2
Jesucristo jũni vajʉraisi'ere kʉamʉ Pablo
1 Mʉsanʉkona aperʉmʉ asamanesi'ere Dios chʉ'ore kʉara chini saisi'kʉa'mʉ chʉ'ʉ mʉsanʉkona pa'icheja. Sani rʉa masina chʉ'opi mʉsanʉkonare Dios chʉ'o chʉ'vamanesi'kʉa'mʉ chʉ'ʉ. 2 Mʉsanʉkona pa'icheja saipi'rarʉmʉ ija'che cuasasi'kʉa'mʉ chʉ'ʉ: “Sani Jesucristo pa'ichechi'a kʉaja'mʉ chʉ'ʉ, Repaʉ kurususẽ'vero jũni ro'ikaisi'ere, repanapi masia'jʉ”, chini cuasasi'kʉa'mʉ chʉ'ʉ. 3 Vajʉchʉrekocho paakʉji mʉsanʉkonare ja'me pa'iʉ kurukuruʉ chʉ'vakʉ pa'isi'kʉa'mʉ chʉ'ʉ. 4-5 “Chʉ'ʉpi pãi rʉa masina i'kache chʉ'o i'kato Dios chʉ'ojẽ'e cuasama'ñe rupʉ pãi cuasachechi'a cuasacosome jã'ana”, chini cuasa, saisirʉmʉ jã'ajachʉ'o i'kamanesi'kʉa'mʉ chʉ'ʉ mʉsanʉkonare. Chʉ'ʉni Dios peore Masikʉji Repaʉ Rekochoji cho'okaiʉna masi chʉ'vasi'kʉa'mʉ chʉ'ʉ mʉsanʉkonare, Jesucristoni cuasaa'jʉ chini. Mʉsanʉkonare ũcuachi'a Dios Rekochoji cho'okaiʉna chʉ'ʉ chʉ'vache asa chẽasinaa'me.
Dios Rekochoji cho'okaiʉna Repaʉ chʉ'o asamasiche'te kʉamʉ
6 Jã'ata'ni Jesucristo'te masi cuasanare Dios chʉ'o na'a vesacheji che'chonaa'me chʉkʉna. Pãi cuasacheja'chere che'chomanaa'me chʉkʉna. Ũcuaja'che irʉmʉ cana pãi chʉ̃'ʉna cuasajʉ chʉ̃'ʉñeja'ñe cuasajʉ che'chomanaa'me chʉkʉna. Repana irʉmʉ pãi chʉ̃'ʉna si'asojanaa'me. 7 Aperʉmʉ Repaʉ chuta'a cheja cho'omarʉmʉ Dios maire irʉmʉ icheja pa'inare cuasakʉ ija'che te'eʉji i'kaasomʉ: “Re'oja'che cho'okaija'mʉ chʉ'ʉ repanare, icheja chʉ'ʉ pa'ichejare rani paapʉ chini”, chiiʉ cuasaasomʉ, maipi Repaʉni cuasajʉ Repaʉ pa'ichejare sani paapʉ chini. Aperʉmʉ Repaʉji jã'are peore kʉamaʉna vesʉsinaa'me pãi. Churata'ni Repaʉ kʉamanesi'ere maire cho'okaiche'te chura Ũcuaʉji kʉaʉna asa pãi ũcuanʉkore kʉame chʉkʉna. 8 Chʉkʉna kʉache asanata'ni irʉmʉ cana pãi chʉ̃'ʉna ũcuanʉko Diore cuhena asavesʉjʉ asa chẽama'me. Dios chʉ'o aperʉmʉna asa chẽasina pani Maire Paakʉ'te Jesure peore Masiʉ'te kurususẽ'verona jẽ'jo nʉko vẽasoche chʉ̃'ʉmanera'asinaa'me repana. 9 Ija'che kʉamʉ Dios chʉ'o aperʉmʉ tocha jo'kasi'e:
Dios Repaʉ'te chiinare rʉa re'oja'chere care'vakaimʉ,
pãi te'eʉjẽ'e ñama'ñena'me asama'ñe pãi rekoñoãjẽ'e cuasama'ñe.
Repaʉ re'oja'che cho'okaijache Ũcuaʉji kʉamaʉna chuta'a vesʉme pãi,
chiimʉ Dios chʉ'o. 10 Churata'ni chʉkʉna'te Dios Repaʉ pãi re'oja'che cho'okaijachere Repaʉ Rekochoji kʉacuhasi'kʉa'mʉ. Dios Rekocho peore Masirekochojekʉ Repaʉ cho'okʉ pa'iche peore masimʉ. 11 Chekʉna cuasache vesʉme pãi. Repana rekoñoãta'ni masimʉ repana cuasache. Ũcuaja'che Dios cuasache Repaʉ Rekochochi'a masimʉ. 12 Dios maire Repaʉ'te cuasamana rekoñoãja'ñere ĩsimanesi'kʉa'mʉ. Repaʉ Rekocho'te ĩsisi'kʉa'mʉ Dios maire, maini Repaʉ Rekochoji ja'me pa'iʉ cho'okaiʉna Repaʉ maire cho'okaiche'te peore masia'jʉ chini. 13 Chʉkʉnapi Dios chʉ'ore Repaʉ Rekocho paanani kʉani Repaʉ Rekocho che'choche'te kʉame. Pãi cuasajʉ che'chocheja'chere kʉamanaa'me chʉkʉna.
14 Dios Rekocho che'choche'te chʉ'vajʉna pãipi asani, “Vesʉna i'kache'me jã'a”, chiime Dios Rekocho peona, repana i'kache'te asavesʉjʉ. Repana rekoñoãre Dios Rekochoji peokʉna asacu'amʉ repanare. Dios Rekocho paanarechi'a asare'omʉ Dios chʉ'o, Repaʉ Rekochoji cho'okaiʉna. 15 Dios Rekocho paanata'ni Repaʉ Rekochoji cho'okaiʉna si'ache cuasajʉ peore ñamasime. Dios Rekocho peonareta'ni Dios Rekocho paana pa'iche te'eʉ'terejẽ'e cuasa ñacu'amʉ. 16 Dios chʉ'o aperʉmʉ tocha jo'kasi'e ija'che kʉamʉ:
Dios, rekocho cuasache masicu'amʉ maire.
Ũcuaja'che Repaʉ'te te'eʉjẽ'e che'chovesʉme mai,
chiimʉ. Maita'ni Repaʉ Rekocho'te paajʉ Jesucristo cuasacheja'che cuasame mai rekoñoã, Repaʉ Rekochoji cho'okaiʉna. Jã'ajekʉna Dios chʉ'o asamasime mai.