នាវកោរាញឞ្រាសងើយតានាវងើយឞូន៝ង នាវតឹមមពើល ១១

១១

ឞូនុយ្សឞារហៃជាននាវខ្លៃ

១ ជេសរីឞូអ៝ន់ទូមល៝ម់តើមត្រែងមាគ៝ប់តឹមឞានមាម៝ង់វែស កោរាញឞ្រាសលាសមាគ៝ប់៖ “អ៝ន់មៃទ៝ក់ហ៝ម់ ហាន់វែសញីសជានឞ្រាសមាកោរាញឞ្រាសនើម វែសញឆឺងជានឞ្រាស នទ្រែលមាកើបទឹងលែៈឞូនុយ្សអីយើកមឞាសមាកោរាញឞ្រាសតានតុកនៃដ៝ង់។* ២ យើនមាលើយអោសវែសតាជ៝ង់គូងញីសជានឞ្រាសអីឞើសទីស យ៝រលាសតានតុកនៃលែៈឞូអ៝ន់មាផូងអីមោទីផូងប៝នលានកោរាញឞ្រាស* ខាន់ពាង់មរាតុនជ៝តប៝នក្ល៝សអ្វែសជ៝ៈ ៤២ ខៃ។ * ៣ ជេសរីគ៝ប់មរាអ៝ន់នាវទើយមាឞារហៃឞូនុយ្សតើមមឞើសងក៝ចនាវខ្លៃគ៝ប់ ខាន់ពាង់ញឆ៝សងគូតបាវច្យាត់ នអ៝ប់មានតើយ្សនាវងើយគ៝ប់ជ៝ៈ ១២៦០ នារ”†។* ៤ លែៈគែសញចីសតានាវកោរាញឞ្រាសងើយមាឞារតើមអោលីវ នទ្រែលមាឞារអឹជ៝ង់ឆាគេង ខាន់ពាង់ទ៝ក់ឞើសនាប់នើមអីកោរាញមានែសនតូ ជេងនាវងើយហោរមាឞារហៃឞូនុយ្សតើមមឞើសងក៝ចអីនៃ។* ៥ លាសឞូម៝សអីហាន់លើសឞារហៃខាន់ពាង់អីនៃ គែសអុញលោសឞើសមឞូងខាន់ពាង់ឆូលើយផូងអីហាន់លើសខាន់ពាង់រ៝។ ឞូម៝សអីហាន់លើសខាន់ពាង់ ពាង់អីនៃខឹតកើតនៃងាន់រ៝។ ៦ ឞារហៃខាន់ពាង់អីនៃគែសនាវទើយជានអ៝ន់ត្រោកមោអោសគែសមីសនោកខាន់ពាង់ហោមនតើយ្សនាវងើយកោរាញឞ្រាស ជេសរីគែសដ៝ង់នាវទើយជានអ៝ន់ទឹងលែៈទាកជេងមហាម នអ៝ប់មាទើយជាននាវជេរអាប់នតីលអ៝ន់គែសតានែសនតូ ទាសអ៝ក់តឹខាន់ពាង់នើមអុច។*

៧ នោកឞារហៃខាន់ពាង់អីនៃលែៈជេសនតើយ្សលែៈផ្យៅ គែសមពោមពា(ឆ្យុម)ទុតជាញលោសឞើសនតូឞ្រ៝ង់អីនៃតឹមលើសដាសខាន់ពាង់ ទើយពាង់អីនៃ ជេសរីងខឹតលើយខាន់ពាង់ដ៝ង់។* ៨ អីឆាក់ខាន់ពាង់នៃឞូនត្លើយរ៝ៈត្រ៝ងប៝នក្វ៝ង់នៃ ជេងប៝នអីឞូងើយហោររាញា«ប៝នឆោដុម » មោលាស«ឞ្រីអេឆីប » យ៝រលាសតាប៝នអីនៃឞូជានអ្យើសហោងាន់ តាប៝នអីនៃដ៝ង់នតុកឞូងខឹតកោរាញខាន់ពាង់នើមតាឆីតឹមរាកាង់នើស។* ៩ ឞូនុយ្សតាៈឞើសទឹងលែៈនទុលមពោលឞូនុយ្ស តាៈឞើសទឹងលែៈរាន៝យទែស តាៈឞើសទឹងលែៈនាវងើយ នទ្រែលមាតាៈឞើសទឹងលែៈឞ្រីទាក ទឹងលែៈខាន់ពាង់មរាអ្វាញ់ឆៃឆាក់ឞារហៃអីនៃជ៝ៈពែនារងគូល ឞូមោអ៝ន់អោសត៝ប់តាមោច។ ១០ ទឹងលែៈឞូនុយ្សតានែសនតូអ្យាគែសនូយ្សនហ៝ម់រាម់មអាកហោងាន់ យ៝រមាឆៃខាន់ពាង់ឞារហៃនៃលែៈខឹតជេស ឞូព៝ល់មអាកទុតហោងាន់ តឹមអ៝ន់នទើទើមទាមឞូអ៝ន់ហែ ហែអ៝ន់ឞូ យ៝រលាសឞូនុយ្សអីនតើយ្សនាវងើយកោរាញឞ្រាសឞារហៃនៃនើសជានអ៝ន់ឞូនុយ្សគុតានែសនតូអ្យាគែសនាវជេរជ៝ត់ទុតហោងាន់។

១១ យើនមាលោចពែនារងគូលនៃ គែសនហ៝ម់នាវរេសលោសតាៈឞើសកោរាញឞ្រាសលាប់តាឞូនុយ្សខឹតឞារហៃនៃ។ ឞារហៃខាន់ពាង់អីនៃទ៝ក់រើបដើបរ៝ ទឹងលែៈឞូនុយ្សអីឆៃនៃក្លាចញឆ៝រ់ងាន់។* ១២ ជេសរីតាង់នតែសឞ៝រ់ទុតទាង់តាៈឞើសកាលើត្រោកតីលាសមាឞារហៃខាន់ពាង់នៃ៖ “ហាវអាអ្យាហ៝ម់!” ជេសរីឞារហៃខាន់ពាង់អីនៃហាវអាត្រោកតាត្រោមតុករី ល៝ង់ផូងអីរាលាង់ដាសខាន់ពាង់អ្វាញ់ឆៃដ៝ង់។* ១៣ នោកនៃទោមាងគើនែសទុតហោងាន់ ប៝នលែៈទូកោៈតឹមជឹត(១/១០)រាល៝ម់លែៈផ្យៅ ឞូនុយ្ស ៧០០០ នុយ្សខឹតនោកងគើនែសនៃ។ ឞូនុយ្សអីហោមរេសក្លាចញឆ៝រ់ងាន់ ខាន់ពាង់លែវឞាល់រានេកោរាញឞ្រាសអីគុតាកាលើត្រោកតី។ ១៤ នាវរេសរាញាល់ត៝ល់ឞារលែៈលោចជេស ល៝ង់នាវរេសរាញាល់ត៝ល់ពែមរាត៝ត់គើញរ៝។

នតែសនុងត៝ល់ពើស

១៥ ជេសរីតោងពារ់ត៝ល់ពើសអោសនុងពាង់នើម ទោមាគែសនតែសឞ៝រ់ងើយទុតទាង់អ៝ក់ងាន់តាកាលើត្រោក លាសកើតនអា៖

“ទឹងលែៈឞ្រីទាកតានែសនតូអ្យាលែៈជេងឞ្រីទាកកោរាញឞ៝ន់នើម‌

នទ្រែលមាជេងឞ្រីទាកឞ្រាសក្រីស អីពាង់លែៈកើយ្ស‌

ជេសរីពាង់មរាជេងកាដាច់បាបើនហ៝រ៝!”*

១៦ នោកនៃមពោលកោរាញអី ២៤ នុយ្សអីគុតារានើលកាដាច់ខាន់ពាង់នើមតាឞើសនាប់កោរាញឞ្រាស ខាន់ពាង់លែវឞាល់ពាន់កុញមុសមាត់អានែស យើកមឞាសមាកោរាញឞ្រាស‌* ១៧ លាសមាពាង់៖

“អើកោរាញឞ្រាស មៃជេងកោរាញមៃទុតគែសនាវទើយមាទឹងលែៈនតីលនទើ‌

មៃគុរេសអាបៃអ្យា មៃលែៈអើមគុរេសនើស។

ហេនទាន់លាសអ្វែសមាមៃ‌

យ៝រលាសអាបៃអ្យាមៃលែៈញហើជេសនាវទុតទើយមៃនើម‌

មៃលែៈនតើមម៝ត់អ្វាញ់។

១៨ ផូងឞូនុយ្សទឹងលែៈឞ្រីទាកជីនូយ្សទាទេងាន់‌

យើនមាអាបៃអ្យាម៝ងមៃញហើនាវជីនូយ្សមៃនើមលែៈត៝ត់ដ៝ង់‌

ជេងលែៈតឹមទីម៝ងមៃផាតទោយ្សឞូនុយ្សខឹត។

ជេងលែៈតឹមទីម៝ងមៃអ៝ន់នទើងខោមមា

ឞូនុយ្សឆើមកើលជានការមា‡មៃ ជេងឞូនុយ្សនតើយ្សនាវងើយកោរាញឞ្រាស ជេងផូងប៝នលានមៃនើម‌

ជេងផូងក្លាចយើកមាមៃ‌

ឞ៝លលាសឞូជេៈឞូក្វ៝ង់‌

ជេងលែៈតឹមទីម៝ងដ៝ង់មាមៃងគ្រ៝សលើយឞូនុយ្សអីជាននាវងគ្រ៝សលើយតានែសនតូ”។*

១៩ នោកនៃញីសជានឞ្រាសមាកោរាញឞ្រាសតាកាលើត្រោករីពើកមពោង ជេសរីឞូឆៃហុបនាវតឹមរាង្លាប់កោរាញឞ្រាសតាត្រោមញីសជានឞ្រាសនៃដ៝ង់ គែសលើបងលាយ្ស គែសនតែសនត៝រ់មីស គែសងលាយ្ស គែសងគើនែសនតូ នទ្រែលមាគែសព្លែរទុតហោតុបតានែសនតូ។*

*១១:១ ១១:១៖ អេឆេ ៤០:៣, ៥; ៤១:២២; ៤២:១៥; ឆាក ២:១-២

*១១:២ ១១:២៖ មោលាស «ផូងអីមោទីផូងអីឆ្រាអែល »។

*១១:២ ១១:២៖ លក ២១:២៤; ដាន ៧:២៥; ១២:៧

†១១:៣ ១១:៣៖ «១២៦០ នារ»តឹមឞានមា «៤២ ខៃ»ដ៝ង់ យ៝រលាសតារានោកនៃឞូកើបអាប់ខៃគែស ៣០ នារ។

*១១:៣ ១១:៣៖ នតម ១២:៦

*១១:៤ ១១:៤៖ ឆាក ៤:១-៣, ១១-១៤

*១១:៦ ១១:៦៖ ១កក ១៧:១; នង ៧:២០-២១

*១១:៧ ១១:៧៖ នតម ១៣:១-៨

*១១:៨ ១១:៨៖ លក ១៣:៣៣-៣៤; នន ១៨:២០

*១១:១១ ១១:១១៖ អេឆេ ៣៧:៥, ១០

*១១:១២ ១១:១២៖ ការ ១:៩

*១១:១៥ ១១:១៥៖ នតម ១០:៧; ដាន ២:៤៤

*១១:១៦ ១១:១៦៖ នតម ៤:៤, ១០

‡១១:១៨ ១១:១៨៖ «ឞូនុយ្សឆើមកើលជានការមា» មោលាស «ទឹក»។

*១១:១៨ ១១:១៨៖ នម ២:១, ៥

*១១:១៩ ១១:១៩៖ ១កក ៨:១, ៦