នាវកោរាញឞ្រាសងើយនាវតឹមរាង្លាប់មហែ នាវតឹមមពើល 5

ឆ៝ម់បុតគែសពើសអឹត្រា នទ្រែលមាក៝នឞែឞ្យាប់កោរាញឞ្រាស

1 ជេសរីគ៝ប់ឆៃទូមល៝ម់ឆ៝ម់បុតក្លោនក្វាន់តាតីឞើសមានើមអីគុតារានើលកាដាច់នៃ តាឆ៝ម់បុតអីនៃគែសញចីសរាព្លៃនាវ នអ៝ប់មាតាត្រោម នអ៝ប់មាតាឞើសទីសដ៝ង់ នទ្រែលមាគែសពើសអឹត្រាមឞាងតាឞើសលើឆ៝ម់បុតរី គៃមាឞ្វៃមោអ៝ន់ទាសមាពើក។* 2 ជេសឞើសនៃ គ៝ប់ឆៃទូហ្វេតោងពារ់ទុតទាង់នតែរទុតទាង់៖ “ឞូម៝សអីទីមាព្លោកត្រាអ្យា ជេសរីទីមាពើកឆ៝ម់បុតអ្យា?” 3 យើនមាមោគែសអោសទូហ្វេតាកាលើត្រោកកាដោយ តានែសនតូកាដោយ មោលាសតាន៝ម់នែសកាដោយអីទើយពើកអីទើយអ្វាញ់ឆ៝ម់បុតអីនៃ។ 4 នោកនៃគ៝ប់ញុមទុតហោងាន់ យ៝រលាសមោគែសអោសទូហ្វេអីទីមាពើកអីទីមាអ្វាញ់ឆ៝ម់បុតអីនៃ។ 5 ជេសរីទោមាគែសទូហ្វេឞើសមពោលកោរាញអីនៃលាសមាគ៝ប់៖ “លើយញុម! អ្វាញ់រី គែសទូហ្វេឞូនុយ្សអីឞូក្វាល់«យៅមុរ»អីតានទុលមពោលយូដា ជេងក៝នឆៅកាដាច់ដាវីត *ពាង់លែៈទើយជេសដាសមាឆាតាង់ អីកោរាញមពោលឞ្រាសអ្យើស ពាង់ទីមាព្លោកពើសអឹត្រា នទ្រែលមាពើកឆ៝ម់បុតអីនៃ”។*

6 ជេសរីគ៝ប់ឆៃទូមល៝ម់ក៝នឞែឞ្យាប់ទ៝ក់តាងក្លាងឞើសនាប់រានើលកាដាច់រី តាងក្លាងនទើអីគែសនាវរេស នទ្រែលមាតាងក្លាងមពោលកោរាញ។ ក៝នឞែឞ្យាប់អីនៃអ្វាញ់តឹមឞានមាលែៈជេសឞូងខឹត គែសពើសអឹងកែ នទ្រែលមាគែសពើសអឹត្រោមមាត់ដ៝ង់ ត្រោមមាត់អីនៃជេងឞ្រាសហ្វេងអ្វែស†កោរាញឞ្រាសនើម អីពាង់អ៝ន់ហាន់លាមនែសនតូ។* 7 ក៝នឞែឞ្យាប់អីនៃហាន់ឆ៝ៈឆ៝ម់បុតឞើសតីមានើមអីគុតារានើលកាដាច់នៃ។ 8 ជេសពាង់ឆ៝ៈឆ៝ម់បុតអីនៃ ព្វាន់នុយ្សនទើអីគែសនាវរេស នទ្រែលមាមពោលកោរាញអី ២៤ នុយ្សនៃលែវឞាល់ពាន់ឞើសនាប់ពាង់ទាទេ ទឹងលែៈមពោលកោរាញអីនៃទូហ្វេទូហ្វេញអោតទូមល៝ម់គ៝ងរេង នទ្រែលមាទូមល៝ម់ងានមាយ្សគែសឞេងមានទើបោកាសមាឆូ នទើបោកាសអីនៃជេងនាវមឞើសឆើមផូងប៝នលានកោរាញឞ្រាស។* 9 ជេសរីខាន់ពាង់មព្រើនាវមព្រើមហែទូនាវ៖

“មៃទីងាន់មាឆ៝ៈឆ៝ម់បុតអីនៃ

នហ៝មាព្លោកត្រាដ៝ង់‌

យ៝រលាសមៃលែៈឞូងខឹតលើយ ជេសរីមៃលែៈច្វាយជេសឞូនុយ្សមាមហាមមៃនើម‌

គៃមាខាន់ពាង់ជេងប៝នលានកោរាញឞ្រាស ឞើសទឹងលែៈរាន៝យទែស ឞើសទឹងលែៈនាវងើយ‌

ឞើសទឹងលែៈនទុលមពោលឞូនុយ្ស នទ្រែលមាឞើសទឹងលែៈឞ្រីទាក។*

10 មៃលែៈជានខាន់ពាង់អ៝ន់ជេងទូផូងប៝នលានអីគែសកាដាច់‌*

នទ្រែលមាជេងឞូនុយ្សជានឞ្រាស ឆើមកើលជានការមាកោរាញឞ្រាសអីឞ៝ន់យើកមឞាស។

ជេសរីទឹងលែៈខាន់ពាង់អីនៃមរាម៝ត់អ្វាញ់នែសនតូ”។

11 ជេសរីគ៝ប់អ្វាញ់ទូតឹជឹត តាង់នតែសផូងតោងពារ់ទុតអ៝ក់ជុមរានើលកាដាច់ ជុមនទើអីគែសនាវរេស ជុមមពោលកោរាញអីនៃ។ ផូងតោងពារ់អីនៃអ៝ក់រាមឺនរាឆែន ទុតអ៝ក់ងាន់‌* 12 ជេសរីលែវឞាល់លាសទុតទាង់ងាន់៖

“ក៝នឞែឞ្យាប់អីឞូងខឹតលើយនៃនើស‌

ពាង់ទីងាន់មាវើតទើននាវទើយ នាវមឹនគឹតឞ្លាវ នាវទាង់‌

នាវយើក នាវច្រេកលើប នាវរានេ នទ្រែលមាឆ៝ៈនទើទុតខ្លៃ!”

13 ជេសរីគ៝ប់តាង់ទឹងលែៈនទើអីគែសនាវរេសតាកាលើត្រោក តានែសនតូ តាន៝ម់នែស តាទាកវាច់ទាកវារ់ នអ៝ប់មាទឹងលែៈនទើអីគុទឹងលែៈនតុកអីនៃលាសទុតទាង់ងាន់៖

“អ៝ន់រានេ អ៝ន់យើក អ៝ន់រានេនាវច្រេកលើប នទ្រែលមាអ៝ន់នាវទើយ

បាបើនហ៝រ៝

មាពាង់អីគុតារានើលកាដាច់ នទ្រែលមាអីក៝នឞែឞ្យាប់”។*

14 ជេសឞើសនៃព្វាន់នុយ្សនទើអីគែសនាវរេសអីនៃលាស៖ “អើអ៝ន់គែសកើតនៃងាន់រ៝‡!” ជេសរីមពោលកោរាញលែវឞាល់ពាន់យើកមឞាសពាង់អីគុតារានើលកាដាច់ នទ្រែលមាក៝នឞែឞ្យាប់អីនៃ។*

*5:1 ៥:១៖ នតម ៤:២-៣; អេឆេ ២:៩-១០

*5:5 ៥:៥៖ «ក៝នឆៅកាដាច់ដាវីត » មោលាស «រែសដាវីត »។

*5:5 ៥:៥៖ នន ៤៩:៩-១០; អេឆា ១១:១

†5:6 ៥:៦៖ មោលាស «ជេងពើសហ្វេង»។ ទាន់អ្វាញ់តានទើញចីសឞើសទ៝ង់តា នតម ១:៤។

*5:6 ៥:៦៖ នតម ៧:១៤, ១៧; ១២:១១; ១៣:៨; យហ ១:២៩

*5:8 ៥:៨៖ នតម ៨:៣-៤

*5:9 ៥:៩៖ នម ៤០:៣; ១ពេ ១:១៨-១៩

*5:10 ៥:១០៖ នតម ១:៦; ១ពេ ២:៩

*5:11 ៥:១១-១២៖ នតម ៧:១១-១២; ដាន ៧:១០; ហេឞ ១២:២២

*5:13 ៥:១៣៖ នតម ៧:១០; ផល ២:១០

‡5:14 ៥:១៤៖ «អើអ៝ន់គែសកើតនៃងាន់រ៝» មោលាស «អាមែន »។

*5:14 ៥:១៤៖ នតម ៤:៩-១០; ១៩:៤