រាគូមនុមពាង់អីរាមែសតាៈឆា លើយអោសអ៝ន់រ៝សដេៈ”។ ១៣ ជេសរីមពោលអ៝សម៝នហាន់រាគូមនុមពាង់រាមែសតាៈឆាព្រាម់មល៝ម់នុមពាង់អីផូងប៝នលានឆានៃនើសគែស ១២ ឆាសឞេងៗ។ ១៤ ត៝ត់មាផូងប៝នលានឆៃនាវខ្លៃឞ្រាសយេឆូ ទែជានអីនៃ ខាន់ពាង់តឹមលាស៖ “ពាង់អីនៃងាន់រ៝ឞូនុយ្សនតើយ្សនាវងើយកោរាញឞ្រាសអីមោឆេ លែៈញចីសកាល់អែនើស៖ «ពាង់មរាវាច់តានែសនតូអ្យា»”។* ១៥ ជេសរីផូងប៝នលានគែសនាវមឹនអុចញច៝ប់ឞ្រាសយេឆូ ជានកាដាច់។ ពាង់គឹតនាវមឹនខាន់ពាង់នៃ នទ្រីទឹងពាង់ទូលោសឞើសនតុកនៃហាវតៃតាកាលើយោកគុទូហ្វេអេង។*

ឞ្រាសយេឆូ ឞ្រោៈតាកាលើទាក

(មថ ១៤:២២-៣៤; មក ៦:៤៥-៥២)

១៦ ត៝ត់ឞ្រីលែៈកេងមាង់ មពោលអ៝សម៝នឞ្រាសយេឆូ ហាន់ជុរអាទាកងលៅក្វ៝ង់។ ១៧ ត៝ត់ត្រោកលែៈង៝ អេហ៝ៈអោសឆៃឞ្រាសយេឆូ ហាន់តាខាន់ពាង់។ ជេសរីខាន់ពាង់ហាវញច៝ទូកហាន់តាប៝នកាពើនិម កាល់តីទាករី។* ១៨ គែសឆ្យាលផុតទុតហោ ជេសរីទាករាឞុសទុតទាង់។ ១៩ ត៝ត់ខាន់ពាង់វាសទូកលែៈងាយក្លាប់លាសគែសព្រាម់ព្រាវកីលោមែត ឆៃឞ្រាសយេឆូ ឞ្រោៈតាកាលើទាកនៃ ហាន់ទាច់ជឹតទូកអ្យា ខាន់ពាង់ក្លាចញឆ៝រ់ទុតហោងាន់។ ២០ ឞ្រាសយេឆូ លាសមាខាន់ពាង់៖ “គ៝ប់យា លើយតាក្លាចអោស”។ ២១ ជេសនៃមពោលអ៝សម៝នអុចរ៝មពាង់ញច៝តាកាលើទូកនៃ ជេសរីទោមាត៝ត់កាល់តីទាករ៝តានតុកខាន់ពាង់អុចហាន់នៃ។

ឞ្រាសយេឆូ ជេងនុមពាង់នាវរេស

២២ ត៝ត់អោយតៃផូងប៝នលានហោមគុតានតុកខាន់ពាង់ឆានុមពាង់នើស មោវ៝ត់អោសមោឆៃឞ្រាសយេឆូ យ៝រលាសអាមាង់នើសទើនគែសទូមល៝ម់ទូកមពោលអ៝សម៝នញច៝ទើម មោដ៝ង់ឆៃឞ្រាសយេឆូ ញច៝នទ្រែលមពោលអ៝សម៝នពាង់តាទូកអីនៃ។ ២៣ ជេសរីគែសទូកអាបាៈតាៈឞើសប៝នតីបេរៀស ញឆ្រុងទាច់កេងនតុកផូងខាន់ពាង់ឆានុមពាង់ជេសឞ្រាសយេឆូ លាសអ្វែសមាកោរាញឞ្រាសរីនើស។* ២៤ នោកផូងប៝នលានអ្វាញ់មោអោសឆៃឞ្រាសយេឆូ នទ្រែលមាមពោលអ៝សម៝នតានៃ ផូងខាន់ពាង់លែវឞាល់ញច៝ទូកហាន់តាប៝នកាពើនិម គៃមាតឹងជ៝យឞ្រាសយេឆូ ។* ២៥ ត៝ត់មាឆៃឞ្រាសយេឆូ មពែសកាល់តីទាករី ខាន់ពាង់អោបឞ្រាសយេឆូ ៖ “ហើយនើមនតី ទាសអើមត៝ត់មៃតាអ្យានើសមេស?” ២៦ ឞ្រាសយេឆូ លាសមាខាន់ពាង់៖ “គ៝ប់លាសនហេលនានេៈងាន់មាខាន់អៃមៃ ខាន់អៃមៃតឹងជ៝យគ៝ប់ មោគែសអោសយ៝រមាខាន់អៃមៃលែៈឆៃនអ៝ប់មាគឹតវ៝ត់នាវខ្លៃ។ ខាន់អៃមៃតឹងជ៝យគ៝ប់ យ៝រមាខាន់អៃមៃលែៈហើមឆានុមពាង់នៃនើសទើម។ ២៧ លើយអោសជានការគៃមាគែសនទើឆោងឆាអីឞ្លាវអោម ជានហ៝ម់ការគៃមាគែសនទើឆោងឆាហោមនហ៝រ៝ នទ្រែលមាអ៝ន់នាវរេសនហ៝រ៝ ជេងនទើឆោងឆាគ៝ប់អីក៝នឞូនុយ្សតាៈឞើសកោរាញឞ្រាសអ៝ន់មាខាន់អៃមៃ យ៝រលាសកោរាញឞ្រាសអីឞឹគ៝ប់អ៝ន់នាវទើយមាគ៝ប់ជាន”។* ២៨ ខាន់ពាង់អោបឞ្រាសយេឆូ ៖ “លាសនទ្រីមើមហេនជាន គៃមាជានការកោរាញឞ្រាសអុចរីមេស?” ២៩ ឞ្រាសយេឆូ លាសមាខាន់ពាង់៖ “អ៝ន់ខាន់អៃមៃញឆីងមាគ៝ប់អីនើមកោរាញឞ្រាសទែលែៈញជ្វាល់អ៝ន់វាច់ អីនៃជេងនាវជានការពាង់អុច”។* ៣០ ខាន់ពាង់អោបតៃឞ្រាសយេឆូ ៖ “លាសនទ្រីម៝សនទើនាវខ្លៃមៃជានអ៝ន់ហេនគឹតឆៃ គៃមាហេនញឆីងមាមៃ? ម៝សបាៈនទើមៃជានមេស?* ៣១ ផូងអូចែឞ៝ន់លែៈជេសឆានទើឆោងឆាអីរាញា«មានា »តាឞ្រីរាទាស ជេងទីដាសនាវកោរាញឞ្រាសងើយ៖ «មោឆេ §អ៝ន់នទើឆោងឆាមានា តាៈឞើសកាលើត្រោកខាន់ព្រែមាឆា»†”។* ៣២ ឞ្រាសយេឆូ លាស៖ “គ៝ប់លាសនហេលនានេៈងាន់មាខាន់អៃមៃ មោគែសអោសមោឆេ អ៝ន់នុមពាង់តាៈឞើសកាលើត្រោកអីនៃ អីងាន់ឞឹគ៝ប់អ៝ន់។ ជេសរីអាបៃអ្យាពាង់អុចអ៝ន់មាខាន់អៃមៃនុមពាង់តាៈឞើសកាលើត្រោកអីជេងនុមពាង់ងាន់ងេន។ ៣៣ នុមពាង់អីកោរាញឞ្រាសទែអ៝ន់អាបៃអ្យានៃ ជេងនើមជុរតាៈឞើសកាលើត្រោកអីនតុកកោរាញឞ្រាស គៃមាអ៝ន់នាវរេសនហ៝រ៝មាទឹងលែៈឞូនុយ្សតានែសនតូអ្យា”។ ៣៤ ខាន់ពាង់លាសមាឞ្រាសយេឆូ ៖ “អើកោរាញ ទាន់នុមពាង់អីមៃងើយអីរីអ៝ន់មាហេនមរ៝មរាង់អើ”។*

៣៥ ឞ្រាសយេឆូ លាស៖ “គ៝ប់អ្យាជេងតឹមឞានមានុមពាង់អីអ៝ន់នាវរេស*។ ឞូម៝សតឹងជ៝យគ៝ប់មោហោមអោសជីង៝ត ឞូម៝សញឆីងមាគ៝ប់មោហោមដ៝ង់ជីហីរ។* ៣៦ យើនមាលែៈគ៝ប់មឞើសមាខាន់អៃមៃ៖ «ខាន់អៃមៃលែៈឆៃគ៝ប់ តីសមាហោមមោញឆីងមាគ៝ប់»។ ៣៧ ឞូម៝សលែៈឞឹគ៝ប់ទែអ៝ន់មាគ៝ប់ ហាន់រានអាគ៝ប់រ៝ ជេសរីឞូម៝សហាន់រានអាគ៝ប់ នហេលនានេៈងាន់គ៝ប់មោអោសនត្រុតពាង់។* ៣៨ គ៝ប់ជុរតាៈឞើសកាលើត្រោកអីនតុកកោរាញឞ្រាសនើស គៃមាជានតឹងនាវកោរាញឞ្រាសអុចនើមតើមញជ្វាល់អ៝ន់គ៝ប់វាច់ គ៝ប់មោអោសវាច់គៃមាជានតឹងនាវគ៝ប់នើមអុច។* ៣៩ អ្យានាវអុចកោរាញឞ្រាសនើមតើមញជ្វាល់គ៝ប់វាច់៖ ទឹងលែៈឞូនុយ្សអីពាង់អ៝ន់មាគ៝ប់ពាង់អុចគ៝ប់អ៝ន់ទ៝ក់រេសតៃត៝ត់នារងគ្លែៈទុតតៃ ពាង់ដាៈគ៝ប់លើយតាអ៝ន់រ៝សខាន់ពាង់ ទូហ្វេមោអើម។* ៤០ អ្យានាវអុចឞឹគ៝ប់៖ ឞូម៝សឆៃគ៝ប់អីក៝នពាង់ ជេសរីញឆីងមាគ៝ប់ គែសនាវរេសនហ៝រ៝។ ជេសរីគ៝ប់ជានឞូនុយ្សអីនៃអ៝ន់ទ៝ក់រេសតៃត៝ត់នារងគ្លែៈទុត”។

៤១ តានៃមពោលកោរាញផូងអីឆ្រាអែល គែសនាវងើយអ៝ក់ឞ៝រ់ញជ៝រ់ឆេកមាឞ្រាសយេឆូ យ៝រមាតាង់នាវពាង់លាស៖ “គ៝ប់ជេងនុមពាង់ជុរតាៈឞើសកាលើត្រោកនតុកកោរាញឞ្រាស”។ ៤២ ខាន់ពាង់តឹមលាស៖ “អើមមោទីលាសពាង់អីនៃរាញាយេឆូ ហ្យាស? ពាង់ក៝នយោឆែប មេៈឞឹពាង់លែៈឞ៝ន់នាល់ដ៝ង់។ មើមទឹងពាង់លាសអេងឆាក់ពាង់នើមជុរតាៈឞើសកាលើត្រោកនតុកកោរាញឞ្រាស?”* ៤៣ ឞ្រាសយេឆូ លាសខាន់ពាង់៖ “ខាន់មៃលើយហោមអោសងើយអ៝ក់ឞ៝រ់ញជ៝រ់ឆេកនទ្រាង់ខាន់មៃនើម! ៤៤ មោគែសអោសទូហ្វេឞូនុយ្សហាន់វាច់តាគ៝ប់ លាសឞឹគ៝ប់នើមតើមញជ្វាល់គ៝ប់មោលែវពាង់វាច់តាគ៝ប់។ ជេសរីគ៝ប់ជានអ៝ន់ពាង់ទ៝ក់រេសតៃត៝ត់នារងគ្លែៈទុត។ ៤៥ ទូហ្វេឞូនុយ្សនតើយ្សនាវងើយកោរាញឞ្រាសលែៈញចីសជេសកាល់អែនើស៖ «ទឹងលែៈឞូនុយ្សកោរាញឞ្រាសនើមមរានតុមនតីទាទេ»†។ ឞូម៝សតាង់នាវឞឹគ៝ប់ ជេសរីឆ៝ៈទើននាវពាង់នតុមនតី ឞូនុយ្សអីនៃហាន់រានអាគ៝ប់ដ៝ង់។* ៤៦ មោគែសអោសទូហ្វេឞូនុយ្សលែៈឆៃឞឹគ៝ប់។ គែសនើមអីកោរាញឞ្រាសញជ្វាល់អីនៃ នើមអីនៃទើមលែៈឆៃកោរាញឞ្រាស។* ៤៧ គ៝ប់លាសនហេលនានេៈងាន់មាខាន់មៃ៖ ឞូម៝សញឆីងមាគ៝ប់ ពាង់អីនៃគែសនាវរេសនហ៝រ៝។* ៤៨ គ៝ប់អ្យានុមពាង់អ៝ន់នាវរេស។ ៤៩ ផូងអូចែខាន់មៃឆានទើឆោងឆាមានា នោកគុតាឞ្រីរាទាស យើនមាទឹងលែៈខាន់ពាង់ខឹតលែៈផ្យៅដ៝ង់។* ៥០ ល៝ង់នុមពាង់នាវគ៝ប់ងើយអ្យា ជេងនុមពាង់ជុរតាៈឞើសកាលើត្រោកនតុកកោរាញឞ្រាស។ ឞូម៝សឆា† ពាង់អីនៃមោខឹតអោស។ ៥១ គ៝ប់អីអ្យានុមពាង់អ៝ន់នាវរេសជុរតាៈឞើសកាលើត្រោកនតុកកោរាញឞ្រាស។ ឞូម៝សឆានុមពាង់អីអ្យា គែសនាវរេសនហ៝រ៝។ នុមពាង់អ្យា ជេងឆាក់ជាន់គ៝ប់នើមខឹតឆើមនតាង គៃមាអ៝ន់ទឹងលែៈឞូនុយ្សតានែសនតូអ្យាគែសនាវរេស”។* ៥២ មពោលកោរាញផូងអីឆ្រាអែល តឹមរាលាច់ហោងាន់ ខាន់ពាង់តឹមលាស៖ “មើមទឹងឞូនុយ្សអីនៃពាង់ឞ្លាវអ៝ន់ឞ៝ន់ឆាឆាក់ជាន់ពាង់នើម?”

៥៣ ឞ្រាសយេឆូ លាស៖ “គ៝ប់លាសនហេលនានេៈងាន់មាខាន់មៃ លាសខាន់មៃមោអោសឆាឆាក់ជាន់គ៝ប់អីក៝នឞូនុយ្សតាៈឞើសកោរាញឞ្រាស នទ្រែលមាមោអោសញេតមហាមគ៝ប់ ខាន់មៃមោអោសគែសនាវរេស។‡* ៥៤ ឞូម៝សឆាឆាក់ជាន់គ៝ប់ នទ្រែលមាញេតមហាមគ៝ប់ ពាង់អីនៃគែសនាវរេសនហ៝រ៝ ជេសរីត៝ត់នារងគ្លែៈទុតតៃគ៝ប់ជានអ៝ន់ពាង់ទ៝ក់រេសតៃដ៝ង់។ ៥៥ យ៝រលាសឆាក់ជាន់គ៝ប់ជេងនទើឆោងឆាងាន់ងេន នទ្រែលមាមហាមគ៝ប់ជេងនទើញេតងាន់ងេនដ៝ង់។ ៥៦ ឞូម៝សឆាឆាក់ជាន់គ៝ប់ នទ្រែលមាញេតមហាមគ៝ប់ ពាង់អីនៃគុតាគ៝ប់នឹង ជេសរីគ៝ប់គុតាពាង់អីនៃដ៝ង់។* ៥៧ ឞឹគ៝ប់នើមអីតើមនាវរេស ពាង់ញជ្វាល់គ៝ប់វាច់តាអ្យា។ គ៝ប់រេសយ៝រតាៈឞើសពាង់ តឹមឞានដ៝ង់ឞូម៝សឆាឆាក់ជាន់គ៝ប់ ឞូនុយ្សអីនៃរេសយ៝រតាៈឞើសគ៝ប់។ ៥៨ គ៝ប់អ្យានុមពាង់ជុរតាៈឞើសកាលើត្រោកនតុកកោរាញឞ្រាស ឞូម៝សឆានុមពាង់អ្យាគែសនាវរេសនហ៝រ៝។ នុមពាង់អីអ្យាមោទីអោសកើតនុមពាង់ផូងអូចែខាន់មៃឆាតាឞ្រីរាទាសនើស ខាន់ពាង់ឆា ជេសរីហោមខឹតលែៈផ្យៅ”។* ៥៩ ឞ្រាសយេឆូ ងើយទឹងលែៈនាវអីនៃ ទោលពាង់គុនតីឞូតាញីសរាបុនផូងអីឆ្រាអែល តាប៝នកាពើនិម ។

៦០ លោចជេសនាវឞ្រាសយេឆូ នតីនៃ គែសអ៝ក់អ៝សម៝នពាង់ តឹមលាស៖ “ទឹងលែៈនាវនតីអីនៃជេរងាន់ មោគែសអោសឞូនុយ្សឞ្លាវឆ៝ៈទើន”។ ៦១ យើនមាឞ្រាសយេឆូ លែៈគឹតម៝សនទើអ៝សម៝នពាង់ងើយអ៝ក់ឞ៝រ់ញជ៝រ់ឆេក ពាង់លាស៖ “លាសនទ្រីទឹងលែៈនាវអីនៃ ជានអ៝ន់ខាន់អៃមៃរ៝សនាវញឆីងមាគ៝ប់ឞើស? ៦២ លាសនទ្រីមើមខាន់អៃមៃមឹន លាសខាន់អៃមៃឆៃគ៝ប់អីក៝នឞូនុយ្សតាៈឞើសកោរាញឞ្រាសហាវឆឹតគុតានតុកគ៝ប់គុអាល៝រនើស?* ៦៣ ឞ្រាសហ្វេងអ្វែសអ៝ន់គែសនាវរេសនហ៝រ៝ នទើឞូនុយ្សជានតានែសនតូអ្យាមោអោសកើលមានាវរេសនហ៝រ៝។ ទឹងលែៈនាវគ៝ប់នតីមាខាន់អៃមៃអីនៃ តាៈឞើសឞ្រាសហ្វេងអ្វែស ជេសរីអ៝ន់គែសនាវរេសនហ៝រ៝។* ៦៤ យើនមាគែសឞូនុយ្សអាបាៈតាផូងខាន់អៃមៃមោអោសញឆីងមាគ៝ប់”។ ឞ្រាសយេឆូ ងើយនទ្រី យ៝រមាពាង់លែៈអើមគឹតឞើសនតើមឞូម៝សមោញឆីងមាពាង់ ឞូម៝សទូហ្វេឞូនុយ្សរាលាង់មាពាង់។* ៦៥ ឞ្រាសយេឆូ លាសតៃ៖ “កើតនទ្រីទឹងគ៝ប់លែៈមឞើសមាខាន់អៃមៃ លាសឞឹគ៝ប់មោអ៝ន់អោស មោគែសអោសឞូនុយ្សហាន់វាច់តាគ៝ប់ ទូហ្វេមោអើម”។

៦៦ តានៃគែសអ៝ក់ឞូនុយ្សតាមពោលអ៝សម៝នពាង់នៃនតើមព្លឹជឹតកើយ មោហោមតឹងពាង់។ ៦៧ នទ្រីទឹងឞ្រាសយេឆូ អោប ១២ នុយ្សមពោលកោរាញអ៝សម៝ន៖ “អាសខាន់មៃអុចទូឞើសគ៝ប់ដ៝ង់?”* ៦៨ ឆីមោន អីឞូក្វាល់ពេត្រោស ដ៝ង់អើសមាពាង់៖ “អើកោរាញ ហេនមោហោមអោសគែសឞូនុយ្សអេងដ៝ង់។ នាវមៃងើយអ៝ន់ហេនគែសនាវរេសនហ៝រ៝។ ៦៩ ហេនលែៈញឆីងមាមៃ ហេនលែៈគឹតមៃអីនើមក្ល៝សអ្វែសឞ្រាសក្រីស តាៈឞើសកោរាញឞ្រាស”។ ៧០ ឞ្រាសយេឆូ លាសមាខាន់ពាង់៖ “គ៝ប់លែៈកើយ្សជេសខាន់មៃ ១២ នុយ្ស តីសមាគែសទូហ្វេតាមពោលខាន់មៃជេងឞូនុយ្សកោរាញមពោលឞ្រាសអ្យើស”។* ៧១ ឞ្រាសយេឆូ អុចងើយមាយូដាស ក៝នឆីមោន-អីឆាការីយោត យ៝រលាសតា ១២ នុយ្សមពោលកោរាញអ៝សម៝ននៃ គែសទូហ្វេពាង់នូយ្សតាន៝ម់នហ៝ម់កាលើមាឞ្រាសយេឆូ ។

*៦:៤ ៦:៤៖ យហ ២:១៣; ១១:៥៥

*៦:៥ ៦:៥៖ យហ ១:៤៣-៤៤

*៦:៧ ៦:៧៖ «២០០ ព្រាក់កាក់» មោលាស «២០០ ដេនារី »។ ទូកាក់ដេនារី តឹមឞានមាខ្លៃឞូងខោមជានការទូនារ។

†៦:៨ ៦:៨៖ មោលាស «ឆីមោន អីឞូក្វាល់ពេត្រោស ដ៝ង់»។

*៦:៨ ៦:៨៖ យហ ១:៤០

‡៦:៩ ៦:៩៖ នតីលនុមពាង់តាអ្យាជេងនតីលនុមពាង់អីឞូជានមាទូនតីលឞាព្រាង់ អីថ៝ក។

*៦:៩ ៦:៩៖ ២កក ៤:៤២-៤៣

*៦:១៤ ៦:១៤៖ យហ ៤:១៩; ៧:៤០; នវ ១៨:១៥

*៦:១៥ ៦:១៥៖ យហ ១២:១៣; ១៨:៣៣-៣៧; ១៩:១៩

*៦:១៧ ៦:១៧៖ យហ ២:១២

*៦:២៣ ៦:២៣៖ យហ ៦:១០-១១

*៦:២៤ ៦:២៤៖ មថ ៤:១៣

*៦:២៧ ៦:២៧៖ យហ ៤:១៤

*៦:២៩ ៦:២៩៖ ១យហ ២:២៣; ៣:២៣

*៦:៣០ ៦:៣០៖ យហ ៤:៤៨

§៦:៣១ ៦:៣១៖ តានាវងើយគ្រែក ញចីស«ពាង់»។ ឆៃខាន់ពាង់គឹតមាមោឆេ យ៝រមាតាៈឞើសត្រ៝ង ៣២។

†៦:៣១ ៦:៣១៖ នម ៧៨:២៤-២៥

*៦:៣១ ៦:៣១៖ នេហ ៩:១៥; នង ១៦:៤, ១៣-១៥

*៦:៣៤ ៦:៣៤៖ យហ ៤:១៥

*៦:៣៥ ៦:៣៥៖ តារានោកឞ្រាសយេឆូ ឞូគែសនុមពាង់ទើមមាឆោងឆា មោគែសអោសព្យាង់មោអោសគែសឞូម។ នទ្រីទឹងនាវខ្លៃឞ្រាសយេឆូ លាស៖ «គ៝ប់អ្យាជេងព្យាង់អីអ៝ន់នាវរេស»។

*៦:៣៥ ៦:៣៥៖ យហ ៦:៤៨-៥៨; ៧:៣៧

*៦:៣៧ ៦:៣៧៖ យហ ១៧:៦-៩

*៦:៣៨ ៦:៣៨៖ យហ ៤:៣៤

*៦:៣៩ ៦:៣៩៖ យហ ១០:២៨-២៩; ១៧:១២

*៦:៤២ ៦:៤២៖ មថ ១៣:៥៥-៥៦

†៦:៤៥ ៦:៤៥៖ អេឆា ៥៤:១៣

*៦:៤៥ ៦:៤៥៖ យេរ ៣១:៣៣-៣៤

*៦:៤៦ ៦:៤៦៖ យហ ១:១៨

*៦:៤៧ ៦:៤៧៖ យហ ៣:១៦; ៥:២៤

*៦:៤៩ ៦:៤៩៖ នង ១៦:១៤-១៥

†៦:៥០ ៦:៥០៖ «ឆា» គែសនាវខ្លៃលាស៖ «ញឆីង» ទាន់អ្វាញ់តាត្រ៝ង ៤៧។

*៦:៥១ ៦:៥១៖ លក ២២:១៩

‡៦:៥៣ ៦:៥៣៖ នាវអីឞ្រាសយេឆូ លាស៖ «ឆាឆាក់ជាន់ពាង់» នអ៝ប់មា«ញេតមហាមពាង់» គែសនាវខ្លៃលាសអ្យាត់មាញឆីងមាពាង់ នអ៝ប់មានាវពាង់ខឹតនត្រ៝ៈឞ៝ន់ គៃមាគែសនាវរេសនហ៝រ៝។ នាវពាង់ងើយអីនៃងកាសតោរមានាវញេតឆាងកាសក្ល៝សអ្វែសដ៝ង់។

*៦:៥៣ ៦:៥៣៖ ១កោ ១០:១៦

*៦:៥៦ ៦:៥៦៖ យហ ១៥:៤-៧

*៦:៥៨ ៦:៥៨៖ យហ ៤:១៣-១៤

*៦:៦២ ៦:៦២៖ យហ ៣:១៣; ២០:១៧; លក ២៤:៥១

*៦:៦៣ ៦:៦៣៖ យហ ៣:៦; ១កោ ១៥:៤៥; ២កោ ៣:៦

*៦:៦៤ ៦:៦៤៖ យហ ២:២៥

*៦:៦៧ ៦:៦៧-៦៩៖ មក ៨:២៧-៣០

*៦:៧០ ៦:៧០-៧១៖ យហ ១៣:១៨; ១៨:២-៣