នាវកោរាញឞ្រាសងើយតានាវងើយឞូន៝ង មាថាយ ១០

១០

ឞ្រាសយេឆូ អ៝ន់នាវទើយមាមពោលកោរាញអ៝សម៝ន

(មក ៣:១៣-១៩; លក ៦:១២-១៦)

១ ជេសរីឞ្រាសយេឆូ ក្វាល់ ១២ នុយ្សមពោលកោរាញអ៝សម៝នពាង់ នហ៝មាពាង់អ៝ន់នាវទើយមាខាន់ពាង់ ទើយមព្រើសឞ្រាសអ្យើសលោសឞើសឞូនុយ្ស នទ្រែលមាទើយជានឞាសទឹងលែៈនាវជីអាប់នតីលដ៝ង់។ ២ ១២ នុយ្សមពោលកោរាញអ៝សម៝ននៃ តានៃគែសល៝រឞូ ឆីមោន អីឞូក្វាល់ពេត្រោស ដ៝ង់ ជេសរីគែសអ៝សពាង់អ៝ន់ទ្រេ គែសយាកើ នទ្រែលមាអ៝សពាង់យោហាន អីក៝នឆេបេដេ ‌* ៣ គែសផីលីប គែសបារថោលោមេ គែសថោមាស គែសមាថាយ អីឞូនុយ្សក៝ប់ឆ៝ៈព្រាក់ប៝នលានមាអ៝ន់កោរាញម៝ត់អ្វាញ់ គែសយាកើ អីក៝នអាល់ផាយ គែសថាដេ ‌* ៤ គែសឆីមោន អីឞូនុយ្សផូងកានាអាន * នទ្រែលមាគែសយូដាស-អីឆាការីយោត ឞូនុយ្សអីលែវឞូហាន់ញុបឞ្រាសយេឆូ ។*

ឞ្រាសយេឆូ អ៝ន់មពោលកោរាញអ៝សម៝នពាង់ហាន់មឞើសងក៝ចនាវមហែមហានអ្វែស

៥ ជេសរីឞ្រាសយេឆូ ដាៈ ១២ នុយ្សមពោលកោរាញអ៝សម៝នអីនៃហាន់តាប៝នអេងៗ នហ៝មានតិញមាខាន់ពាង់៖ “ខាន់មៃលើយហាន់អោសតាផូងអីមោទីផូងអីឆ្រាអែល លើយអោសលាប់តាប៝នឞ្រីឆាមារី ‌ ៦ យើនមាអ៝ន់ខាន់មៃហាន់តាផូងអីឆ្រាអែល ទើម ខាន់ពាង់តឹមឞានមាផូងឞែឞ្យាប់លែៈហ្យើត។* ៧ អ៝ន់ខាន់មៃមឞើសងក៝ច៖ «នាវកោរាញឞ្រាសម៝ត់អ្វាញ់លែៈឞើយត៝ត់»។* ៨ អ៝ន់ខាន់មៃជានឞាសឞូនុយ្សជីក្វែត ឞូនុយ្សខឹតជានអ៝ន់ទ៝ក់រេស ឞូនុយ្សផុងឆាជានអ៝ន់ឞាសអ៝ន់ក្ល៝ស នទ្រែលមាមព្រើសឞ្រាសអ្យើសអ៝ន់ទូលោសឞើសឞូនុយ្ស។ លើយអោសឆ៝ៈខ្លៃឞើសឞូ យ៝រលាសនាវទើយខាន់មៃនើសគែសទើមដ៝ង់។* ៩ មោអ៝ន់អោសញអោតព្រាក់ ឞ៝លលាសដេៈកាដោយ†តាទុងខាន់មៃ។ ១០ លើយចែងទុងទោលខាន់មៃឞ្រោៈប៝នអេងៗ លើយអោសញអោតលែវខ៝អាវនតោជ៝តអាអេងជឹតទើនអីគែសញឆ៝សតាឆាក់រីហ៝ៈ លើយញអោតម៝ង់ជ្រា។ យ៝រលាសទីមាឞូនុយ្សអីជានការមាកោរាញឞ្រាសឆ៝ៈទើននទើអុចតានាវរេសពាង់តាៈឞើសឞូនុយ្សអីពាង់កើលនៃ។* ១១ នោកខាន់មៃលាប់តាប៝នក្វ៝ង់ មោលាសប៝នជេៈ អ៝ន់ខាន់មៃជ៝យឞូនុយ្សអីទីមាខាន់មៃគុនទ្រែល ជេសរីគុតាជៃពាង់នហ៝មាត៝ត់នារខាន់មៃលោសឞើសនតុកនៃ។ ១២ នោកខាន់មៃលាប់តាជៃឞូនុយ្សអីនៃ អ៝ន់ខាន់មៃលាស៖ «អ៝ន់គែសនាវដាប់មពាន់មាខាន់អៃមៃ‡»។ ១៣ លាសតាជៃអីនៃទីឆ៝ៈទើននាវដាប់មពាន់អីនៃ កោរាញឞ្រាសមរាអ៝ន់កើតនៃងាន់រ៝។ លាសមោទីឆ៝ៈទើន កោរាញឞ្រាសមោអ៝ន់អោស យើនមាខាន់មៃហោមគែសនាវដាប់មពាន់។ ១៤ លាសឞូមោអោសរ៝មខាន់មៃ មោអ្យាត់អោសនាវខាន់មៃ នោកខាន់មៃលោសឞើសប៝នឞើសជៃនៃ អ៝ន់រាតោសនែសមោយឞើសជ៝ង់ខាន់មៃនើម គៃមាញហើលាសឞូនុយ្សអីនៃកោរាញឞ្រាសតេៈទោយ្ស។* ១៥ គ៝ប់លាសនហេលនានេៈងាន់មាខាន់មៃ ឞូនុយ្សតាឞ្រីប៝នឆោដុម ប៝នកោមោរា អីជានតីសទុតហោកាល់អែនើស នទ្រីទឹងកោរាញឞ្រាសទែលើសហេងខាន់ពាង់មាអុញឞើសកាលើត្រោក ខាន់ពាង់អីនៃហោមអែគែសទោយ្សថើលមាដាសឞូនុយ្សតាប៝នអីនៃ តានារកោរាញឞ្រាសផាតទោយ្សលាមនែសនតូ”។*

នាវរេសរាញាល់

(មក ១៣:៩-១៣; លក ២១:១២-១៧)

១៦ “គ៝ប់ដាៈខាន់មៃហាន់តាប៝នផូងអីឆ្រាអែល តឹមឞានមាដាៈឞែឞ្យាប់គុតាងក្លាងផូងឆ៝ឞ្រី។ លាសនទ្រីអ៝ន់ខាន់មៃឞ្លាវញជ្រាង់តឹមឞានមាឞេស មលែសតឹមឞានមាព្លុកជេងឆ្យុមទូនតីលអីមោជានតីស។* ១៧ អ៝ន់ឞ្លាវញជ្រាង់មាឞូនុយ្ស យ៝រលាសឞូមរាញុបញជុនខាន់មៃអ៝ន់មាមពោលកោរាញជានការផូងអីឆ្រាអែល ជេសរីឞូមរារាពាត់ខាន់មៃមាម៝ង់រាឆែតាត្រោមញីសរាបុនខាន់ពាង់។* ១៨ ឞូមរាញជុនខាន់មៃអ៝ន់មាកោរាញក្វ៝ង់ នទ្រែលមាញជុនខាន់មៃមាកាដាច់ គៃមាផាតទោយ្សខាន់មៃអាចមាតឹងគ៝ប់។ ជេសរីខាន់មៃទើយងក៝ចនាវញឆីងមាគ៝ប់អ៝ន់មាខាន់ពាង់ អ៝ន់មាផូងអីមោទីផូងអីឆ្រាអែល ដ៝ង់។* ១៩ នោកឞូញុបញជុនខាន់មៃ លើយអោសខាន់មៃរាវៃនាវមឞើសងើយមាឞូ យ៝រលាសកោរាញឞ្រាសឆើមអ៝ន់នាវមឞើសងើយមាខាន់មៃតានោកនៃ។* ២០ មោទីខាន់មៃនើមអោសមឞើសងើយ ឞ្រាសហ្វេងអ្វែសអីហ្វេងកោរាញឞ្រាសឞឹខាន់មៃនើមឆើមងើយអ៝ន់មាខាន់មៃ។ ២១ អ៝សមានោ ឞឹមាក៝នមរាតឹមរាលាម់ញុបញជុនអ៝ន់ឞូងខឹត នទ្រែលមាអីក៝នៗលែវឞាល់តឹមរាទ៝ង់ដាសមេៈឞឹ នហ៝មាញជុនអ៝ន់ឞូងខឹតលើយដ៝ង់។ ២២ យ៝រមាខាន់មៃញឆីងមាគ៝ប់ នទ្រីទឹងអ៝ក់ឞូនុយ្សមរាឞ្យាញ់មាខាន់មៃ។ យើនមាឞូម៝សអីទើយអ៝ត់នហ៝មាត៝ត់លោច កោរាញឞ្រាសមរារាក្លាយ្សពាង់អីនៃ។* ២៣ លាសឞូជានជេរខាន់មៃតាទូប៝ន អ៝ន់ខាន់មៃញច្វាត់ទូតាប៝នអេងជឹត។ គ៝ប់លាសនហេលនានេៈងាន់មាខាន់មៃ ខាន់មៃហាន់អេហ៝ៈអោសលាមប៝នទឹងលែៈតាឞ្រីអីឆ្រាអែល គ៝ប់អីក៝នឞូនុយ្សតាៈឞើសកោរាញឞ្រាសព្លឹលែៈត៝ត់§”។*

២៤ “មោគែសអោសផូងនតីគឹតរាលាវមានើមនតី មោគែសអោសទឹកក្វ៝ង់រាលាវមាកោរាញពាង់នើម។ ២៥ លាសផូងនតីលែៈឞ្លាវតឹមឞានមានើមនតីខាន់ពាង់ លាសទឹកលែៈតឹមឞានមាកោរាញពាង់នើម លាសនទ្រីលែៈគាប់ហើយ្ស។ លាសឞូនុយ្សតើមជៃឞូក្វាល់៖ «បេលឆេបូល »* លាសនទ្រីទឹងលែៈឞូនុយ្សអីគុតាជៃពាង់នៃ រាលាវមានៃជឹតអ្យើសឞូក្វាល់ខាន់ពាង់”។*

លើយតាក្លាចឞូនុយ្ស

២៦ “លើយអោសក្លាចផូងអីជានជេរនៃ យ៝រលាសគែសទូនារជឹតនាប់តៃកោរាញឞ្រាសមរាអ៝ន់ឞូឆៃទឹងលែៈនទើអីឞូនុយ្សហោមមពោន។ កោរាញឞ្រាសអ៝ន់ឞូគឹតទាទេដ៝ង់ ទឹងលែៈនទើអីឞូនុយ្សមោអុចអ៝ន់ឞូគឹត។ ២៧ លាសនទ្រីម៝សនទើគ៝ប់លាសខាន់មៃតានតុកង៝ អ៝ន់ខាន់មៃមឞើសងក៝ចហ៝ម់តានតុកអាង។ ម៝សនទើគ៝ប់ងើយឆ្វីសតាតោរខាន់មៃ អ៝ន់មឞើសងក៝ចហ៝ម់តាកាលើច៝រជៃគៃមាអ៝ក់ឞូនុយ្សតាង់។ ២៨ លើយក្លាចអោសមានើមទើយងខឹតរាង្លៃឆាក់ទើម យើនមាមោទើយអោសងខឹតហ្វេង អ៝ន់ខាន់មៃក្លាចកោរាញឞ្រាសហ៝ៈ យ៝រលាសពាង់ទើយអ៝ន់ហ្វេង នទ្រែលមារាង្លៃឆាក់លើសញអ្យើសតានទ្រូងអុញ។* ២៩ ឞូវៃតាច់ឞារមល៝ម់ឆ្យុមរាលែវខ្លៃទូមល៝ម់កាក់ជេៈ† យើនមាឞ៝លលាសថ៝កកើតនៃ លាសកោរាញឞ្រាសឞឹខាន់មៃមោអ៝ន់ មោគែសអោសទូមល៝ម់ឆ្យុមរាលែវតុបតានែស។ ៣០ ឞ៝លលាសទឹងលែៈឆ៝ក់តាឞោកខាន់មៃនើម កោរាញឞ្រាសលែៈជេសកើបទឹងលែៈដ៝ង់។ ៣១ កើតនទ្រីលើយក្លាចអោស យ៝រលាសកោរាញឞ្រាសកើបខាន់មៃខ្លៃងាន់រាលាវមាឆ្យុមរាលែវទូផូងជឹត”។*

នាវឞូមឞើសងក៝ចឞ្រាសយេឆូ

៣២ “ឞូម៝សអីមឞើសមាឞូលាសពាង់តឹងគ៝ប់គ៝ប់មរាមឞើសពាង់អីនៃជេងអ៝សម៝នគ៝ប់តាឞើសនាប់មាត់ឞឹគ៝ប់តាកាលើត្រោក។ ៣៣ យើនមាឞូម៝សអីរាលាច់មាឞូលាសមោតឹងគ៝ប់គ៝ប់មោដ៝ង់មឞើសពាង់អីនៃជេងអ៝សម៝នគ៝ប់តាឞើសនាប់មាត់ឞឹគ៝ប់តាកាលើត្រោក”។

តឹមងខាសមពោលអាចមានាវញឆីង

៣៤ “លើយមឹនអោសគ៝ប់វាច់តានែសនតូអ្យាលែវនាវដាប់មពាន់។ គ៝ប់វាច់តាអ្យាតឹមឞានមាញអោតដាវ លែវនាវតឹមរាទ៝ង់។ ៣៥ គ៝ប់វាច់អ៝ន់៖

«ក៝នឞូក្លោតឹមងខាសដាសឞឹពាង់‌

ក៝នឞូអូរតឹមងខាសដាសមេៈពាង់‌

មាន់អ៝ន់តឹមងខាសដាសមេៈព៝ពាង់នើមដ៝ង់។*

៣៦ ឞូនុយ្សគុនទ្រែលទូជៃ ជេងតឹមរាលាង់នទ្រាង់ខាន់ពាង់នើម»†”។

អ៝សម៝នឞ្រាសយេឆូ នហេលនានេៈ

៣៧ “ឞូម៝សរ៝ង់មាមេៈឞឹពាង់នើមអ៝ក់រាលាវមារ៝ង់គ៝ប់ ពាង់អីនៃមោអោសទីជេងអ៝សម៝នគ៝ប់។ ឞូម៝សរ៝ង់មាក៝នឞូអូរក៝នឞូក្លោពាង់នើមអ៝ក់រាលាវមារ៝ង់គ៝ប់ ពាង់អីនៃមោដ៝ង់ទីជេងអ៝សម៝នគ៝ប់។* ៣៨ ឞូម៝សមោតូយឆីតឹមរាកាង់ពាង់នើមឞ្រោៈតឹងគ៝ប់ ជេងគែសនាវខ្លៃមោអ្យាត់ទឹងលែៈនាវកោរាញឞ្រាសដាៈ ឞ៝លលាសត៝ត់ខឹតឆាក់កាដោយ ពាង់អីនៃមោអោសទីជេងអ៝សម៝នគ៝ប់។* ៣៩ ជេសរីឞូម៝សព្រាប់រាវានមានាវរេសឆាក់ពាង់នើម ពាង់តៃខឹតនហ៝រ៝ យើនមាឞូម៝សខឹតអាចមាតឹងគ៝ប់ ពាង់តៃរេសនហ៝រ៝”។

នាវងខោមមាផូងអីរ៝មអ៝សម៝នឞ្រាសយេឆូ

៤០ “ឞូម៝សរ៝មខាន់មៃ តឹមឞានមាពាង់រ៝មគ៝ប់ ឞូម៝សរ៝មគ៝ប់តឹមឞានមាពាង់រ៝មកោរាញឞ្រាសតើមញជ្វាល់គ៝ប់ដ៝ង់។* ៤១ ឞូម៝សរ៝មទូហ្វេឞូនុយ្សនតើយ្សនាវងើយកោរាញឞ្រាស អាចមាពាង់ជេងឞូនុយ្សនតើយ្សនាវងើយកោរាញឞ្រាស ឞូនុយ្សអីនៃគែសនទើងខោមតឹមឞានមាឞូនុយ្សនតើយ្សនាវងើយកោរាញឞ្រាសដ៝ង់។ ឞូម៝សរ៝មទូហ្វេឞូនុយ្សឆ៝ង់ អាចមាពាង់ជេងឞូនុយ្សឆ៝ង់ ឞូនុយ្សអីនៃគែសនទើងខោមតឹមឞានមាឞូនុយ្សឆ៝ង់ដ៝ង់។ ៤២ ឞូម៝សអ៝ន់ទាកនអីកទូកែវមាទូហ្វេឞូជេៈ អាចមាឞូជេៈអីនៃជេងអ៝សម៝នគ៝ប់គ៝ប់លាសនហេលនានេៈងាន់មាខាន់មៃ នាវងខោមមាឞូនុយ្សអីនៃមោរ៝សអោស”។*

*១០:២ ១០:២៖ មថ ១៦:១៨

*១០:៣ ១០:៣៖ មថ ៩:៩

*១០:៤ ១០:៤៖ ឞូនុយ្សអីឞូក្វាល់«ផូងកានាអាន »ខាន់ពាង់ផូងអីឆ្រាអែល ដ៝ង់ អុចមព្រើសផូងរោម ទូឞើសឞ្រីផូងអីឆ្រាអែល ។ ឞូក្វាល់លាសខាន់ពាង់«គើយ្ស»ដ៝ង់។

*១០:៤ ១០:៤៖ មថ ២៦:៤៧-៥០

*១០:៦ ១០:៦៖ មថ ១៥:២៤

*១០:៧ ១០:៧៖ មថ ៤:១៧, ២៣

*១០:៨ ១០:៨៖ មក ១៦:១៧-១៨

†១០:៩ ១០:៩៖ មោលាស «មាយ្ស ព្រាក់ ល៝យ្សកោង»។ តានោកនៃឞូជានព្រាក់កាក់មាមាយ្ស មាព្រាក់ មាល៝យ្សកោង។ មាល៝យ្សកោងគែសនាវខ្លៃដេៈតាន៝ម់ឞូ។

*១០:១០ ១០:១០៖ ១កោ ៩:៤, ១៤; ១តម ៥:១៨

‡១០:១២ ១០:១២៖ ផូងអីឆ្រាអែល វៃអោបនាវអ្វែសលាង់កើតនអៃ។

*១០:១៤ ១០:១៤៖ ការ ១៣:៥១; ១៨:៦

*១០:១៥ ១០:១៥៖ នន ១៩:២៤-២៥

*១០:១៦ ១០:១៦៖ រម ១៦:១៩; អេផ ៥:១៥

*១០:១៧ ១០:១៧៖ ការ ៥:៤០; ៧:៥៧-៥៨; ២កោ ១១:២៤

*១០:១៨ ១០:១៨៖ ការ ២៥:២៣; ២៧:២៤

*១០:១៩ ១០:១៩-២០៖ យហ ១៥:២៦; ការ ៤:៨, ១៣; ១កោ ២:៤

*១០:២២ ១០:២២៖ មថ ៥:១១-១២; យហ ១៥:១៨-១៩

§១០:២៣ ១០:២៣៖ «គ៝ប់អីក៝នឞូនុយ្ស...ព្លឹលែៈត៝ត់» នាវអីនៃទើយវ៝ត់ព្វាន់នតីល ១. ងើយមានារឞ្រាសយេឆូ ទ៝ក់រេស ២. ងើយមានារឞ្រាសយេឆូ អ៝ន់ឞ្រាសហ្វេងអ្វែសគុតាផូងអ៝សម៝ន(ការ ២:១-៤) ៣. ងើយមានារកោរាញឞ្រាសតេៈទោយ្សឞ្រីយូដា អ៝ន់ផូងរោម ងគ្រ៝សលើយប៝នយេរូឆាលឹម តានាម់ ៧០ ៤. ងើយមារានោកងគ្លែៈទុតនែសនតូ។

*១០:២៣ ១០:២៣៖ ការ ៨:១; មថ ១៦:២៨

*១០:២៥ ១០:២៥៖ «បេលឆេបូល »រាញាទូនតីលឆាតាង់ អីកោរាញមពោលឞ្រាសអ្យើស។

*១០:២៥ ១០:២៥៖ មថ ៩:៣៤; ១២:២៤

*១០:២៨ ១០:២៨៖ នម ៥៦:៤; ហេឞ ១០:៣១

†១០:២៩ ១០:២៩៖ «ទូមល៝ម់កាក់ជេៈ» មោលាស «ទូអាឆារីអ៝ន់ »។ ព្រាក់ ១៦ មល៝ម់អាឆារីអ៝ន់ តឹមឞានមាងខោមឞូជានការទូនារ។

*១០:៣១ ១០:៣១៖ មថ ៦:២៦

*១០:៣៥ ១០:៣៥៖ មថ ១០:២១; ២៤:១០

†១០:៣៦ ១០:៣៦៖ មកា ៧:៦

*១០:៣៧ ១០:៣៧៖ មថ ៨:២១-២២; នវ ៣៣:៩

*១០:៣៨ ១០:៣៨-៣៩៖ មថ ១៦:២៤-២៥

*១០:៤០ ១០:៤០៖ មថ ១៨:៥; កាល ៤:១៤

*១០:៤២ ១០:៤២៖ មថ ២៥:៤០