1 Ũcuarʉmʉ chʉ'ʉ Ovejachĩija'iʉ'te Jesucristo'te Sión aikũti nʉkakʉni ñasi'kʉa'mʉ. Ũcuaʉna'me pãi ciento cuarenta y cuatro milrepana repana chiapʉãre Repaʉ mamina'me Pʉka'kʉ mami tochacojñosina nʉkasinaa'me. 2 Jã'a ñacuhasirʉmʉ cʉnaʉmʉpi ija'che i'kachʉ'o asasi'kʉa'mʉ chʉ'ʉ: Oko chã'iʉ asocheja'che asosi'kʉa'mʉ repachʉ'o. Ũcuachi'a okopi rʉarepa curukʉ asocheja'chena'me pãipi jairepanʉko arpavʉãre cho'ojʉna asocheja'che asosi'kʉa'mʉ chʉ'ʉre repachʉ'o. 3 Ũcuachi'a repana pãi Dios chʉ̃'ʉkʉ ñu'isaivʉna'me Repaʉ ti'jñeñe pa'ina vajʉpãi ũcuaka'chapana pa'ichejana'me aina pa'icheja ti'jñeñe'te pa'ijʉ uja mamare ujajʉ pa'isinaa'me. Repana ujache uja te'eʉ'terejẽ'e asa chẽa ujacu'ache pa'isi'kʉa'mʉ. Jesucristo vati toare saimanea'jʉ chini chẽa paacojñona ciento cuarenta y cuatro milrepanachi'a ujamasisinaa'me repa. 4 Cheja repana pa'irʉmʉ romi ũcuaʉanare ja'me kãima'ñe re'oja'chechi'a pa'isinajejʉ chura Ovejachĩija'iʉ Jesucristona'me pa'ijʉ Ũcuaʉ chʉ̃'ʉñe'te si'arʉmʉ cho'ojʉ pa'ime repana. Aperʉmʉ Diore cuasamanare ja'me pa'isinaa'me repana. Jã'ata'ni Dios repanare paara chini Repaʉ Mamakʉna'me charo chẽaasomʉ. 5 Ũcuachi'a jmamakarʉjẽ'e joremaneasome. Ũcuachi'a repana rekoñoã Diopi ñato cu'achejẽ'e peoasome repana.

6-7 Jã'aja'ñe cho'ocuhasirʉmʉ ángel'te cʉnaʉmʉ chenevʉji cãva ku'iʉ cheja pa'inani pãi ũcuanʉkore si'avãjʉpãina'me si'ache chʉ'o cutunana'me si'achejña pa'inare, Jesucristo'te cuasache chʉ'vachʉ'ore kʉakʉ ʉjachʉ'opi pãire ija'che i'kakʉni ñasi'kʉa'mʉ chʉ'ʉ:

—Diore vajʉchʉjʉ re'oja'chere Repaʉ'te i'kajʉ pa'ijʉ̃'ʉ mʉsanʉkona, pãi ũcuanʉko cho'osi'e Repaʉ ñarʉmʉ tĩ'api'rakʉna. Ũcuaʉji cʉnaʉmʉna'me chejana'me mar chiarana'me oko puni si'achejña pa'inare cho'osi'kʉa'mʉ. Jã'ajekʉna Repaʉni cuasajʉ, “Peore Masiʉ'mʉ mʉ'ʉ”, chiijʉ pojojʉ̃'ʉ —chiisi'kʉa'mʉ repaʉ ángel.

8 Jã'aja'ñe i'kacuhaʉna chekʉ ángel rani ija'che i'kasi'kʉa'mʉ:

—Babilonia ʉjavʉ'ejoopo ñañasõcuhasi'kʉa'mʉ, repana cu'ache cho'osi'e ro'i. Repajoopo pa'isina cu'ache cho'ojʉ pa'iche'te chekʉchejña cana ũcuanʉko ña chẽa repana cho'ocheja'che cu'ache cho'ojʉ pa'isinaa'me —chiisi'kʉa'mʉ. 9-10 Jã'aja'ñe i'kacuhaʉna jo'e chekʉ ángel rani ʉjachʉ'opi ija'che i'kasi'kʉa'mʉ:

—Cheja sa'navʉ etasi'kʉre cu'arepache cu'akʉ'te repaʉjava'ʉre tʉ̃osi'kʉna'me pojojʉ repana chiapʉãna jã'apãani repana jʉ̃jña repaʉ cu'akʉ mami tochacojñosinare ũcuanʉkore rʉa pe'rukʉ cu'ache chʉ̃'ʉja'mʉ Dios. Repaʉji chʉ̃'ʉʉna vati toa azufre vʉocheja'che cu'asʉche uutoana sani Dios neena ángelena'me Repaʉ Mamakʉ Ovejachĩija'iʉ ñajʉ'te rʉa chʉova'na ai uujʉ pa'ijanaa'me repana. 11 Repa toapi chachama'ñe ai uukʉ pa'iʉna piko si'arʉmʉ mʉiʉ pa'ija'mʉ. Ũcuachi'a cu'arepache cu'akʉna'me ũcuaʉja'iʉ tʉ̃osiva'ʉre pojojʉ repaʉ mami tochacojñosinare repa toare si'arʉmʉ uujʉna asiche cuhama'ñepi pa'ija'mʉ —chiisi'kʉa'mʉ.

12 Dios neenata'ni Repaʉni cuasajʉna repanare cu'ache ti'jñejañe masinata'ni Dios chʉ̃'ʉsi'ere cho'ojʉ re'oja'che pa'ijʉ Jesucristo'te cuasache ũhasõma'ñe koka paajʉ ũcua cuasajʉ pa'ijanaa'me.

13 Ũcuarʉmʉ cʉnaʉmʉpi chʉ'o ija'che i'kache'te asasi'kʉa'mʉ chʉ'ʉ:

—Iere tochajʉ̃'ʉ mʉ'ʉ: “Dios neena Repaʉ'te cuasache ũhamana irʉmʉpi vʉa jũnisõna rʉa pojojʉ pa'ijanaa'me” —chiiche'te. Chikʉna Dios Rekocho ija'che i'kasi'kʉa'mʉ:

—Ũcuarepaa'me jã'a. Repana jũnisõsirʉmʉ repanare cu'ache ti'jñesi'e jo'e ti'jñemaneja'mʉ. Repaʉ pa'ichejana satena repana re'oja'che cho'ojʉ pa'isi'ere cuasa ro'ija'mʉ Dios repanare —chiisi'kʉa'mʉ.

14 Jã'aja'ñe cho'ocuhasirʉmʉ jo'e ñakʉ poja'chere piko ñasi'kʉa'mʉ chʉ'ʉ. Piko sẽ'sevʉ'te pãire ja'me paaʉ chini Dios Raosi'kʉ ñu'isi'kʉa'mʉ. Repaʉ sĩjopʉ pachokurivʉ'te tuhivʉ tuhiʉ va'ti jʉ̃jʉsʉche cʉ'tosiva'tire cãjikʉ ñu'isi'kʉa'mʉ repaʉ. 15 Ũcuarʉmʉ ángel chekʉ Dios vʉ'epi eta piko sẽ'sevʉ ñu'ikʉ'te ʉjachʉ'opi ija'che i'kasi'kʉa'mʉ: “Trigo tʉarʉmʉ pa'icheja'che pa'irʉmʉ tĩ'acuhamʉ. Mʉ'ʉ va'ti mini trigo tʉa chi'icheja'che cho'ojʉ̃'ʉ”, chiisi'kʉa'mʉ. 16 Jã'aja'ñe i'kaʉna asa piko sẽ'sevʉ ñu'ikʉ repaʉ va'ti mini trigo tʉa chi'icheja'che cheja pa'inare cho'osi'kʉa'mʉ.

17 Ũcuarʉmʉ ángel chekʉ jo'e Dios vʉ'epi cʉnaʉmʉ pa'ivʉ'epi va'ti ũcuaja'che jʉ̃jʉsʉche cʉ'tosiva'tire cãjikʉ etasi'kʉa'mʉ. 18 Reparʉmʉ ángel chekʉ Diore ĩsimajñarʉã ʉotoa kuirache chʉ̃'ʉkʉ tʉo ʉoko'a rʉ̃ichejapi eta va'ti jʉ̃jʉsʉva'ti cãjikʉ'te ʉjachʉ'opi ija'che i'kasi'kʉa'mʉ:

—Ʉche cha'jisõcuhasi'kʉa'mʉ. Chejana caje mʉ'ʉ va'ti jʉ̃jʉsʉva'tipi ʉchecha'charʉã chʉto tʉtemejʉ̃'ʉ —chiisi'kʉa'mʉ repaʉ. 19 Chikʉna caje ʉchecha'charʉã cheja pa'iche repaʉ va'tipi chʉto tʉte pi'ni chi'i ʉche cha'ca chachovʉna mañasi'kʉa'mʉ repaʉ. Dios Repaʉ'te cuasamanesinare ũcuaja'che ʉchecha'charʉã tʉa chi'isi'eja'che chi'i rʉa cu'ache cho'oja'mʉ. 20 Reparʉmʉ ʉche cha'cavʉji vʉ'ejoopo jã'acho'jere pa'iʉna ʉchecha'charʉã etua ũcuavʉna maña cha'ca chachojʉna ʉche okora'ka repavʉ vʉ'evʉ cacojepi eta chiacha meañeja'ñe chie so'ona measi'kʉa'mʉ, trescientos kilómetros repa so'o. Repa chiera'ka rʉa rʉisi'kʉa'mʉ.