នាវកោរាញឞ្រាសងើយតានាវងើយឞូន៝ង រោម ១០

១០

១ អើអ៝សនោតានាវញឆីង គ៝ប់អុចងាន់តានូយ្សនហ៝ម់ គ៝ប់ញឆ្រោយ្សមឞើសឆើមទាន់មាកោរាញឞ្រាស គៃមាទឹងលែៈផូងអីឆ្រាអែល គែសនាវរាក្លាយ្ស។* ២ គ៝ប់គឹតនហេលខាន់ពាង់គើយ្សងាន់ជានការអ៝ន់មាកោរាញឞ្រាស តីសមាខាន់ពាង់មោគឹតឞ្លាវជានការអីនៃអ៝ន់ទី‌ ៣ យ៝រលាសខាន់ពាង់នើសមោអោសគឹតវ៝ត់ឞើសតាៈកោរាញឞ្រាសកើបឞូនុយ្សឆ៝ង់។ ខាន់ពាង់ញឆ្រោយ្សជ៝យត្រ៝ងអេងខាន់ពាង់នើមគៃមាកោរាញឞ្រាសកើបខាន់ពាង់ឆ៝ង់ មោអុចអោសឆ៝ៈទើនត្រ៝ងអីកោរាញឞ្រាសអ៝ន់។* ៤ តាៈឞើសនទើឞ្រាសក្រីស លែៈជេសជាន ឞ៝ន់មោហោមអោសខាច់គុរេសជានតឹងមានាវវៃមោឆេ អីនៃ នទ្រីទឹងឞូម៝សអីញឆីងមាពាង់ កោរាញឞ្រាសកើបឆ៝ង់។*

នាវញឆីងគែសនាវរាក្លាយ្ស

៥ មោឆេ លែៈញចីសជេសលាសមានាវកោរាញឞ្រាសកើបឞូនុយ្សឆ៝ង់អីតាៈឞើសជានតឹងនាវវៃ៖ «ឞូម៝សអីជានតឹងកើតទឹងលែៈនាវអីនៃ ពាង់អីនៃកោរាញឞ្រាសមោតេៈទោយ្ស យ៝រមាតាៈឞើសជានតឹងនាវអីនៃ»†។* ៦-៧ យើនមានាវកោរាញឞ្រាសកើបឞូនុយ្សឆ៝ង់អីតាៈឞើសនាវញឆីងកោរាញឞ្រាសលាសកើតនអាតានាវពាង់ងើយ៖ «ខាន់អៃមៃលើយអោសមឹនអេងតានូយ្សនហ៝ម់៖ «ឞូម៝សអីហាវកាលើត្រោក?» លើយអោសអោប៖ «ឞូម៝សអីហាន់ជុរតានតុកផូងខឹត?»»† យ៝រលាសឞ៝ន់មោខាច់អោសហាវកាលើត្រោក គៃមាលែវឞ្រាសក្រីស ជុរតានែសនតូអ្យា ឞ៝ន់មោខាច់អោសហាន់ជុរតានតុកផូងខឹត គៃមាលែវឞ្រាសក្រីស អ៝ន់ទ៝ក់រេសតៃ។ ៨ លែៈគែសញចីសដ៝ង់កើតនអា៖

«នាវងើយកោរាញឞ្រាសលែៈទាច់ងាន់កេងខាន់អៃមៃ‌

លែៈតាមឞូងខាន់អៃមៃ នទ្រែលមាតានូយ្សនហ៝ម់ខាន់អៃមៃដ៝ង់»†។

នាវងើយកោរាញឞ្រាសអីនៃ ជេងនាវងើយមានាវញឆីងអីឞ៝ន់មឞើសងក៝ច។ ៩ ឞូម៝សអីមឞើសងក៝ចមាមឞូងលាសឞ្រាសយេឆូ ជេងកោរាញ នអ៝ប់មាអ្យាត់តានូយ្សនហ៝ម់លាសកោរាញឞ្រាសជានអ៝ន់ឞ្រាសយេឆូ ទ៝ក់រេស ពាង់អីនៃកោរាញឞ្រាសរាក្លាយ្សងាន់រ៝។* ១០ យ៝រតាៈឞើសនូយ្សនហ៝ម់ឞ៝ន់ញឆីងមាឞ្រាសយេឆូ ទឹងកោរាញឞ្រាសកើបឞ៝ន់ឆ៝ង់ ជេសរីទឹងឞ៝ន់គែសរាក្លាយ្សយ៝រតាៈឞើសនាវឞ៝ន់មឞើសងក៝ចមាឞូដ៝ង់ នាវឞ៝ន់ញឆីងអីនៃ។ ១១ នាវអីនៃតឹមទីដាសនាវកោរាញឞ្រាសងើយលាស៖ «ឞូម៝សអីញឆីងមាកោរាញឞ្រាស មោគែសអោសឞូអ៝ន់ពាង់គែសនាវដីតព្រេង»†។ ១២ ផូងអីឆ្រាអែល ជេសរីផូងអីមោទីផូងអីឆ្រាអែល មោគែសអោសតឹមតីសឞាល់ ទឹងលែៈខាន់ពាង់នើសគែសទូហ្វេកោរាញទើម ជេសរីកោរាញអីនៃអ្យាត់នអ៝ប់មាអ៝ន់នាវគែសជេងមាឞូម៝សអីក្វាល់ទាន់ពាង់ឆើមយោៈ។* ១៣ យ៝រលាសលែៈគែសញចីសដ៝ង់៖ «ឞូម៝សអីក្វាល់ទាន់កោរាញឞ្រាសឆើមយោៈ ពាង់អីនៃកោរាញឞ្រាសរាក្លាយ្ស»†។

១៤ យើនមាលាសឞូម៝សអីមោអោសញឆីងមាកោរាញឞ្រាស មើមទឹងពាង់ឞ្លាវក្វាល់ទាន់ឆើមយោៈ? លាសឞូនុយ្សអីនៃមោអោសតាង់នាវឞូមឞើសងក៝ចនាវកោរាញឞ្រាស មើមទឹងពាង់ឞ្លាវញឆីងមាកោរាញឞ្រាស? ជេសរីលាសឞូនុយ្សអីនៃមោគែសអោសឞូនុយ្សមឞើសងក៝ចនាវកោរាញឞ្រាស មើមទឹងអោឞាល់ទើយតាង់? ១៥ ជេសរីលាសមោគែសអោសឞូនុយ្សអីឞូញជ្វាល់ហាន់មឞើសងក៝ច មើមទឹងគែសឞូនុយ្សហាន់មឞើសងក៝ច? លែៈគែសញចីសដ៝ង់៖ «អ្វែសងាន់លាសគែសឞូនុយ្ស*អីវាច់តាអ្យាមឞើសងក៝ចនាវមហែអីអ្វែស»†។

១៦ យើនមាមោគែសអោសទឹងលែៈឞូនុយ្សអ្យាត់នាវមហែមហានអ្វែស។ នាវមោអ្យាត់អីនៃតឹមឞានមានាវឞូនុយ្សនតើយ្សនាវងើយកោរាញឞ្រាសរាញាអេឆាយ លែៈញចីសជេស៖ «អើកោរាញឞ្រាស តឹមឞានមាមោគែសអោសឞូនុយ្សអ្យាត់នាវហេនមឞើសងក៝ច!»† ១៧ លាសនទ្រីនាវញឆីងមាឞ្រាសក្រីស ជេងតាៈឞើសនាវតាង់ តាៈឞើសនាវតាង់ឞូមឞើសងក៝ចមាឞ្រាសក្រីស ។* ១៨ យើនមាគ៝ប់ទាន់អោប អាសផូងអីឆ្រាអែល អើមមោបាស តាង់នាវអីនៃ? ខាន់ពាង់លែៈតាង់ងាន់ជេស! លែៈគែសញចីសដ៝ង់៖

«ឞ៝រ់មឞូងខាន់ពាង់ឞូតាង់លឺលាមនែសនតូ‌

នាវខាន់ពាង់ ឞូតាង់ត៝ត់ទុតឞ្រីទុតនែស»†។

១៩ គ៝ប់អោបតៃទូតឹជឹត អាសផូងអីឆ្រាអែល អើមមោបាស វ៝ត់នាវអីនៃ? ខាន់ពាង់លែៈវ៝ត់។ តារានោកមោឆេ កោរាញឞ្រាសលែៈមឞើសជេសមាផូងអីឆ្រាអែល ៖

«គ៝ប់មរាជានអ៝ន់ខាន់អៃមៃអីផូងអីឆ្រាអែល មោនាចមាទូផូងឞូនុយ្សអីឞើសនតើមនើសមោអោសទីផូងគ៝ប់ យ៝រលាសគ៝ប់កើលមាខាន់ពាង់‌

ជេសរីគ៝ប់មរាជានអ៝ន់ខាន់អៃមៃជីនូយ្សមាទូផូងឞូនុយ្សអីឞើសនតើមនើសមោគឹតនាល់គ៝ប់† យ៝រលាសគ៝ប់យោៈនអាចមាខាន់ពាង់»†។*

២០ ជេសរីអេឆាយ លែៈឞាញ់លាសកើតនអា៖

«កោរាញឞ្រាសលាស៖ «ឞូនុយ្សអីមោជ៝យគ៝ប់ ខាន់ពាង់លែៈឆៃគ៝ប់‌

ជេសរីគ៝ប់ញហើនាវគ៝ប់អ៝ន់មាឞូនុយ្សអីមោអោបមានាវគ៝ប់»»†។*

២១ ជេសរីកោរាញឞ្រាសលាសដ៝ង់មាផូងអីឆ្រាអែល ៖ «គ៝ប់នតាតីនតើមឞើសអោយត៝ត់មាង់មាទាន់ទូផូងអីមោអុចអ្យាត់នាវ អីតឹមរាទ៝ង់ដាសគ៝ប់ អ៝ន់ព្លឹឆឹតអាគ៝ប់»†។

*១០:១ ១០:១-២៖ ការ ២២:៣

*១០:៣ ១០:៣៖ រម ៩:៣២; ផល ៣:៩

*១០:៤ ១០:៤៖ រម ៣:៣១; ៧:១-៦; កាល ២:១៦; ៣:២៣-២៥

†១០:៥ ១០:៥៖ កល ១៨:៥

*១០:៥ ១០:៥៖ កល ១៨:៥; កាល ៣:១០-១៤

†១០:៦-៧ ១០:៦-៧៖ នវ ៣០:១៣

†១០:៨ ១០:៨៖ នវ ៣០:១៤

*១០:៩ ១០:៩៖ មថ ១០:៣២

†១០:១១ ១០:១១៖ អេឆា ២៨:១៦

*១០:១២ ១០:១២-១៣៖ រម ៣:២៩-៣០; ការ ១៥:៩; កាល ៣:២៨-២៩; ៥:៦

†១០:១៣ ១០:១៣៖ យោអ ២:៣២

*១០:១៥ ១០:១៥៖ «អ្វែសងាន់លាសគែសឞូនុយ្ស» មោលាស «អ្វែសងាន់ជ៝ង់ឞូនុយ្ស»។

†១០:១៥ ១០:១៥៖ អេឆា ៥២:៧

†១០:១៦ ១០:១៦៖ អេឆា ៥៣:១

*១០:១៧ ១០:១៧៖ រម ១៦:២៦; យហ ១៧:២០

†១០:១៨ ១០:១៨៖ នម ១៩:៤

†១០:១៩ ១០:១៩៖ តានាវងើយគ្រែក លាស៖ «អីរាលូកម៝ល់»។

†១០:១៩ ១០:១៩៖ នវ ៣២:២១

*១០:១៩ ១០:១៩៖ រម ១១:១១

†១០:២០ ១០:២០៖ អេឆា ៦៥:១

*១០:២០ ១០:២០៖ រម ៩:៣០

†១០:២១ ១០:២១៖ អេឆា ៦៥:២