1 Jŋéi₂ jmɨg₄ né'₃ a₂të₅₄ Jmɨg₄ Të₂'ɨn₅₄, ŋó₃ Jesús juɨ₅ Betania ja₁jme₁chan₂ Lázaro, dsa₂ i₂ca₂jme₃jen'₅₄ Jesús jme₁rë₂'lɨn₄ 'éi₂.

2 Ja₁jaun₂ ca₂jmo₃ dsa₂ caun₂ má₃ o₄quió'₄ Jesús, a₂jme₂juag'₂. Ca₂tia'₃ Marta má₃; Si₁Lia₁ guë'₂ jme₁lɨ́n₄ jan₂ dsa₂ i₂tián'₅ ne₄ mesa guë́'₅ co₂lë₅ quiain'₅₄ Jesús.

3 Jaun₂ në́₃ ca₂can₃ María con'₂ mei'₂ tsá₃ ca₂'nau₅₄ litro no'₅₄ mɨ₂juɨg₂ nardo, a₂quen₅ 'mu'₅₄ 'ŋio₅ lɨn₃, jaun₂ ca₂tsáng₂ mɨ₂tag₄ Jesús, jaun₂ ca₂chí₃ quian'₅₄ jŋi₂ dsi₅₄. Ta₁caun₂ dsi₂néi₂ qui₂ca₂can'₂ dsió'₁ mɨ₂juɨg₂.

4 Jaun₂ në́₃, ca₂juá'₂ Judas Iscariote,*A₂lɨn₅₄ chog₅₄ si₂ juá'₂ bá₄ ján₃: “ja₁ŋi'₅₄ Si₂mu₅₄.” i₂jme₁lɨ́n₄ jan₂ dsa₂ guia₃-tɨ́n₂ quián₅ Jesús, i₂'éi₂ dé₄ i₂jáng'₂ quió'₅ Jesús, ca₂juá'₂:

5 ―¿'E₂ 'uɨg₅₄ tsá₃ ca₂i₃'nag₄ co₂ŋei'₅₄ no'₅₄ mɨ₂juɨg₂ në₅ quian'₅₄ 'nɨ₅ 'ŋiá₂-láu₂ 'éi'₃ cu₄ denario, a₂jme₁jme₁'on₁ dsa₂ te₂ŋé₂?

6 La₁ on₃jua'₅₄ jaun₂ ca₂juá'₂ Judas le₂në₅ jua'₅₄ a₂dsón'₂ dsan₂ dsɨ́₅ ja₁con₂ dsa₂ te₂ŋé₂; a₂jaun₂ bá₄ ca₂juá'₂ le₂në₅ ia₁ a₂jme₁lɨ́in₄ jan₂ dsa₂ 'ang₂ bá₄, ton'₂ jme₁niog₅ gu₂ tsɨ₁të₂lau₂ ja₁jme₁tó'₅ cu₄, jaun₂ jme₁cán₂ a₂jme₁tio'₅₄ 'ŋió'₃.

7 Jaun₂ në́₃ ca₂juá'₂ Jesús ca₂tsɨ́'₃ Judas:

―Tsá₃ lë₁lein'₅₄; ta₁ jaun₂ bá₄ ca₂'ma₃ a₂në₅, jaun₂ ma₂lë́₅ co₂jŋia₅₄ jmɨg₄ jë₁ma₂të́₂ rë₁'on₃ jniá₂. 8 Ca₂le₃jë́₃ jmɨg₄ bá₄ i₂nio₄ dsa₂ te₂ŋé₂ jɨn'₄ 'nia'₂, la₁ jniá₂ në́₃ tsá₃ ma₃uë́₂ 'en₅₄ jniá₂ quian'₅₄ 'nia'₂.

9 Jaun₂ në́₃, ca₂rë₃ŋi₅ juɨn₅ dsa₂ judíos a₂'en₅₄ Jesús jë₄ juɨg₂ Betania, jaun₂ i₁lein₅₄ ja₁jaun₂, on₃jua'₅₄ jmá'₃ ca₂ne₅₄ a₂i₁jɨin₁₂ Jesús, ján₃ bá₄ ca₂i₁jɨin₁₂ Si₁Lia₁ i₂ca₂jme₃jen'₅₄ Jesús jme₁rë₂'lɨin₅₄.

10 Jaun₂ në́₃, ca₂jmo₃ juɨg₅₄ jme₂dsa₂ caun₂ jág₁ a₂jŋɨi'₃ Si₁Lia₁ ján₃, 11 ia₁ o₄quió'₄ 'éi₂ bá₄ juɨn₅ dsa₂ ma₂i₂uɨ́in₂ ja₁con₂ dsa₂ judíos, a₂rë₂'éin₂ të₂le₃ quió'₅ Jesús.

12 Jme₁jnia₃ jaun₂, ca₂dsi₃lén₂ juɨn₅ lɨn₃ dsa₂ Jerusalén, ja₁niog₃ jmɨg₄. Jaun₂ jme₁ca₂rë₃ŋi₅ a₂dsióg₄ Jesús jë₄ juɨg₄ Jerusalén, 13 ca₂can₃ mog'₅₄ 'ma₂tsɨ́n₅, jaun₂ ca₂'uɨin₂ ca₂i₁jŋiai₅₄ Jesús, jaun₂ qui₂ca₂juá'₂ tiá₂:

―¡Juɨ₁le₂juɨn'₂ bá₄ i₂në₅!†lit. “Hosana”, co₂'nió'₄ le₃jua'₅₄: “¡Lio₄ jmɨg₄ në₃!” A₂jme₁juá'₂ dsa₂ le₂në₅ tsɨ́'₅ Diú₄, qui₂mɨ₂₃ a₂jiá₃ dsa₂ I₂rë₂'ɨ́n₁ quiáin₅. ¡Juɨ₁le₂jŋió₃ i₂já₅ o₄quió'₄ Te₁gui'₅₄!‡Salmo 118:25-26. ¡Juɨ₁le₂jŋió₃ Rag₅₄ quián₅ Israel!

14 Ca₂dsán'₂ Jesús jan₂ i₂bú'₄ 'mɨ́₂, jaun₂ ca₂co₃dsɨin₅₄ já'₂, juɨ₁lia'₂ chi₁ton₅ ne₄ Si₂:

16 Tsá₃ a₂jaun₂ ca₂rë₃ŋɨ́'₂ dsɨ́₅ chi'₂ dsɨ₂guia₃-tɨ́n₂ le₂'uɨg₅₄; la₁ia₁ cang₂ jaun₂, jme₁ma₂ca₂lë₃ rë₂juɨn'₂ Jesús, jaun₂ bá₄ ca₂dsáu'₃ dsɨ́₅ guioin₅₄ jág₁ në₅ a₂tio'₅₄ ne₄ Si₂ a₂'ɨin₂₃ 'éi₂. Ca₂dsáu'₃ dsɨ́₅ ján₃, dsau₅ bá₄ le₂jaun₂ ca₂jmo₃ dsa₂ juɨg₂ ja₁con₂ Jesús.

17 Qui₂ca₂jáng'₃ jág₁ dsau₅ dsa₂ juɨn₅ i₂jme₁quian'₅₄ Jesús lia'₂ con'₂ jme₁ca₂të́'₃ Si₁Lia₁ né'₃ tau₂ 'ŋio₅, jme₁ca₂jme₃jein'₅₄ 'éi₂ jme₁rë₂'lɨin₅₄. 18 'Uɨg₅₄ jaun₂ bá₄ ca₂'uɨn₂ dsa₂ juɨn₅, a₂ca₂i₁jŋiai₁₂ Jesús, ia₁ ca₂rë₃ŋi₅ a₂ca₂jmo₃ 'éi₂ léi₄ juë'₂ jaun₂.

19 Jaun₂ në́₃ ca₂juá'₂ dsa₂ fariseos qui₂ca₂tsɨ́'₃ rɨin'₅₄:

―Në₅ bá₄ jág'₂ 'nia'₂, tsá₃ 'e₂ quɨ'₅₄ 'nia'₂ jmɨg₄ jmó'₂ 'i₁caun₂. Jag₄ de'₂ 'nia'₂, ma₂i₂lén₂ ta₁caun₂ mɨ₂güɨ́g₃ le₃quió'₅ i₂në₅.

20 Jɨn₄ dsa₂ i₂i₁len₅₄ Jerusalén i₂jme₂juɨn'₂ Diú₄ ja₁niog₅ jmɨg₄, jme₁tion'₅₄ i₂lɨn₅₄ dsa₂ griegos. 21 Dsa₂ 'éi₂ në́₃, ca₂jme₃quiáin₃ ja₁con₂ Felipe i₂chan₂ juɨg₂ Betsaida, ja₁niog₅ 'uë₃ Galilea, jaun₂ ca₂mɨ₃ ne₄ 'éi₂, ca₂juá'₂:

―Gui'₅₄, 'niog₂ jnia'₅₄ né₄ Jesús.

22 Jaun₂ ŋe₄ Fe₂li₄ ca₂i₁chi'₄ Drë́₄; jaun₂ le₂oin₃ ca₂i₁dsia₂ a₂ca₂i₁chi'₄ Jesús. 23 Jaun₂ në́₃ ca₂ŋag₃ Jesús:

―Ma₂ca₂të́₂ hora a₂le₃juɨn'₂ Jaun₅ dsa₂ mɨ₂güɨ́g₃. 24 A₂dsɨ₂jó'₃ juɨ́g₂ jniá₂ 'nia'₂, në₁jua'₂ tsá₃ tiá'₃ né'₃ 'uë₃ juɨ₁lia'₂ ca₂mɨ́g₂ mɨ₂cuɨg₂,*lit. “trigo.” a₂dsɨ₃'én₂ në́₃, a₂lë₁të₂ron₅₄ 'ŋiog₅; la₁ia₁ në₁jua'₂ ca₂jon₃ në́₃, 'lióng₂ rau₂. 25 Juɨ₁lia'₂ i₂ŋɨ́₄ lë₃ 'nio₃ jme₂dsí₂ a₂chain₂, dsɨ₂'én₂ bá₄ jme₂dsí₂ jaun₂; la₁ia₁ juɨ₁lia'₂ i₂tén'₂ dsɨ́₅ jme₂dsí₂ quió'₅ a₂chain₂ mɨ₂güɨ́g₃ la₂, a₂lé₂ quió'₅ bá₄ co₂tan₅₄. 26 Juɨ₁lia'₂ i₂jme₂ti₃ ta₁ ne₃ jniá₂, 'nió'₅ jiá₃ chi₁co'₅₄ quió₃ jniá₂, jaun₂ juɨ₁lia'₂ ja₁'en₅₄ jniá₂, ján₃ bá₄ ja₁jaun₂ 'en₅₄ guë'₂ i₂jme₂ti₃ ta₁ ne₃. Jaun₂ juɨ₁lia'₂ i₂jme₂ti₃ ta₁ ne₃, guéi'₂ bá₄ Ŋe'₃ rë₂.

27 ’'Ŋio₅ lɨn₃ quian₄ jniá₂ o₂i₁ dsɨ₅. ¿'E₂ bá₄ juá'₄ jniá₂? ¿Juá'₄ 'e₂: “Tia₅₄, lio₄ jniá₂ 'e₂ niog₅ a₂qui₂dsɨ₃ŋɨ́₂ jniá₂ hora la₂”? La₁ on₃jua'₅₄ le₂jaun₂, ia₁ ta₁ jaun₂ guio₃ guë'₂ jniá₂ hora la₂. 28 Tia₅₄ jme₁jnia₅ 'a₂ lia'₂ jláng'₁.

Jaun₂ në́₃ ca₂né'₂ caun₂ jág₁ guei'₅₄ mɨ₂güɨ́g₃ a₂ca₂juá'₂:

―Ma₂ca₂jme₁jnia₅ bá₄ jniá₂, jaun₂ con'₂ siá'₂ jme₁jnia₅ táng₃.

29 Jme₁ca₂nág₂ dsa₂ juɨn₅ i₂jme₁tión₂ cau₅ jaun₂, ca₂juá'₂:

―Ŋí'₃ bá₄ në₂quiá'₃.

La₁ i₂sián'₂ guë'₂ juá'₂:

―Jan₂ ángel bá₄ në₂juá'₂ jág₁ quió'₅.

30 Jaun₂ në́₃ ca₂juá'₂ Jesús ca₂tsɨ́'₃ dsa₂:

―On₃jua'₅₄ o₄quió₃ jniá₂ a₂ca₂né'₂ jág₁ në₅; o₄quián'₂ 'nia'₂ bá₄ a₂ca₂né'₂. 31 Në₃ guë́₄ në́₃ ca₂të́₂ jmɨg₄ a₂të₃dsɨ₅₄ 'éi'₃ mɨ₂güɨ́g₃ la₂; në₃ guë́₄ dsein₂₃ i₂gon₂ mɨ₂güɨ́g₃ la₂. 32 Jaun₂ jniá₂ në́₃, jë₁ma₂ca₂chó'₂ dsa₂ guei'₅₄ gua'₅₄ 'uë₃, jme₁quián₄ jniá₂ ca₂le₃jɨ́n₃ ja₁cong₂.

33 Ca₂juá'₂ le₂në₅ a₂'ë₂₃ 'e₂ ne₅₄ 'mú₃ dsɨ₃ŋɨ́i₂.

34 Jaun₂ ca₂ŋag₃ dsa₂:

―Ma₂néi₂ jnia'₅₄ a₂'ɨ₅ dsa₂ ne₄ Si₂ 'Éi'₃ a₂juá'₂ a₂le₃chan₂ I₂rë₂'ɨ́n₁ quián₅ Diú₄ co₂tan₅₄. ¿'A₂ guë'₂ lia'₂ juá'₂ 'ne₂ tion₅₄ chón'₂ dsa₂ Jaun₅ dsa₂ mɨ₂güɨ́g₃? ¿'Ein₂ 'éi₂ i₂lɨ́n₅ Jaun₅ dsa₂ mɨ₂güɨ́g₃?

35 Jaun₂ në́₃ ca₂juá'₂ Jesús:

―Jŋia'₅₄ lia'₂ co₂'na₂ bá₄ tág₅ guë́₄ si₂ jɨn'₄ 'nia'₂. La₁ i₂nio'₄ 'nia'₂ të₁lia'₂ tág₅ si₂, con'₂ tsá₃ ŋó₅ në₁jua'₂ ca₂tó'₂ nei₂. Ia₁ juɨ₁lia'₂ dsa₂ i₂ŋɨ₅ jë₄ qui₁né'₃, tsá₃ ŋi₅ 'a₂ juɨ₅ dsó₃. 36 Juɨ₁le₂'én'₂ 'nia'₂ le₃quió'₅ si₂, të₁lia'₂ cha₂ si₂ jɨn'₄ 'nia'₂, ia₁jaun₂ lén'₂ 'nia'₂ dsa₂ quián₅ si₂.

Jme₁ca₂dsan₃ juá'₂ Jesús le₂në₅, ŋái'₃, jaun₂ ca₂'mai₃ ja₁con₂ dsa₂ 'éi₂.

37 La₁ juɨ₁'a₂ guë́₃ la₂ ca₂jmo₃ Jesús 'lióng₂ léi₄ ne₄ dsa₂ 'éi₂, tsá₃ ca₂rë₃'én₂ bá₄ guë́₄ dsa₂ 'éi₂ le₃quió'₅. 38 Le₂në₅ ca₂rë₃ti₃ jág₁ a₂ca₂'ë́₂ Isaías o₄quió'₄ Diú₄, jme₁ca₂juá'₂:

39 'Uɨg₅₄ jaun₂ tsá₃ lé₂ le₃'én₂ dsa₂ 'éi₂, ia₁ con'₂ siá'₂ ca₂juá'₂ táng₃ Isaías:

41 Ca₂juá'₂ Isaías le₂në₅ ia₁ ca₂jág₃ le₂jŋiá₅ juɨ₅bí₂ jlá'₁ quió'₅ Jesús, jaun₂ ca₂dsia₃ 'ɨin₂₃ 'éi₂.

42 La₁ia₁ tion₅₄ bá₄ ca₂rë₃'én₂ dsa₂, le₂jiog₅ bá₄ i₂lɨn₅₄ dsa₂ can'₅₄. La₁ tsá₃ ca₂jmo₃ jág₁, ia₁ a₂gó'₅ gain₃ dsa₂ fariseos, con'₂ tsá₃ ŋó₅ në₁jua'₂ ca₂'uág'₂ dsa₂ quió'₅, ja₁le₁toin₂₃ ne₄ si₂ guá'₅ sinagoga.

43 Ia₁ a₂'nio₃ guë́₄ të₃tsɨin'₅₄ dse₃ quian'₅₄ dsa₂ mɨ₂güɨ́g₃, lia'₂ con'₂ guë́₄ a₂jme₁të₃tsɨin'₅₄ dse₃ quian'₅₄ Diú₄.

44 Ca₂juá'₂ Jesús jág₁ tiá₂:

―Juɨ₁lia'₂ i₂'én₂ të₂le₃ quió₃ jniá₂, on₃jua'₅₄ jmá'₃ le₃quió₃ jniá₂ 'éin₂; ján₃ bá₄ 'éin₂ le₃quió'₅ Ŋe'₃ i₂ca₂chei₃ jniá₂. 45 Juɨ₁lia'₂ i₂jág₂ jniá₂, jɨ́in₂ i₂ca₂chei₃ jniá₂. 46 Ma₂guan₅ jniá₂ mɨ₂güɨ́g₃ la₂, a₂lɨ́ng₅ si₂, ia₁jaun₂ i₂'én₂ të₂le₃ quió₃ jniá₂, tsá₃ të₃'ŋiái₄ jë₄ qui₁né'₃. 47 Jaun₂ chi₂jua'₂ 'ein₂ i₂nag₅ jág₁ quió₃, la₁ tsá₃ guë'₂ tón'₂ juɨ₅, on₃jua'₅₄ jniá₂ qui₁dsɨ₅ 'éi'₃ quió'₅ 'éi₂; ia₁ on₃jua'₅₄ ta₁ jaun₂ guio₃ jniá₂ a₂qui₁dsɨ₅ 'éi'₃ ja₁con₂ dsa₂ mɨ₂güɨ́g₃; të₂le₃ a₂loin₅₄ bá₄ jniá₂. 48 Juɨ₁lia'₂ i₂tsá₃ jei₅₄ jniá₂, on₃ guë'₂ tón'₂ juɨ₅ jág₁ quió₃, cha₂ bá₄ caun₂ a₂qui₃dsɨ₅ 'éi'₃ quió'₅. Jág₁ a₂ma₂qui₂ma₂juá'₃ bá₄ jniá₂, a₂jaun₂ bá₄ qui₃dsɨ₅ 'éi'₃ quió'₅, jmɨg₄ jë₁ca₂tó'₂. 49 Ia₁ on₃jua'₅₄ o₄quió₃ 'ŋió₃ ma₂qui₂ma₂juá'₃; Ŋe'₃ jniá₂ i₂ca₂chei₃ bá₄ ma₂ca₂cuë₃ 'éi'₃ juɨ₁'e₂ a₂juá'₅ jniá₂ quian'₅₄ 'e₂ a₂jme₂tɨ́ng₂ dsa₂. 50 Jaun₂ guion₄ jniá₂, a₂jiog₅ 'éi'₃ quió'₅ Ŋe'₃ juɨ₅ ja₁le₃chan₂ dsa₂ co₂tan₅₄; jaun₂ lë₃, jág₁ a₂juá'₅ jniá₂, juá'₅ lia'₂ con'₂ lë́₅ 'éi'₃ ca₂cuë₃ Ŋe'₃.