នាវកោរាញឞ្រាសងើយនាវតឹមរាង្លាប់មហែ មារកោស 16

ឞ្រាសយេឆូ ទ៝ក់រេសតៃ

(មថ ២៨:១-៨; លក ២៤:១-១២; យហ ២០:១-១០)

1 អាមាង់ជេសលោចនារឆាបាត់ អីនាររាលូផូងអីឆ្រាអែល *មពោលឞូអូរមារី អីតាៈឞើសប៝នមាដាលា មារី អីមេៈយាកើ នទ្រែលមាទូហ្វេឞូអូរអេងជឹតរាញាឆាលោមេ លែវឞាល់រាវាត់ទាកងីបោកាសគៃមាញអោតត៝ៈតាឆាក់ឞ្រាសយេឆូ ។ 2 កាសអើមអោយតានារពើស ខាន់ពាង់លែវឞាល់ហាន់អាមោចនោកឞ្រីលែៈអាងនារលែៈលោស‌ 3 ងើយនទ្រាង់ខាន់ពាង់នើមលាស៖ “នទ្រីឞូម៝សឆើមរាលាៈលុអីរាទ៝ល់ត្រោមមោចអ៝ន់មាឞ៝ន់ហ្យាស?”* 4 ត៝ត់តាមោចនៃ ខាន់ពាង់ងើកអ្វាញ់ឆៃលុលែៈអើមរាលាៈជឹតមែងត្រោមមោច។ លុអីនៃក្វ៝ង់ងាន់។ 5 ជេសខាន់ពាង់លាប់តាត្រោមមោចនៃ ឆៃទូហ្វេឞូនទាម់†គុរាគើបមពែសឞើសមា ញឆ៝សអាវក្វ៝ង់ងលាង។ ល៝ង់មពោលឞូអូរអីនៃក្លាចញឆ៝រ់។ 6 ឞូនទាម់អីនៃលាសមាខាន់ពាង់៖ “លើយទឹងក្លាចអោស! ខាន់អៃជ៝យឞ្រាសយេឆូ អីតាៈឞើសប៝ននាឆារែត អីឞូងខឹតតាឆីតឹមរាកាង់នើស។ លែៈកោរាញឞ្រាសរាទ៝ក់ពាង់អ៝ន់ទ៝ក់រេសតៃ។ ពាង់មោហោមអោសគុតាអ្យា អ្វាញ់អែស តានតុកអ្យាឞូញជ៝រឆាក់ពាង់នើស។* 7 ហាន់ខាន់អៃឆឹតមឞើសមពោលអ៝សម៝នពាង់រី នហ៝មាមឞើសពេត្រោស ដ៝ង់៖ «ពាង់ហាន់អាឞ្រីកាលីលេ ល៝រឞើសនាប់ខាន់អៃមៃ អារីតៃខាន់អៃមៃឆៃពាង់ តឹមទីកើតពាង់លែៈជេសនតិញនើស»”។* 8 ជេសរីមពោលឞូអូរនៃទូលោសឞើសមោចញច្វាត់រ៝ង់ឞ្រ៝ង់នអ៝ប់មាញឆ៝រ់ក្លាចនទ្រ៝ត់ហីសរាហ៝ល់ងាន់។ ខាន់ពាង់មោអោសមឞើសនាវអីនៃអ៝ន់មាឞូ យ៝រមាក្លាចហោងាន់។

ឞ្រាសយេឆូ ញហើឆាក់អ៝ន់មពោលអ៝សម៝នឆៃ

9 [តាអោយនារពើស ឞ្រាសយេឆូ ទ៝ក់រេសតៃ ពាង់ញហើល៝រឆាក់អ៝ន់មាមារី ឆៃ មារី អីនៃតាៈឞើសប៝នមាដាលា ។ ពាង់ឞ្រាសយេឆូ លែៈមព្រើសពើសឞ្រាសអ្យើសលោសឞើសឆាក់ពាង់នើស។* 10 ជេសរីមារី ហាន់មឞើសនាវអីនៃអ៝ន់មាមពោលអ៝សម៝នពាង់ ខាន់ពាង់ហោមអែរាង៝តរាវៃញុមវើលពាង់ដ៝ង់។ 11 ត៝ត់តាង់មារី ងក៝ចលាសពាង់លែៈទ៝ក់រេសតៃ តាង់ងក៝ចដ៝ង់លាសមារី លែៈឆៃពាង់ មោអោសខាន់ពាង់អុចអ្យាត់។ 12 ជេសរីឞ្រាសយេឆូ ញហើឆាក់អ៝ន់ឞារហៃអ៝សម៝នឆៃ ជេសខាន់ពាង់លោសឞើសប៝នយេរូឆាលឹម ហាន់រ៝ៈត្រ៝ង។ នោកនៃមុសមាត់ឞ្រាសយេឆូ អេងដាសអាល៝រនើស។* 13 ជេសរីឞារហៃខាន់ពាង់ហាន់ព្លឹជឹតកើយមឞើសនាវអីនៃមាមពោលអ៝សម៝នអាអេងដ៝ង់ តីសមាខាន់ពាង់មោអុចអ្យាត់ដ៝ង់។ 14 កេងមាទុតនោកខាន់ពាង់ហោមគុឆោងឆា ឞ្រាសយេឆូ ញហើឆាក់អ៝ន់មា ១១ នុយ្សមពោលកោរាញអ៝សម៝នឆៃ ជេសរីឞ្រាសយេឆូ នទុយ្សខាន់ពាង់ អាចមាខាន់ពាង់ទាង់ក៝មោអុចអ្យាត់លែៈនាវអីឞូងក៝ចលាសឆៃពាង់លែៈជេសទ៝ក់រេសតៃនើស។* 15 ពាង់លាសមាខាន់ពាង់៖ “ខាន់មៃហាន់អ៝ន់លាមនែសនតូអ្យា ជេសរីមឞើសងក៝ចនាវមហែមហានអ្វែសអ៝ន់មាទឹងលែៈឞូនុយ្សទោ។ 16 ឞូម៝សអ្យាត់នាវងក៝ចអីនៃជេសរីទើននាវបាប់តែមយុកមាទាក ពាង់អីនៃកោរាញឞ្រាសទែរាក្លាយ្ស។ ឞូម៝សអីមោអ្យាត់អោសពាង់អីនៃកោរាញឞ្រាសតេៈទោយ្សមាពាង់រ៝។* 17 ឞូម៝សអីអ្យាត់នាវអីនៃ ខាន់ពាង់ជាននាវមឞេនកើតនអា៖ មព្រើសឞ្រាសអ្យើសយ៝រមានាវទើយគ៝ប់ ឞ្លាវនាវងើយអីខាន់ពាង់មោអោសព្រ៝តងើយ។* 18 លាសខាន់ពាង់ញុបឞេសគែសកាច់ មោលាសញេតនទើខេស ខាន់ពាង់មោគែសនាវត៝ត់ដ៝ង់។ លាសខាន់ពាង់តេៈតីតាឞូនុយ្សជី នាវជីពាង់ឞាសរ៝”។*

ឞ្រាសយេឆូ ឆឹតតាប៝នអ្វែសកាលើ

19 ជេសកោរាញយេឆូ ងើយលែៈនាវអីនៃ ជេសរីកោរាញឞ្រាសឆ៝ៈនហាវពាង់ឆឹតតាប៝នអ្វែសកាលើត្រោក អ៝ន់គុមពែសឞើសមាតីកោរាញឞ្រាសនើម។* 20 ជេសរីខាន់ពាង់ហាន់មឞើសងក៝ចនាវមហែមហានអ្វែសអាប់នតុក នហ៝មាកោរាញឞ្រាសកើលជានការនទ្រែលខាន់ពាង់ អ៝ន់ខាន់ពាង់ទើយជាននាវមឞេនអេងៗ គៃមាអ៝ន់ឞូឆៃនាវអីនៃលែៈទីងាន់៕*]៚

*16:1 ១៦:១៖ ផូងអីឆ្រាអែល នតើមកើបនារមហែនតើមលែៈជេសញ៝ប់នារ។

*16:3 ១៦:៣៖ មក ១៥:៤៦

†16:5 ១៦:៥៖ ពាង់អីនៃតោងពារ់ជានឆាក់តឹមឞានមាឞូនទាម់។

*16:6 ១៦:៦៖ មក ៨:៣១

*16:7 ១៦:៧៖ មក ១៤:២៨

*16:9 ១៦:៩-១០៖ លក ៨:២; យហ ២០:១៤-១៨

*16:12 ១៦:១២-១៣៖ លក ២៤:១៣-៣៥

*16:14 ១៦:១៤៖ ១កោ ១៥:៥

*16:16 ១៦:១៦៖ ការ ២:៣៨; ១៦:៣១

*16:17 ១៦:១៧៖ មក ៦:៧, ១៣; ការ ២:៤; ៨:៧; ១កោ ១២:១០; ១៤:១-៤០

*16:18 ១៦:១៨៖ ការ ២៨:៣-៦; ៥:១៦; ៨:៧; យាក ៥:១៤-១៥

*16:19 ១៦:១៩៖ ការ ១:៩-១១; រម ៨:៣៤

*16:20 ១៦:២០៖ ហេឞ ២:៤