នាវកោរាញឞ្រាសងើយនាវតឹមរាង្លាប់មហែ នាវតឹមមពើល 16

ពើសអឹងានមាយ្សអីអ៝ន់នាវជេរ

1 ជេសរីគ៝ប់តាង់នតែសឞ៝រ់ទុតទាង់ងាន់ឞើសញីសជានឞ្រាសរី លាសមាពើសនុយ្សតោងពារ់នៃ៖ “ហាន់ហ៝ម់ ងខុតហ៝ម់ពើសអឹងានអីគែសនាវកោរាញឞ្រាសតេៈទោយ្សនៃតានែសនតូ!”* 2 តោងពារ់ត៝ល់ង្វាយហាន់ងខុតងានពាង់នើមនៃតាកើសតានែសនតូ ជេសរីទឹងលែៈឞូនុយ្សអីគែសនាវមឞេនមពោមពា(ឆ្យុម)ទុតជាញនើស នទ្រែលមាយើកមឞាសមារូបពាង់នើស គែសនាវឆោតរាហ៝កជីទុតហោងាន់។* 3 តោងពារ់ត៝ល់ឞារងខុតងានពាង់នើមនៃតាទាកវាច់ទាកវារ់ ជេសរីទាកវាច់ទាកវារ់ជេងមហាមតឹមឞានមាមហាមឞូនុយ្សលែៈខឹត ជេសរីទឹងលែៈនទើអីរេសតាទាកវាច់ទាកវារ់នៃខឹតរុងខឹតរាចាៈលែៈផ្យៅ។* 4 តោងពារ់ត៝ល់ពែងខុតងានពាង់នើមនៃតាទឹងលែៈទាករាលាយ តាទឹងលែៈតូទាក ជេសរីទឹងលែៈទាកអីនៃជេងមហាមទាទេ។

5 ជេសរីគ៝ប់តាង់តោងពារ់អីកោរាញមាទាកលាស៖

“អើ កោរាញឞ្រាស មៃគុរេស មៃលែៈអើមគុរេស មៃនើមក្ល៝សអ្វែស។

មៃផាតទោយ្សតានាវអ្យាឆ៝ង់ងាន់‌

6 យ៝រលាសផូងឞូនុយ្សអីមៃតេៈទោយ្សអ្យា ខាន់ពាង់លែៈងខឹតលែៈញចាយមហាមផូងប៝នលានមៃនើម នទ្រែលមាផូងឞូនុយ្សនតើយ្សនាវងើយមៃ‌

កើតនទ្រីអាបៃអ្យាមៃអ៝ន់ខាន់ពាង់ញេតមហាម‌

ញឆុចដេៈខាន់ពាង់!”*

7 ជេសរីគ៝ប់តាង់នតែសឞ៝រ់ឞើសញឆឺងជានឞ្រាសលាសកើតនអា៖

“អើកោរាញឞ្រាស មៃទុតគែសនាវទើយមាទឹងលែៈនតីលនទើ‌

ទីងាន់ ឆ៝ង់ងាន់ ទឹងលែៈនាវមៃផាតទោយ្ស!”*

8 តោងពារ់ត៝ល់ព្វាន់ងខុតងានពាង់នើមតានារ ជេសរីនារគែសនាវទាង់ ជានអ៝ន់ឞូនុយ្សទោសអ្យែសងាន់យ៝រមាទោសហោអីរ។ 9 ទឹងលែៈឞូនុយ្សទោរាហ៝កយ៝រមាទោសហោអីរងាន់ យើនមាខាន់ពាង់មោអោសរាគ៝ល់លើយនូយ្សនហ៝ម់អ្យើស មោអោសរានេនាវច្រេកលើបកោរាញឞ្រាស ខាន់ពាង់រាកថាម់កោរាញឞ្រាសអីគែសនាវទើយមាទឹងលែៈនាវជេរអីនៃ។* 10 តោងពារ់ត៝ល់ព្រាម់ងខុតងានពាង់នើមតារានើលកាដាច់មពោមពា(ឆ្យុម)ទុតជាញនៃ ជេសរីឞ្រីទាកអីពាង់ម៝ត់អ្វាញ់ជេងង៝។ ទឹងលែៈឞូនុយ្សលែវឞាល់កាប់មព្យាត់ខាន់ពាង់នើម យ៝រមានាវរេសរាញាល់ហោអីរហោអារងាន់។* 11 ខាន់ពាង់លែវឞាល់រាកថាម់កោរាញឞ្រាសអីគុតាកាលើត្រោក យ៝រមារេសរាញាល់ហោអីរ នទ្រែលមាឆោតរាហ៝កតាឆាក់ខាន់ពាង់នើម។ លែៈទាសនៃហើយ្សគែសនាវរេសរាញាល់ យើនមាហោមអែមាខាន់ពាង់មោរាគ៝ល់លើយនូយ្សនហ៝ម់អ្យើសមោឞាសជានអ្យើស។

12 តោងពារ់ត៝ល់ព្រាវងខុតងានពាង់នើមតាទាករាលាយក្វ៝ង់ ជេងទាករាលាយអើប្រាត ជេសរីទាករាលាយអើប្រាត ឆ្វាត់លែៈផ្យៅ គៃមាគែសត្រ៝ងអ៝ន់មាមពោលកាដាច់តាៈឞើសលោសនារហាន់។* 13 ជេសរីគ៝ប់ឆៃពែហ្វេងឞ្រាសអ្យើសតឹមឞានមាកឹត ង្វាយលោសឞើសមឞូងឞេសញុកញាក់ ង្វាយលោសឞើសមឞូងមពោមពា(ឆ្យុម)អីទុតជាញនៃ ង្វាយជឹតលោសឞើសមឞូងឞូនុយ្សនតើយ្សងក្លាៈនាវងើយកោរាញឞ្រាស*‌* 14 ទឹងលែៈហ្វេងអីនៃជេងហ្វេងឞ្រាសអ្យើស។ ខាន់ពាង់ជាននាវគឹតមឞេនអេងៗងាន់ នអ៝ប់មាហាន់តាមពោលកាដាច់លាមនែសនតូ គៃមារាគូមមពោលកាដាច់អីនៃអ៝ន់តឹមលើសតានារអីទុតក្វ៝ង់ងាន់ជេងនារកោរាញឞ្រាសផាតទោយ្ស កោរាញឞ្រាសអីទុតគែសនាវទើយមាទឹងលែៈនតីលនទើ។* 15 - ឞ្រាសយេឆូ លាស៖ “ល៝ង់គ៝ប់វាច់ឞូមោអោសគឹតម៝សម៝ង តឹមឞានមាឞូមោអោសគឹតម៝សម៝ងឞូនុយ្សហាន់នតុង! អ្វែសមអាកងាន់មាឞូម៝សអីហោមគុរាងែសញជ្រាង់ឆាក់ហោមញឆីងន៝ប់ ខាន់ពាង់តឹមឞានមាគែសឞ៝កងគូតអាវញឆ៝សងក្រូមឆាក់ជាន់ខាន់ពាង់ មោអោសគុលាហោកអ៝ន់ឞូឆៃនាវដីតព្រេង!” -* 16 ជេសរីហ្វេងអ្យើសអីនៃរាគូមទឹងលែៈមពោលកាដាច់អីនៃអ៝ន់គុទូនតុក តានាវងើយហេឞ្រើ លាសនតុកអីនៃ៖ «ហារមាកេដោន »។

17 តោងពារ់ត៝ល់ពើសងខុតងានពាង់នើមតាត្រោក ជេសរីគែសនតែសឞ៝រ់ទុតទាង់ឞើសរានើលកាដាច់តាត្រោមញីសជានឞ្រាសមាកោរាញឞ្រាស លាសកើតនអា៖ “លែៈជេសលែៈផ្យៅហើយ!” 18 នោកនៃគែសលើបងលាយ្ស គែសនតែសនត៝រ់មីស នអ៝ប់មាគែសងលាយ្ស នទ្រែលមាគែសងគារ់នែសនតូទុតហោងាន់ មោអោសព្រ៝តគែសងគើនែសនតូកើតនៃនតើមឞើសគែសឞូនុយ្សតានែសនតូ។ 19 ប៝នបាបីលោន អីទុតក្វ៝ង់លែៈតឹមងខាសជេងពែអឹ ល៝ង់ទឹងលែៈប៝នទឹងលែៈឞ្រីទាករាល៝ម់។ នោកនៃកោរាញឞ្រាសហោមកាសគឹតមាប៝នបាបីលោន ពាង់តេៈទោយ្សមាប៝នអីនៃអ៝ន់ឞូនុយ្សតាប៝នអីនៃតឹមឞានមាញេតញុលនទ្រាញ់ព្លៃយុងយារប៝នតាកាច៝កអីពាង់ទុតជីនូយ្សតេៈទោយ្ស។* 20 ជេសរីទឹងលែៈគោលទាករ៝សលែៈផ្យៅ ទឹងលែៈយោកឞូអ្វាញ់មោហោមឆៃជឹតអោស។ 21 គែសព្លែរទុតក្វ៝ង់ៗតុបឞើសកាលើត្រោកតាផូងឞូនុយ្ស ព្លែរង្វាយៗជ៝ក់ក្លាប់លាស ៣០ កីលោគ្រាម។ ជេសរីខាន់ពាង់រាកថាម់កោរាញឞ្រាស យ៝រមានាវជេរមាព្លែរអីនៃ អ៝ន់គែសនាវរេសរាញាល់អីនៃទុតហោងាន់។*

*16:1 ១៦:១៖ នតម ១៥:១

*16:2 ១៦:២៖ នតម ១៣:១៤-១៦; នង ៩:១០

*16:3 ១៦:៣-៤៖ នតម ៨:៨-៩; នង ៧:១៧-២១

*16:6 ១៦:៦៖ នតម ១៨:២៤; នម ៧៩:១០; អេឆា ៤៩:២៦

*16:7 ១៦:៧៖ នតម ១៩:២

*16:9 ១៦:៩៖ នតម ៩:២០-២១

*16:10 ១៦:១០៖ នតម ១៣:១-២; នង ១០:២១-២២

*16:12 ១៦:១២៖ នតម ៩:១៤-១៦; អេឆា ៤៤:២៧

*16:13 ១៦:១៣៖ «ឞូនុយ្សនតើយ្សងក្លាៈនាវងើយកោរាញឞ្រាស»តាអ្យា‌ «ទូមល៝ម់មពោមពា(ឆ្យុម)ទុតជាញអាអេងលោសឞើសនែស»(នតម ១៣:១១) ជេសរី «ទូហ្វេឞូនុយ្សនតើយ្សងក្លាៈនាវងើយកោរាញឞ្រាស»(នតម ១៩:២០) ជេងងើយមាទូហ្វេទើម។

*16:13 ១៦:១៣៖ នតម ១២:៣; ១៣:១, ១១

*16:14 ១៦:១៤៖ នតម ១៣:១៣; ១៩:១៩

*16:15 ១៦:១៥៖ នតម ៣:៣; មថ ២៤:៤៣-៤៤

*16:19 ១៦:១៩៖ នតម ១៤:៨, ១០

*16:21 ១៦:២១៖ នតម ១៦:៩, ១១; នង ៩:២២-២៣