នាវកោរាញឞ្រាសងើយតានាវងើយឞូន៝ង លូកា ២១

២១

ឞូអូរនទ្រោតេៈញហើរ

(មក ១២:៤១-៤៤)

១ នោកឞ្រាសយេឆូ គុតាជ៝ង់គូងញីសជានឞ្រាស ពាង់ងើកឆៃមពោលនទ្រ៝ង់តេៈព្រាក់តាត្រោមហុបញហើរមាកោរាញឞ្រាស។ ២ ជេសរីពាង់ឆៃទូហ្វេឞូអូរនទ្រោខឹតឆាយអ៝អាច ហាន់តេៈព្រាក់ដេៈទើមឞារមល៝ម់កាក់ជេៈ*តាត្រោមហុបអីនៃដ៝ង់។ ៣ ឞ្រាសយេឆូ លាស៖ “គ៝ប់មឞើសនហេលនានេៈងាន់មាខាន់អៃមៃ កោរាញឞ្រាសកើបឞូអូរនទ្រោអ៝អាចអីអ្យាតេៈព្រាក់អ៝ក់រាលាវទឹងលែៈឞូ‌ ៤ យ៝រលាសទឹងលែៈមពោលអីនៃ ព្រាក់អីខាន់ពាង់តេៈតាត្រោមហុបនើស ឆ៝ៈព្រាក់រាមែសឞើសឆាក់ខាន់ពាង់នើម។ ល៝ង់អីឞូអូរនទ្រោទែនៃ ពាង់ឞូនុយ្សអ៝អាចហោងាន់ ឞ៝លលាសព្រាក់នៃគៃមាឆ្យាម់នាវរេសពាង់នើមកាដោយលែៈ ពាង់ហោមឆ៝ៈលែៈផ្យៅតេៈញហើរមាកោរាញឞ្រាសដ៝ង់”។*

នាវលើសហេងញីសជានឞ្រាស នទ្រែលមានាវគែសតានារងគ្លែៈទុតតៃ

(មថ ២៤:១-១៤; មក ១៣:១-១៣)

៥ ជេសរីគែសឞូនុយ្សអាបាៈរានេមានាវអ្វែសញីសជានឞ្រាស អីឞូជានមាលុអ្វែស នទ្រែលមាព្លានទើអេងៗអីឞូញហើរអ៝ន់មាកោរាញឞ្រាស ឞ្រាសយេឆូ លាស៖ ៦ “លែៈនទើលែៈជៃអីខាន់អៃមៃឆៃតាអ្យា តានារជឹតនាប់តៃឞូមរាលើសរាល៝ម់លែៈផ្យៅរ៝ មោហោមអោសគែសទូមល៝ម់លុឞ្ល៝នតឹមរាទាប់ជឹត†”។* ៧ ឞូអោបមាឞ្រាសយេឆូ ៖ “ហើយនើមនតី! ទាសហោមជ៝ៈនារអីនៃមេស? លាសនទ្រីម៝សនទើមឞេនអ៝ន់មាហេនគឹតលាសនារអីនៃឞើយត៝ត់?” ៨ ឞ្រាសយេឆូ អើសមាខាន់ពាង់៖ “ញជ្រាង់ងាន់ហ៝ម់ លើយអោសអ៝ន់ឞូនទើមមាខាន់អៃមៃ យ៝រលាសនារជឹតនាប់តៃគែសអ៝ក់ឞូនតូបរាញាគ៝ប់ ខាន់ពាង់លាស៖ «គ៝ប់អ្យាឞ្រាសក្រីស ហែស»។ មោលាសខាន់ពាង់លាស៖ «នារងគ្លែៈទុតឞើយត៝ត់ជេស»។ លើយអោសអ្យាត់មពោលអីនៃ។* ៩ លាសខាន់អៃមៃតាង់ឞូងក៝ចគែសនាវតឹមលើសតឹមឆ្រែស មោលាសគែសនាវអុសអាស លើយក្លាចរាវៃអោស យ៝រលាសលែៈនាវអីនៃពាង់ល៝រគែសងាន់រ៝ យើនមានារងគ្លែៈទុតនែសនតូអេហ៝ៈត៝ត់គើញរ៝អោស”។

១០ ឞ្រាសយេឆូ លាសជឹត៖ “អេល៝រមានារអីនៃ ទូមពោលតឹមលើសដាសទូមពោលអេងជឹត ទូឞ្រីទាកតឹមលើសដាសទូឞ្រីទាកអេងជឹត។ ១១ តានតុកអេងៗ គែសងគារ់នែសនតូទុតទាង់ គែសនាវជីឆ៝ត់ជីង៝តក្វ៝ង់ គែសនាវជីខឹតរុងខឹតរាចាៈ នអ៝ប់មាគែសនាវត៝ត់អេងៗជានអ៝ន់គែសនាវក្លាចរាវៃ នទ្រែលមាគែសនទើមឞេនក្វ៝ង់ងាន់អីឞូមោវៃឆៃអោសតាកាលើត្រោករី។ ១២ អេល៝រមាគែសទឹងលែៈនាវអីនៃ គែសឞូជានជេរមាខាន់អៃមៃ ឞូញុប ឞូញជុនខាន់អៃមៃតាញីសរាបុនផូងឞ៝ន់គៃមាផាតទោយ្ស តេៈខាន់អៃមៃតាត្រោមនទ្រូង។ ឞូញជុនខាន់អៃមៃមាកាដាច់ មាកោរាញក្វ៝ង់ គៃមាតេៈទោយ្សខាន់អៃមៃយ៝រមាអ្យាត់តឹងគ៝ប់ទើម។* ១៣ យើនមានាវអីនៃព្លាច់អ៝ន់មាខាន់អៃមៃគែសមឞើសនាវមហែមហានអ្វែសមាខាន់ពាង់ដ៝ង់។* ១៤ អ៝ន់ខាន់អៃមៃគែសនូយ្សនហ៝ម់ន៝ប់ហ៝ៈ លើយអោសរាវៃនាវល៝រគៃមាតឹមអើសដាសនាវខាន់ពាង់នតោន។* ១៥ យ៝រមានោកនៃគ៝ប់អ៝ន់មាខាន់អៃមៃគែសនាវមាអើស នទ្រែលមាគែសនាវមឹនគឹតឞ្លាវ មោអោសអ៝ន់ទឹងលែៈមពោលតឹមរាទ៝ង់ទើយតឹមអើសទើយតឹមរាលាច់ដាសខាន់អៃមៃ។ ១៦ ឞ៝លលាសមេៈឞឹ អ៝សនោ នទុលមពោល នទ្រែលមាមឹតជាង់ខាន់អៃមៃនើមកាដោយលែៈ ញជុនខាន់អៃមៃមាខាន់ពាង់ ជេសរីខាន់អៃមៃអាបាៈឞូងខឹតលើយដ៝ង់។* ១៧ នោកនៃគែសឞូនុយ្សអ៝ក់ងាន់ឞ្យាញ់មាខាន់អៃមៃងាន់ យ៝រមាខាន់អៃមៃតឹងឆាក់គ៝ប់។* ១៨ យើនមាខាន់ពាង់មោគែសនាវទើយដាសហ្វេងខាន់អៃមៃ មោគែសនាវទើយដាសនាវរេសនហ៝រ៝ខាន់អៃមៃ។‡* ១៩ លាសខាន់អៃមៃទាង់អ៝ត់ដាសទឹងលែៈនទើអីនៃ មោឞាសញឆីងមាគ៝ប់ ខាន់អៃមៃមរាគែសនាវរេសនហ៝រ៝”។*

ឞ្រាសយេឆូ ងើយល៝រនាវលើសហេងប៝នយេរូឆាលឹម

(មថ ២៤:១៥-២១; មក ១៣:១៤-១៩)

២០ “លាសខាន់អៃមៃឆៃតាហែនហាន់ញជ្វែងជុមប៝នក្វ៝ង់យេរូឆាលឹម អ៝ន់ខាន់អៃមៃគឹតលាសប៝នអីនៃឞើយមាហេងជេស។ ២១ នោកនៃអ៝ន់ឞូនុយ្សអីគុតាឞ្រីយូដា ទូញច្វាត់ក្រាបតាយោក ឞូនុយ្សអីគុតាប៝នយេរូឆាលឹម រីញច្វាត់លោសឞើសប៝ននៃ ឞូនុយ្សអីគុឞើសទីសប៝ននៃលើយអោសហាន់លាប់តាត្រោមប៝ន។ ២២ យ៝រលាសនោកនៃរ៝កោរាញឞ្រាសក្លាប់នទាង់តេៈទោយ្សប៝នលានពាង់នើម គៃមាតឹមទីដាសនាវលែៈគែសញចីសតាឆ៝ម់បុតនាវកោរាញឞ្រាសងើយ។* ២៣ នោកនៃដ៝ង់ឞូអូរនត្រែវ ឞូអូរមពូត៝សក៝នគែសនាវរេសរាញាល់ហោងាន់ យ៝រលាសគែសនាវជេររាវៃទុតហោងាន់តាឞ្រីអីនៃ កោរាញឞ្រាសតេៈទោយ្សមាផូងប៝នលាននៃ។* ២៤ គែសអ៝ក់ឞូនុយ្សចោតខឹតយ៝រមាដាវ នទ្រែលមាគែសអ៝ក់ឞូវែងគុជានទឹកតាឞ្រីអេងៗ។ ផូងឞ្រីអេងៗអីមោទីផូងឞ៝ន់រីជ៝តមពែតប៝នយេរូឆាលឹម នហ៝មាត៝ត់ទីនារកោរាញឞ្រាសអ៝ន់មាផូងអីនៃ”។

នាវឞ្រាសយេឆូ ព្លឹវាច់

(មថ ២៤:២៩-៣១; មក ១៣:២៤-២៧)

២៥ “នោកនៃគែសនទើឞូមោវៃឆៃតានារ តាខៃ នទ្រែលមាតាមាញ់មឞីងរី។ លែៈឞូនុយ្សតានែសនតូគែសនាវជេររាវៃ មោហោមអោសឞ្លាវមឹន ត៝ត់មាតាង់នតែសរាឞុសទាកវាច់ទាកវារ់ នទ្រែលមារាឞុសទុតក្វ៝ង់រី។* ២៦ ឞូនុយ្សតានែសនតូក្លាចញឆ៝រ់ ទោលគុមឹននាវត៝ត់តានែសនតូអ្យា លែៈនទើតាកាលើត្រោកគែសងគើដាត់ញហីងញហាង។ ២៧ នោកនៃឞូឆៃគ៝ប់អីក៝នឞូនុយ្សតាៈឞើសកោរាញឞ្រាសហាន់រ៝ៈនទ៝រ់តុកនអ៝ប់មាគែសនាវទើយ នទ្រែលមានាវច្រេកលើបទុតហោ។* ២៨ ទោលនាវអីនៃនតើមគែស អ៝ន់ខាន់អៃមៃទ៝ក់ហ៝ម់ងគើរអ្វាញ់ អ៝ន់គែសនូយ្សនហ៝ម់ឞាញ់ យ៝រលាសនោកកោរាញឞ្រាសរាក្លាយ្សខាន់អៃមៃឞើសទឹងលែៈនាវជេរនើសឞើយមាត៝ត់រ៝”។*

ឞ្រាសយេឆូ ងើយនាវនតឹតមាតើមរាវី

(មថ ២៤:៣២-៣៥; មក ១៣:២៨-៣១)

២៩ ជេសរីឞ្រាសយេឆូ ងើយនតឹតមាតើមរាវី ពាង់លាស៖ “អ៝ន់ខាន់អៃមៃអ្វាញ់តើមរាវី នទ្រែលមាទឹងលែៈតើមឆី។ ៣០ លាសខាន់អៃមៃឆៃនហាពាង់នតើមចាត់ងកុរ ខាន់អៃមៃគឹតលាសខៃមីសឞើយមាត៝ត់រ៝§។ ៣១ តឹមឞានដ៝ង់ ទោលខាន់អៃមៃឆៃលែៈនាវអីនៃលែៈត៝ត់ អ៝ន់ខាន់អៃមៃគឹតលាសនោកកោរាញឞ្រាសម៝ត់អ្វាញ់ទឹងលែៈឞូនុយ្សងាន់ឞើយមាត៝ត់រ៝។ ៣២ គ៝ប់លាសនហេលនានេៈងាន់មាខាន់អៃមៃ លែៈនាវអ្យាពាង់ត៝ត់ ទោលឞូនុយ្សតារានោកអាបៃអ្យាហោមរេស*ទាទេ។ ៣៣ ត្រោកនែសនតូមរារ៝សលេករ៝ យើនមានាវគ៝ប់ងើយមោអោសឞ្លាវរ៝សលេក ហោមគែសទឹងលែៈងាន់”។*

នាវញជ្រាង់ឆាក់ជាន់

៣៤ “អ៝ន់ខាន់អៃមៃគុញជ្រាង់! លើយអោសអ៝ន់នូយ្សនហ៝ម់ខាន់អៃមៃពើសមានទើព៝ល់រាម់មអាក ពើសមាញុលនទ្រាញ់ មោលាសពើសមាមឹនរាវៃមានាវរេស ក្លាចលាសនារគ៝ប់ព្លឹវាច់នៃខាន់អៃមៃតឹមឞានមាគែសទាក់យ៝រមាខាន់អៃមៃមោគែសគុញជ្រាង់។* ៣៥ នារគ៝ប់ព្លឹវាច់តាអ្យា មោគែសអោសទូហ្វេឞូនុយ្សគឹតល៝រ ទឹងលែៈឞូនុយ្សលាមនែសនតូអ្យាគែសទាក់ទាទេ។ ៣៦ ញជ្រាង់ នទ្រែលមាមឞើសឆើមបាបើហ៝ម់ គៃមាគែសឆ្វានទើយអ៝ត់មាលែៈនាវត៝ត់អីនៃ នទ្រែលមាទើយទ៝ក់ន៝ប់មោគែសក្លាចតានាប់គ៝ប់អីក៝នឞូនុយ្សតាៈឞើសកោរាញឞ្រាស”។*

៣៧ អាប់នារឞ្រាសយេឆូ គុនតីឞូតាជ៝ង់គូងញីសជានឞ្រាស តាមាង់ពាង់ហាន់គុតាយោកតើមអោលីវ ។* ៣៨ អើមអោយផូងប៝នលានហាន់អ្យាត់នាវពាង់នតីតាជ៝ង់គូងញីសជានឞ្រាស។

*២១:២ ២១:២៖ «ឞារមល៝ម់កាក់ជេៈ» មោលាស «ឞារលែបតា »។ ១០០ កាក់ជេៈអ្យាជេងខ្លៃងខោមមាឞូជានការទូនារ។

*២១:៤ ២១:៤៖ ២កោ ៨:១២

†២១:៦ ២១:៦៖ ឞ្រាសយេឆូ ងើយនាវអីនៃក្លាប់លាសតានាម់ ៣០។ ត៝ត់នាម់ ៧០ ផូងរោម លើសហេងយេរូឆាលឹម នទ្រែលមាញីសជានឞ្រាសទីកើតឞ្រាសយេឆូ លាសតាអ្យា។

*២១:៦ ២១:៦៖ លក ១៩:៤៣-៤៤

*២១:៨ ២១:៨៖ ២តេ ២:៩-១០; ១យហ ២:១៨

*២១:១២ ២១:១២៖ ការ ៨:៣; ១២:១-៤; ១៨:១២-១៧

*២១:១៣ ២១:១៣៖ ការ ១៦:២៣-៣៤; ផល ១:១២-១៤

*២១:១៤ ២១:១៤-១៥៖ ការ ៦:១០

*២១:១៦ ២១:១៦៖ លក ១២:៥២-៥៣

*២១:១៧ ២១:១៧៖ ២តម ៣:១២

‡២១:១៨ ២១:១៨៖ តានាវងើយគ្រែក លាស៖ «មោអោសគែសឆ៝ក់ទូរាឆែតាឞោកខាន់អៃមៃរ៝សហេង»។

*២១:១៨ ២១:១៨៖ លក ១២:៧

*២១:១៩ ២១:១៩៖ នតម ២:៧, ១១, ១៧

*២១:២២ ២១:២២៖ យោអ ១:១៥

*២១:២៣ ២១:២៣៖ លក ២៣:២៩

*២១:២៥ ២១:២៥-២៦៖ នតម ៦:១២-១៧

*២១:២៧ ២១:២៧៖ ដាន ៧:១៣

*២១:២៨ ២១:២៨៖ ២តេ ១:៥-១០; យាក ៥:៨

§២១:៣០ ២១:៣០៖ តានាវងើយគ្រែក លាស៖ «ខៃទោសឞើយមាត៝ត់» យ៝រលាសតាឞ្រីអីឆ្រាអែល តើមឆីចាត់ងកុរនោកខៃទោសឞើយមាត៝ត់។

*២១:៣២ ២១:៣២៖ មោលាស «ទោលហោមគែសឞូនុយ្សផូងអីឆ្រាអែល »។

*២១:៣៣ ២១:៣៣៖ អេឆា ៤០:៨; ៥១:៦

*២១:៣៤ ២១:៣៤៖ លក ៨:១៤; ១២:១៩-២០; ១៧:២៦-៣០

*២១:៣៦ ២១:៣៦៖ រម ១២:១២; ១ពេ ៤:៧; ២ពេ ៣:១១-១៣

*២១:៣៧ ២១:៣៧៖ លក ១៩:៤៧