នាវកោរាញឞ្រាសងើយតានាវងើយឞូន៝ង នាវតឹមមពើល ៧

៧

ប៝នលានកោរាញឞ្រាសនើម

១ ឞើសកើយនៃគ៝ប់ឆៃគែសព្វាន់នុយ្សតោងពារ់ ទ៝ក់អាប់ព្វាន់ញជោញនែសនតូ។ ទឹងលែៈតោងពារ់អីនៃងកីងលើយឆ្យាលអាប់ព្វាន់ញជោញ មោអោសអ៝ន់ខោមមព្រាតតានែសនតូ តាទាកវាច់ទាកវារ់ មោលាសតាតើមឆីទូតើម។ ២ ជេសរីគ៝ប់ឆៃទូហ្វេតោងពារ់ជឹតតាៈឞើសមពែសលោសនាររី ញអោតនអ៝ប់មាត្រាកោរាញឞ្រាសនើមអីរេសងាន់។ តោងពារ់អីនៃនតែរទុតទាង់លាសមាព្វាន់នុយ្សតោងពារ់អីលែៈគែសជេសនាវទើយមាជានអ្យើសមានែសនតូ នទ្រែលមាទាកវាច់ទាកវារ់៖ ៣ “លើយហ៝ៈអោសជានអ្យើសមានែសនតូ មាទាកវាច់ទាកវារ់ មោលាសមាតើមឆីទូតើម ក៝ប់ជេសហេនមឞាងត្រាតានទាង់ក្លែងផូងឆើមកើលជានការមា*កោរាញឞ្រាសនើមអីឞ៝ន់យើកមឞាសនៃប៝ត់”។* ៤ នោកនៃគ៝ប់តាង់ទឹងលែៈផូងអីគែសមឞាងត្រានៃ គែស ១៤៤០០០ នុយ្ស ផូងអីនៃជេងតាៈឞើសទឹងលែៈ ១២ មពោលផូងអីឆ្រាអែល ទាទេ៖* ៥ ១២០០០ នុយ្សជេងតាៈឞើសរាន៝យមពោលយូដា ‌ ១២០០០ នុយ្សជេងតាៈឞើសរាន៝យមពោលរូបេន ‌ ១២០០០ នុយ្សជេងតាៈឞើសរាន៝យមពោលគាត ‌ ៦ ១២០០០ នុយ្សជេងតាៈឞើសរាន៝យមពោលអាឆើរ ‌ ១២០០០ នុយ្សជេងតាៈឞើសរាន៝យមពោលនាប់តាលី ‌ ១២០០០ នុយ្សជេងតាៈឞើសរាន៝យមពោលមានាឆេ ‌ ៧ ១២០០០ នុយ្សជេងតាៈឞើសរាន៝យមពោលឆីមេអោន ‌ ១២០០០ នុយ្សជេងតាៈឞើសរាន៝យមពោលលេវី ‌ ១២០០០ នុយ្សជេងតាៈឞើសរាន៝យមពោលអីឆាខារ ‌ ៨ ១២០០០ នុយ្សជេងតាៈឞើសរាន៝យមពោលឆាបូលោន ‌ ១២០០០ នុយ្សជេងតាៈឞើសរាន៝យមពោលយោឆែប ‌ នទ្រែលមា ១២០០០ នុយ្សជេងតាៈឞើសរាន៝យមពោលបែនយាមឹន អីឞូមឞាងត្រា។

ផូងប៝នលានទុតអ៝ក់ឞើសនាប់រានើលកាដាច់

៩ ឞើសកើយនៃគ៝ប់ឆៃដ៝ង់ឞូនុយ្សទុតអ៝ក់ងាន់ មោអោសគែសឞូនុយ្សទើយកើប ទឹងលែៈផូងអីនៃជេងតាៈឞើសទឹងលែៈឞ្រីទាក ទឹងលែៈរាន៝យទែស ទឹងលែៈនទុលមពោលឞូនុយ្ស នទ្រែលមាទឹងលែៈនាវងើយ។ ទឹងលែៈខាន់ពាង់ញឆ៝សអាវងលាងជ៝ងទាទេ ទ៝ក់ឞើសនាប់រានើលកាដាច់ នទ្រែលមាឞើសនាប់មាត់ក៝នឞែឞ្យាប់រី នអ៝ប់មាញអោតនហាជោមតាតីដ៝ង់។* ១០ ខាន់ពាង់នតែរទុតទាង់ៗ៖

“គែសកោរាញឞ្រាសអីគុតារានើលកាដាច់នៃ នទ្រែលមាក៝នឞែឞ្យាប់ទើមអីរាក្លាយ្សឞូនុយ្ស”។*

១១ នោកនៃទឹងលែៈតោងពារ់អីគុជុមរានើលកាដាច់ ជុមមពោលកោរាញអី ២៤ នុយ្ស នទ្រែលមាជុមព្វាន់នុយ្សនទើអីគែសនាវរេសរី លែវឞាល់ពាន់ឞើសនាប់រានើលកាដាច់កុញមុសមាត់អានែសឆូយើកមឞាសមាកោរាញឞ្រាស‌* ១២ ខាន់ពាង់លាស៖

“នាវអីនៃទីងាន់†! អ៝ន់រានេមាកោរាញឞ្រាសអីឞ្រាសឞ៝ន់យើកមឞាស

អ៝ន់លាសអ្វែសមាពាង់ នអ៝ប់មាអ៝ន់យើកមាពាង់បាបើនហ៝រ៝!

ពាង់គែសនាវច្រេកលើប ពាង់គែសនាវមឹនគឹតឞ្លាវ‌

ពាង់គែសនាវទាង់ នទ្រែលមានាវទើយបាបើនហ៝រ៝! នាវអីនៃទីងាន់!”

១៣ ជេសរីគែសទូហ្វេកោរាញតាមពោលកោរាញអីនៃអោបគ៝ប់៖ “ផូងអីញឆ៝សអាវងលាងជ៝ងនៃ ឞូម៝សខាន់ពាង់ ឞើសតាៈខាន់ពាង់?” ១៤ គ៝ប់អើសមាពាង់៖ “អើកោរាញ មៃលែៈគឹតជេស”។ ជេសរីពាង់លាសមាគ៝ប់៖ “ទឹងលែៈផូងអីនៃលែៈម៝ប់ជេសនាវជេរជ៝ត់ទុតក្វ៝ង់។ ខាន់ពាង់លែៈពីសជេសអាវខាន់ពាង់នើមអ៝ន់ក្ល៝សមាមហាមក៝នឞែឞ្យាប់អីនៃ។*

១៥ កើតនទ្រីទឹងខាន់ពាង់ហោមគុតាឞើសនាប់រានើលកាដាច់កោរាញឞ្រាសនើម‌

នទ្រែលមាឆើមកើលជានការអ៝ន់មាពាង់នទាង់មាង់មានារតាញីសជានឞ្រាសពាង់នើម។

នើមអីគុតារានើលកាដាច់នៃអ៝ន់នតុកខាន់ពាង់មាគុនទែ។*

១៦ ខាន់ពាង់មោហោមអោសជីង៝តមោហោមជីហីរជឹត‌

មោហោមដ៝ង់គុថ៝ង់តានារ‌

មោហោមអោសទោសនារហ្យាក់មាខាន់ពាង់ជឹត‌*

១៧ យ៝រលាសក៝នឞែឞ្យាប់អីគុតារានើលកាដាច់នៃ ពាង់មរាម៝ត់អ្វាញ់ខាន់ពាង់តឹមឞានមាឞូច្យាប់ឞែឞ្យាប់‌

នទ្រែលមាលែវខាន់ពាង់តានតុកតូទាកអ៝ន់នាវរេស‌

ជេសរីកោរាញឞ្រាសមរាជូតលើយទឹងលែៈទាកមាត់ឞើសត្រោមមាត់ខាន់ពាង់នើម”។*

*៧:៣ ៧:៣៖ «ផូងឆើមកើលជានការមា» មោលាស «ផូងទឹក»។

*៧:៣ ៧:៣៖ នតម ៩:៤; អេឆេ ៩:៤, ៦

*៧:៤ ៧:៤៖ នតម ១៤:១, ៣

*៧:៩ ៧:៩៖ នតម ១៩:៨

*៧:១០ ៧:១០៖ នតម ៥:១៣

*៧:១១ ៧:១១-១២៖ នតម ៥:១១-១២

†៧:១២ ៧:១២៖ «នាវអីនៃទីងាន់» មោលាស «អាមែន »។ តាត្រ៝ងឞើសទ៝ង់អ្យាគែសកើតនៃដ៝ង់។

*៧:១៤ ៧:១៤៖ នតម ៥:៦; ២២:១៤; ១យហ ១:៧

*៧:១៥ ៧:១៥៖ នតម ២១:៣

*៧:១៦ ៧:១៦-១៧៖ អេឆា ៤៩:៩-១០

*៧:១៧ ៧:១៧៖ នតម ២១:៤, ៦; អេឆេ ៣៤:១១-១៦