នាវកោរាញឞ្រាសងើយតានាវងើយឞូន៝ង មាថាយ ២៣

២៣

ឞ្រាសយេឆូ ដាៈញជ្រាង់ដាសផូងនើមនតី នទ្រែលមាផូងផារីឆី

(មក ១២:៣៨-៤០; លក ២០:៤៥-៤៧; ១១:៣៩-៥២)

១ ជេសរីឞ្រាសយេឆូ លាសមាផូងឞូនុយ្សអ៝ក់ នទ្រែលមាមពោលអ៝សម៝នពាង់កើតនអា៖ ២ “ផូងនើមនតីនាវវៃផូងឞ៝ន់ នទ្រែលមាផូងផារីឆី ខាន់ពាង់តឹមឞានមាគុតារានើលមោឆេ យ៝រមាខាន់ពាង់នតីនាវវៃពាង់។ ៣ ទឹងលែៈនទើខាន់ពាង់នតុមនតីអ៝ន់មាខាន់អៃមៃ អ៝ន់ខាន់អៃមៃអ្យាត់ នទ្រែលមាឆ៝ៈទើន។ យើនមាលើយអោសជានតឹងខាន់ពាង់ជាន យ៝រលាសខាន់ពាង់មានមាលាសទើម ឆាក់ខាន់ពាង់នើមមោអោសជានតឹង។* ៤ ខាន់ពាង់ញជេងនាវវៃទុតជេរទុតជ៝ក់ងាន់អ៝ន់មាឞូនុយ្សញអោត យើនមាខាន់ពាង់នើមមោអុចអោសពាស ឞ៝លលាសពាសដេៈមោអុចដ៝ង់*។* ៥ ទឹងលែៈនទើខាន់ពាង់ជាននៃ គៃមាអ៝ន់ឞូឆៃ ជេសរីអ៝ន់ឞូកើបខាន់ពាង់ជេងឞូនុយ្សអីតឹងនាវកោរាញឞ្រាសរាលាវឞូទើម។ នទ្រីទឹងខាន់ពាង់លើមាជានក្វ៝ង់ទុងអីឞ៝ន់វៃក៝ត់តាឞោក នទ្រែលមាក៝ត់តាតីនោកមឞើសឆើម† នទ្រែលមាជានច្យាង់អាវលើមាជ៝ងជឹត‡។* ៦ ខាន់ពាង់រ៝ង់គែសគុតានតុកឞូយើកនោកញេតឆោងក្វ៝ង់ ជេសរីតាត្រោមញីសរាបុនអុចគុឞើសនាប់ឞូតានតុកឞូលឺ។* ៧ ខាន់ពាង់អុចអ៝ន់ឞូមឞាសកុញឞោកមាខាន់ពាង់រ៝ៈនតុកឞូតាច់រាគ៝ល់ទ្រាប់នទើ មោលាសរ៝ៈត្រ៝ងក្វ៝ង់ នទ្រែលមាអុចអ៝ន់ឞូក្វាល់ខាន់ពាង់៖ «នើមនតី»។ ៨ ល៝ង់មាខាន់អៃមៃនៃ លើយអោសអ៝ន់ឞូក្វាល់ខាន់អៃមៃ «នើមនតី» យ៝រលាសគែសទូហ្វេ «នើមនតី»ទើម ជេសរីទឹងលែៈរាងោចខាន់អៃមៃជេងអ៝សនោនទ្រែលទាទេ។ ៩ លើយអោសក្វាល់ទូហ្វេឞូនុយ្សតានែសនតូអ្យា «ឞឹ» យ៝រលាសខាន់អៃមៃលែៈគែសទូហ្វេឞឹអីគុតាកាលើត្រោក។ ១០ លើយអោសក្វាល់ឆាក់ខាន់អៃមៃនើម «នើមនតី» យ៝រលាសខាន់អៃមៃគែសទូហ្វេនើមនតី៖ ឞ្រាសក្រីស អីនើមរាក្លាយ្សតាៈឞើសកោរាញឞ្រាសទែញជ្វាល់។ ១១ យើនមាឞូម៝សពាង់អីក្វ៝ង់រាលាវឞូតាផូងខាន់អៃមៃ អ៝ន់ពាង់ជេងឞូនុយ្សអីឆើមកើលជានការអ៝ន់មាខាន់អៃមៃ។* ១២ ឞូម៝សអីនហាវអេងឆាក់ពាង់នើម កោរាញឞ្រាសញជុរលើយ យើនមាឞូម៝សអីញជុរអេងឆាក់អុចអ្យាត់ពាង់ កោរាញឞ្រាសឆើមនហាវពាង់”។*

នាវរេសរាញាល់មាផូងនើមនតី នទ្រែលមាផូងផារីឆី

១៣ “អើផូងនើមនតីនាវវៃផូងឞ៝ន់ នទ្រែលមាខាន់មៃអីផូងផារីឆី ! ខាន់មៃជានអ្យាត់នាវកោរាញឞ្រាសទើម។ កោរាញឞ្រាសមរាអ៝ន់នាវរេសរាញាល់ងាន់មាខាន់មៃ យ៝រលាសខាន់មៃងកីងលើយត្រ៝ងតានាវកោរាញឞ្រាសម៝ត់អ្វាញ់។ ខាន់មៃនើមមោអុចលាប់ ជេសរីឞូនុយ្សអីអុចលាប់ខាន់មៃងកីងលើយដ៝ង់”។

១៤ [“អើផូងនើមនតីនាវវៃផូងឞ៝ន់ នទ្រែលមាខាន់មៃអីផូងផារីឆី ! ខាន់មៃជានអ្យាត់នាវកោរាញឞ្រាសទើម។ កោរាញឞ្រាសមរាអ៝ន់នាវរេសរាញាល់ងាន់មាខាន់មៃ យ៝រលាសខាន់មៃមរោសឞូអូរនទ្រោលែៈខឹតឆាយគៃមាឆ៝ៈពីតទ្រាប់នទើញីសជៃខាន់ពាង់។ ខាន់មៃជានមឞើសឆើមទុតជ៝ៈងាន់អ៝ន់ឞូអេងតាង់ គៃមាញហើខាន់មៃនើមជេងឞូនុយ្សរ៝ង់មាកោរាញឞ្រាសងាន់។ នទ្រីទឹងកោរាញឞ្រាសតេៈទោយ្សជ្រូរាលាវឞូអេងតានារជឹតនាប់តៃ”។]

១៥ “អើផូងនើមនតីនាវវៃផូងឞ៝ន់ នទ្រែលមាខាន់មៃអីផូងផារីឆី ! ខាន់មៃជានអ្យាត់នាវកោរាញឞ្រាសទើម។ កោរាញឞ្រាសមរាអ៝ន់នាវរេសរាញាល់ងាន់មាខាន់មៃ យ៝រលាសខាន់មៃហាន់ញឆ៝ងទុតងាយរ៝ៈកាលើនែស រ៝ៈទាកវាច់ទាកវារ់ គៃមាជាៈទូហ្វេឞូនុយ្សលាប់តឹងនាវវៃផូងឞ៝ន់។ ត៝ត់មាលែៈគែសឞូលាប់ជេស ខាន់មៃជានអ៝ន់ឞូនុយ្សអីនៃលើមាហោអ្យើសទុតហោងាន់ ទីមាតុបតានទ្រូងអុញ អ្យើសរាលាវឞារតឹខាន់មៃនើមជឹត”។

១៦ “កោរាញឞ្រាសមរាអ៝ន់នាវរេសរាញាល់ងាន់មាខាន់មៃ។ ខាន់មៃឞូនុយ្សលែវឞូ យើនមាខាន់មៃនើមតឹមឞានមាឞូនុយ្សចែសមាត់ យ៝រលាសខាន់មៃងើយកើតនអា៖ «ឞូម៝សត៝នដាសញីសជានឞ្រាសមាកោរាញឞ្រាស នាវត៝នអីនៃមោអោសគែសនាវខ្លៃ យើនមាឞូម៝សត៝នដាសមាយ្សតាញីសជានឞ្រាសមាកោរាញឞ្រាស រីមើនាវត៝នអីនៃគែសនាវខ្លៃ»។* ១៧ អើមពោលឞូនុយ្សមឞ្លុ ខាន់មៃតឹមឞានមាមពោលឞូនុយ្សចែសមាត់! ម៝សនទើអីគែសនាវខ្លៃរាលាវ? មាយ្សអីគែសតាញីសជានឞ្រាស មោលាសញីសជានឞ្រាសអីអ៝ន់មាយ្សអីនៃជេងក្ល៝សអ្វែសជេងនទើកោរាញឞ្រាសនើម? ១៨ ខាន់មៃលាសដ៝ង់៖ «ឞូម៝សត៝នដាសញឆឺងគុចពូរនទើជានឞ្រាស នាវត៝នអីនៃមោអោសគែសនាវខ្លៃ យើនមាឞូម៝សត៝នដាសនទើជានឞ្រាសតាកាលើនតុកជានឞ្រាស រីមើនាវត៝នអីនៃទឹងគែសនាវខ្លៃ»។ ១៩ អើមពោលឞូនុយ្សចែសមាត់ ម៝សនទើអីគែសនាវខ្លៃរាលាវ? នទើជានឞ្រាស មោលាសញឆឺងគុចពូរនទើជានឞ្រាសអីអ៝ន់នទើជានឞ្រាសជេងក្ល៝សអ្វែសជេងនទើកោរាញឞ្រាសនើម? ២០ លាសនទ្រីឞូម៝សត៝នមាញឆឺងគុចពូរនទើជានឞ្រាស ពាង់ត៝នមាញឆឺងគុចពូរនទើជានឞ្រាស នទ្រែលមាទឹងលែៈនទើជានឞ្រាសអីគែសតាកាលើនៃ។ ២១ ជេសរីឞូម៝សត៝នដាសញីសជានឞ្រាសមាកោរាញឞ្រាស ពាង់ត៝នមាញីសអីនៃ នទ្រែលមាត៝នដាសមាកោរាញឞ្រាសអីគុតាញីសជានឞ្រាសនៃដ៝ង់។* ២២ ឞូម៝សត៝នដាសនតុកកោរាញឞ្រាសតាកាលើត្រោក ពាង់អីនៃត៝ននអ៝ប់មារានើលកោរាញឞ្រាសនើម នអ៝ប់មាកោរាញឞ្រាសអីគុតារានើលអីនៃ”។*

២៣ “អើផូងនើមនតីនាវវៃផូងឞ៝ន់ នទ្រែលមាខាន់មៃអីផូងផារីឆី ! ខាន់មៃជានអ្យាត់នាវកោរាញឞ្រាសទើម។ កោរាញឞ្រាសមរាអ៝ន់នាវរេសរាញាល់ងាន់មាខាន់មៃ យ៝រលាសខាន់មៃនើសឆ៝ៈនទើគែសជឹតអឹរាហ្វាត់ង្វាយញហើរមាកោរាញឞ្រាស កើតលាសនទើមោខ្លៃ ក្លោយ្ស គីរ នទ្រែលមានទើបោអាបាៈអេងដ៝ង់។ នាវអីញហើរជេងទី តីសមាខាន់មៃមអារ់លើយនទើអីគែសនាវខ្លៃរាលាវមានទើអីនៃតានាវវៃឞ៝ន់ នទើអីគែសនាវខ្លៃរាលាវនៃ៖ នាវឆ៝ង់ នាវយោៈនអាច នទ្រែលមានាវញឆីងមាកោរាញឞ្រាស។ លាសនទ្រីអ៝ន់ខាន់មៃញឆ្រោយ្សជាននាវឆ៝ង់ នាវយោៈនអាច នទ្រែលមានាវញឆីង ជេសរីញហើរកើតអីនៃមាកោរាញឞ្រាសដ៝ង់”។*

២៤ “ខាន់មៃឞូនុយ្សលែវឞូ យើនមាខាន់មៃនើមតឹមឞានមាឞូនុយ្សចែសមាត់។ ខាន់មៃងខែៈលើយរាហ្វៃឞើសទាកតាកាច៝កខាន់មៃ គៃមាលើយរាង្វាន់§ តីសមាខាន់មៃតឹមឞានមារាង្វាន់ទូមល៝ម់ឆែសឆាមោ*!”

២៥ “អើផូងនើមនតីនាវវៃផូងឞ៝ន់ នទ្រែលមាខាន់មៃអីផូងផារីឆី ! ខាន់មៃជានអ្យាត់នាវកោរាញឞ្រាសទើម។ កោរាញឞ្រាសមរាអ៝ន់នាវរេសរាញាល់ងាន់មាខាន់មៃ យ៝រលាសខាន់មៃជេងតឹមឞានមាឞូនុយ្សអីរាវងាន រាវយាង់តាឞើសទីសទើម យើនមាតាត្រោមហោមអែអូករាមាវ។ ខាន់មៃរាវតីតឹងមានាវវៃខាន់មៃ តីសមាតានូយ្សនហ៝ម់ខាន់មៃរីហោមទុតអុចមានាវរាវានកើញគែសមាទ្រាប់នទើ នទ្រែលមានាវឆាញឆ្យាន់ហោងាន់។* ២៦ អើផូងផារីឆី ចែសមាត់ អ៝ន់រាវកែវរាវងានតាត្រោមល៝រប៝ត់ ជេសរីរាវឞើសទីសដ៝ង់ រីមើទឹងលែៈក្ល៝សទាទេ”។

២៧ “អើផូងនើមនតីនាវវៃផូងឞ៝ន់ នទ្រែលមាខាន់មៃអីផូងផារីឆី ! ខាន់មៃជានអ្យាត់នាវកោរាញឞ្រាសទើម។ កោរាញឞ្រាសមរាអ៝ន់នាវរេសរាញាល់ងាន់មាខាន់មៃ យ៝រលាសខាន់មៃតឹមឞានមាមោចឞូហឹងមាទាកឆីងលាង អ្វាញ់ឞើសទីសតឹមឞានមាអ្វែសងាន់ តីសមាតាត្រោមរីនតីងឞូនុយ្សខឹត នទ្រែលមានទើបឹអាប់នតីលងាន់។ ២៨ ខាន់មៃតឹមឞានមាកើតនៃងាន់ ឞូអ្វាញ់ឞើសទីសជានតឹមឞានមាឞូនុយ្សឆ៝ង់ តីសមាតាត្រោមរីនូយ្សនហ៝ម់នទ៝ប់មពោន នទ្រែលមាមោជានតឹងនាវកោរាញឞ្រាសអុច”។*

២៩ “អើផូងនើមនតីនាវវៃផូងឞ៝ន់ នទ្រែលមាខាន់មៃអីផូងផារីឆី ! ខាន់មៃជានអ្យាត់នាវកោរាញឞ្រាសទើម។ កោរាញឞ្រាសមរាអ៝ន់នាវរេសរាញាល់ងាន់មាខាន់មៃ យ៝រលាសខាន់មៃជានអ្វែសជៃមោចមាមពោលឞូនុយ្សនតើយ្សនាវងើយកោរាញឞ្រាសកាល់អែនើស នទ្រែលមាងក្រឹអ្វែសមោចមាផូងឞូនុយ្សឆ៝ង់‌ ៣០ ជេសរីខាន់មៃលាស៖ «លាសហេនគុរេសរានោកផូងអូចែអីនៃនើស ហេនមោអោសតឹមទីនាវដាសខាន់ពាង់ងខឹតមពោលឞូនុយ្សនតើយ្សនាវងើយកោរាញឞ្រាស»។ ៣១ នទ្រីនាវខាន់មៃងើយកើតនៃ យើនមាខាន់មៃហោមក្វាល់ឞូនុយ្សអីនៃអូចែខាន់មៃ កើតនទ្រីខាន់មៃលែៈញហើនូយ្សនហ៝ម់ខាន់មៃតឹមទីមាផូងងខឹតមពោលឞូនុយ្សនតើយ្សនាវងើយកោរាញឞ្រាសអីនៃ។* ៣២ លាសនទ្រីអ៝ន់ខាន់មៃហោមជានកើតផូងអូចែខាន់មៃនៃត៝ត់លោច†ហ៝ម់!”

៣៣ “យេ! មពោលឞូនុយ្សអ្យើសឞូនុយ្សជាញតឹមឞានមាឞេសកូ! មើមជានខាន់មៃហោមទើយក្លាយ្សឞើសកោរាញឞ្រាសតេៈទោយ្សនតុបតានទ្រូងអុញ?* ៣៤ កើតនទ្រីទឹងគ៝ប់ញជុនតៃមពោលឞូនុយ្សនតើយ្សនាវងើយកោរាញឞ្រាស មពោលឞូនុយ្សគឹតឞ្លាវ នទ្រែលមាផូងនើមនតីអ៝ន់មាខាន់មៃ តីសមាអាបាៈខាន់មៃងខឹតលើយខាន់ពាង់តាឆីតឹមរាកាង់ អាបាៈជឹតខាន់មៃរាពាត់ខាន់ពាង់មាម៝ង់រាឆែតាញីសរាបុនខាន់មៃ នទ្រែលមាខាន់មៃតឹងជ៝យខាន់ពាង់រ៝ៈប៝នអ្យាប៝នរីដ៝ង់។ ៣៥ លាសនទ្រីទឹងលែៈមហាមមពោលឞូនុយ្សឆ៝ង់អីនៃក្រេបតាខាន់មៃទាទេ ជេងនតើមឞើសក៝នអាដាម់ ‡រាញាពាង់កាអីន ងខឹតអីអ៝សពាង់រាញាអាបែល នហ៝មាត៝ត់ឞូងខឹតឆាការី អីក៝នបារាកី §អីអូចែខាន់មៃងខឹតពាង់តាវាសវាងញីសជានឞ្រាស តាញឆឺងគុចពូរនទើជានឞ្រាសរី។ ឞ៝លលាសទឹងលែៈឞូនុយ្សអីនៃលែៈឞូងខឹតឞើសកាល់អែនើស ទោយ្សអីនៃហោមអែតេៈមាខាន់មៃដ៝ង់។* ៣៦ គ៝ប់លាសនហេលនានេៈងាន់មាខាន់មៃ ទឹងលែៈទោយ្សទាកអីនៃញឆុនមាឞូនុយ្សតារានោកអ្យារ៝”។

ឞូនុយ្សតាប៝នយេរូឆាលឹម មោរ៝មឞ្រាសយេឆូ

(លក ១៣:៣៤-៣៥)

៣៧ “ហើយឞូនុយ្សតាប៝នយេរូឆាលឹម ឞូនុយ្សតាយេរូឆាលឹម ខាន់អៃមៃលែៈងខឹតជេសឞូនុយ្សនតើយ្សនាវងើយកោរាញឞ្រាសកាល់អែនើស ឆ៝ៈលុនតុបងខឹតលើយអីឞូនុយ្សកោរាញឞ្រាសដាៈហាន់នតីខាន់អៃមៃ។ យើនមាលែៈបាបើងាន់គ៝ប់អុចរាគូមខាន់អៃមៃ តឹមឞានមាមែអ្យារ់រាតុកក៝នអ៝ន់គុគូមតាន៝ម់នារពាង់។ តីសមាខាន់អៃមៃមោអោសអុច។* ៣៨ ល៝ង់អ្វាញ់ ប៝នខាន់អៃមៃតៃកោរាញឞ្រាសនត្លើយងាន់ ជេងរាង៝ល។* ៣៩ គ៝ប់មឞើសមាខាន់អៃមៃ គ៝ប់ហាន់អាខាន់អៃមៃហោមទូតឹទើម ជេសរីតៃខាន់អៃមៃមោហោមអោសឆៃគ៝ប់ជឹត នហ៝មាត៝ត់ខាន់អៃមៃលាស៖ «ទាន់កោរាញឞ្រាសអ៝ន់នាវគែសជេងមាទូហ្វេឞូនុយ្សអ្យាអីកោរាញឞ្រាសទែដាៈវាច់*»†”។

*២៣:៣ ២៣:៣៖ រម ២:២១-២៣

*២៣:៤ ២៣:៤៖ មោលាស «យើនមាខាន់ពាង់នើមមោអុចអោសកើលឞូជានតឹង ឞ៝លលាសកើលដេៈមោអុចដ៝ង់»។

*២៣:៤ ២៣:៤៖ មថ ១១:២៨-៣០

†២៣:៥ ២៣:៥៖ តាត្រោមទុងអីនៃគែសនហារាដាយ្សញចីសត្រ៝ងនាវកោរាញឞ្រាសងើយអាបាៈ។

‡២៣:៥ ២៣:៥៖ ផូងអីឆ្រាអែល វៃជានតឹងមានទើអីគែសញចីសតានាវកោរាញឞ្រាសងើយ។ មាទុងអីនៃគែសញចីសតា នង ១៣:៩, ១៦; នវ ៦:៨‌ មាច្យាង់អាវគែសញចីសតា នក ១៥:៣៨-៣៩។

*២៣:៥ ២៣:៥៖ មថ ៦:១

*២៣:៦ ២៣:៦៖ លក ១៤:៧-១១

*២៣:១១ ២៣:១១៖ មថ ២០:២៥-២៨

*២៣:១២ ២៣:១២៖ មថ ១៨:៤; ១ពេ ៥:៥-៦

*២៣:១៦ ២៣:១៦៖ មថ ១៥:១៤

*២៣:២១ ២៣:២១៖ ១កក ៩:៣

*២៣:២២ ២៣:២២៖ អេឆា ៦៦:១

*២៣:២៣ ២៣:២៣៖ កល ២៧:៣០-៣៣; មកា ៦:៨

§២៣:២៤ ២៣:២៤៖ ខាន់ពាង់ជានកើតនៃគៃមាតឹមទីដាសមានាវវៃខាន់ពាង់អីឞ្វៃមោអ៝ន់ឆានទើអីតឹមឞានមារាហ្វៃ។

*២៣:២៤ ២៣:២៤៖ ឆែសឆាមោជេងមពោមពា(ឆ្យុម)ក្វ៝ង់រាលាវឞូតាឞ្រីអីឆ្រាអែល ជេសរីព្វាច់ពាង់នាវវៃផូងអីឆ្រាអែល មោអ៝ន់ឆាដ៝ង់។

*២៣:២៥ ២៣:២៥៖ មក ៧:៤

*២៣:២៨ ២៣:២៨៖ លក ១៦:១៥

*២៣:៣១ ២៣:៣១៖ មថ ៥:១២; ការ ៧:៥២

†២៣:៣២ ២៣:៣២៖ ឞ្រាសយេឆូ ងើយមានាវខាន់ពាង់ងខឹតឆាក់ឞ្រាសយេឆូ នើម។

*២៣:៣៣ ២៣:៣៣៖ មថ ៣:៧

‡២៣:៣៥ ២៣:៣៥៖ អាដាម់ ជេងឞូនុយ្សត៝ល់ង្វាយកោរាញឞ្រាសញជេង។ នាវងក៝ចងខឹតអាបែល គែសញចីសតាឆ៝ម់បុតនាវនតើមអីឆ៝ម់បុតត៝ល់ង្វាយតានាវកោរាញឞ្រាសងើយ។

§២៣:៣៥ ២៣:៣៥៖ ឆាការី ជេងឞូនុយ្សនតើយ្សនាវងើយកោរាញឞ្រាសកាល់អែនើស នាវងក៝ចពាង់គែសញចីសតា ឆ៝ម់បុត២នាវរេសជេង ២នរ ២៤:២០-២១។ ឆ៝ម់បុត២នាវរេសជេងអ្យាជេងឆ៝ម់បុតងគ្លែៈទុតតានាវកោរាញឞ្រាសងើយនោកឞ្រាសយេឆូ យើនមានារអ្យាឞូតេៈតានតុកអេងតានាវកោរាញឞ្រាសងើយ។

*២៣:៣៥ ២៣:៣៥៖ នន ៤:៨; ២នរ ២៤:២០-២១

*២៣:៣៧ ២៣:៣៧៖ មថ ៥:១២; ១តេ ២:១៥; ហេឞ ១១:៣៧

*២៣:៣៨ ២៣:៣៨៖ មថ ២៤:២

*២៣:៣៩ ២៣:៣៩៖ មោលាស «ទាន់កោរាញឞ្រាសអ៝ន់នាវគែសជេងមាទូហ្វេឞូនុយ្សវាច់តារាញាកោរាញឞ្រាស»។

†២៣:៣៩ ២៣:៣៩៖ នម ១១៨:២៦