1 Mʉsanʉkonapi Jerusalén vʉ'ejoopo pa'inani Diore cuasanani kuri chi'i saoñu chiisi'ere asa chʉ'ʉ Galacia cheja pa'ijoopoã pa'inare Jesure cuasakuanupʉã chʉ'vasi'eja'che chʉ'vamʉ chʉ'ʉ mʉsanʉkonare. Repanare ũcuachi'a mʉsanʉkonapi ũcuaja'che cho'oa'jʉ chini kuri chi'iche'te chʉ'vasi'kʉa'mʉ chʉ'ʉ. Ija'chea'me repa: 2 Mʉsanʉkona ũcuanʉko cho'oche cho'o kooche kuri romicorʉmʉ pa'iche mʉsanʉkonare ĩsire'onʉkorʉ te'enachi'a mini care'vajʉ̃'ʉ. Mʉsanʉkonapi si'arʉmʉ jã'aja'ñe cho'oto chʉ'ʉ mʉsanʉkona pa'icheja saisirʉmʉ kuri chi'iche peoja'mʉ. 3 Chʉ'ʉ saisirʉmʉ mʉsanʉkonapi chekʉnare re'oja'che pa'inani jñaa chẽarena Jerusalén vʉ'ejoopona saoja'mʉ chʉ'ʉ repanare, mʉsanʉkona chi'isi'ere kurire sakaapʉ chini. Repanare saoni utija'ovana, “Chʉ'ʉ Pabloji inare saomʉ”, chiiche tocha ĩsija'mʉ repanare, sa ñoa'jʉ chini. 4 Reparʉmʉ tĩ'ato, “Chʉ'ʉpi ja'me saito na'a re'ocosomʉ”, chini cuasa chekʉrʉmʉ ja'me saijacosomʉ chʉ'ʉ. Chʉ'ʉ saito chʉ'ʉna'me saijanaa'me repana.

5 Chʉ'ʉ mʉsanʉkonare sani ñara chiimʉ. Jã'ata'ni charo Macedonia chejana saija'mʉ chʉ'ʉ. Jã'achejapi mʉsanʉkona pa'icheja Corinto vʉ'ejoopo saija'mʉ chʉ'ʉ. 6 Mʉsanʉkona pa'icheja sani jeerʉmʉ pa'ijacosomʉ chʉ'ʉ. Chekʉrʉmʉ okorʉmʉ si'achetʉ'ka ja'me pa'ija'mʉ chʉ'ʉ mʉsanʉkonare, pani pi'ni jo'e chekʉchejana saiʉna mʉsanʉkonapi chʉ'ʉni pojojʉ saoa'jʉ chini. 7 Mʉsanʉkonani jmamakarʉ sani ja'me pa'iche'te cuhekʉ chura mʉsanʉkona pa'icheja saima'mʉ chʉ'ʉ. Diopi ʉ̃sema'to na'a pa'isirʉmʉ sani jeerʉmʉ pa'ija'mʉ chʉ'ʉ. 8 Chura saima'ñe Efeso vʉ'ejoopo'te pa'ija'mʉ chʉ'ʉ Pentecostés fiesta caraichejatʉ'ka. Jã'a caraisirʉmʉta'ni saija'mʉ chʉ'ʉ. 9 Icheja pa'ina pãi Dios chʉ'o asaneena jainʉkoa'me. Jã'ajekʉna Diopi cho'okaiʉna repanare Ũcuaʉ chʉ'ore chʉ'vakʉ pa'imʉ chʉ'ʉ. Jã'ata'ni chekʉna chʉ'ʉ chʉ'vache'te asacuhejʉ cu'ache cho'ome chʉ'ʉre chʉ'vamanea'kʉ chini.

10 Timoteo mʉsanʉkona pa'icheja saito pojojʉ re'oja'che cho'ojʉ kuirajʉ pa'ijʉ̃'ʉ repaʉ'te, pojokʉ paaʉ. Maire Paakʉ'te chʉ'ʉ cho'okaicheja'che cho'okaiʉ pa'ikʉ'mʉ repaʉ. 11 Jã'ajekʉna mʉsanʉkona te'eʉjẽ'e cuhemanejʉ̃'ʉ repaʉ'te. Cuhema'ñe pojojʉ repaʉ chʉ'ʉre jo'e rairʉmʉ, “Re'oja'che saijʉ̃'ʉ”, chiijʉ pojojʉ raojʉ̃'ʉ repaʉ'te, ichejana chʉ'ʉ pa'ichejana pojokʉ rani tĩ'aa'kʉ. Chekʉna Jesure cuasanana'me cha'aja'mʉ chʉ'ʉ repaʉ'te.

12 Chura mai majapãiʉja'iʉ Apolos pa'iche'te kʉara. Ija'ova chʉ'ʉ chʉ'o i'kakʉ tochasija'ova sakaijana mai majapãijanana'me sani mʉsanʉkonani ñaa'kʉ chini rʉa chʉ'vasi'kʉa'mʉ chʉ'ʉ repaʉ'te. Jã'ata'ni irʉmʉ saicu'akʉasomʉ repaʉ'te. Na'a pa'isirʉmʉ repaʉ'te saire'orʉmʉna saija'mʉ repaʉ.

13 Mʉsanʉkonapi cu'ache cho'omaneñu chini cuasarepajʉ pa'ijʉ Jesure cuasache ũhasomanejʉ̃'ʉ. Diopi cho'okaiʉna kokarekoñoã paajʉ vajʉchʉma'ñe Repaʉni masi cuasajʉ pa'ijʉ̃'ʉ. 14 Mʉsanʉkonapi chekʉnare si'arʉmʉ cuasajʉ cho'ojʉ pa'ijʉ̃'ʉ.

15 Asarepajʉ̃'ʉ, chʉ'ʉ majapãijana. Acaya cheja cakʉ Estéfanas repaʉ majapãina'me repacheja pa'inare charo Jesure cuasajʉ jovosi'e masime mʉsanʉkona, ũcuachi'a Jesure cuasanajejʉ repana chekʉnare Jesure cuasanare si'arʉmʉ re'oja'che cho'okaiche. 16 Jã'ana pa'icheja'che pa'inani repana chʉ̃'ʉñe cho'okaijʉ pa'ijʉ̃'ʉ, chiimʉ chʉ'ʉ, ũcuachi'a Jesure cho'oche cho'okainare ũcuanʉkore.

17 Mʉsanʉkonare oiʉ ñaʉache cuasakʉjekʉ Estéfanana'me Fortunatona'me Acaico'te mʉsanʉkona pa'icheja pa'inapi ichejana ratena ña pojomʉ chʉ'ʉ. 18 Repana i'kache asa vajʉsi'kʉa'mʉ chʉ'ʉ. Mʉsanʉkona ũcuaja'che repanapi chʉ'ʉ kʉasi'ere co'i kʉajʉna asa pojojanaa'me. Rani pa'ijʉ chʉ'ʉre rʉa re'oja'che cho'okaisinaa'me repana. Jã'ajekʉna repanare co'isirʉmʉ pojojʉ̃'ʉ. 19 Jesure cuasakuanupʉã Asia cheja pa'ikuanupʉã ja'me chʉ'o saome mʉsanʉkonare. Ũcuaja'che Aquilana'me Priscila Maire Paakʉ'te cuasanajejʉ chʉ'o saome mʉsanʉkonare, ũcuaja'che Jesuni pojojʉ repana vʉ'e chi'ikuanupʉ. 20 Icheja pa'ina Jesure cuasana ũcuanʉko chʉ'o saome mʉsanʉkonare. Ũcuachi'a mʉsanʉkona re'oja'che pa'ijʉ sãiñechi'a cuasajʉ si'arʉmʉ chẽse pojojʉ pa'ijʉ̃'ʉ. 21 Chʉ'ʉ Pablo ija'ova tochache chʉ̃'ʉsi'kʉ chã'tireparo jmamakarʉ chʉ'ʉrepaʉ jʉ̃tʉpi tochamʉ ie: 22 Maire Paakʉ'te Jesucristo'te cuasamanare Diopi cu'ache cho'oa'kʉ repanare. Maire Paakʉ Jesucristo cʉnaʉmʉ Pa'ikʉji na'mi cajea'kʉ. 23 Maire Paakʉ Jesucristoji oiʉ re'oja'che cho'okaaʉ mʉsanʉkonare, chiimʉ chʉ'ʉ. 24 Mʉsanʉkonare Jesucristo'te cuasanare ũcuanʉkore oiʉ cuasakʉ'mʉ chʉ'ʉ. Re'omʉ.