7
Aperʉmʉ pa'isi'kʉ Israel mamachĩi jojocojñosinani Dios mami repana chiapʉãna tochacojñosinani i'kamʉ
1 Jã'aja'ñe cho'ocuhasirʉmʉ ángeles ũcuaka'chapanare cheja si'acakã'jño nʉkanani ñasi'kʉa'mʉ chʉ'ʉ. Co'covʉ cakã'ko nʉkakʉ repakã'ko tutache'te ʉ̃sesi'kʉa'mʉ. Chekʉ sʉripʉ cakã'ko nʉkakʉ ũcuachi'a repakã'ko tutache'te ʉ̃sesi'kʉa'mʉ. Chekʉ ʉ̃sʉʉ mʉicheja cakã'ko nʉkakʉ repakã'ko tutache'te ʉ̃sesi'kʉa'mʉ. Jo'e chekʉ ʉ̃sʉʉ na'ikã'ko nʉkakʉ ũcuachi'a repakã'ko tutache'te ʉ̃sesi'kʉa'mʉ. Jã'aja'ñe nʉkajʉ tuta ʉ̃sejʉna chejana'me mar chiara sẽ'sevʉãjẽ'e tutamaʉ si'ache sũki ja'o te'eja'ovajẽ'e tuta ñʉ'kuemanesi'kʉa'mʉ. 2 Ũcuarʉmʉ chekʉre ángel'te ʉ̃sʉʉ mʉichejapi Dios, Si'arʉmʉ Pa'ikʉ mamimaka tochasimakare cãjikʉ raiʉna ñasi'kʉa'mʉ chʉ'ʉ. Rani chekʉnare ángeleva'nare ũcuaka'chapanare chejana'me mar chiara cu'ache cho'oa'jʉ chini chʉ̃'ʉ raocojñosinani ʉjachʉ'opi ija'che i'kasi'kʉa'mʉ repaʉ: 3 “Chuta'a chejana'me mar chiarana'me sũkiñʉã cu'ache cho'omanejʉ̃'ʉ, Dios neenare repana chiapʉãna Repaʉ mami chʉkʉna tocha pi'nisirʉmʉjatʉ'ka.”
4 Ũcuarʉmʉ chʉ'o ija'che i'kache'te asasi'kʉa'mʉ chʉ'ʉ: “Repana chiapʉãna Dios mami tochacojñosina peore ciento cuarenta y cuatro milrepanaa'me. Aperʉmʉ pa'isi'kʉ Israel mamachĩi docerepana jojosinaa'me repana. 5 Ijanʉkoa'me repana, Dios mami repana chiapʉãna tochacojñosina:
Judá jojosina doce milrepanaa'me.
Rubén jojosina doce milrepanaa'me.
Gad jojosina doce milrepanaa'me.
6 Aser jojosina doce milrepanaa'me.
Neftalí jojosina doce milrepanaa'me.
Manasés jojosina doce milrepanaa'me.
7 Simeón jojosina doce milrepanaa'me.
Leví jojosina doce milrepanaa'me.
Isacar jojosina doce milrepanaa'me.
8 Zabulón jojosina doce milrepanaa'me.
José jojosina doce milrepanaa'me.
Benjamín jojosina doce milrepanaa'me,
repana chiapʉãre Dios mami paana”, chiiche'te asasi'kʉa'mʉ chʉ'ʉ.
Pãi jainʉko pojakãña ju'ina pa'iche'te kʉamʉ
9 Jã'aja'ñe i'kache asacuhasirʉmʉ ñakʉ pãi si'achejña canapi tĩichʉ'ochi'a cutunapi te'eʉjẽ'e kuẽkuecu'anʉko Dios ñu'isaivʉna'me Ovejachĩija'iʉ Jesucristo pa'icheja ti'jñeñe pa'inani ñasi'kʉa'mʉ chʉ'ʉ. Kãña pojakãñapi ʉjacueñoãre ju'ijʉ pũtijoo cãjisinaa'me repana. 10 Ũcuarʉmʉ ija'che i'kajʉ ʉjachʉ'opi cuisinaa'me repana: “Maire Paakʉ, ñu'isaivʉ Ñu'ikʉ Diona'me Ovejachĩija'iʉ Jesucristo chẽa paame maire, re'oja'che pa'ijʉ vati toana saimanea'jʉ chini”, chiisinaa'me. 11-12 Jã'a cho'oto ángeles ũcuanʉko Dios ñu'isaivʉna'me ainana'me vajʉpãi ũcuaka'chapana pa'icheja rũhiso'koro nʉkasinaa'me. Nʉkasinapi repasaivʉ ti'jñeñe ro're pʉʉ sime ñu'ijʉ Dioni pojojʉ ija'che i'kasinaa'me repana:
¡Jã'aja'ñe paaʉ!
Maire Paakʉ'te Diore si'arʉmʉ re'oja'che ija'che i'kajʉ pojojʉ pañu mai:
“Rʉa re'okʉ'mʉ mʉ'ʉ.
Peore masikʉ'mʉ.
Peore re'oja'che cho'okaikʉjekʉna mʉ'ʉre, Re'orepamʉ”, chiinaa'me chʉkʉna.
Mʉ'ʉre cuasajʉ vajʉchʉnaa'me chʉkʉna.
Peore chʉ̃'ʉkʉ'mʉ mʉ'ʉ.
Mʉ'ʉ cho'ora chiiche peore cho'omasikʉ'mʉ mʉ'ʉ.
¡Jã'aja'ñe paaʉ!
chiisinaa'me repana.
13 Ũcuarʉmʉ aina, te'eʉ ija'che sẽesi'kʉa'mʉ chʉ'ʉre:
—¿Ina pojakãña ju'ina jeejanaa'ñe? ¿Jeechejapi ina rate? —chiisi'kʉa'mʉ. 14 Chikʉna, chʉ'ʉ,
—Masimʉ mʉ'ʉ —chiisi'kʉa'mʉ. Chikʉna repaʉ ai ija'che i'kasi'kʉa'mʉ chʉ'ʉre:
—Pãi ũcuanʉkore rʉa cu'ache ti'jñerʉmʉ pa'isinata'ni Diore cuasache ũhasõmanesinajejʉ Ovejachĩija'iʉ Jesucristo chiepi kãña meno peokãña choasõñeja'ñe repana rekoñoã cu'ache cho'osi'e tʉnosõcojñosinajejʉ re'oja'che pa'ime ina. 15 Jã'aja'ñe pa'inajejʉ Dios pa'ichejare chʉ̃'ʉkʉ ñu'isaivʉ ti'jñeñe'te pa'ijʉ umucujñana'me ñami Repaʉ'te cho'oche cho'okaijʉ pa'ime repana. Dios ñu'isaivʉ Ñu'ikʉji repanare oiʉ cu'ache ti'jñeñe ʉ̃sekaija'mʉ. 16-17 Ũcuachi'a Dios ñu'isaivʉ ti'jñeñe Pa'ikʉji Ovejachĩija'iʉ Jesucristoji repanare oveja kuirakʉ cho'ocheja'che repanare kuiraja'mʉ. Jã'ajekʉna repanare jo'e ãucuhamaneja'mʉ. Ũcuachi'a jo'e sʉmava'na pa'imanejanaa'me repana, Diona'me Jesucristo jã'aja'ñe cho'okatena. Ũcuachi'a jo'e okoʉamaneja'mʉ repanare. Ʉ̃sʉʉ asuche jo'e uujʉ phã'phamanejanaa'me repana —chiisi'kʉa'mʉ repaʉ.