នាវកោរាញឞ្រាសងើយតានាវងើយឞូន៝ង យោហាន ១១

១១

លាឆារ ខឹតទ៝ក់រេស

១ គែសទូហ្វេឞូក្លោរាញាលាឆារ គែសនាវជី ពាង់គុតាប៝នបេថានី នទ្រែលមាយោសពាង់ឞារហៃ រាញាមារី នទ្រែលមាមាថា ។* ២ មារី អីនៃអីលែៈត៝ៈទាកងីបោកាសតាជ៝ង់ឞ្រាសយេឆូ ជេសរីជូតជ៝ង់ឞ្រាសយេឆូ មាឆ៝ក់ពាង់នើមនើស។* ៣ ជេសរីឞារហៃអ៝សនូរអីនៃដាៈឞូហាន់មឞើសមាឞ្រាសយេឆូ ៖ “ហើយកោរាញ ឞូនុយ្សអីមៃរ៝ង់គែសនាវជីហោងាន់មេ”។ ៤ ត៝ត់ឞ្រាសយេឆូ តាង់នាវអីនៃ ពាង់លាស៖ “នាវជីអីអ្យាមោអីរអោសត៝ត់ខឹត នាវជីអីអ្យាគៃមាគែសលឺនាវច្រេកលើបកោរាញឞ្រាស ជេសរីគែសលឺនាវច្រេកលើបគ៝ប់អីក៝នពាង់ដ៝ង់”។* ៥ ឞ្រាសយេឆូ រ៝ង់មាមាថា មាមារី នអ៝ប់មាលាឆារ ដ៝ង់។ ៦ យើនមាជេសឞ្រាសយេឆូ លែៈគឹតលាឆារ គែសនាវជី ពាង់ហោមគុតានតុកនៃឞារនារជឹត។ ៧ ត៝ត់ឞើសកើយនៃ ពាង់លាសមាមពោលអ៝សម៝នពាង់៖ “ហោៈឞ៝ន់ព្លឹតៃតាឞ្រីយូដា ជឹត”។ ៨ មពោលអ៝សម៝នពាង់លាសមាពាង់៖ “អើនើមនតី មពោលកោរាញផូងអីឆ្រាអែល តាឞ្រីយូដា អុចក្លុបងខឹតមៃមាលុមហែអាពើទើម លាសនទ្រីមៃអុចព្លឹតៃតានៃងាន់បាស?”* ៩ ឞ្រាសយេឆូ លាសមាខាន់ពាង់៖ “នារគែស ១២ ម៝ង។ លាសឞូម៝សហាន់តានោកនារពាង់មោអោសគែសចេសជ៝ង់ យ៝រលាសពាង់ឆៃនាវអាងគែសតានែសនតូអ្យា។* ១០ យើនមាឞូម៝សហាន់តានោកមាង់ ពាង់ចេសជ៝ង់រ៝ យ៝រលាសពាង់មោឆៃនាវអាង”។** ១១ ជេសឞ្រាសយេឆូ លាសកើតនៃ ពាង់លាសតៃមាខាន់ពាង់៖ “មឹតជាង់ឞ៝ន់លាឆារ លែៈហាក់ឞិចហើយ យើនមាគ៝ប់ហាន់គៃអុចរាលៃពាង់”។* ១២ មពោលអ៝សម៝នលាសមាពាង់៖ “អើកោរាញ លាសពាង់លែៈហាក់ឞិច តៃពាង់ឞាស”។ ១៣ ខាន់ពាង់នអោនលាសឞ្រាសយេឆូ លាសលាឆារ ហាក់ឞិចងាន់ទើម យើនមានាវឞ្រាសយេឆូ ងើយអីនៃ ពាង់អុចលាសលាឆារ លែៈខឹតងាន់។ ១៤ ជេសរីឞ្រាសយេឆូ មឞើសងក៝ចមាខាន់ពាង់អ៝ន់គឹតនហេលនានេៈ៖ “លាឆារ លែៈខឹតងាន់។ ១៥ គ៝ប់រាម់មអាកងាន់គ៝ប់មោគែសគុតារី យ៝រលាសគែសនាវខ្លៃមាខាន់មៃ អ៝ន់ខាន់មៃញឆីងលើមាហោ។ ហោៈឞ៝ន់ហាន់តាជៃពាង់អាបៃអ្យាហ៝ម់”។ ១៦ នោកនៃគែសទូហ្វេអ៝សម៝នរាញាថោមាស អីឞូក្វាល់ដីដីម ដ៝ង់ ពាង់លាសមាមពោលអ៝សម៝ន៖ “ហោៈឞ៝ន់ហាន់នទ្រែលពាង់ គៃមាខឹតនទ្រែលពាង់ដ៝ង់!”*

ឞ្រាសយេឆូ អីតើមនាវរេស

១៧ ឞ្រាសយេឆូ ហាន់ត៝ត់តានៃ ឞូមឞើសមាពាង់លាសលាឆារ លែៈឞូត៝ប់តាមោចលែៈគែសព្វាន់នារ។ ១៨ ប៝នបេថានី ដាសប៝នក្វ៝ង់យេរូឆាលឹម តឹមទាច់ ក្លាប់លាសគែសពែកីលោមែតទើម។ ១៩ នទ្រីគែសអ៝ក់ផូងអីឆ្រាអែល តាៈឞើសប៝នយេរូឆាលឹម ហាន់រាយោកនហាញមាថា មារី យ៝រមាអីអ៝សខាន់ពាង់។ ២០ នោកមាថា លែៈគឹតលាសឞ្រាសយេឆូ ឞើយត៝ត់តានៃ ពាង់ហាន់ច្វាៈឞ្រាសយេឆូ រ៝ យើនមាមារី ហោមគុតាជៃ។ ២១ មាថា លាសមាឞ្រាសយេឆូ ៖ “អើកោរាញ លាសមៃគុតាអ្យានើស អ៝សគ៝ប់មោខឹតអោស។ ២២ យើនមាគ៝ប់គឹត ឞ៝លលាសអាបៃអ្យាកាដោយដ៝ង់ ម៝សនទើមៃទាន់តាៈឞើសកោរាញឞ្រាស ពាង់អ៝ន់មាមៃរ៝”។ ២៣ ឞ្រាសយេឆូ លាសមាពាង់៖ “អ៝សអៃមរាទ៝ក់រេស”។ ២៤ មាថា លាសមាឞ្រាសយេឆូ ៖ “អើ គ៝ប់គឹតពាង់មរាទ៝ក់រេសតៃ ពាង់ទ៝ក់រេសតានារងគ្លែៈទុត ត៝ត់ទឹងលែៈឞូនុយ្សខឹតទ៝ក់រេសតៃ”។* ២៥ ឞ្រាសយេឆូ លាស៖ “គ៝ប់អ្យាអីតើមជានអ៝ន់ឞូនុយ្សទ៝ក់រេស នទ្រែលមាតើមនាវរេស ឞូម៝សញឆីងមាគ៝ប់ ឞ៝លលាសខឹតកាដោយពាង់មរាហោមរេស។* ២៦ ជេសរីឞូម៝សហោមគុរេសញឆីងមាគ៝ប់មោគែសខឹតអោស† អៃអ្យាត់ដ៝ង់នាវអីនៃ?” ២៧ មាថា លាសមាឞ្រាសយេឆូ ៖ “អើកោរាញ លែៈគ៝ប់អ្យាត់មៃឞ្រាសក្រីស អីនើមរាក្លាយ្សអីកោរាញឞ្រាសលែៈត៝នញជ្វាល់តានែសនតូអ្យា។ មៃក៝នកោរាញឞ្រាសនើម”។*

ឞ្រាសយេឆូ ញុម

២៨ ជេសមាថា ងើយកើតនៃ ជេសរីពាង់ហាន់ក្វាល់អ៝សពាង់មារី មោអ៝ន់ឞូគឹត ពាង់លាស៖ “នើមនតីលែៈត៝ត់ ពាង់ក្វាល់អៃ”។ ២៩ ត៝ត់មារី គឹត ពាង់ទ៝ក់ហាន់ម៝ប់ឞ្រាសយេឆូ រ៝។ ៣០ ឞ្រាសយេឆូ អេហ៝ៈអោសលាប់ត្រោមប៝ន ពាង់ហោមគុតានតុកមាថា ហាន់ម៝ប់រីនើស។ ៣១ ផូងអីឆ្រាអែល អីគុរាយោកនហាញមារី តាជៃនៃ ឆៃពាង់ទ៝ក់ហាន់នទាលនៃ ខាន់ពាង់លែវឞាល់ហាន់តឹងពាង់ នអោនលាសពាង់ហាន់ញុមវើលអ៝សពាង់អាមោច។

៣២ មារី ហាន់ជឹតនតុកឞ្រាសយេឆូ គុ ត៝ត់ពាង់ឆៃឞ្រាសយេឆូ ពាង់ពាន់តាជ៝ង់ឞ្រាសយេឆូ នៃលាស៖ “អើកោរាញ លាសមៃគុតាអ្យានើស អ៝សគ៝ប់មោអោសខឹត”។ ៣៣ ឞ្រាសយេឆូ ឆៃមារី នទ្រែលមាផូងអីឆ្រាអែល ហាន់តឹងពាង់ញុមវើលទាទេ ឞ្រាសយេឆូ រាង៝តអុករាអុលតានូយ្សនហ៝ម់‡ទុតហោ។ ៣៤ ពាង់អោប៖ “អាសនតុកខាន់អៃត៝ប់ពាង់?” ខាន់ពាង់អើស៖ “អើកោរាញ ទាន់មៃហាន់តឹងហេន”។ ៣៥ នោកនៃឞ្រាសយេឆូ ញុម។ ៣៦ ផូងអីឆ្រាអែល តឹមលាស៖ “អ្វាញ់! ពាង់រ៝ង់ហោងាន់មាលាឆារ ”។ ៣៧ តាផូងខាន់ពាង់អាបាៈលាស៖ “ពាង់អីនៃបាស ឞូនុយ្សចែសមាត់លែៈជានអ៝ន់ឆៃអាង។ លាសនទ្រីមើមទឹងពាង់មោអោសឞ្វៃលាឆារ អ្យាមោអ៝ន់ខឹតនើស?”*

ឞ្រាសយេឆូ ដាៈលាឆារ ទ៝ក់រេស

៣៨ ជេសរីឞ្រាសយេឆូ ហាន់តាមោច តានូយ្សនហ៝ម់ពាង់គែសនាវអុករាអុលតៃទូតឹជឹត។ មោចអីនៃត្រោមក្លេរតាយោក អីត្រោមនៃឞូរាទ៝ល់មាលុក្វ៝ង់។* ៣៩ ត៝ត់តាមោចឞ្រាសយេឆូ លាស៖ “រាលាៈលើយលុអីនៃ”។ មាថា អីយោសឞូនុយ្សខឹតនៃលាសមាឞ្រាសយេឆូ ៖ “អើកោរាញ ឞូនុយ្សអ្យាលែៈបោអោម យ៝រលាសលែៈព្វាន់នារត៝ប់ពាង់តាអ្យា”។ ៤០ ឞ្រាសយេឆូ លាសមាពាង់៖ “គ៝ប់លែៈមឞើសងក៝ចមាអៃបាស លាសអៃញឆីង អៃឆៃនាវច្រេកលើបកោរាញឞ្រាសងាន់រ៝?” ៤១ ជេសរីឞូរាលាៈលើយលុឞើសឞ៝រ់នតូអីនៃ។ ឞ្រាសយេឆូ ងគើរមាត់ជឹតត្រោកតីលាស៖ “អើឞឹគ៝ប់លាសអ្វែសមាមៃងាន់ យ៝រមាមៃលែៈអ្យាត់គ៝ប់។ ៤២ គ៝ប់លែៈគឹតងាន់មៃអ្យាត់គ៝ប់មរ៝មរាង់ ទឹងគ៝ប់ងើយនតែសកើតនអា យ៝រលាសគែសអ៝ក់ឞូនុយ្សគុជុមគ៝ប់តាអ្យា។ គ៝ប់អុចខាន់ពាង់អ្យាត់មៃនើមអីតើមញជ្វាល់គ៝ប់”។* ៤៣ ជេសឞ្រាសយេឆូ លាសកើតនៃ ពាង់នតែរទុតហ្វី៖ “អើលាឆារ ! មៃលោសហ៝ម់!”* ៤៤ ជេសរីលាឆារ លោសឞើសរីជ៝ង់តីហោមពូតមាឞ៝ក មុសមាត់ហោមពូតមាឞ៝កដ៝ង់។ ឞ្រាសយេឆូ លាសមាខាន់ពាង់៖ “ឆើមទ្រីសលើយឞ៝កពាង់នៃ អ៝ន់ពាង់ហាន់”។

ឞូតឹមញច្រាៈគៃអុចងខឹតឞ្រាសយេឆូ

៤៥ ផូងអីឆ្រាអែល អីហាន់តាជៃមារី នៃ ឆៃឞ្រាសយេឆូ ជាននាវខ្លៃនៃ អ៝ក់ងាន់ឞូញឆីងមាពាង់។ ៤៦ យើនមាគែសឞូនុយ្សអាបាៈតាផូងខាន់ពាង់អីនៃ ហាន់មឞើសងក៝ចអ៝ន់មាផូងផារីឆី នទើអីឞ្រាសយេឆូ ជាននៃ។ ៤៧ ជេសរីមពោលកោរាញជានឞ្រាស នទ្រែលមាផូងផារីឆី រាគូមមពោលកោរាញជានការឞ្រីយូដា តឹមញច្រាៈនាវ៖ “អាបៃអ្យាមើមឞ៝ន់ជានមាឞូនុយ្សអីនៃ? យ៝រលាសពាង់ជាននាវខ្លៃអ៝ក់ងាន់។* ៤៨ លាសឞ៝ន់រ៝ងពាង់កើតនៃ ទឹងលែៈផូងប៝នលានញឆីងមាពាង់ទាទេ ជេសរីផូងតាហែនរោម ហាន់លើសហេងញីសជានឞ្រាសមាកោរាញឞ្រាស នអ៝ប់មាឞ្រីទាកឞ៝ន់រ៝§”។ ៤៩ គែសទូហ្វេឞូនុយ្សតាមពោលខាន់ពាង់រាញាកៃផាស ពាង់ជេងកោរាញជានឞ្រាសទុតក្វ៝ង់តានាម់នៃ ពាង់លាស៖ “ទឹងលែៈខាន់មៃនៃមោអោសគឹតវ៝ត់ទូនតីលនាវ!* ៥០ ល៝ង់ខាន់មៃមឹនហែស! អ្វែសរាលាវមាខាន់មៃគែសខឹតទូហ្វេឞូនុយ្សអ៝ន់មាទឹងលែៈផូងប៝នលាន ដាសមារ៝សហេងទឹងលែៈឞ្រីទាកឞ៝ន់”។

៥១ នាវពាង់ងើយកើតនៃមោគែសអោសតឹងនាវអុចអេងឆាក់ពាង់នើម។ ពាង់ជេងកោរាញជានឞ្រាសទុតក្វ៝ង់តានាម់នៃ កើតនទ្រីទឹងកោរាញឞ្រាសអ៝ន់ពាង់ងក៝ចល៝រលាស ឞ្រាសយេឆូ ខឹតនត្រ៝ៈទឹងលែៈផូងអីឆ្រាអែល ។ ៥២ មោអោសខឹតអ៝ន់មាទឹងលែៈផូងអីឆ្រាអែល ទើម យើនមាខឹតអ៝ន់មាទឹងលែៈផូងក៝នកោរាញឞ្រាសគុចាសច្រាយឞាល់លាមនែសនតូ គៃមារាគូមជេងទូផូងទើមហ៝ៈ។* ៥៣ នតើមឞើសនារនៃ មពោលកោរាញផូងអីឆ្រាអែល ខាន់ពាង់តឹមញច្រាៈឞាល់គៃមាអុចងខឹតលើយឞ្រាសយេឆូ ។ ៥៤ អាចមាកើតនទ្រីទឹងឞ្រាសយេឆូ មោហោមឞ្រោៈញឆ៝ងអ៝ន់មពោលកោរាញផូងអីឆ្រាអែល ឆៃ។ ពាង់ទូឞើសនតុកនៃហាន់តាប៝នទាច់កេងឞ្រីរាទាស ប៝ននៃរាញាប៝នអេប្រាអីម ពាង់គុតាប៝ននៃនទ្រែលមពោលអ៝សម៝នពាង់។

៥៥ នោកនៃនារញេតបុននហ៝តលែៈឞើយមាត៝ត់ដ៝ង់ គែសអ៝ក់ផូងអីឆ្រាអែល តាៈឞើសលាមឞ្រីហាន់តាប៝នក្វ៝ង់យេរូឆាលឹម គៃមាជានរាវឆាក់អ៝ន់ក្ល៝សតឹងនាវវៃផូងអីឆ្រាអែល អេល៝រមាញេតបុននហ៝តអីនៃ។* ៥៦ នោកនៃឞូជ៝យឞ្រាសយេឆូ ជេសរីគុតាជ៝ង់គូងញីសជានឞ្រាសនៃ ខាន់ពាង់តឹមលាសនទ្រាង់ខាន់ពាង់៖ “មោឆៃអោសពាង់ មើមខាន់អៃមៃមឹន គឹតលាសពាង់មោឞាញ់ហាន់តាអ្យារ៝?”* ៥៧ ល៝ង់មពោលកោរាញជានឞ្រាស នទ្រែលមាផូងផារីឆី មឞើសនាវមាឞូ លាសឞូម៝សគឹតនតុកឞ្រាសយេឆូ គុ ដាៈមឞើសងក៝ចមាខាន់ពាង់ គៃមាខាន់ពាង់ហាន់ញុប។

*១១:១ ១១:១៖ លក ១០:៣៨-៣៩

*១១:២ ១១:២៖ យហ ១២:៣

*១១:៤ ១១:៤៖ យហ ៩:៣

*១១:៨ ១១:៨៖ យហ ១០:៣១

*១១:៩ ១១:៩៖ យហ ៩:៤-៥; ១២:៣៥-៣៦

*១១:១០ ១១:៩-១០៖ នាវឞ្រាសយេឆូ ងើយតាអ្យាក្លាប់លាសគែសឞារនតីលនាវខ្លៃ៖ ១. តឹងហ៝ម់គ៝ប់អីនាវអាងមានែសនតូអ្យា លើយក្លាចអោសនោកខាន់មៃគុនទ្រែលគ៝ប់។ ២. កោរាញឞ្រាសលែៈអ៝ន់ម៝ងមាឞ៝ន់មាជាននាវអុចពាង់នើម លាសនទ្រីលើយក្លាចអោសនោកខាន់មៃគុនទ្រែលគ៝ប់។ ត៝ត់លែៈម៝ងអីនៃមោអោសហោមទើយជានការ។

*១១:១០ ១១:១០៖ យហ ១២:៣៥

*១១:១១ ១១:១១៖ មក ៥:៣៩

*១១:១៦ ១១:១៦៖ មក ១៤:៣១

*១១:២៤ ១១:២៤៖ អេឆា ២៦:១៩; ដាន ១២:២

*១១:២៥ ១១:២៥៖ យហ ៥:២១, ២៤

†១១:២៦ ១១:២៦៖ មោលាស «មោអោសខឹតនហ៝រ៝»។

*១១:២៧ ១១:២៧៖ យហ ១:៣៤; មថ ១៦:១៦

‡១១:៣៣ ១១:៣៣៖ មោលាស «ជីនូយ្សនអ៝ប់មារាង៝តអុករាអុលតានូយ្សនហ៝ម់»។

*១១:៣៧ ១១:៣៧៖ យហ ៩:៦-៧

*១១:៣៨ ១១:៣៨៖ មថ ២៧:៥៩-៦០

*១១:៤២ ១១:៤២៖ យហ ១២:៣០

*១១:៤៣ ១១:៤៣៖ យហ ៥:២៥, ២៨

*១១:៤៧ ១១:៤៧-៤៨៖ មថ ២៦:៣-៥

§១១:៤៨ ១១:៤៨៖ មពោលកោរាញជានឞ្រាស នទ្រែលមាផូងផារីឆី ក្លាចលាស លាសផូងប៝នលានញឆីងមាឞ្រាសយេឆូ ទាទេ ផូងរោម កើបនាវអីនៃជេងនាវតឹមរាទ៝ង់ដាសខាន់ពាង់ នទ្រីខាន់ពាង់មរាលើសហេងឞ្រីយូដា ។

*១១:៤៩ ១១:៤៩-៥០៖ យហ ១៨:១៤

*១១:៥២ ១១:៥២៖ យហ ១០:១៦; អេផ ២:១៤-១៨

*១១:៥៥ ១១:៥៥៖ យហ ២:១៣; ៦:៤; ២នរ ៣០:១៧-១៨

*១១:៥៦ ១១:៥៦៖ យហ ៧:១១