នាវកោរាញឞ្រាសងើយតានាវងើយឞូន៝ង រោម ៨

៨

នាវរេសគុនទ្រែលឞ្រាសហ្វេងអ្វែស

១ លាសនទ្រី អាបៃអ្យាឞូម៝សអីលែៈគុតឹមរាង្លាប់នទ្រែលឞ្រាសក្រីសយេឆូ មោហោមអោសកោរាញឞ្រាសតេៈទោយ្ស។* ២ យ៝រលាសឞ៝ន់*លែៈគុតឹមរាង្លាប់នទ្រែលឞ្រាសក្រីសយេឆូ ឞ្រាសហ្វេងអ្វែសរាក្លាយ្សឞ៝ន់ឞើសនូយ្សនហ៝ម់អីអុចជានតីសនឹង អីលែវតានាវកោរាញឞ្រាសតេៈទោយ្សគុតានទ្រូងអុញនហ៝រ៝។* ៣ ជានតឹងនាវវៃមោឆេ មោអោសទើយរាក្លាយ្សឞ៝ន់ យ៝រលាសឞ៝ន់រាអ្យាតាៈឞើសនូយ្សនហ៝ម់ឞ៝ន់អុចជានតីសនតើមឞើសនទុលមែ។ នទ្រីទឹងកោរាញឞ្រាសនើមជានអ៝ន់មាឞូនុយ្សនទើអីឞូនុយ្សមោអោសឞ្លាវជានអេងតាៈឞើសជានតឹងនាវវៃអីនៃ។ ពាង់ញជ្វាល់ក៝នពាង់នើមតានែសនតូអ្យា ជេងឞូនុយ្សគែសឆាក់ជាន់តឹមឞានមាឞូនុយ្សឞ៝ន់អីឞ្លាវជានតីសដ៝ង់។ ជេសរីកោរាញឞ្រាសជាវក៝នពាង់នើមគែសឆាក់ជាន់នៃជេងនទើជានឞ្រាសមានត្រ៝ៈនាវតីសឞ៝ន់ គៃមាងគ្រ៝សលើយនាវទើយនាវអុចជានតីសតានូយ្សនហ៝ម់ផូងឞូនុយ្សឞ៝ន់។* ៤ តឹងមានាវវៃកោរាញឞ្រាសទីមាតេៈទោយ្សឞ៝ន់ យើនមាឞ្រាសក្រីស ឆើមនត្រ៝ៈទើននាវតេៈទោយ្សអីនៃ នទ្រីនាវតេៈទោយ្សតឹងមានាវវៃលែៈជេសជានលែៈផ្យៅ។ នាវអីនៃទីមាឞ៝ន់អីមោហោមអោសគុរេសតឹងមានូយ្សនហ៝ម់អីអុចជានតីសឞើសនទុលមែ ជេសរីគុរេសតឹងនាវអុចឞ្រាសហ្វេងអ្វែសហ៝ៈ។* ៥ យ៝រលាសឞូម៝សអីគុរេសតឹងនូយ្សនហ៝ម់អីអុចជានតីសឞើសនទុលមែ ពាង់មឹនមានទើអ្យើសតឹងនូយ្សនហ៝ម់អីនៃ យើនមាឞូម៝សអីគុរេសតឹងនាវអុចឞ្រាសហ្វេងអ្វែស ពាង់មឹនមានទើឞ្រាសហ្វេងអ្វែសអុចទើម។ ៦ ជេសរីនាវមឹនមានទើនូយ្សនហ៝ម់អីអុចជានតីសឞើសនទុលមែ ញជុនលែវតានាវកោរាញឞ្រាសតេៈទោយ្សគុតានទ្រូងអុញនហ៝រ៝។ យើនមានាវមឹនមានទើឞ្រាសហ្វេងអ្វែសអុច ញជុនលែវតានាវរេសនហ៝រ៝ តានាវដាប់មពាន់។* ៧ នាវមឹនមានទើនូយ្សនហ៝ម់អីអុចជានតីសឞើសនទុលមែនើសជេងតឹមរាទ៝ង់ដាសកោរាញឞ្រាសងាន់ មោជានតឹងនាវវៃកោរាញឞ្រាស នហ៝មាមោទើយជានតឹងដ៝ង់។ ៨ ឞូម៝សអីគុរេសតឹងមានាវអុចនូយ្សនហ៝ម់អីអុចជានតីសឞើសនទុលមែ ពាង់មោអោសឞ្លាវជានអ៝ន់តឹមទីដាសនូយ្សនហ៝ម់កោរាញឞ្រាស។

៩ យើនមាលាសឞ្រាសហ្វេងអ្វែសកោរាញឞ្រាស†លែៈគុតាខាន់អៃមៃ ខាន់អៃមៃមោហោមគុរេសតឹងមានូយ្សនហ៝ម់អីអុចជានតីសឞើសនទុលមែ ខាន់អៃមៃលែៈគុរេសជេសតឹងនាវអុចឞ្រាសហ្វេងអ្វែស។ ឞូម៝សអីមោអោសគែសឞ្រាសហ្វេងអ្វែសឞ្រាសក្រីស គុតាពាង់ ពាង់អីនៃមោអោសជេងប៝នលានឞ្រាសក្រីស ។* ១០ យើនមាលាសឞ្រាសក្រីស គុនទ្រែលតាខាន់អៃមៃ ឞ៝លលាសឆាក់ជាន់ខាន់អៃមៃមរាខឹតយ៝រមានាវជានតីសកាដោយ ឞ្រាសហ្វេងអ្វែសអ៝ន់ខាន់អៃមៃនាវរេសនហ៝រ៝ យ៝រលាសកោរាញឞ្រាសកើបខាន់អៃមៃលែៈឆ៝ង់។* ១១ កោរាញឞ្រាសជានឞ្រាសយេឆូ អ៝ន់ទ៝ក់រេស លាសនទ្រីលាសឞ្រាសហ្វេងអ្វែសកោរាញឞ្រាសគុតាខាន់អៃមៃ កោរាញឞ្រាសមរាអ៝ន់ដ៝ង់ខាន់អៃមៃទ៝ក់រេសតៃតាៈឞើសនាវទើយឞ្រាសហ្វេងអ្វែស យ៝រមាឞ្រាសហ្វេងអ្វែសកោរាញឞ្រាសនើមគុតាខាន់អៃមៃ ឞ៝លលាសឆាក់ជាន់ខាន់អៃមៃហោមឞ្លាវខឹតកាដោយ។*

១២ អើអ៝សនោតានាវញឆីង លាសនទ្រីឞ៝ន់មោហោមអោសខាច់គុរេសតឹងមានាវអុចនូយ្សនហ៝ម់អីអុចជានតីសឞើសនទុលមែ។* ១៣ លាសខាន់អៃមៃគុរេសតឹងនូយ្សនហ៝ម់អីអុចជានតីសឞើសនទុលមែ កោរាញឞ្រាសមរាតេៈទោយ្សខាន់អៃមៃគុតានទ្រូងអុញនហ៝រ៝។ យើនមាលាសខាន់អៃមៃគុរេសតឹងនាវអុចឞ្រាសហ្វេងអ្វែស នអ៝ប់មាងខឹតលើយនូយ្សនហ៝ម់អីអុចជានតីសឞើសនទុលមែ លាសនទ្រីខាន់អៃមៃមរាគែសនាវរេសនហ៝រ៝។ ១៤ យ៝រលាសឞូម៝សអីគែសឞ្រាសហ្វេងអ្វែសកោរាញឞ្រាសលែវពាង់ ពាង់អីនៃជេងក៝នកោរាញឞ្រាសនើម។* ១៥ ឞ្រាសហ្វេងអ្វែសអីកោរាញឞ្រាសលែៈអ៝ន់មាខាន់អៃមៃ ពាង់មោអោសអ៝ន់ខាន់អៃមៃក្លាចកោរាញឞ្រាសតេៈទោយ្សតឹមឞានមាទឹកក្លាចកោរាញពាង់។ យើនមាពាង់អ៝ន់ខាន់អៃមៃជេងក៝នកោរាញឞ្រាស តាៈឞើសនៃឞ៝ន់ក្វាល់កោរាញឞ្រាស«ឞឹ‡»។* ១៦ ឞ្រាសហ្វេងអ្វែសនើមមឞើសអ៝ន់ឞ៝ន់គឹតនហេលតានូយ្សនហ៝ម់ ឞ៝ន់លែៈជេងក៝នកោរាញឞ្រាស។* ១៧ ជេសរីលាសឞ៝ន់លែៈជេងក៝នកោរាញឞ្រាសងាន់ ឞ៝ន់មរាឆ៝ៈទើននទើនទ្រៃដ៝ង់ ជេងឆ៝ៈទើននទ្រែលឞ្រាសក្រីស នទើនទ្រៃតាៈឞើសកោរាញឞ្រាស។ លាសឞ៝ន់គុនទ្រែលឞ្រាសក្រីស តានាវជេរជ៝ត់ពាង់ រីមើឞ៝ន់មរាគុនទ្រែលពាង់តានាវច្រេកលើបដ៝ង់។

នាវច្រេកលើបតានារងគ្លែៈទុត

១៨ គ៝ប់កើបនាវជេរជ៝ត់អីឞ៝ន់គែសអាបៃអ្យា មោអោសទើយនតឹតដាសនាវច្រេកលើបកោរាញឞ្រាសទែញហើមាឞ៝ន់តានារជឹតនាប់តៃ។* ១៩ ទឹងលែៈនទើកោរាញឞ្រាសទែញជេងនើស គុក៝ប់រើបហើបងាន់រ៝ ក៝ប់ត៝ត់កោរាញឞ្រាសញហើឞូម៝សអីជេងផូងក៝នពាង់នើម។ ២០ ទឹងលែៈនទើកោរាញឞ្រាសនើមញជេងនើស មោហោមអោសគែសនាវអ្វែសកើតឞើសនតើមនើស ឞ៝លលាសទឹងលែៈនទើអីនៃមោអោសអុចកើតនៃ ជេងតាៈឞើសកោរាញឞ្រាសនើមអ៝ន់កើតនៃអាចមាអាដាម់ ជានតីស។ យើនមាពាង់អ៝ន់ទឹងលែៈនទើអីនៃហោមគែសនាវរានើម* ២១ មាក្លាយ្សឞើសនាវខឹតនាវអោម គៃមាអ៝ន់គែសនាវច្រេកលើបនហ៝រ៝តឹមឞានមានាវច្រេកលើបអីកោរាញឞ្រាសអ៝ន់មាផូងក៝នពាង់នើមដ៝ង់។ ២២ លែៈឞ៝ន់គឹតជេស នតើមឞើសអាដាម់ ជានតីស នហ៝មាត៝ត់អាបៃអ្យារ៝ ទឹងលែៈនទើកោរាញឞ្រាសទែញជេងនើសរាដើសរាដេងហោងាន់ តឹមឞានមាឞូអូរជីគុអ៝ស។ ២៣ មោអោសទើនមាទឹងលែៈនទើអីនៃទើម ឞ៝ន់នើមរាដើសរាដេងតានូយ្សនហ៝ម់ដ៝ង់។ អាបៃអ្យាឞ៝ន់លែៈឆ៝ៈទើនឞ្រាសហ្វេងអ្វែសគុតាឞ៝ន់ ទឹងឆៃនទើដេៈៗអីឞ៝ន់មរាគែសតានារជឹតនាប់តៃ។ កើតនទ្រីឞ៝ន់គុក៝ប់រើបហើបងាន់រ៝ត៝ត់តានារកោរាញឞ្រាសអ៝ន់ឞូឆៃនហេលឞ៝ន់ជេងក៝នពាង់នើមងាន់ងេន អ៝ន់ឞ៝ន់គែសឆាក់ជាន់មហែ។* ២៤ ឞ៝ន់រានើមមានាវអីនៃនតើមឞើសនោកឞ៝ន់លែៈគែសនាវរាក្លាយ្ស។ លាសឞ៝ន់លែៈគែសទូនតីលនទើ ឞ៝ន់មោហោមអោសរានើមកើញគែសមានទើអីនៃជឹត! ២៥ យើនមាលាសឞ៝ន់រានើមមានទើអេហ៝ៈគែសអោស នទ្រីឞ៝ន់គុក៝ប់រើបហើបងាន់នាវអីនៃ។ ២៦ នាវរានើមកើលឞ៝ន់ញឆ្រោយ្សក៝ប់មានាវអីនៃ កើតនទ្រីដ៝ង់ឞ្រាសហ្វេងអ្វែសឆើមកើលនាវរាអ្យាឞ៝ន់អ្យា។ កើតលាសឆាក់ឞ៝ន់នើមមោគឹតអោសម៝សនទើងើយម៝សនទើទាន់តានាវមឞើសឆើម យើនមាឞ្រាសហ្វេងអ្វែសឆើមមឞើសឆើមទាន់អ៝ន់មាឞ៝ន់ មានាវរាដើសរាដេងអីមោហោមអោសឞ្លាវមានាវមាមឞើសងក៝ច។* ២៧ យើនមាកោរាញឞ្រាសអីគឹតនាល់នូយ្សនហ៝ម់នាវមឹនឞូនុយ្ស ពាង់លែៈគឹតវ៝ត់ដ៝ង់តានាវមឹនឞ្រាសហ្វេងអ្វែស យ៝រលាសឞ្រាសហ្វេងអ្វែសឆើមកើលមឞើសឆើមអ៝ន់មាផូងប៝នលានពាង់នើម តឹងកើតនាវពាង់នើមអុច។

២៨ ឞ៝ន់លែៈគឹតជេស ម៝សនទើអីគែសតានាវរេសឞ៝ន់ កោរាញឞ្រាសអ៝ន់លោសជេងនទើអ្វែសមាឞ៝ន់អីរ៝ង់មាពាង់ អីពាង់លែៈក្វាល់ជេងប៝នលានពាង់នើមតឹងនាវអុចពាង់នើម។* ២៩ កោរាញឞ្រាសលែៈអើមគឹតល៝រឞូម៝សមរាជេងប៝នលានពាង់នើម ពាង់កើយ្សឞូនុយ្សអីនៃគៃមាជេងតឹមឞានមាឞ្រាសយេឆូ អីក៝នពាង់នើមងាន់ គៃមាក៝នពាង់អីនៃជេងក៝នឞោកទាកជេងនោមាទឹងលែៈឞ៝ន់អីក៝នកោរាញឞ្រាស។* ៣០ ឞូម៝សអីកោរាញឞ្រាសលែៈអើមគឹតល៝រជេងប៝នលានពាង់នើម ពាង់លែៈក្វាល់ដ៝ង់។ ឞូម៝សអីកោរាញឞ្រាសលែៈក្វាល់ ពាង់លែៈកើបឆ៝ង់ដ៝ង់។ ឞូម៝សអីកោរាញឞ្រាសលែៈកើបឆ៝ង់ ពាង់លែៈអ៝ន់នាវច្រេកលើបមាខាន់ពាង់អីនៃដ៝ង់។

មោទើយអោសតឹមងខាសឞ៝ន់ឞើសនាវកោរាញឞ្រាសរ៝ង់

៣១ លាសនទ្រីទឹងលែៈនទើអីនៃម៝សនទើឞ៝ន់ហោមឞ្លាវងើយ? លាសលែៈកោរាញឞ្រាសគុមពែសឞើសឞ៝ន់ លាសនទ្រីមោហោមគែសអោសទូនតីលនទើទើយតឹមរាទ៝ង់ដាសឞ៝ន់ជឹត! ៣២ យ៝រលាសកោរាញឞ្រាសលែៈមោញហ្វាចអោសអ៝ន់ក៝នពាង់នើមនើស លែៈពាង់ញជុននត្រ៝ៈអ៝ន់មាឞ៝ន់ជេស លាសនទ្រីទឹងលែៈនទើអេងពាង់មរាអ៝ន់មាឞ៝ន់ នទ្រែលមាក៝នពាង់អីនៃដ៝ង់។ ៣៣ អាសហោមគែសដ៝ង់ទូនតីលនទើទើយនតោនមាផូងប៝នលានអីកោរាញឞ្រាសទែលែៈកើយ្ស? មោគែសអោស កោរាញឞ្រាសនើមលែៈអ៝ន់ឞ៝ន់គុឆ៝ង់តានាប់មាត់ពាង់។* ៣៤ ឞូម៝សហោមទើយតេៈទោយ្សឞ៝ន់ជឹត? មោគែសអោស ឞ្រាសក្រីសយេឆូ លែៈខឹត លែៈទ៝ក់រេសជេសគុឞើសមាតីកោរាញឞ្រាសនើម នហ៝មាឆើមកើលទាន់អ៝ន់មាឞ៝ន់ដ៝ង់។* ៣៥ ឞូម៝សហោមទើយតឹមងខាសឞ៝ន់ឞើសនាវរ៝ង់ឞ្រាសក្រីស ? ឞ៝លលាសនាវរេសរាញាល់កាដោយ នាវងក្ល៝ន់រាវៃកាដោយ នាវឞូជានជេរកាដោយ នាវជីឆ៝ត់ជីង៝តកាដោយ នាវឞិចកោសលាហោកកាដោយ នាវត៝ត់ជេរកាដោយ មោលាសនាវឞូអុចងខឹតកាដោយ ក៝ៈមោទើយដ៝ង់តឹមងខាសឞ៝ន់ឞើសនាវរ៝ង់ឞ្រាសក្រីស ។ ៣៦ កើតនាវលែៈគែសញចីសជេស៖

«អើកោរាញឞ្រាសអាប់នារឞូជ៝យអុចងខឹតហេនយ៝រមាហេនជេងប៝នលានមៃ‌

ឞូអ្វាញ់ហេនតឹមឞានមាឞែឞ្យាប់អីឞូមឞាងមាឆា»†។

៣៧ យើនមាយ៝រលាសឞ្រាសក្រីស រ៝ង់មាឞ៝ន់ ទឹងឞ៝ន់គែសនាវទុតទើយមាទឹងលែៈនាវជេរអីនៃ។ ៣៨ គ៝ប់លែៈគឹតនហេលងាន់ ឞ៝លលាសខឹតកាដោយ រេសកាដោយ តោងពារ់កាដោយ ឞ្រាសអ្យើសកាដោយ នាវត៝ត់តានារអ្យាកាដោយ នាវត៝ត់តានារជឹតនាប់តៃកាដោយ ម៝សនទើអីគែសនាវទើយនាវតាមកាដោយ‌* ៣៩ នាវទើយតាកាលើត្រោកកាដោយ នាវទើយតាឞើសទ៝ង់នែសកាដោយ មោលាសតានទើអេងជឹតអីកោរាញឞ្រាសទែលែៈញជេងកាដោយ ក៝ៈមោទើយអោសតឹមងខាសឞ៝ន់ឞើសនាវកោរាញឞ្រាសរ៝ង់អីលែៈពាង់ញហើជេសតាឞ្រាសក្រីសយេឆូ អីកោរាញឞ៝ន់។

*៨:១ ៨:១៖ រម ៨:៣៣-៣៤; យហ ៥:២៤

*៨:២ ៨:២៖ ឆ៝ម់បុតអើមអីញចីសមាតីអាបាៈគែសញចីសលាស៖ «គ៝ប់»។

*៨:២ ៨:២៖ ២កោ ៣:១៧; ហេឞ ៧:១៨

*៨:៣ ៨:៣៖ កាល ៤:៤-៥; ហេឞ ២:១៧-១៨; ៤:៥; ២កោ ៥:២១

*៨:៤ ៨:៤-៥៖ កាល ៥:១៦, ២៥

*៨:៦ ៨:៦៖ រម ៥:១; ៦:២១; ២កោ ៣:៦; កាល ៦:៨

†៨:៩ ៨:៩៖ ឞ្រាសហ្វេងអ្វែសគែសង្វាយទើម យើនមាគែសដ៝ង់ឞូក្វាល់ពាង់«ឞ្រាសហ្វេងអ្វែសកោរាញឞ្រាស» មោលាស «ឞ្រាសហ្វេងអ្វែសឞ្រាសក្រីស » មោលាស «ឞ្រាសហ្វេងអ្វែសឞ្រាសយេឆូ » មោលាសនទើអាបាៈអេងជឹត។

*៨:៩ ៨:៩៖ ១កោ ៣:១៦; កាល ៥:២៤

*៨:១០ ៨:១០៖ កាល ២:២០; យហ ១:១២

*៨:១១ ៨:១១៖ ១កោ ៦:១៤; ១៥:៣៥-៤៩

*៨:១២ ៨:១២-១៣៖ រម ៦:៦-១១

*៨:១៤ ៨:១៤-១៥៖ យហ ១:១២; កាល ៤:៧; អេផ ៥:១; ហេឞ ២:១០-១២; ១ពេ ១:២; ១យហ ៣:២; ៥:១

‡៨:១៥ ៨:១៥៖ តានាវងើយគ្រែក លាស៖ «អាប់បា ហោ ផាតែរ !»។ «អាប់បា »ជេងនាវងើយអារាមេអិច គែសនាវខ្លៃលាស៖ «ឞឹ» អីឞូទ៝ង់មាឞឹពាង់នើមទើម។ «ហោ ផាតែរ »ជេងនាវងើយគ្រែក គែសនាវខ្លៃលាស៖ «ឞឹ»ដ៝ង់។

*៨:១៥ ៨:១៥៖ កោល ៣:១២; ហេឞ ១០:២២; ១យហ ៤:១៨

*៨:១៦ ៨:១៦-១៧៖ កាល ៤:៦-៧

*៨:១៨ ៨:១៨៖ មក ១៣:៩; ២តម ៣:១២

*៨:២០ ៨:២០-២២៖ នន ៣:១៦-១៩; អេផ ១:១០; ២ពេ ៣:១៣

*៨:២៣ ៨:២៣-២៥៖ ២កោ ៥:១-៨; ហេឞ ១១:១

*៨:២៦ ៨:២៦-២៧៖ ១កោ ២:១០-១១; យដ ១:២០

*៨:២៨ ៨:២៨៖ អេផ ១:១១

*៨:២៩ ៨:២៩-៣០៖ អេផ ១:៤-៥; ហេឞ ២:១០-១២; ១ពេ ១:២

*៨:៣៣ ៨:៣៣-៣៤៖ អេឆា ៥០:៨-៩; ហេឞ ៧:២៥; ១យហ ២:១-២

*៨:៣៤ ៨:៣៤៖ មក ១៦:១៩; លក ២២:៦៩; ការ ៧:៥៥-៥៦; អេផ ១:១៩-២៣; កោល ៣:១; ហេឞ ៨:១; ១០:១២; ១២:២; ១ពេ ៣:២២

†៨:៣៦ ៨:៣៦៖ នម ៤៤:២២

*៨:៣៨ ៨:៣៨-៣៩៖ រម ៥:៥; កោល ២:១៤-១៥; ១ពេ ៣:២២; ១យហ ៤:៩-១០