នាវកោរាញឞ្រាសងើយតានាវងើយឞូន៝ង មារកោស ១៣

១៣

នាវលើសហេងញីសជានឞ្រាស

(មថ ២៤:១-២; លក ២១:៥-៦)

១ នោកឞ្រាសយេឆូ លោសឞើសជ៝ង់គូងញីសជានឞ្រាសមាកោរាញឞ្រាស គែសទូហ្វេអ៝សម៝នមឞើសមាពាង់៖ “ហើយនើមនតី ល៝ង់មៃអ្វាញ់ញីសជានឞ្រាសត៝ទុតអ្វែសទុតក្វ៝ង់ងាន់ អីលុឞ្ល៝នពាង់ត៝ក្វ៝ង់ដ៝ង់!” ២ ឞ្រាសយេឆូ លាសមាអ៝សម៝នពាង់នៃ៖ “នារជឹតនាប់តៃ លែៈជៃក្វ៝ង់ៗអីមៃឆៃនៃឞូមរាលើសរាល៝ម់លែៈផ្យៅរ៝ មោហោមអោសគែសទូមល៝ម់លុឞ្ល៝នតឹមរាទាប់ជឹត”។*

នាវត៝ត់នារងគ្លែៈទុត

(មថ ២៤:៣-១៤; លក ២១:៧-១៩)

៣ ជេសរីឞ្រាសយេឆូ គុតាយោកតើមអោលីវ តឹមឆ៝ង់មាញីសជានឞ្រាស។ ពេត្រោស យាកើ យោហាន នទ្រែលមាអ៝ន់ទ្រេ គុងាយដាសឞូអោបអេងពាង់៖ ៤ “ហើយនើមនតី ល៝ង់មៃមឞើសអ៝ន់មាហេនគឹតដ៝ង់ ទាសហោមជ៝ៈនារត៝ត់នាវអីនៃមេស? លាសនទ្រីម៝សនទើមឞេនអ៝ន់មាហេនគឹតលាសនាវអីនៃលែៈឞើយត៝ត់ងាន់?” ៥ ឞ្រាសយេឆូ អើសមាខាន់ពាង់៖ “អ៝ន់ខាន់មៃញជ្រាង់ងាន់ហ៝ៈ លើយទឹងអ៝ន់ឞូមរោសរាលាម់ខាន់មៃអ៝ន់ញហើតលាៈលេង។ ៦ យ៝រមានារជឹតនាប់តៃគែសអ៝ក់ឞូនតូបរាញាគ៝ប់លាស៖ «គ៝ប់អ្យាឞ្រាសក្រីស ហែស!» ខាន់ពាង់លែវញហើតឞូនុយ្សអ៝ក់ងាន់។ ៧ ត៝ត់ខាន់មៃតាង់នាវមហែមានាវតឹមលើសតឹមឆ្រែស នទ្រែលមាតាង់ឞូងក៝ចញច្រ៝សមានាវតឹមលើសតឹមឆ្រែស លើយអោសក្លាច យ៝រលាសលែៈនាវអីនៃពាង់គែសងាន់រ៝ យើនមានារងគ្លែៈទុតនែសនតូអេហ៝ៈត៝ត់អោស។ ៨ ទូមពោលតឹមលើសដាសទូមពោលអេងជឹត ទូឞ្រីទាកតឹមលើសដាសទូឞ្រីទាកអេងជឹត នតុកបាបាៈគែសនាវងគារ់នែស នទ្រែលមាគែសនាវជីឆ៝ត់ជីង៝តក្វ៝ង់តានតុកអេងៗ។ យើនមានាវជេរអីនៃជេងនតើមនាវជេរទើម តឹមឞានមានាវឞូអូរនតើមត៝ត់ជីនទុលគុអ៝ស។* ៩ នទ្រីខាន់មៃញជ្រាង់ឆាក់ហ៝ម់ យ៝រមាឞូញជុនខាន់មៃតានតុកតេៈទោយ្ស ឞូឆ៝ៈម៝ង់រាពាត់ខាន់មៃតាត្រោមញីសរាបុនផូងឞ៝ន់ នទ្រែលមាឞូលែវខាន់មៃឞើសនាប់កោរាញក្វ៝ង់ ឞើសនាប់កាដាច់ដ៝ង់ យ៝រមាខាន់មៃតឹងគ៝ប់។ ជេសរីខាន់មៃទើយងក៝ចនាវញឆីងមាគ៝ប់អ៝ន់ឞូគឹតឞូតាង់។* ១០ អេល៝រមានារងគ្លែៈទុតគែសឞូនុយ្សមឞើសនាវមហែមហានអ្វែសអ៝ន់មាប៝នលានអាប់ងគ៝រឞ្រីតាង់ល៝រប៝ត់។*

១១ ត៝ត់ឞូញុបខាន់មៃញជុនតានតុកផាតទោយ្ស នោកនៃលើយអោសរាវៃល៝រមានាវអីខាន់មៃងើយនៃ អ៝ន់ខាន់មៃងើយតឹងនាវឞ្រាសហ្វេងអ្វែសអ៝ន់មាខាន់មៃ យ៝រមានាវងើយអីនៃមោអោសលោសតាៈឞើសឆាក់ខាន់មៃនើម តាៈឞើសឞ្រាសហ្វេងអ្វែសអីក្ល៝សអ្វែសរី។* ១២ អ៝សមានោ ឞឹមាក៝នមរាតឹមរាលាម់ញុបញជុនអ៝ន់ឞូងខឹត នទ្រែលមាអីក៝នៗលែវឞាល់តឹមរាទ៝ង់ដាសអីមេៈឞឹ នហ៝មាញជុនអ៝ន់ឞូងខឹតលើយដ៝ង់។* ១៣ យ៝រមាខាន់មៃញឆីងមាគ៝ប់ នទ្រីអ៝ក់ឞូមរាឞ្យាញ់មាខាន់មៃ។ យើនមាឞូម៝សអីទើយអ៝ត់ នហ៝មាត៝ត់លោច កោរាញឞ្រាសមរារាក្លាយ្សពាង់អីនៃ”។*

នាវត៝ត់ជេរក្វ៝ង់

(មថ ២៤:១៥-២៨; លក ២១:២០-២៤)

១៤ “ត៝ត់ខាន់មៃឆៃនទើទុតបឹបើចឞូតេៈតានតុកក្ល៝សអ្វែសអីនតុកឞូមោអ៝ន់តេៈ - ឞូម៝សអីរ៝ៈនាវអីនៃអ៝ន់ពាង់គឹតវ៝ត់នាវអីនៃ - ជេសឆៃនទើអីនៃឞូនុយ្សអីគុតាឞ្រីយូដា រីអ៝ន់ទូញច្វាត់នទែតាយោក។* ១៥ ឞូម៝សអីគុកាលើច៝រជៃល៝ង់* លើយហោមអោសជុរលាប់តាត្រោមឆ៝ៈទ្រាប់នទើ។ ១៦ ឞូម៝សអីគុតាមីរ លើយហោមព្លឹតាជៃឆ៝ៈអាវក្វ៝ង់ដ៝ង់។ ១៧ នោកនៃឞូអូរនត្រែវ ឞូអូរមពូត៝សក៝នគែសនាវរេសរាញាល់ហោងាន់។ ១៨ មឞើសឆើមទាន់មាកោរាញឞ្រាសហ៝ម់ លើយអោសអ៝ន់គែសនាវត៝ត់អ្យាតាខៃជីកាត់។ ១៩ តានោកនៃគែសនាវជេរជ៝ត់ហោងាន់។ នតើមឞើសរានោកកោរាញឞ្រាសញជេងទឹងលែៈនតីលនទើត៝ត់អាបៃអ្យា នហ៝មានារជឹតនាប់តៃ មោព្រ៝តដ៝ង់គែសនាវទុតជេរកើតនៃ។* ២០ លាសកោរាញឞ្រាសមោនហុចលើយទឹងលែៈនារនៃ នទ្រីមោហោមគែសអោសទូហ្វេឞូនុយ្សរេស ខឹតលែៈផ្យៅ យើនមាកោរាញឞ្រាសនហុចលើយនារអីនៃ យ៝រមាពាង់យោៈមពោលអីលែៈពាង់កើយ្ស។ ២១ តានោកនៃលាសគែសឞូមឞើសមាខាន់មៃ៖ «ល៝ង់មៃអ្វាញ់ឞ្រាសក្រីស គុតាអ្យា» មោលាស «គុតាត៝» លើយអោសអ្យាត់ឞូ។ ២២ យ៝រមាគែសឞូនុយ្សនតូបលាសឆាក់ពាង់ឞ្រាសក្រីស នទ្រែលមាគែសឞូនុយ្សនតូបលាសឆាក់ពាង់ឞូនុយ្សនតើយ្សនាវងើយកោរាញឞ្រាស។ ខាន់ពាង់អីនៃជាននាវមឞេនអីខ្លៃអេងៗដ៝ង់ គៃមាលែវឞូនុយ្សអ៝ន់ញហើតលាៈលេង ងខេបលាសទើយលែវញហើតផូងអីកោរាញឞ្រាសលែៈកើយ្សដ៝ង់ យើនមាមោទើយអោស។* ២៣ អ៝ន់ញជ្រាង់ងាន់ហ៝ៈ! គ៝ប់លែៈងក៝ចល៝រអ៝ន់មាខាន់មៃនាវអីនៃ”។

នាវក៝នឞូនុយ្សព្លឹវាច់

(មថ ២៤:២៩-៤៤; លក ២១:២៥-៣៣)

២៤ “លោចជេសនារជេរជ៝ត់អីនៃ

តានោកនៃនារជេងង៝‌

ខៃមោហោមអោសអាង‌

២៥ មាញ់មឞីងដុសឞើសត្រោក‌

លែៈនទើអីតេសក្វ៝ង់កាលើត្រោកគែសងគើទាទេ។*

២៦ នោកនៃទឹងលែៈឞូនុយ្សឆៃគ៝ប់អីក៝នឞូនុយ្សតាៈឞើសកោរាញឞ្រាស ហាន់រ៝ៈនទ៝រ់តុកនអ៝ប់មាគែសនាវទើយ នទ្រែលមានាវច្រេកលើបទុតហោ។* ២៧ ជេសរីគ៝ប់ញជ្វាល់ផូងតោងពារ់គ៝ប់ហាន់អាប់ព្វាន់ញជោញឞ្រីលាមនែសនតូ នតើមមពែសឞើសលោសនារត៝ត់មពែសឞើសញ៝ប់នារ គៃមារាគូមលែៈមពោលអីកោរាញឞ្រាសនើមលែៈកើយ្សនើស។* ២៨ អ៝ន់ខាន់មៃងក្ល៝ន់រាវៃទោ នាវនតឹតមាតើមរាវី ។ លាសងគីងពាង់គែសចាត់នហាញឆែនអឹរ ខាន់មៃគឹតលាសខៃតាមីសឞើយត៝ត់ហើយ្ស។ ២៩ នទ្រីលាសខាន់មៃឆៃនាវអីនៃលែៈត៝ត់ គឹតរ៝គ៝ប់អីក៝នឞូនុយ្សតាៈឞើសកោរាញឞ្រាសឞើយត៝ត់ដ៝ង់។ ៣០ គ៝ប់លាសនហេលនានេៈងាន់មាខាន់មៃ លែៈនាវអ្យាពាង់ត៝ត់ទោលឞូនុយ្សតារានោកអាបៃរីហោមរេស។ ៣១ ត្រោកនែសនតូមរារ៝សលេករ៝ យើនមានាវគ៝ប់ងើយមោអោសឞ្លាវរ៝សលេក ហោមគែសទឹងលែៈងាន់”។*

៣២ “ម៝ងនារអីនៃមោគែសអោសទូហ្វេឞូនុយ្សទើយគឹត ឞ៝លលាសតោងពារ់អីគុតាកាលើត្រោកអីនតុកកោរាញឞ្រាស មោលាសគ៝ប់អីក៝នកោរាញឞ្រាសមោទើយគឹតដ៝ង់ គែសទូហ្វេឞឹគ៝ប់ទើមទើយគឹត។* ៣៣ ខាន់មៃមោអោសទើយគឹតម៝ងនារត៝ត់ល៝រ នទ្រីអ៝ន់ញជ្រាង់ឆាក់ជាន់ងាន់‌ ៣៤ យ៝រមានោកម៝ងនារអីនៃត៝ត់តឹមឞានមាទូហ្វេឞូក្លោអីលោសឞើសជៃហាន់នតុកអេង។ ពាង់ដាៈមពោលទឹកម៝ត់អ្វាញ់ជៃ នហ៝មាពាៈនាវជានការអ៝ន់មាទូហ្វេទូហ្វេ ជេសរីពាង់ដាៈឞូនុយ្សអីចាម់ជៃនៃញជ្រាង់ងាន់។* ៣៥ លាសនទ្រីអ៝ន់ខាន់មៃគុរាងែសញជ្រាង់ងាន់កើតនៃដ៝ង់ យ៝រលាសខាន់មៃមោគឹតអោសម៝ងនារអីនៃ តឹមឞានមាទឹកអីនៃមោគឹតអោសម៝ងនារតើមជៃនៃព្លឹឆឹត គឹតមាង់គឹតងគូលមាង់គឹតនទ្រាវអ្យារ់ មោលាសអើមអោយ។ ៣៦ ក្លាចលាសត៝ត់ពាង់ព្លឹឆឹតមោគែសមឞើសល៝រ ជេសរីឆៃខាន់មៃហាក់ឞិច។* ៣៧ នាវអីគ៝ប់មឞើសមាខាន់មៃអ្យា គ៝ប់អុចមឞើសមាទឹងលែៈឞូនុយ្សដ៝ង់៖ អ៝ន់គុរាងែសញជ្រាង់ឆាក់!”

*១៣:២ ១៣:២៖ លក ១៩:៤៤; យេរ ៧:១៤

*១៣:៨ ១៣:៨៖ អេឆា ១៩:២

*១៣:៩ ១៣:៩៖ ការ ៥:៤០; ៧:៥៧-៥៨; ២កោ ១១:២៤

*១៣:១០ ១៣:១០៖ មក ១៦:១៥

*១៣:១១ ១៣:១១៖ លក ១២:១១-១២; ការ ៤:៨

*១៣:១២ ១៣:១២៖ លក ១២:៥២-៥៣; មកា ៧:៦

*១៣:១៣ ១៣:១៣៖ យហ ១៥:១៨-២១

*១៣:១៤ ១៣:១៤៖ ដាន ៩:២៧; ១១:៣១; ១២:១១; មថ ២៤:១៥

*១៣:១៥ ១៣:១៥៖ តាឞ្រីអីឆ្រាអែល ជៃគែសច៝រល៝ង់ គៃមាជានការ គុរាលូ មោលាសអីសនទើ ជេសរីគូងហាវឞើសទីសជៃ។

*១៣:១៩ ១៣:១៩៖ ដាន ១២:១

*១៣:២២ ១៣:២២៖ ២តេ ២:៩; ២ពេ ២:១; នតម ១៣:១៣-១៤

*១៣:២៥ ១៣:២៤-២៥៖ អេឆា ១៣:១០; ៣៤:៤; ២ពេ ៣:១០; នតម ៦:១២-១៣

*១៣:២៦ ១៣:២៦៖ ដាន ៧:១៣-១៤; នតម ១:៧

*១៣:២៧ ១៣:២៧៖ ១តេ ៤:១៧

*១៣:៣១ ១៣:៣១៖ អេឆា ៤០:៨

*១៣:៣២ ១៣:៣២៖ ការ ១:៧

*១៣:៣៤ ១៣:៣៤-៣៥៖ លក ១២:៣៥-៤០

*១៣:៣៦ ១៣:៣៦៖ មថ ២៥:១-១៣