នាវកោរាញឞ្រាសងើយតានាវងើយឞូន៝ង មារកោស ៤

៤

នាវងើយនតឹតឆូយគារ់នតីល

(មថ ១៣:១-៩; លក ៨:៤-៨)

១ គែសទូនាររីឞ្រាសយេឆូ គុនតីផូងប៝នលានរ៝ៈមែងទាកងលៅក្វ៝ង់កាលីលេ ទូតឹជឹត។ តានៃគែសអ៝ក់ងាន់ឞូនុយ្សហាន់វាច់តាពាង់ នទ្រីពាង់ហាវគុរាគើបកាលើទូក ជេសរីនតីកាលើទូករី ផូងប៝នលានគុឞើសកើសអ្យា គុរ៝ៈមែងទាក។* ២ ឞ្រាសយេឆូ នតុមនតីខាន់ពាង់អ៝ក់ងាន់មានាវងើយនតឹតកើតនអា៖ ៣ “អ្យាត់ហ៝ៈ គែសទូហ្វេឞូក្លោហាន់ឆូយគារ់នតីល។ ៤ នោកពាង់ឆូយនៃអាបាៈតុបរ៝ៈត្រ៝ង ជេសរីឆ្យុមច៝កលែៈផ្យៅ។ ៥ គារ់អាបាៈតុបតានែសក្លេរ គារ់អីនៃគើញហ៝នព្រូយ៝រលាសនែសនហើ។ ៦ ត៝ត់ទោសនារតើមអីនៃនទ្រ៝ប្រុង យ៝រមារែសពាង់ហ៝នមោជ្រូ។ ៧ គារ់អាបាៈជឹតតុបតានែសល៝ក ជេសរីល៝កហ៝នត៝ល់លែៈផ្យៅ នហ៝មាមោអោសត៝ត់ព្លៃ។ ៨ ល៝ង់គារ់អីអាបាៈជឹតតុបតានែសអ្វែស ពាង់ហ៝នព្រូអ្វែសជេង នហ៝មាត៝ត់គែសព្លៃទូគារ់គែស ៣០‌ អាបាៈទូគារ់គែស ៦០‌ អាបាៈជឹតទូគារ់គែស ១០០”។ ៩ ជេសរីឞ្រាសយេឆូ លាសតៃ៖ “ឞូម៝សតាង់នាវគ៝ប់ងើយអ្យា អ៝ន់ពាង់ងក្ល៝ន់អេងតាឆាក់!”

១០ នោកឞ្រាសយេឆូ គុងាយដាសឞាល់ផូង តានៃគែស ១២ នុយ្ស មពោលអ៝សម៝ន នទ្រែលមាឞូអាបាៈដ៝ង់គុនទ្រែលពាង់ ជេសរីខាន់ពាង់អោបពាង់៖ “មៃមឞើសនហេលនាវងើយនតឹតអីនៃអឺស”។ ១១ ឞ្រាសយេឆូ អើសលាស៖ “អាល៝រនើសនាវខ្លៃកោរាញឞ្រាសម៝ត់អ្វាញ់ឞូនុយ្សហោមនទ៝ប់មពោន អាបៃរីកោរាញឞ្រាសអ៝ន់មាខាន់អៃមៃគឹតវ៝ត់នទើអីនៃ។ ល៝ង់ឞូនុយ្សអាបាៈជឹត គ៝ប់ងើយនតឹតអ៝ន់មាខាន់ពាង់។* ១២ នទ្រីតឹមទីដាសនាវកោរាញឞ្រាសងើយកាល់អែនើស៖

«ឞ៝លលាសខាន់ពាង់អ្វាញ់នទើគ៝ប់ជានក៝ៈមោវ៝ត់នទើខ្លៃនាវអីនៃ។

ខាន់ពាង់តាង់នាវគ៝ប់ងើយក៝ៈមោវ៝ត់ដ៝ង់។

លាសខាន់ពាង់វ៝ត់ ខាន់ពាង់រាគ៝ល់នូយ្សនហ៝ម់អ្យើស ជេសរីកោរាញឞ្រាសយោៈនអាចមោហោមកើបនាវតីសខាន់ពាង់»†”។*

១៣ ឞ្រាសយេឆូ លាសតៃមាខាន់ពាង់៖ “នាវងើយនតឹតអ្យាលាសខាន់អៃមៃមោវ៝ត់ដ៝ង់ មើមខាន់អៃមៃទើយវ៝ត់នាវងើយនតឹតអាបាៈអេងជឹតហាៈ! ១៤ ឞូនុយ្សអីឆូយគារ់នតីលនៃ កើតឞូនុយ្សអីមឞើសងក៝ចនាវកោរាញឞ្រាស។ ១៥ គារ់នតីលអីតុបរ៝ៈត្រ៝ង តឹមឞានមាឞូនុយ្សអីអ្យាត់នាវកោរាញឞ្រាស ជេសអ្យាត់ទោមាឆាតាង់ អីកោរាញមពោលឞ្រាសអ្យើសពីតលើយនាវពាង់អ្យាត់នៃរ៝។ ១៦ ឞូនុយ្សអីតឹមឞានមាគារ់នតីលតុបតានែសក្លេរតាង់នាវកោរាញឞ្រាស ខាន់ពាង់អ្យាត់រ៝រាម់មអាកងាន់‌ ១៧ ហ៝នអ្វែសទូប្ល៝ត់ទើម។ នាវកោរាញឞ្រាសមោអោសហ៝នរែសតានូយ្សនហ៝ម់ខាន់ពាង់នើម នទ្រីត៝ត់គែសនាវជេរអេងៗ មោលាសឞូជានជេរយ៝រមានាវកោរាញឞ្រាស ខាន់ពាង់មអារ់រ៝នាវញឆីង។* ១៨ ឞូនុយ្សអាបាៈជឹតតឹមឞានមាគារ់នតីលតុបតានែសល៝ក ខាន់ពាង់អ្យាត់នាវកោរាញឞ្រាសដ៝ង់‌ ១៩ តីសមាតាត្រោមនូយ្សនហ៝ម់ខាន់ពាង់ងក្ល៝ន់រាវៃហោងាន់មានាវរេសតានែសនតូអ្យា អុចរាវានកើញគែសទ្រាប់នទើ នអ៝ប់មានូយ្សនហ៝ម់ខាន់ពាង់រ៝ង់គែសមានទើអេងៗ។ ជេសរីពូតបារ់នាវកោរាញឞ្រាសអីនៃមោអ៝ន់ត៝ត់ព្លៃ។* ២០ ល៝ង់ខាន់ពាង់អីតឹមឞានមាគារ់នតីលតុបតានែសអ្វែសរី ជេសតាង់នាវកោរាញឞ្រាសពាង់អ្យាត់ នហ៝មាត៝ត់គែសព្លៃ គែសឞូនុយ្សអាបាៈរីទូគារ់ជេងគែស ៣០‌ ទូគារ់ជេងគែស ៦០‌ ឞូនុយ្សអាបាៈរីជឹតទូគារ់ជេងគែស ១០០ ងាន់”។*

នាវងើយនតឹតមាអុញឆាគេង

(មថ ៥:១៥; លក ៨:១៦-១៨)

២១ ជេសរីឞ្រាសយេឆូ លាសមាផូងប៝នលាន៖ “មោវៃឆៃអោសឞូមពេសអុញឆាគេង ជេសរីកុបលើយមាឆាស មោលាសតេៈតាន៝ម់គ្រែ។ ឞូវៃយោងអុញឆាគេងអ៝ន់ព្រេស។* ២២ ទឹងលែៈនទើអីមពោនម៝ កោរាញឞ្រាសអ៝ន់ឞូគឹតទាទេ។ ទឹងលែៈនទើអីឞូមោឆៃ ពាង់ញហើអ៝ន់ឞូឆៃក្ល៝សរាសវាសដ៝ង់។ ២៣ ឞូម៝សអីតាង់នាវគ៝ប់ងើយអ្យាអ៝ន់ពាង់មឹនអេងតាឆាក់!*” ២៤ “អ៝ន់ខាន់អៃមៃញជ្រាង់ងាន់ហ៝ម់នាវអីខាន់អៃមៃអ្យាត់អីអ្យា។ កោរាញឞ្រាសរាញ្វែសអ៝ន់មាខាន់អៃមៃ តឹងខាន់អៃមៃរាញ្វែសអ៝ន់មាឞូដ៝ង់ ជេសរីពាង់កើយនត៝បតៃមាខាន់អៃមៃអ៝ន់រាលាវអីនៃជឹត។* ២៥ ឞូម៝សអីលែៈគែស កោរាញឞ្រាសកើយនត៝បអ៝ន់មាពាង់ជឹត តីសមាឞូម៝សអីមោគែស កោរាញឞ្រាសឆ៝ៈរាហ្វាត់លើយលែៈនទើអីពាង់គឹតលាសលែៈគែស”†។*

នាវងើយនតឹតមាគារ់ឞា

២៦ ឞ្រាសយេឆូ លាសតៃ៖ “នាវកោរាញឞ្រាសម៝ត់អ្វាញ់ឞូនុយ្សតឹមឞានមាទូហ្វេឞូក្លោលោសតូចឞាតាមីរពាង់នើម‌ ២៧ ជេសរីអាមាង់ឞិច អានារជានការ។ គារ់ឞាអីនៃហ៝ន យើនមាពាង់មោគឹតដ៝ង់អាមើមនតើមហ៝ន។ ២៨ នែសអ៝ន់គារ់ឞាអីនៃគែសហ៝នអេងពាង់នើម។ ឞើសនតើមពាង់លោសនហា ព្រេសដេៈព្រេសដេៈនហ៝មាត៝ត់លោសត៝ត់មឞោន ជេសរីមើជេងព្លៃឞា។ ២៩ ត៝ត់ឞាលែៈទុម ពាង់ឆ៝ៈញអែវហាន់រែក យ៝រលាសលែៈទីខៃរែក”។*

នាវងើយនតឹតមាគារ់ឆី

(មថ ១៣:៣១-៣២, ៣៤; លក ១៣:១៨-១៩)

៣០ ឞ្រាសយេឆូ លាស៖ “នទ្រីម៝សនទើឞ៝ន់តឹមរាដឹលមានាវកោរាញឞ្រាសម៝ត់អ្វាញ់ឞូនុយ្ស? ម៝សនាវងើយនតឹតឞ៝ន់ឆ៝ៈមាតឹមរាដឹលដាសនាវកោរាញឞ្រាសម៝ត់អ្វាញ់? ៣១ នាវកោរាញឞ្រាសម៝ត់អ្វាញ់ឞូនុយ្ស តឹមឞានមាទូនតីលគារ់ឆីអីឞូឆូយតានែស គារ់ឆីអីនៃរាហេនរាលាវឞូងាន់មាដាសគារ់ឆីទឹងលែៈតានែសនតូអ្យា។* ៣២ ជេសឞូឆូយពាង់តានែសរី ត៝ត់មាហ៝នតើមអីនៃក្វ៝ង់រាលាវមាតើមអាបាៈអេងជឹត គែសងគីងគែសនថាននហ៝ម់ងាន់ នហ៝មាគែសឆ្យុមគុជានរាឆ្វាន់តានៃ”។*

៣៣ កើតនទ្រីឞ្រាសយេឆូ នតុមនតីនាវកោរាញឞ្រាស ពាង់ទ៝ង់នាវងើយនតឹតកើតនអា តឹងអីប៝នលានទើយវ៝ត់។ ៣៤ ប៝នលានតាង់ពាង់ងើយនាវងើយនតឹតទើម យើនមានោកពាង់គុអេង ពាង់រាឞ្លាងនាវអីនៃអ៝ន់មាមពោលអ៝សម៝នពាង់។

ឞ្រាសយេឆូ ឞ្វៃផុត

(មថ ៨:២៣-២៧; លក ៨:២២-២៥)

៣៥ នោកនៃឞ្រាសយេឆូ ហោមគុតាទូក ត៝ត់កេងមាង់នារអីនៃដ៝ង់ ពាង់លាសមាមពោលអ៝សម៝នពាង់៖ “ហោៈ ឞ៝ន់ហាន់ជឹតកាល់តីទាករី”។ ៣៦ ជេសរីខាន់ពាង់ញច៝ទូកនៃទូឞើសប៝នលានហាន់ជឹតកាល់តីរី គែសទូកអាបាៈដ៝ង់ហាន់នទ្រែលខាន់ពាង់។ ៣៧ ជេសរីទោមាគែសផុតច្វាញ់ទុតហោងាន់។ ទាករាឞុស លាប់តាទូករីឞើយមាឞេង។ ៣៨ ល៝ង់ឞ្រាសយេឆូ រីពាង់លែៈហាក់ឞិចតាខានើយតាច្យាង់ទូកនៃ។ មពោលអ៝សម៝នរាលៃពាង់៖ “ហើយនើមនតី លែៈខឹតងាន់ឞ៝ន់! មើមឞិចមៃថើលាវើនៃ?” ៣៩ ឞ្រាសយេឆូ កាសរាងាល់ពាង់ទ៝ក់ដើប ឞ្វៃផុត នទ្រែលមាទាករាឞុសនៃ៖ “ឞាសហ៝ម់! រាង៝ន់ហ៝ម់!” ជេសរីផុតឞាសឆ្យាលមោហោម ទាករាឞុសរាង៝ន់ញជុបដ៝ង់។* ៤០ ឞ្រាសយេឆូ លាសខាន់ពាង់៖ “មើមទឹងខាន់មៃក្លាចហោអីរកើតនៃ? មើមទឹងមោហោមគែសនាវញឆីងមាគ៝ប់?” ៤១ ងាន់ខាន់ពាង់តានៃក្លាចញឆ៝រ់ហោ ជេសរីតឹមលាសនទ្រាង់ខាន់ពាង់នើម៖ “ឞូម៝សពាង់អីនៃហ្យាស ទឹងគែសមាផុត នទ្រែលមាទាករាឞុសអ្យាត់នាវពាង់?”*

*៤:១ ៤:១៖ មក ២:១៣; ៣:៩

*៤:១១ ៤:១១៖ មថ ១១:២៥

†៤:១២ ៤:១២៖ អេឆា ៦:៩-១០

*៤:១២ ៤:១២៖ យហ ១២:៣៨-៤០; ការ ២៨:២៥-២៧

*៤:១៧ ៤:១៧៖ ១តេ ៣:៥

*៤:១៩ ៤:១៩៖ មក ១០:២៣-២៤; ១តម ៦:៩-១០

*៤:២០ ៤:២០៖ យហ ១៥:៥

*៤:២១ ៤:២១៖ មថ ៥:១៤-១៦

*៤:២៣ ៤:២៣៖ មោលាស «លែៈឞូនុយ្សគែសតោរមាអ្យាត់ អ៝ន់ពាង់អ្យាត់ហ៝ម់»។

*៤:២៤ ៤:២៤៖ មថ ៧:២

†៤:២៥ ៤:២៥៖ មោលាស «ឞូនុយ្សអីគឹតវ៝ត់ទើនទឹងលែៈនទើគ៝ប់នតី កោរាញឞ្រាសមរាកើយនត៝បតៃអ៝ន់លើមាវ៝ត់រាលាវ។ យើនមាឞូនុយ្សអីមោទើននាវគ៝ប់នតី ម៝សនាវអីលែៈពាង់គឹតវ៝ត់តាឆាក់ពាង់ កោរាញឞ្រាសឆ៝ៈលើយលែៈផ្យៅ»។

*៤:២៥ ៤:២៥៖ មថ ១៣:១២; ២៥:២៩

*៤:២៩ ៤:២៩៖ នតម ១៤:១៤-១៥

*៤:៣១ ៤:៣១៖ មថ ១៧:២០

*៤:៣២ ៤:៣២៖ អេឆេ ១៧:២២-២៣

*៤:៣៩ ៤:៣៩៖ នម ៨៩:៩; ១០៧:២៣-២៩; មក ៦:៥១

*៤:៤១ ៤:៤១៖ មក ១:២៧