នាវកោរាញឞ្រាសងើយតានាវងើយឞូន៝ង យោហាន ១៣

១៣

ឞ្រាសយេឆូ រាវជ៝ង់មពោលអ៝សម៝នពាង់

១ អេល៝រមាលាប់ញេតបុននហ៝ត ឞ្រាសយេឆូ លែៈគឹតនារពាង់លោសឞើសនែសនតូអ្យាហាន់ឆឹតតាឞឹពាង់នើមលែៈទីម៝ង។ ឞ្រាសយេឆូ រ៝ង់មាមពោលអ៝សម៝នពាង់នើមតានែសនតូអ្យា ពាង់ហោមរ៝ង់មាខាន់ពាង់មរ៝មរាង់ត៝ត់លោច។* ២ ត៝ត់ម៝ងឆោងឆាអាមាង់ ឆាតាង់ លែៈជានអ៝ន់យូដាស-អីឆាការីយោត អីក៝នឆីមោន គែសនាវមឹនលែវឞូហាន់ញុបឞ្រាសយេឆូ ។* ៣ ឞ្រាសយេឆូ លែៈគឹតជេស ទឹងលែៈនទើឞឹពាង់លែៈអ៝ន់នាវទើយមាពាង់ទាទេ ពាង់លែៈគឹតដ៝ង់ ពាង់នើសវាច់តាៈឞើសកោរាញឞ្រាស ជេសរីព្លឹឆឹតតៃតាកោរាញឞ្រាសដ៝ង់។* ៤ កើតនទ្រីទឹងពាង់ទ៝ក់ឞើសនតុកឆោង ទ្រីសអាវក្វ៝ង់ពាង់នើម ឆ៝ៈឞ៝កក៝ត់តាឞុត។* ៥ ពាង់ឆ៝ៈទាកងខុតតាងានគ្រឺង ជេសរីពាង់រាវជ៝ង់មពោលអ៝សម៝នពាង់ទូហ្វេទូហ្វេ ពាង់ឆ៝ៈឞ៝កក៝ត់តាឞុត ឆើមជូតជ៝ង់ខាន់ពាង់ដ៝ង់។ ៦ ត៝ត់តាឆីមោន អីឞូក្វាល់ពេត្រោស ដ៝ង់នៃ ពាង់អោបឞ្រាសយេឆូ ៖ “អើកោរាញ អាសមៃអុចឆើមរាវជ៝ង់គ៝ប់ឞើស?*”* ៧ ឞ្រាសយេឆូ អើសមាពាង់៖ “អាបៃអ្យាមៃអេហ៝ៈវ៝ត់អោសនទើគ៝ប់ជានអ្យា។ នារជឹតនាប់តៃមៃវ៝ត់រ៝”។ ៨ ពេត្រោស លាសមាឞ្រាសយេឆូ ៖ “អើកោរាញ លើយអោសមៃឆើមរាវជ៝ង់គ៝ប់!” ឞ្រាសយេឆូ អើស៖ “លាសគ៝ប់មោរាវជ៝ង់មៃ មៃមោអោសជេងអ៝សម៝នគ៝ប់”។ ៩ ឆីមោន អីឞូក្វាល់ពេត្រោស ដ៝ង់លាស៖ “អើកោរាញ លាសនទ្រីមៃលើយអោសទើនរាវជ៝ង់ទើម ទាន់មៃរាវលែៈមាតីមាឞោកគ៝ប់ដ៝ង់”។ ១០ ឞ្រាសយេឆូ លាស៖ “ឞូនុយ្សលែៈជេសអុម រាវជ៝ង់គាប់ហើយ្ស យ៝រលាសឆាក់ជាន់ពាង់លែៈក្ល៝ស។ មពោលខាន់មៃលែៈក្ល៝ស យើនមាមោគែសអោសគែសទឹងលែៈខាន់មៃ”។* ១១ ឞ្រាសយេឆូ ងើយកើតនៃ យ៝រលាសពាង់លែៈគឹតឞូម៝សអុចលែវឞូហាន់ញុបពាង់។ កើតនទ្រីទឹងពាង់លាស៖ “ទឹងលែៈខាន់មៃមោគែសអោសក្ល៝សទាទេ”។*

១២ ជេសផ្យៅឞ្រាសយេឆូ រាវជ៝ង់មពោលអ៝សម៝នពាង់ពាង់ញឆ៝សឞ៝កអាវពាង់នើម គុតៃតានតុកឆោងឆា ជេសរីអោបខាន់ពាង់៖ “ខាន់មៃវ៝ត់ដ៝ង់ នទើគ៝ប់ឆើមជានអ៝ន់មាខាន់មៃនៃនើស? ១៣ ខាន់មៃក្វាល់គ៝ប់«នើមនតី» ក្វាល់គ៝ប់«កោរាញ»។ ទីងាន់នាវខាន់មៃក្វាល់នៃ យ៝រលាសគ៝ប់នើមនតី គ៝ប់កោរាញងាន់។* ១៤ លាសគ៝ប់អ្យាលែៈនើមនតីខាន់មៃ លែៈកោរាញខាន់មៃ ជេសរីងខើងមាឆើមរាវរាលឹជ៝ង់ខាន់មៃ លាសនទ្រីអ៝ន់ខាន់មៃឆើមរាវជ៝ង់នទ្រាង់ខាន់មៃនើមដ៝ង់។* ១៥ អ្យាគ៝ប់ជានលែវត្រ៝ងអ៝ន់មាខាន់មៃ លាសនទ្រីអ៝ន់ខាន់មៃជានកើតគ៝ប់លែៈជានមាខាន់មៃនៃ។ ១៦ គ៝ប់លាសនហេលនានេៈងាន់មាខាន់មៃ ឞូនុយ្សឆើមកើលជានការមោអោសក្វ៝ង់រាលាវមាកោរាញពាង់ ឞូនុយ្សនតើយ្សនាវមោដ៝ង់ក្វ៝ង់រាលាវមានើមដាៈពាង់ហាន់”។

១៧ “លាសខាន់មៃគឹតវ៝ត់នាវអីនៃ ជេសរីជានតឹងកើត កោរាញឞ្រាសអ៝ន់នាវគែសជេងអ្វែសងាន់មាខាន់មៃ។ ១៨ គ៝ប់ងើយកើតនអៃ មោអោសងើយអ៝ន់មាទឹងលែៈខាន់មៃ យ៝រលាសគ៝ប់លែៈគឹតឞូម៝សគ៝ប់កើយ្ស។ យើនមាអ្យាត់មាគែសតឹមទីមានាវកោរាញឞ្រាសងើយលែៈញចីសលាស៖ «ទូហ្វេឞូនុយ្សគុឆោងឆានទ្រែលគ៝ប់ តីសមាពាង់ជានអ្យើសមាគ៝ប់»†។ ១៩ គ៝ប់មឞើសនាវអីនៃមាខាន់មៃអេល៝រមាត៝ត់ គៃមានោកត៝ត់នាវអីនៃតៃ ខាន់មៃអ្យាត់រ៝គ៝ប់ឞ្រាសក្រីស អីនើមរាក្លាយ្សតាៈឞើសកោរាញឞ្រាសទែញជ្វាល់ងាន់។* ២០ គ៝ប់លាសនហេលនានេៈងាន់មាខាន់មៃ៖ ឞូម៝សរ៝មទូហ្វេឞូនុយ្សគ៝ប់ដាៈហាន់ ជេងពាង់រ៝មគ៝ប់ដ៝ង់ ជេសរីឞូម៝សរ៝មគ៝ប់ ជេងពាង់រ៝មអីនើមតើមញជ្វាល់គ៝ប់ដ៝ង់”។*

ឞ្រាសយេឆូ មឞើសងក៝ចនាវយូដាស-អីឆាការីយោត រាលាង់មាពាង់

(មថ ២៦:២០-២៥; មក ១៤:១៧-២១; លក ២២:២១-២៣)

២១ ជេសឞ្រាសយេឆូ ងើយនាវនៃ តានូយ្សនហ៝ម់ពាង់រីគែសនាវរាវៃរុងរាង់ងាន់ ជេសរីពាង់លាស៖ “គ៝ប់លាសនហេលនានេៈងាន់មាខាន់មៃ គែសទូហ្វេតាមពោលខាន់មៃតាអ៝យតៃលែវឞូហាន់ញុបគ៝ប់”។ ២២ មពោលអ៝សម៝នតឹមអ្វាញ់មាត់នទ្រាង់ខាន់ពាង់នើម យ៝រលាសខាន់ពាង់មោគឹតអោសឞូម៝សឞ្រាសយេឆូ អុចលាសអីនៃ។ ២៣ តានៃគែសទូហ្វេអ៝សម៝នអីឞ្រាសយេឆូ ទែរ៝ង់ ពាង់គុទាច់កេងឞ្រាសយេឆូ ។* ២៤ ឆីមោន អីឞូក្វាល់ពេត្រោស ដ៝ង់ញច៝ង់មាតីអ៝ន់អ៝សម៝នអីនៃគឹតវ៝ត់ គៃមាដាៈពាង់អោបឞ្រាសយេឆូ ឞូម៝សឞូនុយ្សពាង់អុចលាសអីនៃ។ ២៥ ជេសរីអ៝សម៝នអីនៃងគឹលមាត់ជឹតឞ្រាសយេឆូ នៃ អោបពាង់៖ “អើកោរាញ ឞូម៝សអីរីមេស?” ២៦ ឞ្រាសយេឆូ អើស៖ “ឞូម៝សគ៝ប់នទឹនុមពាង់គ៝ប់យុកអ្យា ពាង់អីនៃរ៝”។ ជេសរីឞ្រាសយេឆូ យុកនុមពាង់តាងាននទឹអ៝ន់យូដាស-អីឆាការីយោត អីក៝នឆីមោន ។ ២៧ ជេសយូដាស-អីឆាការីយោត ឆ៝ៈនុមពាង់អីនៃ ឆាតាង់ លាប់គុតាឆាក់ពាង់រ៝។ ជេសរីឞ្រាសយេឆូ លាសមាពាង់៖ “ម៝សនទើអីមៃអុចជាន អ៝ន់មៃជានគើញហ៝ម់”។ ២៨ ទឹងលែៈមពោលគុឆោងឆាតាញឆឺងនៃ មោគែសអោសទូហ្វេឞូនុយ្សគឹតម៝សគែសនាវខ្លៃនាវឞ្រាសយេឆូ លាសអីនៃ។ ២៩ ឞូនុយ្សអាបាៈនអោនលាសឞ្រាសយេឆូ អុចដាៈយូដាស-អីឆាការីយោត ហាន់រាវាត់នទើមាទ៝ង់នារញេតបុន មោលាសអុចដាៈពាង់ហាន់ពាៈនទើអ៝ន់មាផូងអ៝អាច អាចមាយូដាស-អីឆាការីយោត ជេងឞូនុយ្សញអោតទុងព្រាក់មពោលខាន់ពាង់នៃ។* ៣០ ជេសយូដាស-អីឆាការីយោត ទើននុមពាង់អីនៃ ជេសរីពាង់ហាន់រ៝ នោកនៃឞ្រីលែៈង៝។

នាវដាៈមហែ

៣១ នទុតយូដាស-អីឆាការីយោត ហាន់ ឞ្រាសយេឆូ លាស៖ “អាបៃអ្យាលែៈត៝ត់ទីម៝ងគ៝ប់អីក៝នឞូនុយ្សតាៈឞើសកោរាញឞ្រាសលាប់តានាវច្រេកលើបគ៝ប់នើម ជេសរីកោរាញឞ្រាសគែសនាវច្រេកលើបយ៝រមាគ៝ប់ដ៝ង់។ ៣២ ជេសរីលាសកោរាញឞ្រាសគែសនាវច្រេកលើបយ៝រមាគ៝ប់ ហោមទូប្ល៝ត់ជឹតពាង់អុចអ៝ន់នាវច្រេកលើបមាគ៝ប់។* ៣៣ អើមពោលក៝នគ៝ប់គ៝ប់ហោមគុនទ្រែលខាន់មៃទូប្ល៝ត់ទើម ជេសរីតៃខាន់មៃតឹងជ៝យគ៝ប់។ អាបៃអ្យាគ៝ប់អុចមឞើសមាខាន់មៃកើតគ៝ប់លែៈមឞើសមាមពោលកោរាញផូងអីឆ្រាអែល នើសដ៝ង់៖ «នតុកគ៝ប់ហាន់ ខាន់មៃមោអោសទើយហាន់»។* ៣៤ គ៝ប់អ៝ន់ទូនាវដាៈមហែមាខាន់មៃ៖ ដាៈខាន់មៃតឹមរ៝ង់នទ្រាង់ខាន់មៃនើម។ តឹមឞានមាគ៝ប់លែៈរ៝ង់មាខាន់មៃ អ៝ន់ខាន់មៃតឹមរ៝ង់នទ្រាង់ខាន់មៃនើម។** ៣៥ យ៝រមាខាន់មៃតឹមរ៝ង់នទ្រាង់ខាន់មៃនើម ទឹងលែៈឞូនុយ្សឞូគឹតលាសខាន់មៃអ៝សម៝នគ៝ប់ងាន់”។

ឞ្រាសយេឆូ មឞើសល៝រពេត្រោស រាលាច់ពាង់

(មថ ២៦:៣១-៣៥; មក ១៤:២៧-៣១; លក ២២:៣១-៣៤)

៣៦ ឆីមោន អីឞូក្វាល់ពេត្រោស ដ៝ង់អោបឞ្រាសយេឆូ ៖ “អើកោរាញ អាសនតុកហាន់មៃរី?” ឞ្រាសយេឆូ អើស៖ “នតុកគ៝ប់ហាន់អីនៃ អាបៃអ្យាមៃមោអោសទើយហាន់។ នារជឹតនាប់តៃមៃមរាហាន់តឹងគ៝ប់តានៃ”។* ៣៧ ពេត្រោស អោបតៃឞ្រាសយេឆូ ៖ “អើកោរាញ ម៝សកោៈគ៝ប់មោទើយតឹងមៃអាបៃអ្យា? គ៝ប់អុចប៝ង់ឆាក់គ៝ប់នើមខឹតមាមៃ”។ ៣៨ ឞ្រាសយេឆូ លាសមាពាង់៖ “មៃអុចប៝ង់ឆាក់មៃនើមខឹតមាគ៝ប់ងាន់បាស? យើនមាគ៝ប់លាសនហេលនានេៈងាន់មាមៃ តាមាង់អ្យាអ្យារ់អេហ៝ៈអោសនទ្រាវ មៃលែៈរាលាច់ពែតឹលាសមោគឹតនាល់គ៝ប់”។*

*១៣:១ ១៣:១៖ យហ ៧:៣០; ៨:២០; ១២:២៣

*១៣:២ ១៣:២៖ យហ ១៣:២៧; លក ២២:៣

*១៣:៣ ១៣:៣៖ យហ ៣:៣៥

*១៣:៤ ១៣:៤៖ មថ ២០:២៨; លក ១២:៣៧

*១៣:៦ ១៣:៦៖ មោលាស «អើកោរាញ មោអោសទីមៃឆើមរាវជ៝ង់គ៝ប់!»

*១៣:៦ ១៣:៦៖ មថ ៣:១៤

*១៣:១០ ១៣:១០៖ យហ ១៥:៣

*១៣:១១ ១៣:១១៖ យហ ៦:៦៤, ៧០-៧១

*១៣:១៣ ១៣:១៣៖ មថ ២៣:៨-១០

*១៣:១៤ ១៣:១៤-១៥៖ ១យហ ២:៦; ៣:១៦

†១៣:១៨ ១៣:១៨៖ នម ៤១:៩

*១៣:១៩ ១៣:១៩៖ យហ ១៤:២៩

*១៣:២០ ១៣:២០៖ មថ ១០:៤០-៤២

*១៣:២៣ ១៣:២៣៖ យហ ១៩:២៦; ២០:២; ២១:៧, ២០, ២៤

*១៣:២៩ ១៣:២៩៖ យហ ១២:៦

*១៣:៣២ ១៣:៣២៖ យហ ១៧:១-៥

*១៣:៣៣ ១៣:៣៣៖ យហ ៧:៣៤-៣៦

*១៣:៣៤ ១៣:៣៤-៣៥៖ រម ១២:១០

*១៣:៣៤ ១៣:៣៤៖ យហ ១៥:១២, ១៧; កាល ៦:២; ១យហ ២:៧-៨; ៣:១៦-១៨; ៤:៩-១១; ២យហ ១:៥

*១៣:៣៦ ១៣:៣៦៖ យហ ២១:១៨-១៩

*១៣:៣៨ ១៣:៣៨៖ យហ ១៨:២៧